Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2016

Dandamen Kurish Mulong wa Kutambul Chiyukish cha Yehova

Dandamen Kurish Mulong wa Kutambul Chiyukish cha Yehova

“Mulong ey wadi nich usu wa kurish ni Nzamb ni antu kand chad ey [wayiwina] kwey.”—DISAMBISHIL 32:28.

MIMINY: 23, 38

1, 2. Kurish ik kurishinau nich atushalapol a Yehova?

ATUSHALAPOL awonsu ashinshamena a Nzamb arisha nich yakamish ap mar, kusambishin padiay Abel djat ni atushalapol ashinshamena a nlel. Kambuy Paul wayileja in Kristu a Hebereu anch ‘imana dang mu mar ni mu kurish’ ni asala usu wa kwitapin dilau kud Yehova ni kutambul chiyukish. (Hebereu 10:32-34) Paul ufanikeshin kurish kwa in Kristu ni atilet akata kurish mu masengan ma in Grek, mud in kuya mau, in kach, ni in kubulijan yikany (box). (Hebereu 12:1, 4) Nlel, turishin mulong wa mwom, ni tukwet akankuny akatina kutuletin kampuw ni kutusal anch tushadish musangar wetu wa katat ni difut dietu mu machuku ma kurutu.

2 Kurish kwetu kukash, kud kwa kurish ni Satan ni mangand mend. (Efes 6:12.) Chid cha usey anch kangal kulik mafundish ma mangand mudi, filozofi, yisal yiyimp, mudi kusal masandj, kuna ruwand, kulew maar ap kuna yom ya kulewishan yiyipish mwikadil wetu. Tufanyidin kand kusal usu wa kurish ni mwikadil  wetu wa kuziy.—2 Korint 10:3-6; Kolosay 3:5-9.

3. Mutapu ik utufumbinay Nzamb mulong wa kurish ni akankuny netu?

3 Ov, chitwishikin kuwin njit jinej jiturishina ni akankuny akweta usu? Mwaning, pakwez chitining kusal usu nakash! Paul wifanikesha ni antu akata kubulijan yinkany palonday anch: “Nidi kand mudi mwin kubulan yinkany, kinikat kubulap [chamwibudil].” (1 Korint 9:26) Mud mwin kubulan yinkany mukatay kurish ni mukwau, tufanyidin niyetu kurish ni akankuny netu. Yehova utukwashin ni utufumbin kusal mwamu. Usadining mwamu kusutil mu Bibil. Utukwashining kand kusutil ku mikand yimedina pa Bibil, yikumangan ya win Kristu, yitentam ya munyingumuku ni ya rejon. Ukat kusadin mafundish minam utambwilinga? Anch kimwawiyap, ukutwishap kumuwin mukankuny wey, mud mwin kubulan yinkany ukata kubul chamwibudin.

4. Yom ik tufanyidina kwipuk mulong tuwin uyimp?

4 Tufanyidin kwikal achila ku mes chisu chawonsu. Mulong wak? Mulong mukankuny wetu ukat kuturishish chisu chitwakad kutongin ap pa chisu tuziyina. Bibil utubabeshin ni utukasikeshin palondinay anch: “Kangal witiy kuyip kukupandakan usu. Pakwez chifanyidin ey kusal yom yiwamp mulong wa kupandakan kuyip.” (Rom 12:21) Anch twadandamen kurish nich uyimp, tukutwish kuwin! Anch, tuchilap ku mes ni turishinap, Satan, mangand mend, ni kuziy kwetu yikutwish kutuyikel. Chawiy, kangal walik. Kangal kuziy ap kulikumwish makas mey!—1 Pita 5:9.

5. (a) Yom ik tufanyidina kuvurik mulong wa kwitapil dilau dia Nzamb ni kutambul chiyukish? (b) Antu ik a mu Bibil tukwisambina?

5 Mulong wa kuwin, tufanyidin kuvurik mulong wak tukata kurish. Chiding mulong tukatining kwitapil dilau dia Nzamb ni mulong wa kutambul chiyukish. Hebereu 11:6 ulondin anch: “Mulong muntu mwawonsu ukuseja piswimp kudi Nzamb ufanyidin kwitiy anch, Nzamb udiaku, ndiy ukat kufutan kuwap kudi antu awonsu akata kumusurab.” Kumukimb Yehova nich mushiku chirumburikin anch tufanyidin kusal usu anch tukatin twitapila dilau diend. (Midimu 15:17) Bibil ukwet yilakej yiwamp ya amakundj nau amband asala mwamu. Jakob, Rachel, Josef ni Paul arisha ni mikadil yikash ya kumujimbu ni ya mu manangu. Pakwez atwisha. Yilakej yau yimekeshin patok anch, ang twasal usu niyetu kukutwish kutambul chiyukish cha Yehova. El tumanany mutapu chitwishikina.

ANCH WADANDAMEN AKUKUYUKISH

6. Chom ik chamukwasha Jakob adandamena kurish, ni difut ik diatambulay? (Tal chipich cha kwisambishin.)

6 Jakob muntu ushinshamena warisha ni wajijamana mulong wading umukatin Yehova ni wakwata urund wend ni Yehova nich usey. Wading nich ritiy rikash mu kushilamu kwa Yehova mulong wa kuyukish anend. (Disambishil 28:3, 4) Padingay Jakob ni mivu 100, warisha nakash ni mwangel mulong wa kutambul chiyukish cha Nzamb. (Tang Disambishil 32:24-28.) Usu warishay nich Jakob ni mwangel, ov, wading usu wend? Bwat kwau! Pakwez, wadandamena kurish ni wamekesha anch wafanyina kusal usu chakwel amuyukish! Yehova wamuyukisha Jakob mulong wa kudandamen kurish kwend ni wamupila dijin dia Isarel, dijin dirumburikina anch ‘Ukweta usu wakurish ni Nzamb.’ Jakob amufuta, niyetu anch twadandamen kwitapil dilau dia Yehova akutuyukish.

7. (a) Mwikadil wa mutapu ik wamuziyisha Rachel? (b) Chom ik chasalay Rachel ni mutapu ik wamuyukishau?

 7 Rachel mband mukatish wa Jakob wading muntu wa kusambish wamana mutapu wawanyishay Yehova kushilamu kwend padiay nfumwend. Pakwez, kwading mulong. Rachel wading mumb. Pasak kwikal mumb chading chom chayiletinanga amband ushon. Mutapu ik wadandamenay Rachel kurish ap anch mwikadil winou wamuziyishang? Kashadishap ruchingej rend. Pakwez, wadandamena kurish mu kumulembil Yehova chisu chawonsu. Yehova watesha malembil makin ma Rachel, kupwa wamuyukisha pavalay an. Chawiy chalonday anch: “Am narisha nakash. . . Chad am namupandakan kal !”—Disambishil 30:8, 20-24.

8. Milong ik yikash yarishay nich Josef ni mutapu ik udiay chilakej chiwamp kud etu?

8 Chilakej chiwamp cha kushinshiman cha Jakob ni Rachel pamwing ap chamukwasha mwanau Josef padingay mu mar. Padingay Josef ni mivu 17, mashakamin mend maswimpa. Ayayend amwovila mukau ni amulandisha mu usuk. Kupwa, wasala mivu yivud mu rukan mu Idjibit, ap anch kadingap ni mulong. (Disambishil 37:23-28; 39:7-9, 20, 21) Pakwez, Josef kaziyap ni kakimbap mutapu wa kufundakesh. Mulong wak? Mulong Josef wading ukwatin urund wend ni Yehova nich usey ni washinshikina pa yom yiney nich muchim  wend wawonsu. (In Levi 19:18; Rom 12:17-21) Chilakej cha Josef chikutwish kutukwash ni yetu. Ap anch twading mu mwikadil uyimp pa wanikanch ap mwom wetu umeken katat anch ukwetap usey, tufanyidin kurish ni kudandamen. Anch twasal mwamu, tukutwish kwikal ni kashinsh anch Yehova ukutuyukish.—Tang Disambishil 39:21-23.

9. Mutapu ik tukutwisha kumwimburij Jakob, Rachel ni Josef?

9 Nlel unou, niyetu tukutwish kujijaman nich milong yikash. Pamwing ap anch akusadidin mu mutapu uyimp, akusadidin nich kasolikany, ap akupipejin, ap anch muntu ukwovidin mukau. Pa ndond pa kuziy, vurik yom yamukwasha Jakob, Rachel ni Josef chakwel adandamena kumusadin Yehova nich musangar. Nzamb wayikasikesha ni wayiyukisha mulong asangera nakash urund wau ni ndiy. Adandamena kurish ni asala yom yikwatijadina ni malembil mau. Mulong tud mu machuku ma nsudien, chawiy komb chid cha usey kudandamen kulam nakash ruchingej retu ra machuku ma kurutu! Ukudandamen kurish, kusal usu chakwel witapila dilau dia Yehova?

SAL USU WA KURISH CHAKWEL AKUYUKISH

10, 11. (a) Mulong wak tufanyidina kurish mulong wa kutambul yiyukish ya Nzamb? (b) Yom ik yikutukwasha tukwata mipak yiwamp?

10 Mulong wak tufanyidina kurish mulong wa kutambul chiyukish cha Nzamb? Mulong tud antu akad kuwanyin, chawiy tufanyidina kusal usu wa kurish nich maku metu mayimp. Antu amwing arishining mulong wa kwikal ni chitongijok chiwamp pa mudimu wa kulejan, akwau kand arishining mulong wa mayej ap iyoviling anch ad ayinau. Akwau chiyikasikedining kuyilikishin antu akata kuyirumbukin. Ap anch twasadin kal mivu yivud mu kumusadin Yehova, etu awonsu tufanyidin kusal usu wa kurish ni mikadil yiney yikash mulong wa kumusadin Nzamb, muntu ukata kuyifut antu ashinshamena.

Ov, ukudandamen kurish chakwel utambula yiyukish ya Nzamb? (Tang paragraf wa 10, 11)

11 Chakin kamu, chikasikening kwikal mwin Kristu ukata kukwat mipak yiwamp, pakampwil anch turishin ni maku metu mayimp. (Jeremiy 17:9) Anch mwamu ukata kwiyov, mulembila Yehova ni mwita spiritu wend utumbila. Malembil ni spiritu utumbila yawiy yikukukwasha chakwel usala usu wa kusal yom yiwamp ni kupwa ukutambul yiyukish ya Nzamb. Itekina mupak wa kusal kukwatijan ni malembil mey. Sal usu wa kutang Bibil dichuku diawonsu ni kwitekin chisu mulong wa dilejan dia panrey ni dilejan dia mu dijuku.—Tang Kuseng 119:32.

12, 13. Yom ik yayikwasha in Kristu aad chakwel arijeka maku mau mayimp?

12 Kud yilakej yivud yilejena mutapu Dizu dia Nzamb, spiritu utumbila ni mikand yetu ya win Kristu yayikwasha akadivar ni anambaz etu kuwin maku mau mayimp. Nsand umwing watanga mutu wa mulong udia mu Réveillez-vous wa 8 ngond wa 12, 2003 ulondina anch: “Comment résister aux mauvais désirs?” Chom ik chasalay? Ulondin anch: “Nasala usu wa kurish mulong wa kurijek yitongijok yam. Pinatanga mu mutu wa mulong winou najingunina anch ‘antu avud arisha mulong wa kuwin maku mau mayimp makash,’ Chom chinech chakwasha nijika anch yom yiney yikat kuyishikena akadivar awonsu. Namana anch, komb nadingap amwinam.” Nsand winou wataninamu kand mu mutu wa mulong ulondina anch “Dieu approuve-t-il les moeurs—Différentes?” udia mu Réveillez-vous wa 8 ngond wa 10,  2003. Mu mutu wa mulong winou, ndiy wajingunina anch kurish kumwing kud kwa chisu chawonsu mud “rubwambu ripampinau mu mujimbu.” (2 Korint 12:7) Chikwau kand, padandamedinau kurish mulong wa mwikadil wishitwila, akwet ruchingej ruwamp mulong wa machuku ma kurutu. Walonda anch: “Mulong wa mayingishin minam, nitongin anch dichuku diawonsu disutina nifanyidin kwikal ushinshamena. Nimujikitishin nakash Yehova mulong ukat kusadin dirijek diend mulong wa kutukwash twikalaku dichuku ni dichuku mu machuku minam mayimp.”

13 Tushinshikinany kand yom yamushikena nambaz umwing udia mu État-Unis. Wafunda anch: “Chisu chawonsu nikat kujikitish mulong wa kutudish yakudia ya muspiritu tukweta nich kuswir pa chisu chiwanyidina. Yisu yivud nikat kwiyov anch mitu ya milong yiney ayifundining mulong wamam. Mu mivu yivud, narisha ni maku makash ma yom yimwing yikisiningay Yehova. Mu yisu yimwing, nakimba kulik kurish. Nij anch Yehova ud mwin riy ni mwin kulikishin, pakwez, mulong nikwet maku mayimp nisadinap usu wa kukis yom yiney, niyovil anch niwanyidinap kutambul ukwash wend. Kurish kwinoku kwadandamena kwikal nich chibachikin chiyimp mu mwom wam. . . . Kupwa kwa kutang mutu wa mulong udia mu Chinong cha Kalam cha 1 ngond wa 3, 2013 ulondina anch: ‘Ov, Ukwetany “Muchim wa Kumwijik” Yehova?’ Nijika anch Yehova ukatin kwinkwash.”

14. (a) Paul wiyova nchik piur pa kurish kwend? (b) Mutapu ik tukutwisha kuwin anch twarishish kuziy kwetu ?

14 Tang Rom 7:21-25. Paul wijika amwinend anch chading chikasiken kurish ni maku mayimp ni kuziy. Pakwez, wading nich kashinsh anch ukutwish kuwin kurish kwinoku anch wamulembil Yehova, wamuchingejin mulong amukwasha ni kumekesh ritiy rend mu chakupesh cha Yesu. Chid nchik piur petu? Tukutwish kuwin kurish kwinoku ni kuziy kwetu? Inge, anch twamwimburij Paul ni anch twamuchingejin kamu Yehova pakad kuchingejin pa usu wetu ni twatek ritiy retu mu difut.

15. Mutapu ik ukutukwashay Yehova chakwel tudandamen kwikal ashinshamena ni kujijaman yoziu?

15 Yisu yimwing Nzamb ukutwish kutulik chakwel tumekesha mutapu tukutwisha kupwish milong yetu. Chilakej, anch etu ap muntu kanang wa mu dijuku dietu uyendin nakash ap amusadidin mutapu uyimp, tukusal nchik? Anch tumuchingejidin kamu Yehova, tukumwit chakwel atwinkisha usu tuswirikedina mulong wa kushal ashinshamena ni kundandamen kulam musangar wetu ni urund wetu uwamp ni ndiy. (Filip 4:13) Yilakej ya in Kristu avud a pakur ni a katat, yimekeshin anch malembil makutukwash ni kutwinkish usu tuswirikedina chakwel tujijanam.

DANDAMEN KURISH MULONG WA KUTAMBUL CHIYUKISH CHA YEHOVA

16, 17. Mupak ik ufanyidina kwitekin?

16 Djabul ukatin anch uziya, ulika ni ulikumwisha makas mey. Chawiy, kwat mupak wa ‘kulam yom yidia yiwamp.’ (1 Tesalonik 5:21) Ukutwish kumuwin Satan, mangand mend mayimp ni maku mawonsu mayimp! Ukutwish kuwin anch wamuchingejin kamu Nzamb chakwel akukukwash ni akukasikesha.—2 Korint 4:7-9; Galatia 6:9.

17 Dandamen, dandamen, dandamen amboku kurish. Dandamen amboku kujijaman. Anch wasal mwamu, ukutwish kwikal nich kashinsh anch Yehova ‘ukukuyukish mu mitapu yivud yikudiokala mwiur.’—Malakiy 3:10.