Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 8 , 2016

Mutapu Ukutwishau In Kristu Uruw

Mutapu Ukutwishau In Kristu Uruw

“Chifanyidin ngatan mwawonsu kumukat mukajend mudi mwikatilay amwinend; . . . Chifanyidin niyend ngachik mwawonsu kumulimish nfumwend.”—Efes 5:33.

MIMINY: 36, 3

1. Ap anch uruw ukat kusambish nich musangar, yom ik yikutwishau ambay a uruw kuchingejin kuman? (Tal chipich cha kwinsambishin.)

ANCH ngatan wamuman ngachik kapamp kakusambish mu dichuku diau dia uruw, ambay inay akat kusangar nakash. Mu kusut kwa machuku, rukat rau rikat kupandakan mulong akata kwatijan ni ashilamu anch akushal ashinshamena umwing ni mukwau. Kupwa kwa musambu wa uruw, asambish kal mashakamin mau pamwing, akwikal ni kuswir kwa kuswimp yom kanang chakwel ikala mu umwing. Yehova, Sakatang wa uruw, ukatin mbay wa uruw mwawonsu ikala ni musangar ni atwisha uruw, chawiy chapanay yiyul ya manangu mu Dizu diend, Bibil. (Jinswir 18:22) Ap mwamu, Bibil utulejin anch antu akad kuwanyin anch atijan akwikal ni milong ap “akez kuman mar mu chirung chinech mu mwom yau.” (1 Korint 7:28) Mutapu ik ukutwishau ambay a uruw kupwish milong yiney? Ni mutapu ik ukusalau in Kristu chakwel atwish uruw?

2. Rukat ra mutapu ik rifanyidinau kumekesh ambay a uruw?

2 Bibil utufundishin anch rukat ud mwikadil wa usey. Pakwez, kud mitapu kushalijan ya rukat yifanyidinau ambay  a uruw kumekesh mu uruw. Chilakej, afanyidin kumekesh rukat rukurikina nakash. Anch ikal ni an, rukat kud antu a mudijuku rikat kwikal ra usey nakash. Pakwez rukat rimedina pa mbil ja Bibil rikat kusal anch uruw utwishika. Kambuy Paul wajimbula rukat riner palonday anch: “Chifanyidin ngatan mwawonsu kumukat mukajend mudi mwikatilay amwinend. Chifanyidin niyend ngachik mwawonsu kumulimish nfumwend.”—Efes 5:33.

KUSHINSHIKIN PA YISEND YA AMBAY A URUW

3. Rukat ra mutapu ik rifanyidina kwikal mu uruw?

3 Paul wafunda anch: “En angatan, yikatany akajen mudi Kristu chayikatay in [Chikumangen] cha Nzamb, wipana amwinend mulong wa kuyambat awiy.” (Efes 5:25) Nlel unou, in Kristu imburijin chilakej cha Yesu cha kukatijan umwing ni mukwau mud mwayikatay Yesu in kwilej end. (Tang Yohan 13:34, 35; 15:12, 13.) Ikundj mwin Kristu ni mband afanyidin kukatijan nakash umwing ni mukwau, ukutwish ap kufa pa ndond ya mukwau. Pakwez anch mu uruw mud milong yikash, amwing kakutwishap kwiyov anch rukat rau rid rikash. Yom ik yikutwisha kuyikwash? Rukat rimedina pa mbil “kirukubangangakup milong, rikat kwitiy kwau yom yawonsu, rikat kuchingejin yom yawonsu, rikat kujijaman mu yom yawonsu.” Rukat ra mutapu winou riding ra “chikupu.” (1 Korint 13:7, 8,NWT.) Ambay a uruw afanyidin kuvurik anch asala machip. Ashilamu anch akukatijan ni akushal ashinshamena umwing ni mukwau. Kuvurik yom yiney, kukutwish kuyikwash ambay a uruw in Kristu akimba ukwash ni kusal pamwing chakwel apwish milong kanang yikutwisha kuyishiken.

4, 5. (a) Chisend ik chikwetay ikundj padiay ntakel wa dijuku? (b) Mutapu ik ufanyidinay mband kuman wintakel wa mu dijuku? (c) Yom ik yafanyinau kurijek ambay a uruw amwing?

4 Paul wisambina yisend yikwetau ambay a uruw palonday anch: “En angachik, ikepishany kudi anfumwen mudi muwikepishinanya kudi Nsalejen. Mulong ngatan udi [ntakel] wa mukajend mudi mudiay Kristu Yesu Mwant wa [chikumangen] cha Nzamb.” (Efes 5:22, 23) Chinech chirumburikinap anch ikundj umupandakenamu mukajend kuwap. Yehova walonda piur pa chisend cha usey chikwetay mband palonday anch: “Kichiwapidilap kudi ikundj kushakam amwinend. Chinfanyidin nimutangil mwin kumukwash [umuwanyidina] ukutwishay kushakam nend.” (Disambishil 2:18) Mband ufanyidin kumukwash nfumwend chakwel ikala ntakel muwamp wa dijuku. Ni ikundj ufanyidin kwimburij chilakej cha rukat cha Yesu, udia “Mwant wa [chikumangen] cha Nzamb.” Anch ikundj wasal mwamu, mukajend ukwiyov anch ud mu diking ni chikumuswapel kumukwash ni kumulimish nfumwend.

“Twikala piswimp nakash mud ambay a uruw mu kusal yom mu mutapu ukatinay Yehova”

5 Cathy, watinau kud Fred, ulondin anch: “Pinading mujich, nading kwisadin yom amwinam. Uruw wakwasha ni nileja mutapu wa kumuchingejin nfumwam. Chadingap kamu chiswapela, pakwez twikala piswimp nakash mud ambay a uruw mu kusal yom mu mutapu ukatinay Yehova.” [1] (Tal mazu ma kwinsudien.) Fred ulondin anch: “Chadingap chinswapedina kukwat mipak. Mu uruw, kukwat mipak ya antu aad chading chom chikasikena nakash. Pakwez, mu kukimb wintakel wa Yehova mu malembil ni kutesh kamu yitongijok ya mukajam, chading chom chiswapela dichuku diawonsu. Niyovil kamu anch tud mu umwing!”

6. Mutapu ik ukwashina rukat mud “moj uwanyidina ukasila yawonsu pamwing mu kovijan” anch milong yikal mu uruw?

 6 Ambay a uruw akutwish kukasikesh uruw anch alik ‘kujimanijadin umwing ni mukwau ni anch adandamen kulikishijadin umwing ni mukwau.’ Mulong ad akad kuwanyin, ambay inay akutwish kurumbuk. Anch yom yiney yashiken, akutwish kwilej kulikishijadin kusutin ku kurumbuk kwau, ni kumekesh rukat rimedina pa mbil ja Bibil. Rukat riner wawiy “moj uwanyidina ukasila yawonsu pamwing mu kovijan.” (Kolosay 3:13, 14,TMK.) Ambay a uruw akutwish kumekesh rukat riner kusutin ku kwikal ashimpishina muchim ni anch ikal awamp mu kulik kudandamen ‘kumulamin muntu kuyip.’ (1 Korint 13:4, 5) Anch kwikal kulik kovijan, ambay a uruw afanyidin kusal usu wa kupwish milong yiney pakad kulab chakwel kangal ajinga nich ujim dichuku diakabuj. (Efes 4:26, 27) Chinech chitin kwikepish ni kutakaman chakwel muntu alond anch “Nlikishinaku amboku mulong wa kukurumbukin,” pakwez kusal mwamu kukat kukwash kupwish milong ni kusal anch ambay a uruw ikal pamwing.

MASWIR MA PAKAMPWIL MULONG WA RIY

7, 8. (a) Yiyul ik yipaninay Bibil yitadina pa mulong wa kumanijan kwa ikundj ni mband mu uruw? (b) Mulong wak ambay a uruw afanyidin kumekeshijadin rukat rikurikina?

7 Bibil upanin yiyul yiwamp yikutwisha kuyikwash ambay a uruw kwikal ni chitongijok chiwamp piur pa kumanijan kwa ikundj ni mband mu uruw. (Tang 1 Korint 7:3-5.) Chid cha usey nakash kud ikundj ni mband kushinshikin maswir ni yovil ya umwing ni mukwau. Anch ikundj kakwetap riy mulong wa mukajend, chikutwish kumukasiken mband kusanger kumanijan kwa ikundj ni mband. Amakundj afanyidin kushakam ni akajau “mudi mudia ronganyin.” (1 Pita 3:7,TMK.) Kumanijan kwa ikundj ni mband kufanyidinap kwikal kwa kumusadish muntu ku usu ap kwit, pakwez kufayidin kwikal kudiokila ku muchim. Ikundj ukutwish kwitiy kapamp kamwing kusut mband. Pakwez ikundj ni mband afanyidin kumekesh maswir pa chisu chiwanyidina.

8 Bibil kaletinap mbil piur pa mutapu ufanyidinau ikundj ni mband kumekeshijadin rukat. Pakwez ulondin piur pa rukat riner. (Muminy wa Salomon 1:2; 2:6) Ambay a uruw in Kristu afanyidin kumekeshijadin rukat rikurikina umwing ni mukwau.

9. Mulong wak chiyipin kwikal ni chitongijok cha masandj ni muntu wakad kwikal mbay wetu wa uruw?

9 Anch tukwet rukat rikurikina mulong wa Nzamb ni mulong wa mutej netu, tukutwishap kulik anch muntu kampand ap chom kanang chiyipisha uruw wetu. Amwing ashikena kuziyish ap kuyipish uruw wau mulong wa kwipan nakash mu kutal pornografi. Tufanyidin kujijamen maku mawonsu ma pornografi ap mitapu yawonsu yiyimp yisangareshina ya masandj. Tufanyidin kand kwipuk kusal chom chin chawonsu chimekeshina anch  twizezin ni muntu kanang wakad kwikal mbay wetu wa uruw, mulong kusal mwamu kud kuburen rukat. Tufanyidin kwijik anch Nzamb wij yitongijok ni yisal yetu yawonsu. Chinech chikutukwash tukasikesha maswir metu ma kumusangaresh Nzamb ni kushal ashinshamena kud mbay wetu wa uruw.—Tang Mateu 5:27, 28; Hebereu 4:13.

ANCH MU URUW MWIKAL MILONG

10, 11. (a) Mutapu ik ukatau antu avud kujip uruw? (b) Chom ik chilondinay Bibil piur pa kwaurik? (c) Chom ik chikutwisha kuyikwash ambay a uruw alika kwaurik?

10 Ambay a uruw amwing akutwish kukwat mupak wa kwaurik ap kujip uruw anch milong yikash yipwilap. Mu jingand jimwing, ambay a uruw amwing akat kujip uruw. Chakin kamu, chisal chinech chikusadikangap yisu yivud mu chikumangen cha win Kristu. Pakwez, ambay a uruw avud in Kristu akweting milong yikash mu uruw wau.

11 Bibil upanin yiyul ey: “Mband udia ku uruw kangal [waurik] nend nfumwend, bwat. Pakwez anch wadiokal ku uruw, kangal kand wachik, ching anch wachirik kudi nfumwend. Chawiy chimwing, niyend ikundj kafanyidinap kulikijan nend mukajend.” (1 Korint 7:10, 11) Ambay amwing a uruw akutwish kutong anch milong yau yipandaken chawiy chifanyidin kwaurik. Pakwez Yesu walejana milong yikutwisha kusadik anch antu aurik palonday chitongijok cha Nzamb cha kwinsambishin piur pa uruw palonday anch: “Muntu kafanyidinap kwauril antu abombakeshay Nzamb.” (Mateu 19:3-6; Disambishil 2:24) Chawiy Yehova ukatining anch amakundj ni amband ashakama pamwing. (1 Korint 7:39) Etu awonsu tufanyidin kuvurik anch Yehova ukuturumburish mulong wa yisal yetu. Chinech chikutwish kutukwash tupwisha milong pakad kulab kurutu milong yiney yikala yikash.

Pakwez, chid chiwamp kuman mutapu ukatau ambay a uruw avud in Kristu kupwish milong yau mulong akatining anch Nzamb ayitakela

12. Yom ik yifanyidinau ambay a uruw kushinshikin kurutu aurika?

12 Mulong wak ambay a uruw amwing akweting milong yikash mu uruw? Amwing kachingejinap kuman yom yiyimp mu uruw wau chawiy akat kuziy ap akat kujiman. Yisu yivud, kuding milong kushalijan yikata kushiken kulondwish mutapu wamulilau muntu ap mutapu ukatay kusal. Milong ku maku ap kulik kovijan mulong wa mutapu wa kusadin nfalang ap mutapu wa kulil an, yom yiney yikat kulet milong nakash. Pakwez, chid chiwamp kuman mutapu ukatau ambay a uruw avud in Kristu kupwish milong yau mulong akatining anch Nzamb ayitakela.

13. Mayingishin ik makin makusala anch ambay a uruw aurika?

13 Kukutwish kwikal mayingishin makin makutwisha kusal anch ambay a uruw aurika. Milong yikash mud kulik kuwanyish maswir ma mu dijuku, kuyimesh mar nakash, ap kutek mwikadil wa mwin Kristu mu ubaj, mawiy mayingishin makutwisha kusal anch muntu aurika. Anch ambay a uruw akwet milong yikash, afanyidin kwit ukwash kud amakurump. Amakurump  inay akwet ronganyin nakash ni akutwish kuyikwash ambay a uruw chakwel asadina yiyul ya Nzamb mu mwom wau. Ni anch ambay a uruw amwit Yehova spiritu wend utumbila, ukuyikwash chakwel asadina mbil ja mu Bibil ni kumekesh mikadil ya win Kristu. (Galatia 5:22, 23) [2]—Tal mazu ma kwinsudien.

14. Yom ik yilondinay Bibil piur pa in Kristu akweta ambay a uruw akad kwikal in kumwifukwil Yehova?

14 Bibil ulejen anch kud mayingishin mawamp mafanyidinau ambay a uruw kushakam pamwing ap anch mbay umwing kadiap mwin kumwifukwil Yehova. (Tang 1 Korint 7:12-14.) Mbay wakad kwiyitiyij “utumbil” mulong amwatin ap wachikin kudi kashalapol wa Nzamb. Anau akutwish kuyiman mud “atumbil” ni ad mudiking dia Nzamb. Paul wayikasikesha ambay in Kristu anch: “Ov, ey mband mwin Kristu wij nchik anch ukez kumupandish nfumwey? Ap niyey ikundj mwin Kristu wij nchik anch ukez kumupandish mukajey?” (1 Korint 7:16) Kud yilakej yiwamp yivud ya amakundj ni amband in Kristu ayikwasha ambay nau a uruw chakwel ikala atushalapol a Yehova.

15, 16. (a) Chiyul ik chipaninay Bibil kud amband in Kristu akweta anfumwau akad kwikal atushapol a Yehova? (b) Chitongijok ik chifanyidinau kwikal nich in Kristu “anch ngachik ap ngatan wakad kwitiyij ukatina kwaurik ni mukajend ap nfumwend”?

15 Kambuy Pita wayiyula amband in Kristu anch afanyidin kuziyin kud anfumwau palonday anch, “ap anch amwing a pakach pau kitiyinap nchik dizu dia Nzamb, ukutwishany kuyipwitany ku ritiy pakumanau yisalijok yen yiwamp. En kiukwikalanyap nich kuswir kwa kulond dizu, mulong awiy akez kuman yaku yen ya zwang ni kalimish ken.” Pa ndond pa kulondang piur pa yitiyij yau chisu chawonsu, mband ufanyidin chisu chawonsu kumukwash nfumwend itiya uyakin pakumumekeshinay “muchim udimukina wa kwitudish,  muchim winou ukwet usey upandakena kujimb kurutu kwa Nzamb.”—1 Pita 3:1-4.

16 Chikwikal nchik anch mbay wa uruw wakad kwitiyij wakwat mupak wa kwaurik? Bibil ulondin anch: ‘Anch ngachik ap ngatan wakad kwitiyij ukatina kwaurik ni mukajend ap nfumwend, mwitiyany kwend asala mwamu. Mu chom mudi chinech ngachik ap ngatan mwin Kristu kamukasinap ku chijil cha uruw, mulong Nzamb watutazuka etu kushakam mu chisambu.’ (1 Korint 7:15) Ap anch kwaurik kukutwish kwalet chisambu kanang, mbay mwin Kristu kafanyidinap kutong anch ufanyidin kwatan ap kwachik kukwatijan ni Bibil. Pakwez, kafanyidinap kumushindil mbay nend wa uruw chakwel achirika. Kupwa ka machuku, mbay wa uruw wakad kwitiyij ukutwish chad kukwat mupak wa kuchirik mulong wa kuwapish uruw wau. Ni mu machuku ma kurutu mbay wa uruw wakad kwikal mwin kwitiyij ukutwish pamwing ap kwikal kashalapol wa Yehova.

YOM IK YIFANDINA KWIKAL YA KUSAMBISH MU URUW WETU?

Anch twashinshikin pa difukwil dietu mulong wa Yehova, tukutwish kwikal ni musangar uvud mu uruw wetu (Tal paragraf 17)

17. Chom ik chifanyidina kwikal cha kusambish mu uruw wa in Kristu?

17 Mulong tud mu machuku ma “nsudien,” tumen “mar makash.” (2 Timote 3:1-5) Chawiy tukweta kuswir kwa diking dikash ni urund wa piswimp ni Yehova. Paul wafunda anch: “Chisu chakep kal. Kudiokal katat chifanyidin angatan kushakam mudi katenap kwau, . . . chifanyidin antu akata kusadil yom ya mangand minam ikala mudi kasadidilap kwau yom yiney.” (1 Korint 7:29-31) Paul kalondap anch antu atena afanyidin kuyidiul ambay nau a uruw bwat. Pakwez, mulong tushich mu machuku ma nsudien, tufanyidin kutek pa ndond ya kusambish difukwil dietu dia Yehova mu mwom wetu.—Mateu 6:33.

18. Mulong wak chitwishikina kud in Kristu kwikal ni uruw usangareshina?

18 Mu yisu yiney yiyimp, tumen mauruw mavud mafil. Ov, chitwishikin kwikal ni uruw usangareshina? Mwaning, ching anch twashal piswimp ni Yehova ni antu end, twasadin mbil ja mu Bibil ni twitiy ukwash wa spiritu utumbila wa Yehova. Anch twasal mwamu, tukulimish ‘chabombakeshay kal Nzamb’—Marko 10:9.

^ [1] (paragraf 5) Majin mamwing amaswimpin.

^ [2] (paragraf 13) Tal buku ulondina anch “Ilamany Ayinen mu Rukat ra Nzamb,” wenjin, “Chilondilay Bibil Piur pa Kujip Uruw ni Kwaurik,” paj 219-221.