Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 7 , 2016

Kimb Bil Want, Kangal Kukimb Yom Yikwau

Kimb Bil Want, Kangal Kukimb Yom Yikwau

“Dandamenany kukimb Want [wa Nzamb], chad akukuwejinanyaku kand yom yiney.”—LUKA 12:31, NWT.

MIMINY: 40, 44

1. Kushalijan ik kudia pakach pa yom tukweta nich kuswir ni yom tukatina?

KUDI kwau yom yikemp kusu tukweta nich kuswir mulong wa kwikal ni mwom. Chilakej, tukwet kuswir kwa yakudia, ya kudjal ni ndond ya kulal. Pakwez, kudingap nsudien ya yom tukatininga. Chawiy, antu avud kijingap anch kafanyidinap kuwanyish maswir ma yom yawonsu yikatiningau.

2. Yom ik yimwing yikatiningau antu?

2 Antu amwing adia mwingand ya uzwendj akutwish kukat kwikal ni yom yimwing yishalijadina kamu ni yom yikatinau antu adia mwingand ya wimpich. Mu jindond jimwing ja mangand, antu amwing akatining kwikal ni matelefon, akwau akatin kwikal ni ma moto ni akwau kand akatining kwikal ni chikunku cha divu. Pakwez, mu jindond jikwau ja mangand, antu akatining kwikal ni maswun ma usey nakash, kwikal ni chikumbu chijim, akwau kand akatining kwikal ni motak wa usey nakash. Chikalap nchik ndond tushicha ap uvud wa nfalang tukweta, tukutwish kusambish kukat nakash yom yivud yatwakad kwikal nich kuswir ap yitukutwishap kuland.

YOM YA KUMUJIMBU YIKUTWISH KWIKAL NICH USU PADI ETU

3. Yom ya kumujimbu chom ik?

3 Yom ya kumujimbu chom ik? Udi mwikadil wa muntu ukata  kutongin nakash pa yom ya kumujimbu pa ndond pa kutongin pa urund wend wa piswimp ni Nzamb. Kakatap kusanger kwikal ni yom yikwetay nich kuswir, pakwez ukatining kwikal ni yom yivud. Ap antu akad kwikal ni nfalang jivud ap akad kuland yom ya usey uvud akutwish kwikal niyawiy ni mwikadil wa kukat yom ya kumujimbu. Akutwish kulik kutek Want pa ndond ya kusambish mu mwom wau.—Hebereu 13:5.

4. Mutapu ik ukatay Satan kusadin ‘maku metu ma mes’?

4 Satan ukatin twitiyija anch tukutwish kusanger mwom ching anch twikal ni yom yivud. Chawiy, ukat kusadin mangand mend ni ‘maku ma mes’ mulong wa kupakish kutubachik tukata kwikal ni yom yivud. (1 Yohan 2:15-17; Disambishil 3:6; Jinswir 27:20) Yisu yivud, tumening ni tuteshining mapiblisite makata kupakish kutubachik twitiya kuland yom yisu. Ov, walandap kal chom kanang mu magaze mulong cha kusangaresha ap mulong wa chimana ap wachitesha ku piblisite? Anch chidi mwamu, ukutwish kwijik anch walandin yom yakad kwikal nich kuswir. Anch twadandamen kuland yom yatwakad kwikal nich kuswir, tutekin kanvundangesh mu mwom wetu. Yom yiney yikutwish kutuletin kampuw pitumusadidina Yehova. Chilakej, tukwikalap ni chisu chivud cha kwilej Bibil, cha kwirijek mulong wa kukumangan, ni cha kwipan nich mushiku mu mudimu wa kulejan. Vurik anch kambuy Yohan wababesha anch: ‘Mangand mayil ni kujiy pamwing ni maku mau mawonsu.’

5. Chom ik chikutwisha kuyishiken antu awonsu asadidina usu wau mulong wa kwikal ni yom yivud?

5 Satan ukatin anch tusadin usu wetu mulong wa kwikal ni nfalang ni yom yivud pa ndond pa kusadin usu winou mulong wa Yehova. (Mateu 6:24) Pakwez, anch twasanger kwikal ni yom yivud, twijikany anch mwom wetu ukwikalap ni usey. Tukutwish kwikal ni yakamish ni kurish nich milong ya nfalang. Chipandakena kuyip, tukutwish kushadish ritiy retu mudiay Yehova ni Want wend. (1 Timote 6:9, 10; Kujingunik 3:17) Yesu walonda anch: “maku ma yom ya mitapu ni mitapu” madi mudi mitond ya miy yikutwisha kukangesh mbut kupam ni kusong mabuj.—Marko 4:14, 18, 19.

6. Dilejan ik tukutwisha kwilejin kudiay Baruk?

6 Tongin bil pakemp piur pa Baruk, secreter wenday muprofet Jeremiy. Chisu chasambishay Baruk ‘kukimb yom yijim’, Yehova wamuvurisha anch piswimp ap kamu Yerusalem akumushesh. Pakwez, wamukana Baruk anch ukez kupandish mwom wend. (Jeremiy 45:1-5) Baruk kafanyidinap kuchingejin chom ap chimwing. Yehova kafanyinap kupandish yom yadingau nich antu. (Jeremiy 20:5) Nlel, tudi piswimp ni nsudien ya mangand ma Satan. Chawiy, chinech chidiap chisu cha kudandamen kukimb kwikal ni yom yivud nakash. Ni tufanyidinap kuchingejin anch kupwa kwa mar makash, tukudandamen kwikal ni yom tukweta ap anch yidi ya usey nakash.—Jinswir 11:4; Mateu 24:21, 22; Luka 12:15.

7. Yom ik tukwisambina ni mulong wak?

7 Mutapu ik tufanyidina kusal ayinetu ni dijuku dietu chakwel tudandamena kushinshikin pa yom ya usey nakash mu mwom wetu? Mutapu ik tukutwisha kwipuk mwikadil wa kutongin yom ya kumujimbu? Ni chom ik chikutwisha kutukwash twipuka kwiyakamish nakash piur pa yom tuswirikedina? Yesu watwinkisha chiyul chiwamp piur pa chom chinech chidi mu Diskur diend dia pa Mukandu. (Mateu 6:19-21) El tutangany ni twisambinany Mateu 6:25-34. Yom yiney yawiy yikutwinkisha kashinsh anch tufanyidin kudandamen kukimb Want pa ndond pa kukimb yom yikwau.—Luka 12:31.

YEHOVA UKAT KUWANYISH YOM TUSWIRIKEDINA

8, 9. (a) Mulong wak tufanyidinap kwiyakamish nakash piur pa yom tuswirikedina? (b) Yesu wading wij ik piur pa antu ni piur pa maswir mau?

8 Tang Mateu 6:25. Yesu wading wij anch  in kwilej end ading iyakamishin piur pa yom yikudiau ni yikunau ni yikudjalau, chawiy mu Diskur diend dia pa Mukandu wayileja anch: ‘Kangal wiyakamishany mulong wa mwom yen.’ Yesu wakata kuyikwash chakwel ijika mulong wak kafanyidinap kwiyakamish mulong wa yom yiney yawonsou. Ndiy wading wij anch, ang iyakamish nakash piur pa yom yadingau nich kuswir, awiy ela kuvuramen yom ya usey nakash mu mwom wau. Yesu wading ni kuyitongin nakash in kwilej end chawiy chayibabeshinay tupamp tunying piur pa ubaj winou mu diskur diend.—Mateu 6:27, 28, 31, 34.

9 Mulong wak Yesu watuleja anch kangal twiyakamish piur pa yom tukutwisha kudia, kuna, ap kudjal? Ov, tukwetingap kuswir kwa yakudia ap yakudjal? Inge tukweting! Pakwez anch tukwetap nfalang mulong wa kuland yom yiney, chiding kamu chiwamp kwiyakamish. Yesu wading wij mwamu. Wading wij yiswirikedinau antu. Ni wading wij anch mu “machuku ma kwisudiel,” in kwilej end akushakam mu yirung yikash. (2 Timote 3:1) Chawiy, antu avud nlel chiyikasikedin kuman mudimu wakusal ni yom yidandamedin kukaninik usey. Mu jindond jivud antu adi atuzwendj nakash ni akwet yom yikemp ap aburedin yakudia. Pakwez, Yesu wading kand wij anch mwom wa muntu ukwet usey nakash ‘kusutamu yakudia ni mujimbu kusutamu yidjal.’

10. Payifundishay Yesu in kwilej end mutapu wa kulembil, yom ik yalonday yifanyidina kwikal ya usey nakash mu mwom wau?

10 Chakusambish, Yesu wayifundisha in kwilej end anch palembilau afanyidin kumulej Tatukwau wa mwiur ayinkisha yom yiswirikedinau. Afanyina kulembil anch: “Itwinkisha ilel unou yakudia yetu ya pichuku pichuku.” (Mateu 6:11) Mu chisu chikwau, wayileja kulembil kand anch: “Itwinkisha yakudia yiwanyidina pichuku pichuku.” (Luka 11:3) Pakwez chimekeshin anch tufanyidinap kutongin piur pa yom tuswirikedina. Chawiy, Yesu wayileja in kwilej end anch afanyidin kulembil chakwel Want wa Nzamb weza mulong wawiy udia wa usey nakash kusutamu kulembil mulong wa maswir mau. (Mateu 6:10; Luka 11:2) Mulong wakuyikwash in kwilej chakwel alika kwiyakamish, Yesu wayikasikesha pakuyivurish mutapu utongidiningay Yehova yitang yend yawonsu.

11, 12. Yom ik twilejina mu mutapu ukatay Yehova kuyitongin atujil a mwiur? (Tal chipich cha kwinsambishin.)

11 Tang Mateu 6:26. Tufanyidin ‘kuyital atujil a mwiur.’ Ap anch atujil adi yitang yikemp, akat kudia yom yivud. Pakwez, anch atujil ading ajim mudi antu, akimbang kudia yakudia yivud kusutamu yidilingau antu. Atujil akat kudia mabuj, ntit, atupwapu, ni aminany. Pakwez awiy kakwetingap kuswir kwa kukun mbut ni kupamish yakudia yau. Yehova ukat kuyiwanyishinang maswir mau mawonsu. (Kuseng 147:9) Ap mwamu, kakatap kuyitek ku milamu yau! Ayiling ayinau kukimb ni awiy ayinau akat kutanang.

12 Yesu kidjidjekap anch, ang Tatukwend ukat kuwanyish maswir ma atujil, ukuwanyish kand maswir ma antu. [1] (Tal mazu ma kwinsudien.) (1 Pita 5:6, 7) Chidi chakin anch, mudi atujill tufanyidinap kwikal ni usweral. Tufanyidin kusal mudimu chakwel twikala ni yakudia yetu ap kukimb nfalang mulong wakuyiland. Yehova ukutwish kuyukish usu wetu. Anch tukwetap nfalang ap yakudia yivud, ukutwish kudandamen kutuwanyishin maswir metu. Chilakej, akwetu akutwish kutwinkish yakudia yikwetau. Yehova uyinkishining kand atujil ndond yakushakam. Wayinkisha kal ukaliweny wa kutung yinswal, ni wasala kal yom yikutwishau atujil kusadin mulong wakutung yinswal. Chilik chimwing Yehova ukutwish kutukwash ndond yiwanyidina chakwel tushakama ni dijuku dietu.

13. Yom ik yimekeshina anch etu tukwet usey nakash kusutamu atujil a mwiur?

13 Kupwa kwa Yesu kuyivurish in kwilej  end anch Yehova ukat kuyidish atujil, wayipula anch: “Ov, kiukwetanap usey kuyipandakanamu awiy?” (Ilakej Luka 12:6, 7.) Palonday yom yiney, Yesu wading utongin pamwing ap piur pa mutapu ukwez kapanay mwom wend mulong wa antu awonsu. Mwawiy, Yesu kafap mulong wa atujil ap mulong wa annam akwau. Wafa mulong wetwetu chakwel tutwisha kushakam chikupu.—Mateu 20:28.

14. Muntu wiyakamishina kafanyidinap kusal ik?

14 Tang Mateu 6:27. Chom ik chakimbay kulond Yesu palonday anch tukutwishap kuwejin kachisu ap kakemp ku mwom wetu anch twiyakamish? Wakimba kulond anch tukutwishap kusal machuku mavud mu kwiyakamish piur pa yom tukweta nich kuswir. Chakin kamu, anch twinan nakash tukutwish kuyel ap kufa.

15, 16. (a) Chom ik twilejina kal ku mutapu ukatay Yehova kulam yisalamb ya mu masuku? (Tal chipich cha kwinsambishin.) (b) Yipul ik tukutwisha kwiyipul ni mulong wak?

15 Tang Mateu 6:28-30. Tukat kusangar anch twadjal masun mawamp, pakampwil pituyilinga mu mudimu wa kulejan, ku yikumangan, ni ku yitentam. Ov, tufanyidin ‘kwiyakamish mulong wa yidjal’? Chikwau kand, Yesu wayivurisha in kwilej end mutapu ukatay Yehova kulam yitang yend. Yesu wasadina chilakej cha “yisalamb ya mu masuku.”  “Yisalamb” yiney akutwish kuyifanikesh nich yisalamb yitazukinau anch glaïeul, jacinthes, iris, ni tulipes. Kwikil chisalamb ap chimwing chikata kwichimin achinach masun. Pakwez yiding ya ufun chawiy chalonday Yesu anch ‘Mwant Salomon wading ni miril ya mapit, chad kadingap nich yidjal ya ufun mudi chisalamb chimwing cha mu masuku’!

16 Tongin piur pa yom yalonday kand Yesu: ‘Anch Nzamb ukat kudjik masuku ni mitond ya mwimpay . . . , en ukwetany ritiy rikemp, ov, yidjal yikupanay Nzamb kudi en, kiyikupandakanap ufun wa masuku?’ Chakin kamu ukusal mwamu! Pakwez, in kwilej a Yesu afanyina kwikal ni ritiy rikash. (Mateu 8:26; 14:31; 16:8; 17:20) Afanyina kumuchingejin Yehova anch ukuyilam ni ukusal kamu mwamu. Chidi mutapu ik piur petu? Twitiyijin anch Yehova ukutulam?

17. Yom ik yikutwisha kuyipish urund wetu wa piswimp ni Yehova?

17 Tang Mateu 6:31, 32. Antu avud akad kumwijik Yehova atongining ching kwikal ni nfalang ap yom yivud mu mwom wau. Pakwez anch niyetu twasal mwamu, tukuyipish urund wetu wa piswimp ni Yehova. Twij anch Yehova udi Tatukwetu ni utukatining. Ni tukwet kashinsh anch, ang twasal yom yitwitinay ni twatek Want wend pa ndond yakusambish ukutwinkish yom yivud yitukweta  nich kuswir. Twij kand anch urund uwamp ni Yehova wawiy ukutusala twikala ni musangar wakin ni wawiy ukutukwasha tusangera “yakudia ni yidjal” yitukweta nich kuswir.—1 Timote 6:6-8.

OV, WANT WA NZAMB UDI PA NDOND YAKUSAMBISH MU MWOM WEY?

18. Yom ik yijay Yehova piur petwetu, ni yom ik yikutusadinay?

18 Tang Mateu 6:33. Anch twatek Want pa ndond yakusambish mu mwom wetu, Yehova ukutwinkish yom yawonsu tukweta nich kuswir. Yesu warumburila mulong wak tufanyidina kwikal nich mulong wa kushilamu kwinoku. Walond anch: “Tatukwen udia mwiur wij kal anch, ukwetany kuswir kwa yom yiney yawonsu.” Yehova wij yom ukweta nich kuswir kurutu ey amwiy wijika. (Filip 4:19) Wij anch tufanyidin kudjal. Wij kand yakudia yiukweta nich kuswir. Ni wij anch ey ni dijuku diey ukwetany kuswir kwa ndond ya kushakam. Yehova ukwikal ni kashinsh anch wikal kal ni yom yiukweta nich kuswir.

19. Mulong wak tufanyidinap kwiyakamish piur pa yom yikutushikena mu machuku ma kurutu?

19 Tang Mateu 6:34. Chikwau kand, Yesu wayileja in kwilej end anch: “Kangal wiyakamishany.” Yehova ukuwanyish yom tukweta nich kuswir. Chawiy tufanyidinap kwiyakamish piur pa yom yikushikena kurutu oku. Anch twasal mwamu, tukutwish kusambish kwichigejin ayinetu ni chinech chikuyipish urund wetu ni Yehova. Pakwez, tufanyidin kumuchingejin nakash ndiy.—Jinswir 3:5, 6; Filip 4:6, 7.

KIMB BIL WANT, NI YEHOVA UKUKUWEJIN YOM YIKWAU

Ukutwish kupipej mwom wey mulong wa kushinshikin nakash pa Want? (Tal paragraf 20)

20. (a) Mupak ik ufanyidina kwitekin mu mudimu wa Yehova? (b) Yom ik ufanyidina kusal mulong wa kupipej mwom wey?

20 Chikwikal chiyimp mudi ik anch tukwetap usu nakash mulong wa kumusadin Yehova mulong tukimbin kwikal ni yom yivud! Pakwez, tufanyidin kumusadin ni usu wetu wawonsu. Chilakej, ukutwish kuya kukwash chikumangen chikweta kuswir kwa in kulejan avud? Ukutwish kwikal chibol? Ap anch usadin mudimu wa uchibol, ov, ukutwish kutong mulong wa kuya ku Shikol ya in Kulejan a Want? Ukutwish pamwing ap kusutish machuku makemp pa rubing mulong wa kukwash ku Bethel ap kusadinau mudimu wa kukarumun? Ap pamwing ap ukutwish kwipan ku Biro Utadina Mudimu wa Kutung ni kusadin chisu chey mulong wa kukwash kutung Yot ya Want. Tongin piur pa yom ufanyidina kusal mulong upipeja mwom wey chakwel wikala ni chisu nakash cha kwipan mu mudimu wa Want. Mushet ulondina anch “Mutapu wa Kupipej Mwom Wey” upanin yiyul yimwing ya kusadin. Mulembila Yehova chakwel akukwasha kukwat mupak wa yom ufanyidina kusal. Kupwa sambish kapamp kamwing kuswimp.

21. Yom ik yikukukwasha kwikal piswimp ni Yehova?

21 Yesu watufundisha kukimb bil Want. Anch twasal mwamu, tukwipuk kwinan nakash mulong wa yom tukweta nich kuswir. Tumusejidin Yehova piswimp mulong tuchingejin anch ukuwanyish maswir metu. Tufanyidin kwishinshikin ayinetu ni kwipuk kuland yom yawonsu tuswirikedina ap yom yawonsu yidia mu mangand ap anch tukutwish kuyiland. Anch twapipej mwom wetu katat, kukutukwash tushala ashinshamena kudiay Yehova ni “kutambul mwom udia wakin” watukanay.—1 Timote 6:19.

^ [1] (paragraf 12) Atushalapol amwing a Yehova kakwetap yakudia yiwanyidina chisu chawonsu. Chakwel twova nawamp mulong wak ulikinay Yehova anch yom yiney yishikena, tal “Yipul ya in Kutang” mu nimero wa Chinong cha Kalam cha 15 Ngond wa 9, 2014, paj wa 22 mu Français.