Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 6 , 2016

Mwikadil wa Winzamb Ukweta Usey Nakash Kusutamu Kamang

Mwikadil wa Winzamb Ukweta Usey Nakash Kusutamu Kamang

Antu akat kuman kamang mudi mayal ma usey nakash. Kudi kamang mukwau akat kumulandish ma miliyon ma madolar. Ov, kudi chom kanang chimenay Nzamb kwikal cha usey nakash kusutamu kamang ap mayal makwau?

 Haykanush, mwin kulejan wakad kal kutambul dibatish udia mwi ngand ya Arménie, watana pasepor piswimp ni chikumbu chend. Mu pasepor mwading makart ma ku bank ni nfalang jivud. Wamuleja nfumwend, ni ndiy wading kand mwin kulejan wakad kal kutambul dibatish, piur pa yom yatanay.

Ambay a uruw inay, ading akwet kuswir kwa nfalang ni ading ni mabaz. Pakwez akwata mupak wa kuya kutwal nfalang ku adres watanau pa pasepor. Muntu washadisha pasepor winou washimoka nakash pamwing ni dijuku diend. Haykanush ni nfumwend arumburila anch adi in kashinsh mulong wa yom yilejau mu Bibil. Chad, asadina chisu chinech mulong wa kwambambin piur pa Atuman a Yehova ni apana mikand yiwing ku dijuku dined.

Dijuku dinidia diamufuta Haykanush nfalang, pakwez ndiy kitiyap. Dichuku dialondulaku, mband wa muntu wachirishinau pasepor waya kumutal Haykanush ni nfumwend ku chikumbu chau mulong wa kuyijikitish ni wayikasikesha atambul rupet ra kamang.

Mudi dijuku dinidia, antu avud akutwish kushimok mulong wa win kashinsh wamekeshay Haykanush ni nfumwend. Ov, Yehova washimoka? Mutapu ik wamanay win kashinsh wau? Win kashinsh wau wading wa usey?

MIKADIL YA USEY NAKASH YISUTINAMU YOM YA KUMUJIMBU

Yakul ku yipul yiney yikasikenap. Mulong wak? Mulong atushalapol a Nzamb ij anch kwimburij mikadil ya Nzamb chidi cha usey nakash kusutamu kamang, or, ap yom yikwau ya kumujimbu. Mwaning, yom yimeningay Yehova anch yidi ya usey yishalijadin ni yimeningau antu anch yidi ya usey. (Isay 55:8, 9) Atusalapol end atongining anch kusal usu wa kwimburij mikadil ya Yehova kudi kwa usey nakash.

Tukutwish kuman yom yiney kusutin yom yilondinay Bibil piur pa kuman yom kurutu ni manangu. Jinswir 3:13-15 ulondin anch: “Wayuku kwend muntu ukata kutan manangu, ni muntu ukata kutambul ronganyin [kuman yom kurutu]! Mulong kupit kudiokila ku manangu kupandakenimu kuwap kupit kukudiokala ku utad wa usey ukash. Kwisak kwau kupandakenimu kuwap kwa or. Ni upadakenimu usey wa mayal ma usey ukash, kwikil chom cha rusot rey chiukumwilikeja nich.” Chakin kamu, Yehova ukat kusanger mikadil yiney kusutamu mapit min mawonsu ma kumujimbu.

Chidi nchik piur pa win kashinsh?

Yehova amwinend udi mwin kashinsh. ‘Kakutwishap kulond makasu.’ (Titus 1:2) Ni wamupepila kambuy Paul chakwel ayifundina in Kristu in Hebereu a mu mivu chitot ya kusambish anch: “Dandamenany kutulembidil. Twij nawamp anch, tukwet kom ka zwang, mulong tusotil yisu yawonsu kusal yom yiwamp.”—Hebereu 13:18.

Yesu Kristu watushila chilakej chiwamp cha win kashinsh. Chilakej, pamwipulau kudi Mwin Kupesh Mujim Kaifas anch, “Nakuchipil kal mu dijin dia Nzamb mwom, tuleja anch yey Kristu Uzizidilau Many, Mwan a Nzamb!,” Yesu wading mwin kashinsh ni wimekesha mudi Mesia. Ndiy walonda uyakin ap anch wading wij anch a Sanedrin ela kumufish nich, amusaala ni chom chinech chela kumushikij ku rufu.—Mateu 26:63-67.

Chidi nchik piur petu? Anch twashiken mu kuland yom ni twataninamu chad tumulejinap muntu mukwau usey twaladang nich yom ap mapaper masinyangau, ov, tukudandamen kwikal in kashinsh?

 YOM YIKUTWISHA KUMUKANGESH MUNTU IKALA MWIN KASHINSH

Chikutwish kwikal chikasikena kwikal mwin kashinsh mu machuku minam ma nsudien mulong antu avud adi “in kwikat ayinau, in kukat nfalang.” (2 Timote 3:2) Anch kudi milong ya kuburen nfalang, ap anch midimu yimekenap, antu avud asambishining kusal yom yiburedina win kashinsh mudi kwiy ni kudimban makasu. Mwawiy mutonginau antu avud anch mutapu umwing wakutaninamu mu yom ya kumujimbu udi kuburen win kashinsh. Ap in Kristu amwing akwata mipak yiyimp mulong wa ‘ris ra yom’ ashadisha mwikadil wau uwamp mu chikumangen.—1 Timote 3:8; Titus 1:7.

Pakwez, in Kristu avud akat kumwimburij Yesu. Ijing anch kwikal ni mikadil mudi ya Nzamb kudi kwa usey kupandakanamu mapit ap kutaninamu kwin kwawonsu. Chawiy chisadina anch ansand in Kristu alika kwiy ku ma ekzame mulong wa kumatik mu shikol yikwau. (Jinswir 20:23) Anch  udi mwin kashinsh kangal kuchingej anch chisu chawonsu ukutambul difut mudi Haykanush. Kudandamen kwikal ni win kashinsh ku yom yilondinay Nzamb anch yidi yiwamp, kutukwashin kwikal ni kom kishitwila, chidi chom cha usey kamu.

Chilakej cha Gagik chimekeshin yom yiney. Ulondin anch: “Kurutu kwa kwikal mwin Kristu, nasalang mu sosiete mujim mwalikangay mwin sosiete kulambul yitad ni wapana nfalan jikemp mulong wa kukatul milamu. Mudi mukurump wa mudimu, nasambisha ‘kwovijan’ ni antu alambwishang yitad mu kulondul yisal ya wij yadingau nich. Mudi chibudikin, nashikena kwikal mudi muntu uburedina win kashinsh. Pinileja uyakin, nalika kusal mudimu winou ap anch ading anfutin nawamp. Pakwez, nasambisha kwisak amwinam. Kupwa kwa machuku, nafundisha sosiete wam kwa mburamatad ni nasambisha kulambul yitad yawonsu.”—2 Korint 8:21.

Gagik ulondin kand anch: “Mudimu wam wayipa, yankasikena kuwanyish maswir mu dijuku diam. Pakwez katat nikwet musangar. Mulong nikwet kom kishitwila ku mes ma Yehova. Nidi chilakej chiwamp kudi an am amakundj aad, ni nikwet chisend mu chikumangen. Nikwet katat yisal yiwamp ni nidi mwin kashinsh pakach pa in kulambwish yitad ni antu tusading nau mudimu.”

YEHOVA UTUKWASHINING

Yehova uyikatin antu akata kumutumbish mu kwimburij mikadil yend yiwamp ni win kashinsh. (Titus 2:10) Anch twasal mwamu, ushidinamu anch ukutukwash. Wamupepila Mwant David palonday anch: “Nading nsand, katat nananap kal, pakwez kand kal nimumanangip mwin kutentam amulikil, ap anend [akimb] yakudia.”—Kuseng 37:25.

Yom yamushikena Rut ushinshamena yimekeshin yom yiney. Washala ushinshamena kudi mawenend, Nawom, pa ndond pa kumulik mulong wananapin kal. Rut waya mu Isarel, kwinikwa kwawiy kwamwifukwilay Nzamb wakin. (Rut 1:16, 17) Wading mwin kashinsh ni wasala usu nakash wakunonijol yakudia mu chir, kulondwish chijil chatekau mulong wa atuzwendj. Mutapu umwing ni yom yamushikena David, Yehova kamulikap Rut ni Nawom. (Rut 2:2-18) Wamusadina kand Rut yom yivud kupandakanamu kumukwash ni yom ya kumujimbu. Wamutonda kwikal umwing wa mu dijuku dia Mwant David mukezay kuvadik Mesia!—Rut 4:13-17; Mateu 1:5, 16.

Chikutwish kuyikasiken atushalapol amwing a Yehova kwikal ni nfalang jiwanyidina mulong wa kuwanyish maswir mau. Pakwez pandond pa kusal mudimu uswapela ukuyisala ikala akad kashinsh, asadining mudimu ni usu wau wawonsu. Pasadiningau mwamu, amekeshining anch mikadil yiwamp ya Nzamb kuwejinaku win kashinsh yidi ya usey kusutamu yom yawonsu ya ku mujimbu.—Jinswir 12:24; Efes 4:28.

Mudi Rut, in Kristu adia pa mangand mawonsu akat kumekesh ritiy mu usu wa Yehova chakwel ayikwash. Atekin ruchingej rau kudi Nzamb washilamu anch: “Kinikukushap, kinikez kukulikap chikupu.” (Hebereu 13:5) Chisu ni chishu, Yehova ukat kumekesh anch ukwet usu wa kuyikwash antu awonsu amekeshina win kashinsh chisu chawonsu. Yisu yawonsu udandamedining kuwanyish maswir ma atushalapol end.—Mateu 6:33.

Mwaning, antu akwatinimg kamang ni yom yikwau ya kumujimbu nich usey. Pakwez, tukwet kashinsh anch Tatukwetu wa mwiur ukwatin nich usey win kashinsh wetu ni mikadil yikwau yiwamp kupandakanamu mapit mawonsu ma usey!

Anch twikal in kashinsh, tukutwish kuyilej antu ni kom kishitwila