Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 7 , 2016

Mulong Wak Tufanyidin ‘Kudandamen Kuchish ku Mes’

Mulong Wak Tufanyidin ‘Kudandamen Kuchish ku Mes’

“Kiwijanyap dichuku dikez kushikay Nsalejen.” —MATEU 24:42.

MIMINY: 136, 54

1. Rumburil mulong wak chidia cha usey kuchish ku mes mulong wa chisu tudia ni mulong wa kwijik yom yisadikina pa ndond tudia. (Tal chipich cha kwinsambishin.)

CHITENTAM chidi piswimp ni kusambish. Mwin kutakel yikunku wakandam ku chimet ni wayilangwish antu awonsu. Mizik yidi piswimp ni kusambish. In kukumangan ijik kal anch chidi chisu cha kushakam. Akimbin kutesh mizik yiwamp, ni akat kutong kurutu mulong wa ma diskur makusadika. Pakwez, kudi pamwing ap antu amwing kababelap kwau palondinay mwin kutakel yikunku ap kateshinap kwau anch mizik yasambishang kal. Kijap kwau anch chitentam chasambishang kal, ni adandamedin kwau kwendangan ap akat kwambamb ni arund nau. Yom yiney yimekeshin yom yikutwisha kutushiken anch tubabelap mulong wa chisu tudia ni mulong wa kwijik yom yisadikina pa ndond tudia. Dined didi dilejan dia usey kudi etu mulong kurutu oku kukusadik yom yijim, ni tufanyidin kwirijek mulong wa yom yiney. Yom yiney yom ik?

2. Mulong wak Yesu wayileja in kwilej end anch ‘adandamena kuchish ku mes’?

2 Yesu Kristu wayibabesha in kwilej end piur pa usey wa kushal achishina ku mes ni kwirijek mulong wa “disudiel dia mangand.” Wayileja anch: “Babalany, chishany ku mes, mulong kiwijanyap chisu chikushika yom yiney.” Kupwa wayileja kand tupamp  tuvud anch: ‘Dandamenany kuchish ku mes.’ (Mateu 24:3; tang Marko 13:32-37.) Rusangu ridia mu Mateu rimekeshin kand anch Yesu wayibabesha in kwilej end piur pa chom chinech. Wayileja anch: ‘Dandamenany kuchish ku mes, mulong kiwijanyap dichuku dikez kushikay Nsalejen.’ Ni wayibabesha kand anch: “Chifanyidin kand niyen kwirijek yisu yawonsu, mulong Mwan a Muntu ukwez pa chisu chiwakadiany en kwijik.” Wachirikina kand anch: ‘Chawiy, Dandamenany kuchish ku mes, mulong kiwijanyap dichuku ap chisu.’—Mateu 24:42-44; 25:13.

3. Mulong wak tufanyidin kutesh kubabesh kwa Yesu?

3 Atuman a Yehova akat kutesh kubabesh kwapanay Yesu. Twij anch tushich “ku disudiel dia mangand” ni ‘mar makash’ makusambish piswimp ap! (Daniel 12:4; Mateu 24:21) Mudi mwatakelay kulonday Yesu, antu a Yehova alejen rusangu ruwamp piur pa Want mu mangand mawonsu. Pa chisu chawiy chimwing, tumen jinjit, mayej, kuzal kwa divu, ni kabwakat mu jingand jivud. Kudi kanrumbangesh ka chirelijon, ni kujipan, ni uyimp upandakena kusutamu pakur. (Mateu 24:7, 11, 12, 14; Luka 21:11) Katat tuchingedin kamu ni mushiku mulong wa chisu chikwezay Yesu ni kuwanyish chitongijok cha Tatukwend.—Marko 13:26, 27.

DICHUKU DIASEJ KAL PISWIMP !

4. (a) Mulong wak tukutwish kwitiyij katat anch pamwing ap Yesu wij chisu chikushika Harmagedon? (b) Ap anch twijap chisu chikusambisha mar makash, tukutwish kwikal nich kashinsh ka chom ik?

4 Pituyilinga ku chitentam, twijing chisu chikusambisha chikunku ni chikunku. Pakwez, chitukasikedin kwijik kamu nawamp chisu chikusambisha mar makash. Padingay pa divu Yesu walonda anch: “Kwikil muntu wija kushik kwa dichuku dinidia ap kwa chisu chinicha. [Angel] a mwiur kijap, ap Mwan, ching kusu Tatuku ndiy wija amwinend.” (Mateu 24:36) Mwawiy, mulong Yesu ndiy ukutakela njit ja Harmagedon, wij pamwing ap nawamp chisu chikusadika njit jinej. (Kujingunik 19:11-16) Pakwez, etu kushik ni katat twijap machuku ma ngond ap chisu chikweza disudien. Chawiy chidia cha usey kudi etu kudandamen kuchish ku mes. Yehova wakwatin kal mupak uwanyidina wa chisu chikusambisha mar makash, ni dichuku ni dichuku disutina ditusejishin piswimp ku mar makash. “Kichikulabap, bwat!” (Tang Abakuk 2:1-3.) Mulong wak tufanyidin kwikal ni kashinsh ka yom yiney?

5. Pan chilakej chimekeshina anch uprofet wa Yehova ukat kuwanyin kamu pa chisu chiwanyidina.

5 Uprofet wa Yehova wawanyina kamu pa chisu chiwanyidina! Chilakej, tongin piur pa dichuku diayikolay antu end mu Idjibit. Mading machuku ma ngond 14 ngond wa Nisan muvu wa 1513 kurutu kwa Kristu kwikalaku. Moses wafunda piur pa dichuku dined anch: “Chiyasuta mivu yitot yinying ni makum masatu, pa dichuku dinidia kamu, yisak yawonsu ya [Yehova] yadiokala mwi ngand ya Idjibit.” (Kubudik 12:40-42) Machuku ma ngond 14 ngond wa Nisan mu muvu wa 1943 kurutu kwa Kristu kwikalaku, mu muvu wa 430 kurutu kwa kuyikol in Isarel, kushilamu kwa Yehova kwa kuyiyukish an a Aburaham kwawanyina kamu. (Galatia 3:17, 18) Yisu yimwing, Yehova wamuleja Aburaham anch: ‘majuku mey makeza kwez makez kushakam mwi ngand yau aeny, mwinimwa awiy akez kwikal aswik, akez kuyizengol kudi antu akwau mu mivu yitot yinying.’ (Disambishil 15:13; Midimu 7:6) Mivu 400 yasambisha mu muvu wa 1913 kurutu kwa Kristu kwikalaku pasambishay Isamael kumuzengol Isak. Yapwa dichuku diyikolau in Isarel mu Idjibit. (Disambishil 21:8-10; Galatia 4:22-29) Mwawiy, yitot ya mivu kurutu, Yehova wateka kamu dichuku diwanyidina diafanyinay kuyikol antu end!

6. Mutapu ik tukutwisha kwikal ni kashinsh anch Yehova ukuyikol antu end?

6 Joshua wading umwing wa in Isarel akolau  mu Idjibit. Kupwa kwa mivu yivud, wayivurisha antu anch: ‘En wijany ni michim yen, ni mipim yenen yawonsu anch, kushilamu kwawonsu kuwamp kwashilayimu Yehova Nzamb wen kudi en, kwikil chom ap kusu chimwing chaburena kuwanyin. Yawonsu yasadika mulong wenen. Kwikil chom ap chimwing chaburena, bwat.’ (Joshua 23:2, 14) Yehova washilamu kal mulong wa kuyikol antu end ku mar makash ni kuyinkish mwom wa chikupu mwi ngand yisu. Ni tukwikal ni kashinsh anch kushilamu kwend kukwikal kwakin. Chawiy anch tukatin kwikal mwi ngand yisu, tufanyidin kudandamen kuchish ku mes.

DANDAMEN KUCHISH KU MES CHAKWEL UPANDA

7, 8. (a) Mudimu ik wadingay kusal kalam mu yisu ya pakur, ni yom yiney yitufundishin ik? (b) Let chilakej cha yom yikutwisha kushiken anch kalam walal ku mudimu.

7 Tukutwish kwilejin ku atulam alamanga misumb yisu ya pakur. Misumb yivud, kuwejinaku Yerusalem, yading ayinyigumukin ni mbumbu jilemp chakwel akankuny kakutwishap kwandam. Atulam imanang pa mbumbu jinej, ni pinipa akutwish kuman ngand yinyingumukina musumb. Atulam akwau imanang ku yis ya musumb. Antu inay ading afanyidin kudandamen kuchish ku mes uchuku ni muten, ni anch aman akankuny akat kwez, ababeshang antu adia mu musumb. (Isay 62:6) Ading ij mutapu chading cha usey kucha ku mes ni kubabal mulong wa yom yikusadika. Anch kasadinap mwamu, antu avud akutwish kufa.—Ezekiel 33:6.

8 Josephus, wafunda rusangu ra in Yuda, warumburila mutapu watwishau in Rom kwandam mu Yerusalem mu muvu 70 wa Kupwa kwa Yesu kufa. Atulam ading alamina mutambu umwing wa musumb alala tul. Mudi chibudikin, amasalay in Rom atwisha kwandam mu musumb. Aya ku tempel, akish kasu, ni ayipisha jindond jikwau ja mu Yerusalem. Chinech chading chikunku cha nsudien cha mar makash makad kal kumanangau in muchid wa Yuda.

9. Antu avud nlel kababelap ku yom ik?

9 Mant mavud ma mangand malamin mimbu yau nich ukwash wa amasalay ap kand ni yom ya kuking nich ya tekinoloji wa katat. Mant minam machishining ku mes mulong wa muntu mwawonsu ap chom chawonsu chikutwisha kuyipish diking dia ngand yau. Pakwez mijap kwau anch kudi want ukweta usu nakash udia mwiur, utakedinau kudi Yesu Kristu. Want winou ukurishikish mant ma pa mangand mawonsu. (Isay 9:6, 7, 56:10; Daniel 2:44) Tuchingedin kamu nich mushiku kushik kwa dichuku dined ni tukatin kwikal irijekina mulong wa dichuku dined. Chawiy, tuchishin ku mes mulong wa uprofet wa Bibil ni tudandamedin kumusadin Yehova nich kushinshaman.—Kuseng 130:6.

KANGAL TWIKAL NI KAMPUW

10, 11. (a) Yom ik tufanyidina kubabel, ni mulong wak? (b) Yom ik yikwinkishina kashinsh anch Djabul uyibachikin antu chakwel avuramen uprofet wa Bibil?

10 Tongin kalam uchishina ku mes uchuku wawonsu. Mu masaa makemp piswimp ni kucha chikumukasiken kuchish ku mes mulong waziyang kal nakash. Chilik chimwing kand, tudi mu machuku ma nsudien ma mangand minam. Pasejina disudien piswimp, mar mayila kupandakan makutwish kusal anch chitukasikena kucha ku mes. Chikwikal cha ushon mud ik anch tudandamedinap kuchish ku mes! El amboku twisambinany yom yisatu yikutwisha kusal anch tulika kwikal achila ku mes.

11 Djabul ukat kuyidimb antu. Udi “mwin kutakel wa mangand minam.” Machuku makemp kurutu Yesu afa, wayivurisha in kwilej end tupamp tusatu piur pa chom chinech. (Yohan 12:31; 14:30; 16:11) Djabul ukat kusadin relijon wa makasu mulong wa kuyidimb antu. Chawiy chisadina anch antu avud nlel kijap kwau uprofet wa Bibil umekeshina patok anch disudien dia mangand minam didi  piswimp. (Sofoniy 1:14) Chakin kamu, Satan ‘wabwikin kal manangu ma antu.’ (2 Korint 4:3-6) Mudi chibudikin, pitukata kuyilej antu anch disudien dia mangand minam didi piswimp ni anch Kristu uyikedin katat, antu avud pakach pau kakatiningap kwau kutesh. Yisu yivud alondining anch, “Nisangaredinap kutesh.”

12. Mulong wak tufanyidinap kumulik Djabul atudimba?

12 Ap anch antu avud kakatap kusanger uprofet wa Bibil, tufanyidinap kuziy mulong wa mwikadil wau. Twij mulong wak chidia cha usey kudandamen kwikal achila ku mes. Paul wayileja akadivar nend anch: ‘Mulong en ayinen wijany nawamp anch, dichuku dia Yehova disejin piswimp.’ Wawejaku kand anch: “Mudi mukat kwezay mwij uchuku.” (Tang 1 Tesalonik 5:1-6.) Yesu watubabesha anch: “Chifanyidin niyen wirijekany kand, mulong Mwan a Muntu ukwez kwa kukashimuk pa chisu chiwakadiany en kwijik.” (Luka 12:39, 40) Kurutu oku, Satan ukez kand kuyidimb antu kusutil ku kuyitongish anch ku kwikal “chisambu ni diking” mu mangand. Kupwa, dichuku dia Yehova dikushik kapamp kamwing ni antu akez kwinan. Chidi nchik piur petu? Anch tukimbin twirijek mulong wa dichuku dined ni kulik kwikal adimbinau mudi antu akwau, tufanyidin “kuchish ku mes ni kubabal.” Chawiy, tuswirikedin kutang Dizu dia Nzamb pichuku pichuku ni kutongijokin pa yom yitulejinay Yehova.

13. Mutapu ik spiritu wa mangand minam ukwetay usu padiau antu, ni mutapu ik tukutwisha kwipuk chibachikin chinech cha ubaj?

13 Spiritu wa mangand ukwet chibachikin chiyimp pa mutapu wa kutong kwa antu. Antu avud atongining anch kakwetap kuswir kwa kumwijik Nzamb. (Mateu 5:3) Pakwez, akat kusadin chisu chau ni usu wau mulong wa kwikal ni yom yivud yiletina mangand minam. (1 Yohan 2:16) Kusutamu pakur, kudi mitapu kushalijan ya kwipuwangej yiyisangareshina antu ni yikat kuyikasikesh antu awanyisha maswir ma yom yikatinau. (2 Timote 3:4) Yom yiney yawiy yikata kuyiletin antu kampuw pa yom yikweta usey nakash, ni kakatap kutongin piur pa urund wau wa piswimp ni Nzamb. Chawiy chasala anch Paul ayivurisha in Kristu anch afanyidin “kulank pa tul” mukulik kushinshikin mashakamin masangareshina maswir mau.—Rom 13:11-14.

14. Kubabesh ik tutanina mu Luka 21:34, 35?

14 Tukatin anch spiritu wa Nzamb atutakela mu mutapu wetu wa kutong, kulik spiritu wa mangand. Kusutil ku spiritu winou, Yehova ukat kutukwash tutesha nawamp piur pa yom yikushikena. (1 Korint 2:12) [1] (Tal mazu ma kwinsudien.) Pakwez, tukwet kuswir kwa kwikal ababela. Ap mu yom yitumena anch yikwet usey ukemp mu mwom wetu yikutwish kutuletin kampuw mulong wa kumusadin Yehova. (Tang Luka 21:34, 35.) Antu amwing akutwish kutwel anch tusupin mulong tukat kwitiyij anch tudi mu machuku ma nsudien ma mangand minam. (2 Pita 3:3-7) Pakwez, tufanyidinap kuyilik atuziyisha. Twij patok anch disudien didi piswimp ap. Anch tukatin anch spiritu wa Nzamb ikala ni usu padi etu, tufanyidin kukumanganang chisu chawonsu pamwing ni akadivar netu.

Ukutwish kusal yom yawonsu ukutwisha kusal chakwel ‘udandamena kuchish ku mes’? (Tal paragraf 11-16)

15. Yom ik yamushikena Pita, Jakobu ni Yohan, ni mutapu ik yikutwisha niyetu kutushiken?

 15 Kuziy kwetu kukutwish kwasal chitukasikena kwikal ababela. Yesu wading wij nawamp kuburen kuwanyin kwa antu ni kuziy kwau. Vurik yom yasadika uchuku kurutu kwa rufu rend. Ap anch Yesu wading uwanyidin, wading wij anch pakushal ushinshamena chading chifanyidin kumulembil Tatukwend chakwel amukwasha. Chawiy, Yesu wayileja atwimbuy end, Pita, Jakobu ni Yohan anch achisha ku mes chisu chadingay ni kulembil. Pakwez atwimbuy kijikap usey wa kushal achishina ku mes. Aziya, kupwa alala. Yesu nindiy waziya, pakwez washala uchishina ku mes mu kumulembil Tatukwend. Atwimbuy niyawiy afanyina kulembil pa chisu chawiy chimwing kand.—Marko 14:32-41.

16. Kukwatijan ni Luka 21:36, yom ik yitulejinay Yesu chakwel ‘tuchisha ku mes’?

16 Chom ik chikutukwasha twikala ‘achishina ku mes’ ni kwirijik mulong wa dichuku dia Yehova? Tufanyidin kukudish maswir ma kudandamen kusal yom yiwamp. Pakwez, kiyidiap ching yiney. Machuku makemp kurutu Yesu afa, wayileja in kwilej end anch afanyidin kudandamen kulembil mulong wa kutambul ukwash wa Yehova. (Tang Luka 21:36.) Mulong wa kushal ababela mu yisu yiney ya nsudien, tufanyidin niyetu kumulembil Yehova yisu yawonsu.—1 Pita 4:7.

DANDAMENANY KUCHISH KU MES

17. Mutapu ik tukutwisha kwikal nich kashinsh anch twirijekin mulong wa yom yikweza mu machuku ma kurutu?

17 Yesu walonda anch disudien dikwez “pa chisu chiwakadiany en kwijik.” (Mateu 24:44) Chawiy, tufanyidin kwikal irijekina chisu chawonsu. Katat chidiap chisu cha kupakish kukimb mashakamin malondinau kudi antu adia mu mangand ma Satan anch maletin musangar. Chidi kwau mudi chilat. Pakwez, kusutil mu Bibil, Yehova ni Yesu atulejin mutapu tufanyidina kudandamen kuchish ku mes. Chawiy lel, tushinshikinany nakash ku uprofet wa mu Bibil ni mutapu uyila mu kuwanyin. Ni tukutwish kudandamen kumusejin Yehova piswimp ni kutek pa ndond ya kusambish Want wend mu mwom wetu. Chawiy chikutukwasha twirijeka pakweza disudien. (Kujingunik 22:20) Chakwel tupanda tufanyidin kusal mwamu!

^ [1] (paragraf 14) Tal shapitre 21 wa buku Want wa Nzamb Wasambishin Kal Kuyikel!