Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 7 , 2016

Kujikitish Mulong wa Ranaken ra Nzamb

Kujikitish Mulong wa Ranaken ra Nzamb

“Watuyukisha etu awonsu . . . mulong wa ranaken rend rujim”—YOHAN 1:16, NWT.

MIMINY: 1, 13

1, 2. (a) Rumburil chishimu cha Yesu cha muntu ukweta chir cha nviny. (b) Mutapu ik umekeshina rusangu riner mikadil ya kupan ni ya ranaken?

PAMANCH nakash, mwin chir cha nviny waya pasok mulong wa kukimb antu akumusadina mudimu. Wayinkisha uvud kanang wa nfalang ni antu inay itiya nfalang jinej. Pakwez, mulong mwin chir wading ukwet kuswir kwa in kusal mudimu avud, chawiy chachirikay kand pasok tupamp tuvud pa dichuku mulong wa kukimb antu akwau. Wayilej in mudimu inay anch ukuyifut nfalang ja chilik chimwing. Kushik kwinsudien kwa dichuku, mwin chir wakumangeja in kusal mudimu inay chakwel ayifuta. Ap anch antu inay asala dichuku diakabuj ap mu masaa makemp, pakwez mulong wa muchim wend wa kupan ndiy wayifuta nfalang uvud umwing. Pakwez, pasambishau antu asala mudimu dichuku diakabuj kwinan, mwin chir walonda anch: ‘Witiyinanyap nfalang jinakufutana kal? Ov, am nikutwishap kusal nich nfalang jam mudi munikatila? En wovan kal mukau mulong am nidi kwam muntu mwin kupanol?’—Mateu 20:1-15.

2 Rusangu ra Yesu ritufundishin dilejan dia usey nakash piur pa “ranaken ra Yehova”  [1] (Tal mazu ma kwinsudien.) (Tang 2 Korint 6:1.) Mutapu ik? Antu amwing akutwish kutong anch antu asala mudimu dichuku diakabuj afanyina kutambul nfalang jivud kusutamu akwau. Pakwez, mwin chir wamekesha ranaken kudi antu a mudimu asala kwau chikunku cha dichuku. Mwin manangu  umwing ulondin mazu malondwilaku am piur pa “ranaken” risadidinau mu Bibil anch : “Chidi chitongijok cha kumushinshikin muntu chakwel umukwasha ni chom kanang chadingay nich kuswir.”

CHIPAN CHAPANAY YEHOVA

3, 4. Mulong wak ni mutapu ik umekeshinay Yehova ranaken rend kudi antu awonsu?

3 Bibil utulejin anch ranaken ra Nzamb ridi ‘chipan cha kwikatin.’ (Efes 3:7) Mulong tukutwishap kumuziyin Yehova mu mutapu uwanyidina ni tukutwishap kutambul ranaken rawonsu ra Nzamb. Chakin kamu, tukat kufa. Mwant Salomon walonda anch: “Pa mangand pikil muntu ap umwing utentamina wakad kusal yitil.” (Mulej 7:20) Kupwa, kambuy Paul walonda anch: “Mulong antu awonsu asala yitil kawanyidinap ku uyaj wa Nzamb,” ni “difut dia chitil didi rufu.”—Rom 3:23; 6:23,TMK.

4 Mulong Yehova wakata antu nakash, wamutuma “Mwanend kapwokal” mulong atufila. Chawiy chading chisal chijim nakash cha ranaken. (Yohan 3:16) Paul walonda anch Yesu ‘ukwet katat chibangul cha uyaj ni katumb, chakwel ku ranaken ra Nzamb ndiy wapaka rufu mulong wa antu awonsu.’ (Hebereu 2:9) Mwaning, ‘chipan cha Nzamb chidi mwom wa chikupu kusutin Kristu Yesu Nsalejetu.’—Rom 6:23.

5, 6. Yibudikin ik yidingaku ya kwikal atakedinau kusutin (a) ku chitil? (b) ku ranaken?

5 Mulong wak tukat kusal yitil ni tukat kufa? Bibil ulondin anch: “yitil yandamina mu mangand [kusutil] muntu umwing.” Chawiy, mulong tudi an a Adam, tuburedin kuwanyin ni tukat kufa. (Rom 5:12, 14, 17) Pakwez, tukutwishap kudandamen kutond kwikal atakedinau kusutin ku chitil. Mutapu ik chitwishikina? Anch twamekesh ritiy retu mu chakupesh cha difut cha Kristu, tukutaninamu mu ranaken ra Yehova. Bibil ulondin anch: ‘Kuvudidina yitil, kwawiy nlel kuvudidina ranaken ra Nzamb. Chawiy mudi yitil yayiyikela antu kuyitwal ku rufu, chawiy chimwing kand, ranaken ra Nzamb rukat kutuyikel ni kututenchik mulong wa kututwal ku mwom wa chikupu watenchikay Yesu Kristu Nsalejetu.’—Rom 5:20, 21.

6 Ap anch tudandamedin kwikal akayitil, tufanyidinap kwitiy anch yitil yitutakela. Chawiy anch twasal yom yiyimp, tukwit dilikishin kudi Yehova. Paul watubabesha anch: “Kichifanyidinap yitil kukuyikelany kand, mulong en kiupandilanyap mulong wa yom yilondilau mu yijil, pakwez upandilany mulong wa ranaken ra Nzamb.” (Rom 6:14) Mutapu ik tukutwisha kutaninamu mu ranaken ra Nzamb? Paul walonda anch: ‘Mulong Nzamb wamekesha kal ranaken rend. . . rikat kutulej chakwel tudjibula yom yiyimp ni kulik yom ya mu mangand, chakwel twikal nich mwom wa kwilam ayinetu, utentamina, ufanakena nend Nzamb mu chirung chinech.’—Titus 2:11, 12.

KUMEKESH RANAKEN MU ‘MITAPU KUSHALIJAN’

7, 8. Kumekesh ranaken ra Yehova mu ‘mitapu kushalijan’ kurumburikin ik? (Tal chipich cha kwinsambishin.)

7 Kambuy Pita wafunda anch: ‘Muntu mwawonsu wa pakach pen watambula chipan, mudi atulam awamp a ranaken rijim ra Nzamb mulong wa kukwashijan nich mu mitapu kushalijan.’ (1 Pita 4:10) Kumekesh ranaken ra Yehova mu ‘mitapu kushalijan’ kurumburikin ik? Kurumburikin anch mar mawonsu makutushikena mu mwom wetu, Yehova ukutwinkish yom yawonsu tuswirikedina mulong tujijaman. (1Pita 1:6) Ukutwinkish kand yom yawonsu tuswirikedina mulong wa kuwin mar minam.

8 Kambuy Yohan wafunda anch: “Watuyukisha etu awonsu kusutil ku ranaken pa ranaken.” (Yohan 1:16, NWT.) Mulong Yehova ukat kumekesh ranaken rend mu mitapu yivud ni tukat kutambul yiyukish  yivud. Yiyukish ik yimwing tukata kutambul?

9. Mutapu ik tukata kutaninamu mu ranaken ra Yehova ni mutapu ik tukutwisha kumekesh kujikitish kwetu mulong wa ranaken riner?

9 Yehova ukat kutulikishin yitil yetu. Tukat kumujikitish Yehova mulong ranaken rend rawiy rikata kusal anch atulikishin yitil yetu. Pakwez, ukat kusal mwamu ching anch twit dilikishin ni twadandamen kurish nich maku metu ma yitil. (Tang 1 Yohan 1:8, 9.) Paul wayirumburila in Kristu azizidilau many a pa chirung chend mutapu ukatay Yehova kuyilikishin yitil. Ndiy walonda anch: “[Nzamb] watukamunina kutudiosh ku ukash wa want wa mididim, watushemunin mu want wa Mwanend ukatishena. Ndiy watukwola, watulikishin kand yitil yetu.” (Kolosay 1:13, 14) Tumujikitishining Nzamb mulong wa riy rend ritubachikininga chakwel tumutumbisha. Ni mulong Yehova ukat kutulikishin yitil yetu, chawiy tukutwisha kand kutambul yiyukish yikwau yisangareshina.

10. Chom ik tukata kusanger mulong wa ranaken ra Nzamb?

10 Tukutwish kwikal mu urund wa chisambu ni Nzamb. Tud akad kuwanyin, mulong twavadika mu yitil, chawiy tudi akankuny a Nzamb. Chawiy chalonday Paul anch: “Mulong pitwading akunkuny atuchakwisha kudi Nzamb ku rufu ra Mwanend.” (Rom 5:10,TMK.) Mulong wa difut, tukutwish kwichakwish ni Nzamb, chawiy chikusala anch twikala mu chisambu ni ndiy ni twikal arund end. Paul warumburil pa chom chinech mutapu chitwishikina kusutil ku ranaken ra Yehova payilejay akadivar nend azizidilau many anch: “Katat atuyingishin kal ku ritiy, chad tukwet chisambu pakach petwetu nend Nzamb mwi Nsalejetu Yesu Kristu. Yesu watushikija ku ranaken ra Nzamb ritukweta katat mulong wa ritiy retu.” (Rom 5:1, 2) Kujikitish mud ik pa kusanger urund wa chisambu ni Yehova!

Chisend cha kutesh rusangu ruwamp (Tal paragraf 11)

11. Mutapu ik uyishikijiningau “amikoku akwau” ku kutentam kud azizidilau many?

11 Tukutwish kwikal atentamina kurutu kwa Nzamb. Muprofet Daniel wafunda anch mu machuku ma nsudien, “in kutakel akweta manangu akez kuzut,” awiy kamu azizidilau many “akuyikaruma antu avud kwikal atentamina.” (Tang Daniel 12:3.) Mutapu ik usadiningau azizidilau many mwamu? Akat kulejan rusangu ruwamp ni akat kufundish mamiliyon ma “amikoku akwau” yijil ya Yehova. (Yohan 10:16) Ayikwashining chakwel ikala atentamina kurutu kwa Nzamb, wawiy mutapu uswapela mulong wa ranaken ra Yehova. Paul walonda anch: “Mulong wa kupan kwa riy kwa ranaken rend, [Nzamb] wayikadisha antu atentamina kurutu kwend. Ndiy wasala mwamu mu Kristu Yesu ukata kuyikwol ku yitil yau.”—Rom 3:23, 24.

Chiyukish cha kulembil (Tal paragraf 12)

12. Mutapu ik ukwatijadina malembil ni ranaken ra Nzamb?

12 Tukutwish kumusejin Nzamb piswimp kusutil malembil. Mulong wa ranaken rend, tukutwish kumulembil Yehova. Paul ulondin anch nkwas ya Yehova yidi “nkwas ya ranaken,” ni utwitin chakwel tuseja kwi nkwas yiney mulong “kwinikwa kwawiy kukutwovilau riy.” (Hebereu 4:16) Tukutwish kumulembil Yehova chisu chawonsu kusutil kudi Yesu. Chakin kamu chid chisend chijim mud ik! Paul walonda anch: “Mwi ndiy twajijamana, tukuya kudiay ndiy nich ruchingej mulong wa ritiy retu mwi ndiy.”—Efes 3:12, TMK.

Ukwash pa chisu chiwanyidina (Tal paragraf 13)

13. Mutapu ik ukutwisha ranaken ‘kutukwash pa chisu chiwanyidina’?

13 Tukutwish kutan ukwash pa chisu chiwanyidina. Paul watukasikesha kumulembil Yehova chisu chin chawonsu tukukata, ‘chakwel atwovilaku riy ni kutwanaken mulong wa kutukwash pa chisu chiwanyidina.’ (Hebereu 4:16) Chisu chin chawonsu tudia mu yakamish ap mu mar, tukutwish kumulembil Yehova chakwel atukwasha. Ni  ndiy ukwakul ku malembil metu chisu chin chawonsu chikukatay. Yisu yivud ukat kusadin akadivar ni anambaz netu mulong wa kutukwash. Yehova wakwiling ku malembil metu “chawiy mwamu niyetu tukutwish kulond patok, pakad wom, anch: ‘[Yehova], ndiy mwin kwinkwash, nikwovap wom. Ov, muntu ukwinsal chom ik?’”—Hebereu 13:6.

14. Mutapu ik ukata michim yetu kutaninamu mu ranaken ra Yehova?

14 Tukutwish kutan kwongoj mu michim yetu. Chidi chiyukish chijim chakwikal ongojinau kudi Yehova pa chisu chin chawonsu tumena mar. (Kuseng 51:17) Padingau kuyizengol in Kristu a mu Tesalonik Paul wafunda anch: ‘Nsalejetu Yesu Kristu amwinend, ni Nzamb Tatukwetu watukata, chad watwinkish kwongoj kwa chikupu, ni ruchingej ruwamp ku ranaken rend, ndiy ukukwongojany ni kukasikesh michim yen.’ (2 Tesalonik 2:16, 17) Chikasikeshin mud ik pakwijik anch Yehova ukat kutumekeshin ranaken rend ni utukatining ni ukat kututongin!

15. Kujikitish mulong wa ranaken ra Nzamb, ruchingej ik tukweta?

15 Tukwet ruchingej ra mwom wa chikupu. Mulong tudi akayitil, tukutwishap kwikal ni ruchingej pakad ukwash wa Yehova. (Tang Kuseng 49:7, 8.) Pakwez, Yehova utwinkishin ruchingej risangareshina. Ruchingej ik? Yesu walonda anch: “Mulong riner rawiy rusot ra Tatukwam, chakwel mwawonsu ukumumana Mwan ni kumwitiyij ukwikal ni mwom wa chikupu.” (Yohan 6:40, TMK.) Chawiy, tukwet ruchingej ra kushakam chikupu mulong wa ranaken ra Yehova. Paul walonda anch: “Mulong Nzamb wamekesha kal ranaken rend ra dipandish kudi antu awonsu.”—Titus 2:11.

KANGAL KUYIPISH RANAKEN RA NZAMB MULONG WA MAYINGISHIN MA CHITIL

16. Mutapu ik wayipishau in Kristu amwing akusambish ranaken ra Nzamb?

16 Tutambwil yiyukish yivud mulong wa ranaken ra Nzamb. Chawiy, tufanyidinap kuyipish uwamp wa Nzamb, mulong wa mayingishin ma chitil. Pakach pa in Kristu akusambish, pading amwing apakisha  “kukarumun ranaken ra Nzamb wetu . . . ni yaku yau yiyimp.” (Jud 4, TMK) In Kristu inay akad kushinshiman atongang anch akutwish kwau kusal yitil ni Yehova ukutwish kwend kuyilikishin chisu chawonsu. Asalang usu wau mulong wa kuyibachik akadivar nau chakwel ambobakana nau mu yitil yau. Nlel kand, muntu mwawonsu ukusala mwamu, “usaadin mwiku wa ranaken.”—Hebereu 10:29.

17. Chiyul ik cha usey chapanay Pita?

17 Satan ukat kuyidimb in Kristu amwing nlel mu kutong anch, ang asal yitil Yehova ukutwish kuyilikishin kapamp kamwing. Chidi chakin anch Yehova ukat kulikishin antu asadina yitil anch akarumuk; pakwez utwitin chakwel turish nich maku metu ma yitil. Yehova wamupepila Pita chakwel afunda anch: “Arund nam, en wijikany kal yom yiney, chawiy babalany kangal akupumbulany nich kanrumbangesh ka antu ayimp, chakwel ushadishany ndond yen wiminyana daang. Pakwez, dandamenany kuya kurutu mu ranaken ni mu kumwijik kand Nsalejetu ndiy kamu Mupandish wetu Yesu Kristu.”—2 Pita 3:17, 18.

TUKWET YISEND MULONG WA RANAKEN

18. Yisend ik tukweta mulong wa ranaken ra Yehova?

18 Tumujikitishining nakash Yehova mulong wa ranaken rend. Chawiy, tufanyidin kusadin yipan yetu mulong wa kumutumbish Yehova ni mulong wa kuyikwash antu akwau. Tufanyidin kuyisadin antu akwau mwamu. Mutapu ik tukutwisha kusadin yipan yiney? Paul walonda anch: ‘Chawiy, tukwet yipan kushalijan kukwatijan ni ranaken ratwinkishau, . . . anch chipan chetu chidi cha kulejan nich tufanyidin kulejan, anch chipan chetu chidi cha kufundish nich tufanyidin kufundish, anch chipan chetu chidi cha kuyikasikesh nich antu akwau, tufanyidin kusal mwamu . . . anch chipan chetu chidi cha kumekesh riy tufanyidin kusal mwamu nich musangar.’ (Rom 12:6-8) Mulong wa ranaken ra Yehova, tukwet chisend cha kusal mudimu nakash mu mudimu wa kulejan, wa kufundish antu akwau Bibil ni wakuyikasikesh akadivar ni anambaz netu ni kuyilikishin anch aturumbukin.

19. Yisend ik tukweta tukwisambina mu mutu wa mulong ulondwilaku ou?

19 Pitudia antu ayukishinau nich ranaken ra Yehova, tufanyidin kwikal abachikinau mulong wa kusal nawamp “mudimu wa kulejan rusangu ruwamp [wa] ranaken ra Nzamb.” (Midimu 20:24, TMK.) Tukwisambin chisend chinech mu mutu wa mulong ulondwiku ou.

^ [1] (paragraf 2) Tal ka mutu ka mulong kalondina anch “Faveur Imméritée” mu it-1-F p. 871, ni mu “Glossary of Bible Terms” wa Traduction du monde nouveau mu Inglish wa katat.