Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 8 , 2016

Umen Usey wa Kuyifumb Antu Akwau?

Umen Usey wa Kuyifumb Antu Akwau?

“Nikez kakwinkishany malejan mawamp.”—JINSWIR 4:2,NWT.

MIMINY: 45, 44

1, 2. Mulong wak tufanyidin kuyifumb antu akwau chakwel ikala ni yisend ya uteokras?

YESU wasala mudimu nakash mulong wa kulejan piur pa Want. Wasutisha kand chisu chilemp mulong wa kufumb in kwilej end. Wayileja mutapu wa kulejan ni mutapu wa kuyilam antu a Nzamb. In kwilej ileja mutapu wa kwikal mud atufung alamina amikoku au. (Mateu 10:5-7) Filip wading ukwatiken nakash ni mudimu wa kulejan, pakwez wayifumba kand anend ayangadim kusal mudimu winou. (Midimu 21:8, 9) Nlel, tufanyidin niyetu kuyifumb antu akwau. Mulong wak?

2 Mu yikumangen ya mu mangand mawonsu, mud antu asu avud akad kal kutambul dibatish. Antu asu inay akwet kuswir kwa kuyifumb. Tufanyidin kuyikwash chakwel ijika mulong wak chid chiwamp kud awiy kutang ni kwilej Bibil ayinau. Ni tufanyidin kand kuyifumb mulong wa kulejan ni kufundish rusangu ruwamp. Akadivar atambwila dibatish katat, akwet kuswir kwa kuyifumb mulong kurutu kwa machuku akutwish kusal mud ankwash a mudimu ni  amakurump. Muntu mwawonsu mu chikumangen ukutwish kusal usu mulong wa kuyikwash antu asu.—Jinswir 4:2.

YIFUNDISHA ANTU ASU MUTAPU WA KWILEJ BIBIL

3, 4. (a) Mutapu ik wafanikeshay Paul kwilej kwa Mifund ni yibudikin yiwamp mu mudimu wa kulejan? (b) Kurutu kwa kuyikasikesh in kwilej etu chakwel ileja Bibil, yom ik tufanyidina kusalang?

3 Kashalapol mwawonsu wa Yehova ufanyidin kutang ni kwilej Bibil mulong wa kwijik rusot ra Nzamb. Kambuy Paul wayirumburila akadivar nau anambaz a ku Kolosay chom chinech palonday anch: “Etu kituziyilap kukulembidilany en machuku mawonsu, kudiokal pitwatesha rusangu ren. Tukat kumwit Nzamb chakwel akwizwishany nich ronganyin ra rusot rend.” Mulong wak chading cha usey kud awiy kutang ni kwilej Bibil? Mulong chinech chafanyina kuyinkish manangu ni kuyikwash kwijik mutapu wa ‘kwikal nich mwom uwamp mulong wa kumusangaresh Yehova.’ Chafanyina kand kuyikwash kusal “midimu yawonsu yiwamp” yakimbay Yehova anch amusadina, pakampwil kulejan rusangu ruwamp. (Kolosay 1:9, 10) Chawiy anch twilejin ni muntu, tufanyidin kumukwash ijika anch kutang ni kwilej Bibil dichuku diawonsu kukumukwash amusadina Yehova.

4 Tukutwishap kuyikwash in kwilej etu a Bibil kwijik usey wa dilejan dia Bibil dia panrey anch ayinetu tukwilejangap Bibil. Pakwez anch tutangining Bibil dichuku diawonsu ni kutongijokin pa yom tutangina, chinech chikutukwash mu mwom wetu ni mu mudimu wa kulejan. Chilakej, anch tud mu mudimu wa kulejan ni atwipul chipul chikasikena, tukutwish kusadin Bibil mulong wa kwakul. Ni chisu tutangina yom kanang piur pa Yesu, Paul, ni antu akwau alika kuziy mu mudimu wa kulejan, yikutukasikesh ni tukudandamen kulejan ap anch chikasiken kusal mwamu. Ni pitukuyileja antu akwau piur pa yom tukata kwilej mu dilejan dietu ni mutapu yikata kutukwash, tukuyikasikesh chakwel ileja Bibil nakash ni ataninamu mud etu.

5. Pan chiyul chilejena mutapu wa kuyikwash antu asu chakwel ikala ni chaku cha kwilej Bibil ayinau.

5 Ukutwish kwiyipul anch, ‘Mutapu ik nikutwisha kumufumb mwin kwilej wam chakwel ilejang Bibil dichuku diawonsu?’ Pamwing ap ukutwish kumulej mutapu wa kurijek jinsangu jidia mu mukand wilejinanya nend. Ukutwish kumulej atanga jinsangu jidia mu wenjil jidia mu buku Chom ik Chakin Kamu  Chifundishinay Bibil? ni kutal ma verse ma mu Bibil mafundinau. Kupwa, ukutwish kand kumulej mutapu wa kurijek yikumangan mulong wa kwakul. Mukasikesha kutang nimero mwawonsu wa Chinong cha Kalam ni Réveillez-vous! Ukubudika. Ni ufanyidin kumulej mutapu wa kukimb yakul ku yipul ya mu Bibil, chilakej mu kusadin Watchtower Library ap BIBLIOTHÈQUE EN LIGNE Watchtower. Anch wapakish mitapu kushalijan yiney mu dilejan dia panrend, ukusanger dilejan diend ni ukukat kwilej yom yivud.

6. (a) Mutapu ik ukutwisha kumukwash mwin kwilej wey chakwel akudisha rukat rend mulong wa Bibil mu muchim wend? (b) Yom ik yikusalay mwin kwilej wa Bibil anch wakudish rukat mu muchim wend mulong wa Mifund?

6 Anch twilejin ni muntu, tukatining ijik anch Bibil ud wa usey nakash mulong ukumukwash kumwijik Yehova nawamp. Pa ndond pa kumubachik ileja, tufanyidin kumulej mutapu wa kusal chakwel asanger dilejan. Pilejinay yom yidiokila mu Bibil, ukutwish kwiyov mud mwiyovay nfund a kuseng wawanga anch: “Kudi am chidi chiwamp kamu kusej piswimp kudi Nzamb, natekil kal ruchingej ram mwi [Yehova] Nsalejam.” (Kuseng 73:28) Spiritu wa Yehova ukumukwash muntu ukatina kusej piswimp ni ndiy.

YIFUMBA ANTU ASU KULEJAN NI KUFUNDISH

7. Mutapu ik wafumbay Yesu in kulejan a rusangu ruwamp? (Tal chipich cha kwinsambishin.)

7 Tukutwish kwilej yom yivud kusutin ku mutapu Yesu wayifumbay atwimbuy end. Yesu wayisedang ni wayangang nau mu kulejan, ni amanang mutapu wadingay kufundish antu. Ni wayileja piur pa mutapu wafanyinau kulejan. (Mateu, shapitre 10) [1] (Tal mazu ma kwinsudien.) Mu chisu chikemp, atwimbuy ilejina kud Yesu mutapu wa kuyifundish antu uyakin. (Mateu 11:1) El tumana yom yaad yikutukwasha kuyifumb antu asu kusal chisu chidiau mu mudimu wa kulejan.

8, 9. (a) Mutapu ik wasejangay Yesu kud muntu ni muntu mu mudimu wa kulejan? (b) Mutapu ik tukutwisha kuyikwash in kulejan asu chakwel asambish kwisamb nau antu mud mwasalay Yesu?

8 Isamba nau antu. Yesu kambambangap ching nau antu avud mu chisu chimwing. Wambambang kand ap ni muntu panrend, ni wasala mwamu mu mutapu uwamp. Chilakej, wambamba mu mutapu usangareshina ni mband weza kuvit mem ku dijiy diading piswimp ni ul wa Sikar. (Yohan 4:5-30) Yesu wambamba kand ni Mateu Levi, mwin kulambwish yitad, ni wamutazuka kwikal mwin kwilej wend. Mateu witiya ni kupwa wamutazuka Yesu nau antu akwau kwol kwend mulong wa kudia nau pamwing. Kwinikwa, Yesu wisamba nau antu avud.—Mateu 9:9; Luka 5:27-39.

Ang twisambin nau antu mu mutapu uwamp, akukat nakash kutesh yituyilejina

9 Yesu wisamba kand ni Natanyel mu mutapu uwamp, ap anch Natanyel walonda yom yiyimp mulong wa antu a ku Nazaret. Mulong Yesu wisamba nend mu mutapu uwamp, Natanyel waswimpa  mutapu wend wa kutong piur pa Yesu, wading mwin Nazaret. Ni Natanyel wakata kwilej yom yivud kud Yesu. (Yohan 1:46-51) Kusutin chilakej cha Yesu, twilejin anch, ang twisambin nau antu mu mutapu uwamp, akukat nakash kutesh yituyilejina. [2] [Tal mazu ma kwinsudien.] Anch twayifumb antu asu kwisamb mu mutapu winou, akusanger nakash mudimu wa kulejan.

10-12. (a) Mutapu ik wasalay Yesu chakwel antu akwau asangera rusangu ruwamp? (b) Mutapu ik tukutwisha kuyikwash in kulejan asu chakwel arijeka ukaliweny wau mud alej a uyakin wa Bibil?

10 Yifundisha antu akatina kutesh. Yesu wading ukwataken nakash. Pakwez, chisu chakatau antu kumutesh, wasutisha nau chisu ni wayifundisha yom yivud nakash. Chilakej, dichuku dimwing chisak cha antu chakumangana ku chikum cha kawit mulong wa kumutesh Yesu. Chawiy Yesu ni Pita adiokala mu waat ni asambisha kuyifundish. Kupwa kwa yom yiney, wamufundisha kand Pita dilejan dimwing. Yesu wasala kand chilay mu kusal anch Pita akwata ansh avud. Kupwa wamuleja Pita anch: “Kudiokal pinap ni kurutu ey ukez kakwat antu.” Pakad kulab Pita nau antu akwau “chaletau maat kwimpat, asha yom yawonsu” ni amulondula Yesu.—Luka 5:1-11,TMK.

11 Nikodem niyend wakata kwilej yom yivud kud Yesu. Pakwez, mulong Nikodem wading wa mu chisak cha in Sanedrin, wova wom mulong wa yom yikulondau antu akwau anch amuman ukat kwisamb ni Yesu. Chawiy waya kumutal Yesu uchuku. Yesu kamwopatap bwat pakwez wasutisha nend chisu ni wamurumburila uyakin wa usey. (Yohan 3:1, 2) Yesu wasadina nakash chisu chend mulong wa kuyifundish antu uyakin ni kukasikesh ritiy rau. Mu mutapu wawiy umwing, tufanyidin kuya kuyital antu mu chisu chiwanyidina kud awiy, ni tufanyidin kusutish nau chisu mulong wa kuyikwash kutesh Bibil.

12 Anch tusadin mudimu pamwing nau antu asu, tukutwish kuyifundish mutapu wa kuchirikin antu awonsu akatishina chakwel isamba nau kapamp kakwau. Tukutwish kand kuya nau antu asu chakwel tuyichirikina antu twambambina nau kapamp ka kusambish ni antu twilejining nau Bibil. Mu mutapu winou, akwilej mutapu wa kuyifundish antu akwau ni akuman mutapu chidia chiwamp kuyikwash antu akwau kwilej uyakin piur pa Yehova. Kupwa, antu asu akwikal ni musangar wa kuchirikin antu ni kwilej nau Bibil. Akwilej kand kwikal ashimpinshina michim ni kulik kuziy mau mau anch kataninap antu ku yikumbu yau.—Galatia 5:22; tal mushet ulondina anch “Kaziyap.”

YIFUMBA ANTU ASU CHAKWEL AYISADIN AKADIVAR NAU

13, 14. (a) Chom ik utongina piur pa yilakej ya mu Bibil piur pa antu ipana nakash mulong kuyikwash antu akwau? (b) Mu mutapu ik ukutwisha kuyifumb in kulejan asu ni ansand chakwel amekesha rukat mulong wa akadivar ni anambaz nau?

13 Yehova ukatining anch atushalapol end akatijana umwing ni mukwau mud akadivar nau anambaz ni akwashijana umwing ni mukwau. (Tang Luka 22:24-27; 1 Pita 1:22.) Bibil ulondin anch Yesu wapana yom yend yawonsu ni mwom wend mulong wa kuyikwash antu akwau. (Mateu 20:28) Dorkas “wading wizwil sens ni midimu yiwamp ni riy.” (Midimu 9:36, 39,TMK.) Mariy ‘wasala mudimu  nakash’ mulong wa akadivar nau anambaz nend a mu Rom. (Rom 16:6) Mutapu ik tukutwisha kuyikwash antu asu chakwel ijika anch chid cha usey kusal yom yiwamp mulong wa akadivar nau anambaz?

Yifumba antu asu chakwel amekesha rukat ni ayisadina akadivar nau (Tal paragraf wa 13, 14)

14 Tukutwish kuyilej antu asu chakwel tuya nau pamwing kuyital amapal ni antu ayedina. Anch anvaj awiy ayila kuyital antu inay, akutwish kuya nau an au anch chitwishikin. Amakurump akutwish kuyilej ansand ap antu asu kusal nau pamwing mulong wa kuyinkish amapal yakudia ap kuyirijekin yikumbu yau. Anch ansand ni antu asu aman mutapu utalijadinau akadivar nau anambaz, niyau akwilej kusal mwamu. Chilakej, anch twaya mu kulejan mu teritwar wa kulemp, mukurump umwing ufanyidin kuyangang kuyital akadivar adia kwinikwa mulong wa kwijik mutapu udiau. Mukadivar ukata kuya nend pamwing, ukwilej chilakej chiwamp cha mukurump winou piur pa mutapu ufanyidina kuyikwash akadivar nau anambaz.—Rom 12:10.

15. Mulong wak chid cha usey kud amakurump kushinshikin kuya kurutu kwa amakundj adia mu chikumangen?

15 Yehova wayinkisha amakundj chisend cha kufundish dizu dia Nzamb mu chikumangen. Chawiy chid cha usey kud akadivar kwilej mutapu ufanyidinau kusal nawamp ma diskur. Anch ud mukurump pamwing ap ukutwish kumutesh nkwash wa mudimu pa rijekinay diskur ni kumukwash chakwel arijeka nawamp. ( Nehemiy 8:8) [3]—Tal mazu ma kwinsudien.

16, 17. (a) Yom ik yashinshikinay Paul mulong wa kumukwash Timote aya kurutu? (b) Mutapu ik ukutwishau amakurump kuyifumb nawamp atufung akulama chikumangen mu machuku ma kurutu?

16 Kud maswir nakash ma kuyifumb akadivar avud chakwel ikala atufung mu chikumangen. Paul wamufumba Timote ni wamukasikesha mulong wa kuyifumb antu akwau. Paul walonda anch: “Ikasikesha mu ranaken ridia mu Kristu Yesu. Yom yiwileja kudi am kurutu kwa atuman avud, niyey yilejana kudi amakundj akin akutwisha niyau kuyilejan kudi antu akwau.” (2 Timote 2:1, 2) Timote wileja yom yivud kudiay Paul, wading mukurump ni kambuy, warijeka mutapu wend wa kulejan ni mutapu wa kuyikwash antu akwau mu chikumangen.—2 Timote 3:10-12.

17 Paul wasutisha chisu chilemp ni Timote mulong wa kwikal nich kashinsh anch wamufumb kal nawamp. (Midimu 16:1-5) Amakurump akutwish  kumwimburij Paul pakuyisendau ankwash a mudimu awanyishina yitinau chakwel asala nau pamwing mudimu wa ukafung. Mu mutapu winou, ankwash a mudimu akwilejin kud amakurump mutapu wa kuyifundish antu akwau, mutapu wa kwikal in kushimpish muchim ni kwikal ni rukat ni mutapu wa kumuchingejin Yehova palaminau amikoku end.—1 Pita 5:2.

KUFUMB KUD KWA USEY

18. Mulong wak chidi cha usey kuyifumb antu akwau mu mudimu wa Yehova?

18 Mu machuku minam mansudien, chid cha usey kuyifumb antu asu chakwel awapisha ukaliweny wau mu mudimu wa kulejan. Kud kand maswir ma akadivar chakwel ileja mutapu wa kulam chikumangen. Yehova ukatin anch atushalapol end awonsu ayifumba nawamp, ni watwinkishin kal chisend cha kuyikwash antu asu. Chawiy komb chid cha usey kuyifumb antu akwau mud mwasalay Yesu ni Paul. Tukwet kuswir kwa kuyifumb antu avud anch chitwishikin mulong chisu cha kusal mudimu wa kulejan chid kamu chijim kurutu nsudien yishika.

19. Mulong wak ukweta kashinsh anch usu wey usadina nich mushiku mulong wa kuyifumb antu akwau mu mudimu wa Yehova uyil kurutu?

19 Kuyifumb antu asu kwitining chisu ni usu. Pakwez, tukutwish kwikal nich kashinsh anch Yehova ni Yesu akutukwash chakwel twijika mutapu wa kuyifumb antu akwau mu mutapu uwamp. Tukwikal ni musangar anch twaman antu tufumbina ‘asadin mudimu ukash pipaninau ayinau’ mu chikumangen ap mu mudimu wa kulejan. (1 Timote 4:10) Mu chisu chawiy chimwing, tukwet kuswir kwa kusal yom yiwamp mulong wa kuya kurutu mu spiritu, kurijek mikadil yetu ya win Kristu ni kusej piswimp ni Yehova.

^ [1] (paragraf wa 7) chilakej, Yesu wayileja in kwilej end (1) kulejan piur pa Want; (2) kumuchingejin Nzamb mulong wa kuyink ya kudia ni yidjal yikwetau nich kuswir; (3) kwipuk kutadikijan nau antu; (4) kumuchingejin Nzamb anch ayizengol; ni (5) kwov wom piur pa yom yikuyisalau kud antu.

^ [2] (paragraf wa 9) Tirez profit de l’École du ministère théocratique, paj wa 62-64, mud yiyul yiwamp mulong wa mutapu wa kwisamb nau antu mu mudimu wa chingand.

^ [3] (paragraf wa 15) Tirez profit de l’École du ministère théocratique, paj wa 52-61, ulejen mutapu ukutwishau akadivar kuwapish mutapu wau wa kusal ma diskur mu chikumangen.