Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2016

En Ansand, Kasikeshany Ritiy Ren

En Ansand, Kasikeshany Ritiy Ren

“Ritiy kudi . . . Kwitiy yom yakad kumekan ku mes.”—HEBEREU 11:1, NWT.

MIMINY: 41, 11

1, 2. Chom ik chikutwishau kwiyipul ansand atushalapol a Yehova ni chiyul ik chipaninay Bibil?

NAMBAZ umwing wa mu Grande-Bretagne amuleja kud murund wa mu shikol anch: “Umen anch ukwet manangu piukat kwitiy anch kud Nzamb .” Mukadivar umwing wa mu Allemagne wafunda anch: “Mulej wam umening jinsangu ja Bibil jisambidina piur pa yom yatangau anch jid kwau jingany. Chawiy ukat kuyibachik in kwilej chakwel itiya mu malejan ma dikarumuk.” Nambaz umwing udia mu France walonda anch: “Alej a ku shikol yetu akat kushimok nakash pameningau anch in kwilej amwing adandamedining kwitiyij Bibil.”

2 Nlel unou, antu avud kakatap kwitiyij anch Nzamb watutanga. Anch ud nsand udia kashalapol wa Yehova ap anch wilejin piur pend, ukutwish kwiyipul pa mutapu ukutwisha kumekesh anch kud Sakatang wetu. Bibil utukwashin kutongin nakash piur pa yom tuteshininga ap pa yom tutangininga ni kutongin pa yom yiney. Dizu dia Nzamb dilondin anch: ‘Ukaliweny wa kutongin ukez kukulam.’ Mutapu ik? Mulong ukukukwash ulika yitongijok ya makasu ni ukasikesha ritiy rey mudiay Yehova.—Tang Jinswir 2:10-12.

3. Yom ik tukwisambina mu mutu wa mulong winou?

3 Mulong wa kwikal ni ritiy rikash mudiay Yehova, tufanyidin kumwijik nawamp. (1 Timote 2:4) Chawiy, anch utangin Bibil ni mikand yetu, chid cha usey kutongin pa yom yilondinay Bibil. Sal usu  wa kutesh yom utangina. (Mateu 13:23) Anch wilej mu mutapu winou, ukwikal ni kashinsh anch Yehova ndiy Sakatang wetu ni Bibil udiokil kud ndiy. (Hebrews 11:1) El twisambinany mutapu tukutwisha kusal mwamu.

MUTAPU WA KUKASIKESH RITIY REY

4. Mutapu ik tukutwisha kulond anch antu itiyijining mu malejan ma dikarumuk ad chilik chimwing ni antu itiyijina anch yom ayitanga? Chom ik tufanyidina kusal etu awonsu?

4 Muntu umwing ukutwish kukulej anch: “Am nikat kwitiyij mu malejan ma dikarumuk mulong in siyans akat kulond anch mad makin. Mutapu ik ukutwisha kwitiyij mudiay Nzamb, anch kwikil muntu wamumanap kal?” Antu avud mwamu mutonginingau. Chakin kamu, kwikil muntu ap umwing wamumanap kal Nzamb ap wamana mutapu wasambishay kutang yom. (Yohan 1:18) Chid nchik piur pa antu akat kwitiyij malejan ma dikarumuk? Niyawiy akat kwitiyij mu yom yakad kumekan. Kwikil mwin siyans ap umwing ap kand muntu kanang wamana mutapu mwom wa chom kanang wakarumuka kwikal mwom chom kampand. Chilakej, kwikil muntu ap umwing wamana nnam ukata kwomb may ni wakarumuk kwikal nnam ukat kwamwish. (Job 38:1, 4) Chawiy, etu awonsu tufanyidin kushinshikin pa yom yiney, kutong nawamp ni kukwat mupak wa kwitiy kwikalaku kwa yom yiney. Antu avud akat kutal yom yatangau ‘yimekeshina’ anch kuding Nzamb. Amening “patok” anch udi Sakatang, ukweta usu ni ukweta mikadil yivud yipandakena kuwap.—Rom 1:20.

Yom ya kukimbijol nich yikutwish kukukwash uyileja antu akwau piur pa yitiyij yey (Tal paragraf wa 5)

5. Yom ik ya kukimbijol nich yikutwisha kutukwasha chakwel twileja yom yivud piur pa yom yatangau?

5 Pitukata kushinshikin pa yom yatangau ni kutong nakash pa yom yiney, tukutwish kuman anch yom yawonsu ayitanga mu mutapu wa kushimok. “Ku ritiy retu twij” anch Sakatang udingaku ap anch tumumeningap. Twij kamu anch ukweting untu uwamp ni ukwet kand manangu nakash. (Hebereu 11:3, 27) Tukutwish kwilej yom yivud piur pa yom yatangay anch twatang yom yijinguninau in siyans. Jinsangu jimwing ukutwish kujitan mu yom ya kukimbijol nich mudi video Les merveilles de la création révèlent la gloire de Dieu, mu mabroshir am: La vie a-t-elle été créée?, Cinq questions—à se poser sur l’origine de la vie? ni buku Y a-t-il un Créateur qui se soucie de vous? Mu magazet ma Réveillez-vous! muding yisu yivud jinsangu jiyipwilingau in siyans ni akwau alejen katat mulong wak itiyijin mudiay Nzamb. Ni mu mitu ya milong yilondina anch: “Hasard ou conception?” yilejening kand yom yivud piur pa annam ni yom yikwau yatangau ni yilejening kand mutapu usadiningau in siyans yom mu kufanikesh ni yom yatangau.

6. Mutapu ik ukutwisha ku kukwash yom ya kukimbijol nich?

6 Mukadivar ukweta mivu 19 udia mu États-Unis walonda piur pa ma broshir maad mitwajimbulang am anch: “Ma broshir minam mankwasha nakash. Nileja ma broshir minam piswimp tupamp dikum.” Nambaz udia mwi ngand ya France wafunda anch: “Mitu ya milong yilondina anch ‘Hasard ou conception?’ yanshimokisha! Yamekesha anch antu akweta ukaliweny nakash akutwish kwimburij yom yatangau pakwez kakutwishap kuyisal mud mwayitangau.” Anvaj akweta mwan changadim ukweta mivu 15 adia  mwin ngand ya Afrique du Sud alonda anch: “Chom cha kusambish chitanginingay mwanetu mu Réveillez-vous! Ud mutu wa mulong ulondina anch ‘Interview.’” Mikand yiney yikukukwash chakwel wijika nawamp anch kuding Sakatang, ni ukutwish chad kujik mafundish makin ni kulik mafundish ma makasu. Ritiy rey rikukasikan ni ukwikal mud mutond wandjikina mij pansh ni wiminya ap anch kwez rinkind mukash.—Jeremiy 17:5-8.

RITIY REY MU BIBIL

7. Mulong wak Nzamb ukatin ey usadin chitongijok chey?

7 Chidi chiyimp kwiyipul yipul mud: ‘Ov,mulong wak nitiyijin yilondinay Bibil?’ Chiyipinap kwau. Yehova kakatinap anch twitiyija yom mulong antu akwau itiyijin. Ukatin anch usadina ‘chitongijok chey’ mulong wa kwijik Bibil ni kwikal ni kashinsh anch udiokil kud ndiy. Anch wijik yilondinay, ukukasikesh ritiy rey mulong wa Bibil. (Tang Rom 12:1, 2; 1 Timote 2:4.) Mutapu umwing wa kwijik Bibil ud wa kwilej mitu ya milong ya pakampwil ukatina mulong wijik yom yivud.

8, 9. (a) Mitu ik ya milong yikatau kusanger antu amwing? (b) Mutapu ik wataninawamu antu amwing patangau ni kutong nakash piur pa yom yitanginau?

8 Antu amwing akatining kwilej uprofet wa mu Bibil. Ap akatining kufanikesh jinsangu ja mu Bibil ni yilondiningau in kwilej jinsangu, in siyans ni in kukimbijol yom ya pansh. Tal chilakej cha Disambishil 3:15. Yehova wapana uprofet wa usey kupwa kwa Adam ni Ev kumubwambwil ni kulik mutapu wend wa kuyikel. Ud uprofet wa kusambish pakach pa uprofet uvud udia mu Bibil utukwashina kutesh mutapu Want wa Nzamb ukumekesha anch mutapu wa Nzamb wa kuyikel ud uwamp ni mutapu Want ukupwisha mar mawonsu. Mutapu ik ukutwisha kwilej Disambishil 3:15? Ufanyidin kufund list wa maverse ma mu Bibil malondina yom yivud piur pa mutapu ukuwanyina uprofet winou. Kupwa, kimb nawamp chisu chafundau maverse minam ni ndond ya mafundinau ni kumalam nawamp. Kupwa ukwijik anch in kufund a Bibil inay afunda mu yirung kushalijan pakwez afunda yom yimwing yovikeshina patok uprofet winou. Chinech chikutwish kukukwash umana anch spiritu utumbila wa Nzamb wayitakela.—2 Pita 1:21.

9 Mukadivar umwing udia mwi ngand ya Allemagne watonga piur pa mutapu urumburilay nawamp buku ni buku wa Bibil piur pa Want. Walonda anch: “Chawiy, ap anch antu piswimp 40 afunda Bibil. Ni ashakama mu yirung kushalijan ni kadingap ijikijadina umwing ni mukwau.” Nambaz udia mu Australie watanga mutu wa mulong umwing mu Chinong cha Kalam ni wileja mutapu wading ukwatijadina Pasak ni Disambishil 3:15 ni Mesia.. [1] (Tal muzu ma kwinsudien.) Wafunda anch: “Dilejan dined diaburila mes mam chakwel nijik mutapu udiay Yehova. Mulong wa muntu kutesh nawamp ditenchik dined mulong wa in Isarel ni kuwanyin kwa yom yiney padiay Yesu kwanshimokisha. Nimika kutang pakemp ni kutong mutapu wading uprofet wa chakudia cha Pasak!” Mulong wak wiyovay nambaz winou mwamu? Watonga nakash piur pa yom yatangay ni yateshay. Chinech cha mukwash kukasikesh ritiy rend ni kusej piswimp.—Mateu 13:23.

10. Win kashinsh wa antu afunda Bibil ukasikeshin mutapu ik ritiy retu mu Bibil?

10 Tongin kand piur pa win kashinsh wa antu afunda Bibil. Alonda ching uyakin ni kwovap wom wa kusal mwamu. In kufund a chisu chinicha afundang ching yom yiwamp piur pa michid yau ni antekel au. Pakwez aprofet a Yehova kafundap ching yom yiwamp pakwez afunda kand yom yiyimp yasalangau in Isarel ni ant au. (2 Jinsangu 16:9, 10; 24:18-22) Afunda kurumbok kwau ni kurumbok kwa atushalapol akwau a Nzamb. (2 Samwel 12:1-14; Marko 14:50) Mukadivar umwing nsand wa mwi ngand ya Grande-Bretagne walonda anch “win kashinsh mud winou umekeningap. Yiney yiwejidin ku kashinsh ketu anch Bibil wadiokala kamu kud Yehova.”

11. Mutapu ik utwinkishina ukwash udia mu Bibil kashinsh anch Bibil wadiokala kud Nzamb?

 11 Pitiyiningau antu anch Bibil ayitakel mu mwom yau, akat kuman yibudikin yiwamp. Chom chinech chayinkisha kashinsh anch Bibil udiokil kud Nzamb. (Tang Kuseng 19:7-11.) Nambaz changadim udia mu Japon wafunda anch: “Pasadina dijuku dietu mafundish ma Bibil, twikala ni musangar nakash. Twikala kamu ni chisambu, uumwing ni rukat.” Bibil wayikwashin kal antu avud kwijik anch yom yadingau ni kwitiyij yading yamakasu. (Kuseng 115:3-8) Uyikwashin antu kumuchingejin Yehova, Nzamb mwin dikand diawonsu ni ushidilamu yom yiwamp ya machuku ma kurutu. Chikwau kand, antu amwing alondininga anch kwikil Nzamb, akat kusadin yom yatangay mulong wa kuyifanikesh mud nzamb. Akwau akat kulond anch antu akutwish kulet yom yiwamp mu machuku ma kurutu, pakwez anch twatal yom yikatau kusal, tumen kamu anch kakutwishap kupwish milong yawonsu yidia mu mangand minam.—Kuseng 146:3, 4.

MUTAPU WA KUTONG NI ANTU AKWAU

12, 13. Mutapu ik tukutwisha kuyilej antu akwau piur pa yom yatangau ap piur pa Bibil?

12 Anch wisambin piur pa yom yatangau ap piur pa Bibil ni antu akwau, cha kusambish ufanyidin kwijik yom yitiyijinau. Ufanyidin kuvurik anch antu akata kwitiyij mu malejan ma dikarumuk itiyijining kand anch Nzamb udiaku. Alondin anch Nzamb wasadina malejan ma dikarumuk mulong wa kutang yom yawonsu yidiaku. Antu amwing akat kwitiyij anch malejan ma dikarumuk mad makin mulong akat kumafundish ku shikol. Ni antu akwau alikin kal kumwitiyij Nzamb mulong ayiziyishin kal kud marelijon. Cha kusambish ufanyidin kumwipul muntu chom ik chitiyijinay ni mulong wak witiyijinay chom chinech. Kupwa, mutesha kamu nawamp piur pa yom yilondinay. Anch wasal mwamu, ukutwish kukutesh kamu nawamp.—Titus 3:2.

13 Anch muntu wa kulond anch usupin mulong witiyijin anch kud Sakatang, mutapu ik ukutwisha kumwakul? Mwipula muntu winou ni kalimish chakwel akuleja piur pa mutapu wasambisha mwom. Ukutwish kumulej anch, ang mwom wikarumukina, chom cha kusambish chafanyina kwikarumun achinach. Chid chakin, mulong mulej umwing wa chimie walond anch kud kuswir kwa yom yikwau, yom yiney yid (1) chom mud chikit chafanyina kulam mujimbu , (2) ukaliweny wa kwikal ni usu ni kuusadin, (3) kwijik mutapu udia chom ni mutapu uchipamina ni (4) ukaliweny wa kukwat yom mulong wa kupan jinsangu. Walonda kand anch: “Mutapu ukata kusal anch mwom wikalaku ushimokishening nakash.”

14. Chitongijok ik chiswapela ufanyidina kusadin anch wambambin mulong wa yom yatangau?

14 Anch wisambin ni muntu piur pa yom yatangau, ukutwish kusadin chitongijok chiswapela mud chasadinay kambuy Paul. Ndiy wafunda anch: “Chikumbu ni chikumbu chikwet muntu wachitunga, pakwez Nzamb udi mwin kutung wa yom yawonsu.” (Hebereu 3:4) Mwawiy chikumbu chakin achitungining kud muntu. Chakin, yom yidiaku, yikasikena kuyirumburil mutapu wayitangau kusut chikumbu yimekeshin anch ayisala kud muntu kanang. Ukutwish kusadin kand mikand yetu. Nambaz umwing wambamba ni nsand umwing wading wakad kwitiyij anch kuding Nzamb. Wamwinka ma broshir maad twajimbulang kwinsambishin, ni chikwasuta mbing, walond anch: “Katat nitiyij kal anch kud Nzamb.” Nsand winou wasambisha kwilej Bibil ni kupwa wikala mukadivar netu.

15, 16. Chom ik tufanyidina kusal kurutu kwa kumurumburil muntu anch Bibil udiokil kud Nzamb? Ni chom ik tufanyidina kuvurik chisu chawonsu?

15 Anch muntu ukat kwidjidjek mulong wa Bibil, mutapu ik ukutwisha kutong nend? Mud twatakelang kulond, mwipula chakusambish yom ik yitiyijinay. Chikwau, ufanyidin kwijik mulong wak yimusangareshin. (Jinswir 18:13) Anch ukatin malejan ma siyans, mwinkisha yilakej yidia mu Bibil  yimekeshina anch yom yilondinau in siyans yid yakin. Anch ukatin malejan ma jinsangu ja antu, ukutwish kujimbul chom chasadika chilejenau mu ma buku ma jinsangu ja antu ni kumulej mutapu watakelay Bibil kulejan piur pa chom chinech mu mivu yivud kurutu chisadika. Antu akwau akatining kutesh anch wayilej chom chidia mu Bibil chikutwisha chawapish mwom yau, mud chiyul chidia mu Malejan ma pa Mukandu.

16 Tufanyidin kuvurik anch, tufanyidinap kukakalijan ni antu. Tukatining asanger kwisamb netu chakwel ileja yom yivud piur pa Bibil. Chawiy, ufanyidin kuyipul ni kalimish ni kuyitesh nawamp. Piulejena yom yiukata kwitiyij kudi muntu kampand, ufanyidin kwikal ni kalimish, pakampwil anch muntu wisambina nend ud mukurump kukusutamu ey. Anch wayilimish antu akwau, niyawiy akutwish kukulish. Akusanger ni kutong nakash pa yom witiyijina ap anch udi mwanikanch. Chakin kamu anch muntu wakimb anch utadikijan nend, ap wa kuswingish ufanyidinap kumwakul.—Jinswir 26:4.

JINGUNIN UYAKIN UDIA MU BIBIL NI KASIKESH RITIY REY

17, 18. (a) Yom ik yikutwisha kukukwash chakwel ukasikesha ritiy rey mu Bibil? (b) Chipul ik tukutwisha kwisambin mu mutu wa mulong ulondwilaku?

17 Tukutwish kwijik mafundish ma dishin madia mu Bibil, pakwez, tukwet kand kuswir kwa kwikal ni ritiy rikash. Tufanyidin kukimbijol ni kujingunin uyakin ukurukina udiamu, mud tukata kukimb mapit majingamina. (Jinswir 2:3-6) Mitapu yiwamp ya kukasikesh ritiy rey yid wa kutang Bibil mwawonsu. Pamwing ap ukutwish kumutang mu muvu umwing. Chawiy, chamukwasha kalam umwing wa munyingumuku ikala piswimp ni Yehova padingay nsand. Walonda anch: “Chom chimwing chankwasha chakwel nisangera Bibil mud Dizu dia Nzamb chading cha kumutang nich chitongijok chiwamp. Jinsangu ja Bibil natanga pinadinga mwanikanch jankwasha.” Chikwau kand, kusadin yom ya kukimbijol nich yidia mu dizu dien yikukukwash utesha nawamp yom utangina. Ukutwish kwikal ni Watchtower Library udia pa DVD, BIBLIOTHÈQUE EN LIGNE Watchtower, l’Index des publications Watch Tower, ap Ukwash wa Kukimbijol Nich wa Atuman a Yehova.

18 En anvaj salany usu wen wawonsu mulong wa kuyifundish anen chakwel amwijika Yehova. Mutapu ik ukutwishanya kuyikwash chakwel akasikesha ritiy rau mudiay ndiy? Mutu wa mulong ulondwilaku ou ukwambambin mitapu yimwing tukutwisha kusadin.

^ [1] (paragraf wa 9) Chinong cha Kalam cha 1 Ngond wa 12, 2013.