Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 7 , 2016

 BIBIL UKARUMWIN MWOM YA ANTU

Nakanganya Tupamp Tuvud Kurutu Nitwisha

Nakanganya Tupamp Tuvud Kurutu Nitwisha
  • MUVU WAVADIKAY: 1953

  • NGAND YA CHIVADIK: AUSTRALIE

  • RUSANGU: MWIN KUTAL NAKASH PORNOGRAFI

CHINADINGA PASAK:

Tatukwam wadiokala mu Australie ni waya kushakam mu Allemangne mu muvu wa 1949. Waya kukimb mudimu ku sosiete umwing wa kupund mayal ma usey wading mu ul wa Victoria. Kwawiy kwamwatinay maku, ni kwawiy navadikina mu muvu wa 1953.

Kupwa kwa mivu yikemp, maku wasambisha kwilej Bibil pamwing ni Atuman a Yehova, mawiy mafundish mam ma kusambish ma Bibil madinga mu manangu mam. Pakwez, tatuku kitiyijangap relijon ap umwing. Wikala mwin chisum, mwin kwovishan wom, ni maku wamwovanga wom nakash. Pakwez, maku wadandamena kwilej Bibil mu ujindj ni wakata malejan minam. Padingay Tatuku kwamwamu, maku watufundishang am ni mpanyam yom yilejengay. Watulejang piur pa paradis ukeza kwikal pa divu ni mutapu tukutwisha kwikal ni musangar anch twalondul mbil ja mu Bibil.—Kuseng 37:10, 29; Isay 48:17.

Pinawanyisha mivu 18, nafanyina kudiokal ku chikumbu mulong wa mwikadil wa chisum wa Tatuku. Ap anch nitiyija yom yanfundishangay Maku yidiokila mu Bibil, pakwez nasangerap usey wa malejan minam. Chawiy, natwishap kushakam kukwatijan ni malejan minam. Nasambisha kusal mudimu wa kasu ka nzembu mu sosiete wa kupund mayal ma usey. Pinawanyisha mivu 20, natana. Pitwasala mivu yisatu mu uruw twavala mwan mband wa kusambish, namana chading cha usey mu mwom wam. Nijika anch Bibil wafanyina kutukwash mu dijuku dietu, chawiy nakwata mupak wa kusambish kwilej Bibil ni Kaman wa Yehova. Pakwez, mukajam kayikatap Atuman. Pinakumangana ku chikumangan chau chimwing, wanleja nich ujim anch—ufanyidin kwimik kwilej Bibil ap ufanyidin kudiokal mu dijuku. Nadingap ni usu wa kulond, kupwa namuleja mukajam anch nikwilejap kand ni Atuman a Yehova. Kupwa nasambisha kwinan mulong nakanganya kulondul yom yinadinga nija anch yidi yiwamp.

Dichuku dimwing murund nam wa mudimu wasambisha kwinlej pornografi. Yading yisangareshina ni yiwamp ni yansala anch nisambisha kwifish nich. Pinavurika yom nileja mu Bibil, nitiyija chakin kamu anch Nzamb ukwimpup. Pinadandamena kutal yipich yiney yijondina, mwikadil wam pa mulong utadina pornografi waswimpa. Kupwa kwa machuku nasambisha kutal nakash pornografi.

Kupwa kwa mivu 20, nasambisha kutong nakash pa yom yafundishangay maku. Yisal yam yading ni kumekesh yom yadinga mu  manangu mam. Mazu mam mading mayimp ni maswimbu mam mading ching ma masaal. Nakudisha chitongijok chijondina piur pa kumanijan kwa ikundj ni mband. Ap anch nadandamena kwikal ni mukajam, pakwez, nading kand ni amband akwau. Dichuku dimwing, natala mu dikalash ni natonga anch ‘Nikatinap kwam.’ Mwikadil wa kalimish nadinga nich waswimpa ni mwikadil wa kwifish nich.

Uruw wetu wapwa ni mashakamin mam mikala nayimp. Kupwa, namulembila Yehova nich muchim wam wawonsu. Nachirikina dilejan diam dia Bibil, ap anch nasala yom yiyimp mu mivu yivud. Mu chisu chinicha, tatuku wafa ni maku watambula dibatish mulong wa kwikal Kaman wa Yehova.

MUTAPU WAKARUMUNAY BIBIL MWOM WAM:

Padinga kushalijan nakash pakach pa yom nadinga ni kusal ni yom yalonday Bibil. Pakwez, pa chisu chinicha nakwata mupak wa kwikal ni chisambu cha mu manangu cha kushilamu kwa mu Bibil. Nawapisha mutapu wam wa kulond ni mwikadil wam uyimp. Nakwata kand mupak wa kulik mwikadil uyimp, wa kusengan masengan ma nfalang ni kulik kuna nakash ni kumwiy mukurump wam.

Arund nam a ku mudimu kateshap mulong wak naswimpa nakash mwamu. Mu mivu yisatu, asambisha kwinsarumun chakwel nichirikin yom yiyimp nasalang. Anch nachirikin yom yikwau nasalang mudi kujiman nakash ap kulond mazu mayimp, arund nam asangarang: Alonda anch: “Ah, Josef wachirikin kal kand maswimbu mey.” Mazu minam mangovishanga kuyip mud ik! Namana kamu anch nakanganya.

Ndond yam ya kusadin mudimu yading yizwil nich pornografi ku machin ap ku mapaper. Arund nam a ku mudimu ading ni chaku chakutumijadin yipich yiyimp mu ma ordinater mau, yipich yiney nadinga nich pakur. Nasal usu wa kwiyep kutal pornografi, pakwez mupak wau wading wa kwingoz mu mitapu kushalijan. Nachirika kuya kumutal muntu wafundishanga Bibil chakwel ankwasha ni ankasikesha. Wantesha kamu nawamp pinamuleja. Wasadina maverse ma pakampwil ma mu Bibil, mulong wa kwinlej mutapu wa kurish ni mwikadil winou wa kutal pornografi ni wankasikesha chakwel nidandamena kukimb ukwash wa Yehova kusutil mu kulembil.—Kuseng 119:37.

Dichuku dimwing twashakama pamwing ni arund nam a ku mudimu. Pitwadinga nau pamwing, nayileja antu ayinkisha maar maswejina nakash amakundj aad ading ni chaku kuna, pakwez alikin kal. Arund nam awonsu alika alond anch: “Ufanyidinap kusal mwamu! Amakundj inay ading asadin kal usu wa kulik kuna maar!” Kupwa nakula anch: “Mwaning niyam nikutwishap kusal mwamu.” Kudiosh pa dichuku dinidia, amakundj inay ijika kamu anch nasadin kal usu wa kulik kutal pornografi ni kakutwishap kwinshidil chakwel nichirikina kand mwikadil wam wa pakur.

Kupwa kwa machuku, nich ukwash uvud wa Yehova nawina kamu chaku chinech cha kutal pornografi. Mu muvu wa 1999, natambula dibatish ni nikala Kaman wa Yehova, chidi cha musangar mulong nipana kapamp ka kaad mulong wa kwikal ni mwom uwamp ni usangareshina.

Katat nijik kal mulong wak Yehova ukisin yom nadinga nikatina pakur. Mulong udi Tatuku mukatish, wakata anch niyepa ku ubaj ukata kudiokal ku kutal pornografi. Mazu mafundinau mu Jinswir 3:5, 6 madi kamu makin! Verse winou ulondin anch: ‘Muchingejina [Yehova] ni muchim wey wawonsu. Kangal wachingej ronganyin rey amwiney. Mu jinjil jey jawonsu itiyij kudi Ndiy, ni Ndiy ukez katenchik jinjil jey.’ Mbil ja mu Bibil jidiap kusu mulong wa diking pakwez, jidiaku mulong wa kumukwash muntu chakwel awina mwikadil kanang uyimp.—Kuseng 1:1-3.

MUTAPU NATANA YIYUKISH:

Pakur nading nifishin nich, pakwez katat alimishin ni nikwet chisambu cha mukach. Nikwet mashakamin ma mwom mishitwila ni niyovil anch Yehova wanlikishidin ni winkwashin. Mu muvu wa 2000, namwata Karolin mwin Kristu muwamp umukatina nakash Yehova mudi am. Tukwet chisambu mu chikumbu chetu. Twiyovil anch tukwet musangar wa kwikal mukach mwa in Kristu ishitwila ni amekeshina rukat ra ukadivar adia pa mangand mawonsu.