Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 7 , 2016

Kupalangesh Rusangu Ruwamp ra Ranaken

Kupalangesh Rusangu Ruwamp ra Ranaken

“Kulejan rusangu ruwamp ra ranaken ra Nzamb.” —MIDIMU 20:24, TMK.

MIMINY: 10, 25

1, 2. Mutapu ik wamekeshay kambuy Paul anch wamujikitisha Nzamb mulong wa ranaken rend?

KAMBUY Paul walonda patok anch: ‘ ranaken ra Nzamb rangikishau kudi [Nzamb] ridiap ra chamwamu.’ (Tang 1 Korint 15:9, 10.) Paul wading wij patok anch wading kadikal amwovilap riy kudi Nzamb. Wading mwin kuyizengol in Kristu.

2 Machuku makemp kurutu afa, Paul wamufundina Timote anch: “Namujikitish Kristu Yesu Nsalejetu, ndiy wanginkisha usu wa kusal mudimu. Namujikitish mulong ndiy wanmana am anch niwanyidin, chad wantek ku mudimu wend.” (1 Timote 1:12-14) Wading mudimu ik? Paul wayileja amakurump a mu chikumangen cha Efes anch: ‘Pakwez kinichingejinap anch mwom wam ukwet usey kudi am amwinam. Nikimbin kusu kuwanyish chisend ni kupwish mudimu wanginkishau kudi Nsalejetu Yesu. Mudimu winou udi wa kulejan rusangu ruwamp ra ranaken ra Nzamb.’—Mudimu 20:24.

3. Mudimu ik wa pakampwil wamwinkishau Paul? (Tal chipich cha kwinsambishin.)

3 “Rusangu ruwamp” ralejanay Paul rading rusangu ik, ni  mutapu ik rusangu riner ramekesha ranaken ra Yehova? Paul wayileja in Kristu a ku Efes anch: “Wateshinany kal katumb ka mudimu wa ranaken ra Nzamb [wangikishau] am mulong wenen.” (Efes 3:1, 2,TMK) Yesu wamuleja Paul chakwel alejana rusangu ruwamp kudi antu akad kwikal in Yuda. Katat chading chiswapel kudi antu a michid kwikal antu a mu Want utakedinau kudiay Mesia. (Tang Efes 3:5-8.) Paul walejana nich mushiku ni wayishila in Kristu a nlel chilakej chiwamp. Wamekesha anch ranaken ra Nzamb radingap ra “chamwamu.”

RANAKEN RA NZAMB RIKUBACHIKIN USAL IK?

4, 5. Mulong wak tukutwisha kulond anch “rusangu ruwamp ra Want” ridi chilik chimwing ni rusangu ruwamp ra “ranaken ra Nzamb”?

4 Mu machuku minam ma nsudien, antu a Yehova akwet chisend cha kulejan ‘rusangu ruwamp ra Want . . . ku mangand mawonsu ni kwikal uman kudi antu a michid yawonsu.” (Mateu 24:14) Rusangu ruwamp ra Want ridi kand “rusangu ruwamp ra ranaken ra Nzamb.” Mulong wak tulondina mwamu? Mulong yiyukish yawonsu tukutambula yidiokila ku Want wa Nzamb yidi chibudikin cha ranaken ra Yehova. (Efes 1:3) Paul wamekesha kujikitish kwend mulong wa ranaken ra Yehova kusutil ku kulejan nich mushiku. Ov, tukat kwimburij chilakej cha Paul?—Tang Rom 1:14-16.

5 Mu mutu wa mulong wasutina ou, twilejin anch ap anch tudi akayitil, pakwez tukutwish kutaninamu mu mitapu kushalijan ya ranaken ra Yehova. Mulong tukat kutaninamu nakash, komb tukwet chisend cha kuyilej antu akwau mutapu umekeshinay Yehova rukat rend ni mutapu ukutwishau kutaninamu. Mu mitapu ik tukutwisha kuyikwash antu akwau chakwel amekesha kujikitish kwau mulong wa ranaken ra Nzamb?

KUPALANGESH RUSANGU RUWAMP MULONG WA CHAKUPESH CHA DIFUT

6, 7. Pitukata kuyilej antu piur pa difut, mutapu ik tukata kupalangesh rusangu ruwamp ra ranaken ra Nzamb?

6 Nlel unou, antu avud kakatap kwifish nich anch asal chitil, chawiy kijap mulong wak antu akwet kuswir kwa difut. Pa chisu chawiy chimwing, antu avud ashikin ku kutong anch mwom wau ukwet musangar. Ap pakatau kuyilej kudi Atuman a Yehova, antu avud kijingap kwau chirumburikina chitil, usu ukweta chitil chinech padi etu, ni yom tuswirikedina mulong wa kukwolik ku chitil chinech. Kapamp ka kusambish pateshiningau kurumburik kwa chitil, antu akin akat kumujikitish Yehova pakwijik anch watuma Mwanend pansh mulong wa kutukwol ku rufu. Yehova wasala mwamu mulong wa rukat rend rijim ni mulong wa ranaken rend.—1 Yohan 4:9, 10.

7 Shinshikin yom yalonday Paul piur pa Mwan wa Yehova mukatish: ‘Ndiy watuchakwisha ku mash ma Mwanend Kristu, mwamu mwatulikishinay yitil yetu, mulong wa mapit ma ranaken ra Yehova.’ (Efes 1:7) Difut dia yakupesh ya Kristu udi uman wa rukat rijim ra Nzamb mulong wetwetu ni kumekesh mutapu udia ranaken Rend rupandakena kujimb. Udi mutapu wa kutukwash chakwel twileja anch ang twamekesh ritiy retu mu yakupesh ya Yesu, akutulikishin yitil yetu ni twikikal ni kom kishitwila! (Hebereu 9:14) Riner ridi kamu rusangu ruwamp tulejena kudi antu akwau!

YIKWASHA ANTU AKWAU KWIKAL ARUND A NZAMB

8. Mulong wak akayitil akwet kuswir kwa kwichakwish ni Nzamb?

8 Anch antu katekinap ritiy mu yakupesh ya Yesu, Nzamb uyimen mudi akankuny. Chawiy tukwet chisend cha kuyilej antu anch akutwish kwikal arund a Nzamb. Kambuy  Yohan wafund anch: “Muntu mwawonsu umwitiyijina Mwan ukwet mwom wa chikupu. Muntu mwawonsu wakad kumuziyil Mwan kakez kwikalap nich mwom winou, pakwez Nzamb ukez kudandamen kumujimen.” (Yohan 3:36) Tukutwish kwikal ni musangar mulong yakupesh ya Yesu yasala anch tutwish kwikal arund a Nzamb. Paul walonda chom chinech mu mutapu unou: “Pakur en wamwombanya Nzamb nyim, wamukisanya mu yitongijok yen ni mu yisalijok yen yiyimp. Pakwez katat, ku rufu ra Mwanend rafay ku mujimbu wa wuntu, Nzamb wakuchakwishinany kal nend ndiy.”—Kolosay 1:21, 22.

9, 10. (a) Chisend ik chapanay Kristu kudi akadivar nend azizidinau many ? (b) Mutapu ik uyikwashinau azizidinau many kudi “amikoku akwau”?

9 Kristu wayinkisha akadivar nend azizidinau many adia pa divu “mudimu wa kuyichakwish.” Paul wayileja anch: “Chom chinech chidiokil kudi Nzamb, ndiy kamu watuchakwisha etu nend ndiy mu Kristu. Ndiy kand watwinkisha mudimu wa kuyichakwish antu akwau nend ndiy. Mulong Nzamb wachakula nau antu awonsu a pa mangand mu Kristu wakad kuyichindil yitil yau. Chad watwinkisha etu mudimu wa kulejan rusangu ra kuchakwish. Chawiy etu panap tudi antimesh a Kristu, Nzamb amwinend ukat kukutazukinany en mu etu. Chawiy tukulembijekinany en mu dijin dia Kristu chakwel witiyany kuchakul nend Nzamb.”—2 Korint 5:18-20.

10 Chidi chisend kudi “amikoku akwau” mulong wa kuyikwash azizidinau many mu mudimu winou. (Yohan 10:16) Mudi “antimesh,” a Kristu “amikoku akwau” asadina mudimu ujim nakash wa kulejan, ayifundishin antu uyakin ni ayikwashin chakwel ikala mu urund wa piswimp ni Yehova. Chinech chidi chikunku cha usey nakash cha mudimu wa kulejan rusangu ruwamp ra ranaken ra Nzamb.

YIFUNDISHA ANTU ANCH NZAMB UKAT KUTESH MALEMBIL

11, 12. Mulong wak ridi rusangu ruwamp kudi antu kwijik anch akutwish kumulembil Yehova?

11 Antu avud akat kulembil mulong chom chinech chiyisadining iyov nawamp, pakwez kakatap kwitiyij anch Nzamb ukat kutesh malembil mau. Akwet kuswir kwa kwijik anch Yehova ukat “kutesh kulembil.” Nfunda kuseng David wafunda anch: ‘Mulong ey ukat kutesh kulembil kwetu. Antu awonsu akat kwez kudi ey Kulim kwa kuyip kwatupandiken kal, Ey ukatulikishil kurumbuk kwetu.’—Kusneg 65:2, 3.

12 Yesu wayileja in kwilej end anch: “Anch witany chom mu dijin diam, nikez kuchisal.” (Yohan 14:14) Chirumburikin anch tukutwish kwit mu malembil ‘chom chin chawonsu’ chikwatijadina ni rusot ra Yehova. Yohan wafunda anch: “Chawiy katat ruchingej ritukweta kudi Nzamb rawiy riner, anch twamwit chom, chad tumwit mudi mudia rusot rend, ndiy ukututesh.” (1 Yohan 5:14) Chiwapin mud ik mu kuyikwash antu chakwel ijik anch malembil madiap kwau kusu chom chikata kuyisal iyova nawamp pakwez udi mutapu wa kusej kwi “nkwas ya ranaken “ ra Yehova! (Hebereu 4:16) Anch twayifundish antu kulembil mu mutapu uwamp, kudi Muntu utentamina, ni yom yiwamp, tukat kuyikwash chakwel ikala arund a Yehova ni atana kwongoj pa yisu ya mar.—Kuseng 4:1; 145:18.

RANAKEN MU MANGAND MASU

13, 14. (a) Chisend ik chiwamp chikwikalau nich azizidilau mu machuku ma kurutu? (b) Mudimu ik uwamp ukusalau azizidilau many mulong wa antu?

13 Yehova ukez kumekesh ranaken rend nakash “mu yirung yikweza kurutu.” Mutapu ik ukusalay mwamu? Nzamb ukuyinkish antu 144000 akeza kuyikel pamwing ni Kristu mwiur chisend chisangareshina. Paul wisambina pa chisend chinech  pafunday anch: “Pakwez, Nzamb watukata nich rukat rujim nakash, chad watwovil riy kupandakan, chawiy pitwadinga etu mudi antu afu mulong wa yitil yetu—ndiy watwikadisha aom pamwing nend Kristu. Chakin, mulong wa ranaken ra Nzamb kwawiy kuwapandidilany! Nzamb watuvumbula pamwing nend Kristu kutudiosh etu ku mwom wetu ukur. Watushichika nend mwiur chakwel tukez kuyikel nend. Ndiy wasala mwamu, mulong wa kumekesh kudi antu a yirung yawonsu yikweza kurutu kujimb kwa mapit ma ranaken rend ku kudimuk kwend kwatumekeshinay mu Kristu Yesu.”—Efes 2:4-7.

14 Chikutwish chatukasiken pa kutongin pa yom yiwamp yirijekinay Yehova mulong wa in Kristu azizidilau many pakuyikelau pamwing ni Kristu mwiur. (Luka 22:28-30; Filip 3:20, 21; 1 Yohan 3:2) Yehova ukez ‘kuyimekeshin kujimb kwa mapit ma ranaken rend’ mu mutapu wa pakampwil. Akwikal ‘Yerusalem Musu,’ mband wa Kristu. (Kujingunik 3:12; 17:14; 21:2, 9, 10) Akez kusal pamwing ni Yesu mu ‘kuyok in michid.’ Akez kuyikwash antu mu kudiosh yilim ya chitil ni ya rufu ni kuyikwash kand chakwel ikala antu awanyidina.—Tang Kujingunik 22:1, 2, 17.

15, 16. Mutapu ik ukumekeshay Yehova ranaken rend kudi “amikoku akwau” mu machuku ma kurutu?

15 Efes 2:7 ulondin anch Nzamb ukez kumekesh ranaken mu “yirung yawonsu yikweza kurutu.” Pa chisu chinicha, antu awonsu pa divu akez kwimen kamu “kumekesh kujimb kwa mapit ma ranaken rend.” (Luka 18:29, 30) Mutapu umwing ujim ukumekeshay Yehova ranaken rend pa divu udi wa kuyivumbul antu kudiokal ‘Mwi Nzay’ (Job 14:13-15; Yohan 5:28, 29) Anany akeza kuvumbuk? Amakundj ni amband ashinshamena afa kurutu kwa Kristu afa ni antu adia “amikoku akwau” afila ashinshamena kudiay Yehova mu machuku minam ma nsudien. Antu awonsu ashinshamena akez kuvumbuk ni akudandamen kumusadin Yehova.

16 Mamiliyon ma antu afa, pakad kumwijik  Nzamb, niyawiy akez kand kuvumbuk. Yohan wafunda anch: “Namana afu ajim ni akemp iminy kurutu kwa ditand, [mivungur] yading yibudikin. Mukand ukwau wabudika wawiy [mivungur] wa mwom. Afu ayirumburisha mudi mwading yisalijok yau yafundau mu [mivungur] yiney. Karung wabudisha afu adingamu. Rufu ni [Nzay] ya afu niyau abudisha afu adingamu. Awonsu ayirumburish mudi mwading yisalijok yau.” (Kujingunik 20:12, 13) Antu akuvumbuka akwikal ni mitapu ya kwilej piur pa Yehova ni akwitiy wintakel wend. Akez kwilej ni kusadin mbil ja mu Bibil ni malejan makwau masu madia mu “mivungur.” Malejan minam masu makez kwikal mutapu ukwau ukumekeshay Yehova ranaken rend.

DANDAMEN KULEJAN RUSANGU RUWAMP

17. Chom ik tufanyidina kulam mu manangu pitwipanina mu mudimu wetu wa kulejan?

17 Chidi cha usey mud ik kusutamu pakur kulejan rusangu ruwamp ra Want mulong disudien didi piswimp! (Marko 13:10) Tufanyindin kuvurik anch chitongijok chetu cha kulejan chidi mulong wa kumutumbish Yehova. Mutapu ik tukutwisha kusal mwamu? Tufanyidin kuyilej antu anch yiyukish yawonsu tukusangera mu mangand masu yitwishikin mulong wa ranaken ripandakena kuwap ra Yehova.

Kusal nich mushiku mudi “atulam awamp a ranaken ra Nzamb.”—1 Pita 4:10 (Tal mapagraf 17-19)

18, 19. Mutapu ik tukutwisha kumutumbish Yehova mulong wa ranaken rend?

18 Pituyilejina antu, tukutwish kuyirumburil anch, ang Want wa Kristu wasambish kuyikel, antu akez kutaninamu yiyukish yawonsu mulong wa difut ni akez kwikal pakemp pakemp awanyidina. Bibil ulondin anch: ‘Mulong yom yatangau yikutwish kudiokal kand iyinau mu usuk wa yom yivundina, ni akez kuyikol ku uyaj wa an a Nzamb.’ (Rom 8:21) Chinech chikutwish kuswapal ching nich ranaken ra Yehova.

19 Tukwet chisend cha kuyilej antu awonsu piur pa kushilamu kuwamp kudia mu Kujingunik 21:4, 5: “[Nzamb] ukez kayikusol mansoj mawonsu ku mes mau. Kukez kikalap kand rufu, ap madil, ap kwishikokin, ap kusansan, mulong yom yikur kiyamekanap kand. Chad [Yehova] ushicha pa ditand walonda anch: Katat nikat kusal yom yawonsu yisu! Wangela kand anch: Fund mazu minam, mulong madi makin, mafanyidin kumachingej.! Anch twalejan rusangu riner ruwamp kudi antu akwau nich mushiku, tukat chakin kamu kumutumbish Yehova mulong wa ranaken rend!