Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 6 , 2016

Mumana Yehova mudi Mwin Kuumb Wetu

Mumana Yehova mudi Mwin Kuumb Wetu

‘Pakwez ey, Yehova, . . . ey udi mwin kutuumb, etu tudi mudimu wa makas mey.’—ISAY 64:8.

MIMINY: 11, 26

1. Mulong wak Yehova udi mwin kuumb mujim?

MWI Ngond wa 11, 2010, Chom cha kam chikur nakash cha mu Chine achilandisha usey uvud nakash, mwi ngand ya Angleterre ku usey piswimp ni a dolar miliyon 70. Chidi cha kushimok anch mwin kuumb ukutwish waumb chom mudi musadiningay yom yikwau ya kam wa usey ukemp pakwez ukutwish wasal nich kam winiwa chom chiwamp ni cha usey. Yehova mwin kutuumb udi mujim kusutamu muntu win mwawonsu ukata kuumb. Bibil ulondin anch Yehova waumba muntu uwanyidina nich “rufunfut ra divu,” chimeken anch, kamuumbap nich kam. (Disambishil 2:7) Muntu winou Adam, wading “mwan a Nzamb” ni wamutanga nich ukaliweny wa kwimburij mikadil ya Nzamb.—Luka 3:38.

2, 3. Mutapu ik tukutwisha kwimburij mwikadil wa in Isarel akarumuka?

2 Adam pamubwambwilay Sakatang wend, kikalap kand mwan a Nzamb. Pakwez an avud a Adam amutonda Yehova mudi Nyikel wau. (Hebereu 12:1) Mu kwikepish ni kumuziyin Sakatang wau, amekesha anch amukatin ndiy, kwikal  Tatukwau ni mwin kuyiumb, pakwez Satan bwat. (Yohan 8:44) Kushinshaman kwau kudi Nzamb kutuvurishin mutapu walondau in Isarel pakarumukau anch: ‘Pakwez ey, Yehova, . . . ey udi mwin kutuumb, etu tudi mudimu wa makas mey.’—Isay 64:8.

3 In kwifukwil akin a Yehova nlel niyawiy asadin usu wa kwikepish ni kuziyin. Akwatin nich ntumb kumutazuk Yehova mudi Tatukwau, ni akatin anch ikal mwin kuyiumb. Tukatining kwikal mudi kam muwamp ukutwishay Nzamb kuumb nich chom chiwamp? Ov, tuyimening akadivar ni anambaz awonsu mudi mudimu uyila kurutu, adandamedinau kuumb kudi Nzamb? Mulong wa kutukwash kwikal ni mwikadil uwamp, tukushinshikin mutapu utondiningay Yehova antu akuumbay, mulong wak uyiumbining, ni mutapu usadiningay mwamu.

YEHOVA UTONDINING ANTU AKUUMBAY

4. Mutapu ik utondiningay Yehova antu akata kusejin kudi ndiy? Let chilakej.

4 Yehova kameningap antu mutapu tuyimening. Pakwez, ukat kutal mu muchim ni umening chitudia chakin kamu. (Tang 1 Samwel 16:7b.) Yehova wamekesha chom chinech pasalay chikumangen cha win Kristu. Wasejisha antu avud kudi ndiy ni kudi Mwanend amanangau kudi antu akwau anch kakwetap usey. (Yohan 6:44) Chilakej, umwing wa antu inay wading Mufaris watazukangau anch Saul, wading mwin ‘masaal ni mwin kuzengolan ni chibud.’ (1 Timote 1:13) Pakwez Yehova wamana muchim wa Saul ni kamumanap mudi kam wakad usey. (Jinswir 17:3) Pakwez, Yehova wamana anch wafanyina kumuumb Saul ikal mudi “chom chitondinau” chakwel alejana “kudi in michid yikwau, ni kudi ant, ni kudi in Isarel.” (Midimu 9:15) Yehova watonda kand antu akwau akutwishay kuumb mulong wa “kusadil mudimu wa katumb,” pakach pa antu inay mudi antu alewang maar pakur, asalang masandj, ni antu iyang. (Rom 9:21; 1 Korint 6:9-11) Chisu chilejau Bibil, akasikesha ritiy rau mudiay Yehova ni itiya anch ayiumba.

Tufanyidinap kuyirumburish antu adia mu teritwar wetu ap adia mu chikumangen chetu

5, 6. Mutapu ik kumuchingejin Yehova mudi mwin kutuumb kukwikal ni usu pa mwikadil wetu pantaliken ni (a) antu adia mu teritwar ? (b) akadivar ni anambaz netu?

5 Tuchingejin anch Yehova ukutwish kutond ni kusejish piswimp antu. Chawiy tufanyidinap kuyirumburish antu adia mu teritwar wetu ap mu chikumangen chetu. Tal chilakej chilejena mutapu wasalay Michael chisu chezau kumutal kudi Atuman a Yehova. Ulondin anch: “Nadiokalaku kwam ni nayivuramena mudi kadingapaku. Nading ni chibeng nakash ! Kupwa kwa kushakam mu jindond kushalijan, Natanijana ni dijuku dia nasangera mulong wa yisal yau yiwamp. Dichuku dimwing naziya—mulong ading Atuman a Yehova! Yisal yau yambachika kushinshikin pa yom  nading kutong. Pikwasuta machuku nijika anch mwikadil wam wading wimedin pa kulik kwijik ni pa yom yalondangau, pakwez yadingap yakin.” Michael wakata kwilej yom yivud ni witiya dilejan dia Bibil. Kupwa amubatisha ni wikala kashalapol wa chisu chawonsu.

6 Anch twijik anch Yehova udi mwin kutuumb, mwikadil wetu piur pa akadivar ni anambaz ukuswimp. Tukuman muntu ni muntu wapakach pau mudi mudimu udandamedina kuya kurutu. Wawiy mutapu uyimeningay Yehova. Umen mutapu udia chakin mu michim ni wij anch kuburen kuwanyin kwau kudi kwau kwa chisu chikemp. Wij kand mutapu ukwikalay muntu ni muntu wa pakach pau. (Kuseng 130:3) Tukutwish kumwimburij Yehova anch twikal ni chitongijok cha mutapu umwing piur pa akadivar netu. Tukutwish kand kusal mudimu pamwing ni mwin kutuumb wetu mulong wa kuyikwash akadivar ni anambaz netu adandamen kuya kurutu. (1 Tesalonik 5:14, 15) Amakurump mu chikumangen afanyidin kumekesh chilakej mu kasal mwamu.—Efes 4:8, 11-13.

MULONG WAK YEHOVA UKAT KUTUUMB?

7. Mulong wak usangaredining dipup dia Yehova?

7 Antu amwing akutwish kulond anch: ‘Kand kal nikwatangap dipup dinatambulang kudi anvaj nich usey djat pinikala nau an.’ Pituyila kupam, tukutwish kukwat dipup nich usey mulong tumen anch udi mudi mutapu wa kumekesh rukat. (Tang Hebereu 12:5, 6, 11.) Mwawiy, Yehova utukatin mudi an end, chawiy chikatay kutupup nich kushimpish muchim, ap kutuumb. Ukatin anch twikal ni manangu ni musangar ni tumukata mudi tatukwetu. (Jinswir 23:15) Kakatiningap kutuman tukat kuman mar, ni kakatiningap anch tufa mudi in yitil akad kukarumuk.—Efes 2:2, 3.

Yehova utukatin mudi an end, chawiy ukat kutupup nich kushimpish muchim, ap kutuumb

8, 9. Mutapu ik utufundishinay Yehova nlel, ni mutapu ik kufumb kwinoku kukudandamen kuya kurutu mu machuku ma kurutu?

8 Kurutu tumwijika Yehova, twading pamwing ap ni mikadil yiyimp. Pakwez Yehova watuumba ni watukwasha kuswimp, mudi chibudikin tukwet katat mikadil yimwing yiwamp. (Isay 11:6-8; Kolosay 3:9, 10) Tudi mu paradis wa muspiritu. Yiney yawiy ndond yiwamp yisadinay mu machuku metu mulong wakumukwash kutuumb. Mu paradis winou, twiyovil nawamp ni tudi mudiking ap anch mangand matunyingumukina madi mayimp. Antu apama pakad kuyimekeshin rukat mu majuku mau katat amen rukat rakin ridiokila kudi akadivar ni anambaz nau mu paradise wa muspiritu (Yohan 13:35) Ni tukat kwilej anch tufanyidin kumekesh rukat kudi akwetu. Pakwez chidia cha usey, kudi kumwijik Yehova ni kwijik anch katat utumekeshidin rukat mudi nvaj.—Jakobu 4:8.

9 Mwi ngand yisu, tukutaninamu nakash mu paradis winou wa muspiritu. Tukusanger kand mwom mu paradis wa  kumujimbu pakuyikela Want wa Nzamb. Chisu chinicha, Yehova ukudandamen kutuumb ni kutufumb mu mutapu wakad kutwish kutongin katat kamu. (Isay 11:9) Yehova ukusal kand manangu ni mijimbu yetu kwikal yiwanyidina. Chinech chikusal anch chituswapel kutesh ni kuziyin kwimbil jend. Chawil el tudandamen kumulik Yehova chakwel atuumba ni el tumumekeshin anch tukwatin nich usey rukat rend ritumekeshidinay.—Jinswir 3:11, 12.

MUTAPU UTUUMBINAY YEHOVA

10. Mutapu ik wamekeshay Yesu kushimpish muchim ni ukaliweny wa Mwin Kuumb Mujim?

10 Mudi mwin kuumb ukweta ukaliweny wija kam ukutwishay kuumbay nich, Muumb wetu, Yehova utwij nawamp. Ndiy wij ulim wetu, mipak yetu, ni usu tusadining, ni ukat kutuumb muntu ni muntu kulondwish mitapu kushalijan mu manangu. (Tang Kuseng 103:10-14.) Tukutwish kwilej mutapu utumeningay Yehova pa kutal mutapu wasalay Yesu piur pa kurumbuk kwa atwimbuy end. Yisu yimwing, atwimbuy atadikijanang mulong wakwijik nany wading mukurump. Anch wadingaku mutapu ik wakimba kuman yisal ya atwimbuy? Wakimba kutong anch kadingap mudi kam muwamp. Pakwez, Yesu wading wij anch afanyina kuyiumb anch atesh chiyul chend chiwamp ni imburij kwikepish kwend. (Marko 9:33-37; 10:37, 41-45; Luka 22:24-27) Kupwa kwa kuvumbuk kwend atwimbuy atambula spiritu wa Nzamb ni kimenap kand pa kutadikijan mulong wa kwijik nany udia mukurump. Pakwez, imena pa mudimu wayikishau kudi Yesu.—Midimu 5:42.

11. Mu mitapu ik kushalijan mwamekeshay David anch udi mudi kam muwamp, ni mutapu ik tufanyindina kumwimburij?

11 Nlel, Yehova usadidin Bibil, spiritu wend utumbila, ni chikumangen mulong wa kutuumb. Mutapu ik ukutwishay Bibil kutuumb? Tufanyidin kumutang, kutongijokin pa yom tutangina, ni kumwit Yehova chakwel atukwasha kusadin yom twilejina. Mwant David wanfunda anch: “Anch nakuvurik ey pa ulal wam pakutongijok mulong wa yom yey.” (Kuseng 63:6) Wafunda kand anch: “Nakat kumushiman Yehova ukata kwiyul uchuku kom kam kakat kwimbabesh.” (Kuseng 16:7) Mwawiy, David watongijokina pa chiyul cha Yehova ni ndiy witiya anch chiyul chinech chiumba yitongijok ni yovil yend, ap anch chiyul chinech chading chikasiken kuchitiy. (2 Samwel 12:1-13) David watushila chilakej chiwamp cha kwikepish ni kuziyin. Chawiy iyipula anch: ‘Anch natang Bibil, ov, nikat kutongijokin pa yom nitangina ni kulik chiyul cha Nzamb chishik ku muchim ni yovil yam? Nikutwish kusal mwamu chipandikena?’—Kuseng 1:2, 3.

12, 13. Mutapu ik utuumbinay Yehova kusutin spiritu utumbila ni chikumangen cha win Kristu?

12 Spiritu utumbila ukutwish kutuumb mu mitapu kushalijan. Chilakej, ukutwish kutukwash kwilej kwimburij untu usu wa Yesu, ni kumekesh yom kushalijan ya dimbuj dia mu spiritu. (Galatia 5:22, 23) Chom chimwing cha dibuj dined ridi rukat. Tumukatin Nzamb ni tukatin kumuziyin ni kwikal aumbinau kudi ndiy mulong twij anch yijil yend yidi mulong wakutaninamu kwetu. Chikwau kand, spiritu utumbila ukutwinkish usu wa kwipuk kwikal aumbinau kudi mangand minam mayimp. (Efes 2:2) Padingay  kambuy Paul nsand, amubachika kwikal ni chibud kudi antakel a chirelijon a in Yuda. Pakwez spiritu utumbila wamukwasha kuswimp. Kupwa wafunda anch: “Nikutwish kusal yom yawonsu mwi ndiy ukata kwinkasikesh am.” (Filip 4:13 TMK) Niyetu tukwet kuswir kwa kwit spiritu utumbila, mulong twij anch Yehova ukutesh malembil metu madiokila mu muchim.—Kuseng 10:17.

Yehova usadidin amakurump in Kristu mulong wa kutuumb, pakwez tufanyidin kusadin yiyul yau (Tal paragraf 12, 13)

13 Yehova usadidin kand chikumangen ni amakurump mulong wa kuumb muntu win mwawonsu. Chilakej, anch amakurump aman anch tukwet yilim kampand, akusal usu wa kutukwash. Pakwez, kakupanap yiyul yimedina pa manangu mau. (Galatia 6:1) Chawiy, akat kumulembil Yehova nich kwikepish mulong wa kutesh kuwamp ni kutambul manangu. Kupwa, akat kusadin Bibil ni mikand yetu ya win Kristu mulong wa kukimbijol chakwel atana jinsangu jikutwisha kutukwash. Anch amakurump ez kukutal ni kukwinkish chiyul chiwamp ni cha rukat, pamwing ap piur mutapu wey wa kudjal, vurik anch chinech chimekeshin rukat ra Nzamb mulong weyey. Anch wasadin chiyul, ukwikal mudi kam muwamp ukutwishau kuumb kudi Yehova, ni ukutaninamu.

14. Ap anch Yehova ukwet usu piur pa kam, mutapu ik umekeshinay anch ulimishim want ipetu?

14 Anch twatesh nawamp mutapu utuumbinay Yehova, chikutwish kutukwash kwikal ni urund uwamp pamwing ni akadivar nau anambaz netu. Chikwau kand, tukwikal ni mwikadil uwamp piur pa antu adia mu teritwar wetu, ni antu tukata kwilej nau Bibil. Mu chisu chafundau Bibil, kurutu kwa kuumb kam, mwin kuumb wafanyina kumuwapish ni kudiosh mayal ni yishoshot yikwau. Mwin Kuumb Mujim, Yehova, uyikwashin antu akatina anch ayiumba. Kakuyisadishangap ku usu anch aswimpa,  pakwez, ukat kuyilej mbil jend jishitwila. Chawiy akutwish kwitondin ayinau anch akuswiriken kuswimp.

15, 16. Mutapu ik ukumekeshau in kwilej a Bibil anch akatin Yehova ayiumb? Let chilakej.

15 Tal yamushikena Tessie, nambaz umwing wa mwi ngand ya Australie. Chading chimuswapedin nakash kwilej yilondinay Bibil. Pakwez, kayap kurutu nakash, ni walika kuya kuyikumangan. Nambaz wilejangay nend Bibil walembila kudi Yehova ni wakwata mupak wa kwimik dilejan dia Bibil. Chad chom cha kushimok chasadika. Pilejangau, Tessie wamuleja mulej wend mulong wak chimukasikedin kuya kurutu. Walonda anch wading wiyovil mudi mwin rubabek mulong wakatang kusengan masengan ma nfalang. Pakwez katat wakwatin kal mupak wakulik kusengan kand masengan ma nfalang.

16 Chikwasuta machuku, Tessie wasambisha kand kuya kuyikumangan ni kumekesh mikadil ya win Kristu ap anch arund nend amwing apakur amusipang. Pasuta machuku, Tessie amubatisha ni wikala chibol wa rawonsu, ap anch wading uchidi mwanikanch. Chimeken patok anch ang in kwilej Bibil asambish kuswimp mulong wa kumusangaresh Nzamb, ukuyisejin piswimp ni ukuyiumb mudi yom ya usey.

17. (a) Yom ik yikusangareshina piur pa kwijik anch Yehova udi mwin kutuumb? (b) Mitapu ik ya kuumb tukushinshikina kurutu oku?

17 Nlel, in kuumb amwing adandamedin kuwapish kam chakwel aumb yom yiwamp nich makas mau. Chilik chimwing, Yehova ukat kushimpish muchim pakatay kutuumb mukusadin yiyul yend ni utadining aman mutapu ik tukusala. (Tang Kuseng 32:8.) Ukutwish kuman anch Yehova ukat kukutongin nakash? Umen mutapu ukuumbinay Yehova nawamp? Anch mwawiy, mikadil ik yikukukwasha kwikal mudi kam muwamp ukutwishay Yehova kuumb? Yisal ik yiufanyidina kwipuk chakwel ulika kwikal mudi kam ukasikena ukukanganyau kuumb? Mutapu ik ukutwishau kusal anvaj pamwing ni Yehova mulong wa kuumb anau? Mutu wa mulong ulondwilaku ou ukwakul ku yipul yiney.