Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 6 , 2016

‘Yehova Nzamb Wetu Udi Yehova Umwing’

‘Yehova Nzamb Wetu Udi Yehova Umwing’

“A! Teshany, en in Isarel: Yehova Nzamb wetu udi Yehova umwing.”-NWT —KUVURIK YIJIL 6:4.

MIMINY: 138, 2

1, 2. (a) Mulong wak mazu madia mu Kuvurik Yijil 6:4 mijiken nawamp? (b) Mulong wak Moses walonda mazu minam?

MU yitot ya mivu, in Yuda asadina mazu madia mu Kuvurik Yijil 6:4 mudi chikunku cha malembil ma pakampwil. Malembil minam amatazuka anch Shema, mamekeshina dizu dia kusambish dia in Hebereu. In Yuda avud alembilang malembil minam dichuku diawonsu pamanch ni urel mulong wakumekesh kwipan kwa rawonsu kudi Nzamb.

2 Mazu minam mading chikunku cha diskur dia nsudien diasalay Moses ku muchid wa an a Isarel. Mu muvu wa 1473 kurutu kwa Kristu, muchid wading mwi ngand ya Moab, piswimp ni kwawuk wit wa Yordan ni kuya kukwat ngand ya kushilamu. (Kuvurik Yijil 6:1) Moses wayitakela antu mu mivu 40, ni wakata anch ikal atakamena mulong wa kurish nich milong yikuyishikena. Afanyina kumuchingejin Nzamb wau, Yehova, ni kwikal ashinshamena kudi ndiy. Chawiy mazu ma nsudien ma Moses mayikasikesha kusal mwamu. Kupwa kwa kulejan yijil dikum ni yijil yikwau ya  Yehova, Moses wayivurisha antu yom ya usey tutangina mu Kuvurik Yijil 6:4, 5. (Tang.)

3. Yipul ik tukushinshikina mu mutu wa mulong winou?

3 In Isarel ading ij anch Yehova Nzamb wau udi “Yehova umwing.” In Isarel ashinshamena amwifukwilang Nzamb umwing, Nzamb wa angakau. Chawiy mulong wak Moses wayivurisha anch Yehova Nzamb wau udi “Yehova umwing”? Kovijan ik kudia pakach pa uyakin ni kumukat Nzamb wetu nich muchim wetu wawonsu, nich mupim wetu wawonsu, nich usu wetu wawonsu? Ni mutapu ik tukusadina mazu madia mu Kuvurik Yijil 6:4, 5 nlel?

NZAMB WETU UDI “YEHOVA UMWING”

4, 5. (a) Chom ik chirumburikina mazu “Yehova umwing”? (b) Kushalijan ik kudia pakach pa Yehova ni anzamb akwau a michid?

4 Umwing. Dizu “Yehova umwing” dirumburikin anch Yehova udi kamu ching umwing, kwikil wilikenay nend ap udia mudi ndiy. Mulong wak Moses wasadina dizu dined? Chikimbinap kumekesh anch Moses walonda piur pa mafundish ma usatu. Yehova udi Sakatang wa diur ni divu ni udi Nyikel wa mangand mawonsu. Udi Nzamb umwing wakin, ni kwikil mukwau udia mudi ndiy. (2 Samwel 7:22) Chawiy mazu ma Moses mayivurisha an a Isarel anch afanyidin kumwifukwil ching Yehova. Kafanyinap kuyimburij antu ading ashichau nau piswimp, ifukwilang anzamb a makasu ni anzamb amband. Antu inay itiyijang anch anzamb au akutwish kutakel yom yimwing yatangau.

5 Chilakej, in Idjibit ifukwilang nzamb muten Ra, nzamb diur Nut, nzamb divu Geb, nzamb Nile Hapi, ni ifukwilang kand annam avud. Yehova wamekesha anch wading piur pa anzamb inay a makasu paletay Yipup Dikum. In Kanan nzamb wau mujim wading Baal, nzamb wa makasu witiyijangau in Kanan anch ndiy waleta mwom. Wading kand wijiken mudi nzamb wa diur, wa ruval, ni wa rinkind. Mu jindond jivud, antu amuchingejinang Baal mulong wa kuyiking. (Kuchind Michid 25:3) An a Isarel ading afanyidin kuvurik anch Nzamb wau “Nzamb wakin”, udi umwing, “Yehova umwing.”—Kuvurik Yijil 4:35, 39.

Yehova kadiap Nzamb wawurokina ap kadiap Nzamb wakad kukanang yom yikusalay. Uding ushinshamena chisu chawonsu, wakad kuswimp, ni wakin

6, 7. Chom ik chikwau chirumburikina “umwing,” ni mutapu ik umekeshinay Yehova anch udi “umwing”?

6 Wakad kuswimp ni Ushinshamena. Dizu “umwing” dirumburikin kand anch ‘Yehova udi umwing’ yitongijok yend ni yisal yend yiding yisu yawonsu yakin. Yehova kadiap Nzamb wawurokina ap kadiap Nzamb wakad kukanang yom yikusalay. Uding ushinshamena chisu chawonsu, wakad kuswimp, ni wakin. Chilakej, washilamu kudi Aburaham anch an end akez kushakam mwi Ngand ya Kushilamu. Ni Yehova wasala yilay yivud mulong wa kuwanyish kushilamu kwinoku. Mivu yitot yinying ni  makum masatu, kupwa kwa kushilamu kwinoku, chitongijok cha Nzamb chaswimpap.—Disambishil 12:1, 2, 7; Kubudik 12:40, 41.

7 Pasuta mivu yitot, Yehova wayitazuka an a Isarel anch atuman end ni wayileja anch: “Yam kusu Nzamb. Kwikiling Nzamb mukwau kudiokal pakur, ni katat, ni chikupu.” Yehova walonda kand patok anch chitongijok chend chikez kaswimpap palonday anch : “Am nidi Nzamb, nikez kikal kamu mwamu chikupu.” (Isay 43:10, 13; 44:6; 48:12) Chisend chijim mudi ik chadingau nich in Isarel mulong wa kumusadin Nzamb wakad kuswimpang ni ushinshamena! Ni yetu tukwet chisend chinech nlel.—Malakiy 3:6; Jakobu 1:17.

8, 9. (a) Yom ik yitinay Yehova kudi in kumwifukwil end? (b) Mutapu ik wakasikeshay Yesu usey wa mazu ma Moses?

8 Mwawiy, Moses wayivurisha in Isarel anch rukat ra Yehova ni mutapu wend wa kuyilam ukez kaswimpap. Pakwez, Yehova wayichingejina anch ipan rawonsu kudi ndiy ni kumukat nich muchim wau wawonsu, ni mupim wau wawonsu, ni usu wau wawonsu. Anvaj ading afanyidin kuyifundish an au piur pa Yehova yisu yawonsu chakwel ni yawiy amwifukwil ching Yehova.—Kuvurik Yijil 6:6-9.

9 Yehova kakuswimpangap chitongijok chend, chawiy kakezap kuswimp yom yend ya padishin yiyitinay in kumwifukwil end akin. Anch twakimb anch Yehova asangera difukwil dietu, tufanyidin kwipan rawonsu kudi ndiy ni kumukat nich muchim wetu wawonsu, nich manangu metu mawonsu, nich usu wetu wawonsu. Yesu walonda anch chinech chawiy chijil chipandakena kujimb. (Tang Marko 12:28-31.) El twilej mutapu tukutwisha kumekesh kusutin yisal yetu anch twitiyijin anch “Yehova Nzamb wetu udi Yehova umwing.”

IPANA RAWONSU KUDI YEHOVA

10, 11. (a) Mu mutapu ik tukumekesha anch difukwil dietu kudi Yehova didi dia rawonsu? (b) Mutapu ik wamekeshau ansand in Hebereu ading mu Babilon kwipan kwau kwa rawonsu kudi Yehova?

10 Yehova udi Nzamb wetu umwing. Twipanin rawonsu kudi ndiy patumwifukwidina ching ndiy. Tufanyidinap kwifukwil anzamb akwau ap kutekamu yitongijok ya makasu ap yisalijok ya makasu mu difukwil dietu kudi Yehova. Kadiap ching Nzamb udia piur pa anzamb akwau ap ukweta usu kuyisutamu. Pakwez udi ching Nzamb wakin. Tufanyidin kumwifukwil ching Yehova.—Tang Kujingunik 4:11.

11 Mu buku wa Daniel, tutangin piur pa ansand in Hebereu Daniel, Hanania, Mishael, ni Azaria. Amekesha kwipan kwau kwa rawonsu kudi Yehova palikau kudia yakudia yijondila mulong ading in kumufukwil Yehova. Arund nend asatu a Daniel alika kwifukwil mukish wa Nebukadnesar wa utad wa or. Awiy amuteka Yehova pandond ya kusambish. Ading kamu ashinshamena kudi ndiy.—Daniel 1:1–3:30.

Yehova ufanyidin kwikal pa ndond yakusambish mu mwom wetu

12. Mu kwipan kudi Yehova rawonsu, tufanyidin kwilam ku chom ik?

12 Yehova ufanyidin kwikal pa ndond yakusambish mu mwom wetu. Anch  tukatin kwipan rawonsu kudi ndiy, tufanyidin kubabal chakwel kangal chom ap chimwing chisenda ndond yend. Yom yiney yikutwish kwikal ik? Mu Yijil Dikum, Yehova walonda anch antu end kafanyidinap kwifukwil anzamb a makasu. Kafanyinap kwifukwil akish mu mitapu yin yawonsu. (Kuvurik Yijil 5:6-10) Nlel, kudi mitapu yivud ya kwifukwil akish, ni yimwing ya mitapu yiney yikutwish kukasikan kuyijik. Pakwez Yehova kaswimpinap yom yend yitinay. Udandamedin kwikal “Yehova umwing.” El tuman mutapu tukutwisha kwiyep kwifukwil akish nlel.

13. Yom ik tukutwisha kusambish kukat nakash kusutamu Yehova?

13 Mu Kolosay 3:5 (tang), tutangin piur pa yom yikutwisha kuyipish urund wetu wa rawonsu ni Yehova. Tumen anch ris udi mutapu wa kwifukwil akish. Mutapu ik? Anch tukwet kuswir nakash kwa chom kanang, mudi kwikal ni nfalang jivud, kukat mashakamin mawamp, yom yiney yikutwish yatakel mwom wetu, mudi nzamb ukweta usu. Yitil yawonsu yifundinau mu Kolosay 3:5 ayilejen mudi ris, udia mutapu wakwifukwil akish. Chawiy anch tukwet maswir nakash kwa yom yiney, tukusambish kuyikat nakash kusutamu mutapu tumukatina Nzamb. Kupwa, Yehova kakwikalap kand kudi etu “Yehova umwing”. Tukatinap anch yom yiney yitushiken.

14. Kubabesh ik kwapanay mupostol Yohan mulong wa rukat retu kudi Nzamb?

14 Mupostol Yohan walonda yom yimwing yifanakena nich yiney. Watubabesha anch ang muntu wakat yom ya mangand, yiney yidi, “maku mayimp ma akayitil, ni ris ra yom yikat kumanau nich mes mau, ni kwibaz kwa yom yikwetau ni kwa yom yisadilau,” chawiy “rukat ra Nzamb Tatuku kirishichap mu muchim wend.” (1 Yohan 2:15, 16) Chawiy tufanyidin kwishinshikin ayinetu chisu chawonsu mulong wa kuman anch tukatin mangand. Tukutwish kujingunin anch twasambish kal kusanger yom ya mangand pa kuman mutapu wa kwipuwangej kwetu , antu twendina nau, mutapu wa kurijek nswich, ap mutapu wa kwileng. Ap tukutwish kukat kusal ‘yom yijim’ kusutin kwilej shikol ya piur. (Jeremiy 45:4, 5) Ngand yisu yidi piswimp nakash. Chawiy tufanyidin kuvurik mazu ma Moses makweta usu! Anch twatesh ni twitiyij kamu anch “Yehova Nzamb wetu udi Yehova umwing,” tukwipan rawonsu kudi ndiy ni tukumusadin mu mutapu ukatinay.—Hebereu 12:28, 29.

LAM UUMWING WA WIN KRISTU

15. Mulong wak Paul wayivurisha in Kristu anch Nzamb udi “Yehova umwing”?

15 Dizu “Yehova umwing” ditukwashin kutesh anch Yehova ukatin anch atushalapol end ikala mu umwing ni ikala ni chitongijok chimwing mu mwom. Mu chikumangen cha win Kristu chakusambish, mwading in Yuda, in Grek, in Rom, ni antu a michid yikwau. Ading ni yaku, yinshakur, ni kukat yom kushalijan.  Mulong wayiney, chading chiyikasikedin amwing pakach pau kwitiy mutapu usu wa kwifukwil ap kulik yisal yau ya pakur. Chawiy Paul wading ufanyidin kuyivurish anch in Kristu akwet Nzamb umwing, Yehova.—Tang 1 Korint 8:5, 6.

Yehova ukatin anch atushalapol end ikala mu umwing ni ikala ni chitongijok chimwing mu mwom

16, 17. (a) Uprofet ik uwanyidina mu machuku metu, ni chibudikin ik? (b) Yom ik yikutwisha kuyipish uumwing wetu?

16 Tukulond nchik mulong wa chikumangen cha win Kristu nlel? Muprofet Isay walonda anch ‘mu machuku ma nsudien,’ antu akudiokal ku michid yawonsu ni akez kamwifukwil Yehova pamwing. Akulond anch: “Ndiy ukutulej rusot rend, chad etu tukez kendil mu jinjil jatonday ndiy.” (Isay 2:2, 3) Tukwet musangar wa kuman mutapu uwanyidina uprofet winou nlel! Akadivar nau anambaz netu adiokil jindond kushalijan, alondin mazu kushalijan, ni akwet yaku kushalijan. Pakwez tukat kumwifukwil Yehova mu umwing. Chawiy, mulong tushalijadin, yikat kutukasiken yisu yimwing.

Ov, usadin usu nakash mulong wa kulam uumwing wa chikumangen? (Tal paragraf 16-19)

17 Chilakej, mutapu ik ukutwisha kwiyov piur pa akadivar ap anambaz akweta yaku kushalijan ni yeyey? Mazu mau,  mutapu wau wakudjal, mutapu udiau, ni yakudia yau yikutwish kwikal yishalijadina ni yeyey. Ukat kwiyep ni ukat kusutish chisu ching nau antu ausadining nau yom ya mutapu umwing? Mutapu ik wiyoviling piur pa amakurump a mu teritwar wen achida kal ansand kukusutamu ey ap akweta ulombu wa chikit ap yaku kushalijan ni yeyey? Anch tubabelap, tukulik yom mudi yiney yikal nich usu padi etu ni kuyipish uumwing wetu.

18, 19. (a) Chiyul ik chidia mu Efes 4:1-3? (b) Chom ik tufanyidina kusal mulong chikumangen chikala mu umwing?

18 Mutapu ik tukutwisha kwiyep milong mudi yiney? Paul wapana yiyul ya kusadin kudi in Kristu ading ashicha mu Efes, musumb ukweta dipit ni mwading mushich antu akweta yaku kushalijan. (Tang Efes 4:1-3.) Paul wajimbula mikadil mudi kwikepish, kwitudish, kushimpish muchim, ni rukat. Mikadil yiney yidi mudi manguj malamina chikumbu mulong kangal chawa. Mulong wa kulam chikumbu mu mutapu uwamp, tufanyidin kusal usu nakash. Paul wakimba in Kristu a mu Efes asal usu nakash mulong wa ‘kwikal mu umwing wa mu spiritu.’

19 Muntu ni muntu ufanyindin kusal yom yiwamp mulong wakulam uumwing wa chikumangen. Mutapu ik tukutwisha kusal mwamu? Chakusambish, tufanyindin kukudish ni kumekesh mikadil yalonday Paul: kwikepish, kwitudish, kushimpish muchim, ni rukat. chakaad, tufanyidin kusal usu wa kukasikesh ‘uumwing uletina chisambu.’ Kulik kovijan kudi mudi mintash yikemp yikemp yidia mu umwing wetu; chawiy lel tufanyidin kusal usu wa kupwish kulik kovijan kwinoku chakwel tulam chisambu ni uumwing pakach petu.

20. Mutapu ik tukumekesha anch tuteshin anch “Yehova Nzamb wetu udi Yehova umwing”?

20 ‘Yehova Nzamb wetu udi Yehova umwing.’ Mazu minam makwet usey nakash! Mazu minam mayivurisha in Isarel chakwel ajijamana mu yakamish pandamau ni pakwatau Ngand ya Kushilamu. Mazu minam kand makutwish kutukasikesh niyetu chakwel tutwisha kusut ku mar makash ni makutukwash twandama mu Paradis. El tudandamenany kwipan rawonsu kudi Yehova. Tufanyidin kumukat ni kumusadin nich muchim wetu wawonsu, nich manangu metu mawonsu ni usu wetu wawonsu, ni tufanyidin kusal usu wa kulam chisambu ni uumwing pamwing nau akadivar netu. Anch twadandamen kusal yom yiney, Yesu ukez katurumburish mudi amikoku ni tukuman kamu kuwanyin kwa mazu mend malondina anch: “Ezany, en antu ayukishau kal kudi Tatukwam! Ezany, uswanany Want wakurijekinanyau kudiokal ku disambishil dia mangand.”—Mateu 25:34.