Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 6 , 2016

Kangal Walik Kurumbuk Kwa Antu Akwau Kukupwakesh

Kangal Walik Kurumbuk Kwa Antu Akwau Kukupwakesh

“Dandamenany . . . kulikishijadin ayinen umwing ni mukwau.”—KOLOSAY 3:13 NWT.

MIMINY: 53, 28

1, 2. Mutapu ik watakelay kulond Bibil piur pa kuya kurutu kwa antu a Yehova?

PA DIVU diawonsu, padi dirijek diyikwashina antu kumukat Yehova ni kumusadin. Antu inay adi Atuman a Yehova. Ap anch akwet yilim ni akat kurumbuk, Yehova uyitakedin antu end nich spiritu utumbila. El tumana mitapu kushalijan uyiyukishinay antu inay.

2 Mu muvu wa 1914, antu akemp amwifukwilang Yehova. Pakwez, Yehova wayukisha mudimu wa kulejan. Mudi chibudikin, mamiliyon ma antu ileja uyakin wa mu Bibil ni ikala atuman end. Yehova warumburila kuya kurutu kwinoku kushimokishena palonday anch: “Dijuku diey dikemp dia uzwendj dikez kikal muchid wa usu. Pakeza kawanyin chisu chiwamp, nikez kamekesh yom yiney swa. Yam kamu [Yehova].” (Isay 60:22) Nlel tukutwish kuman patok anch uprofet winou uwanyidin kamu. Antu a Yehova adi mudi muchid ujim. Pachinech, kudi jingand jivud pa mangand  mawonsu jikweta antu akemp kusutamu uvud udiau antu a Yehova.

3. Mutapu ik wamekeshau atushalapol a Nzamb rukat?

3 Mu machuku minam mansudien, Yehova uyikwashin antu end payikasikeshinay mulong wa kukatijan umwing ni mukwau. “Nzamb udi rukat,” ni akat kumwimburij. (1 Yohan 4:8) Yesu wayileja in kwilej end anch “Katijanany muntu ni mukwau.” Wayileja kand anch: “Anch niyen wakatijanany mwamu, chawiy antu awonsu akez kwijik anch, en udiany in kwilejam.” (Yohan 13:34, 35) Mu mivu ya kwinyim ey, atushalapol a Yehova amekesha rukat riner umwing ni mukwau ap anch michid yarisha njit. Chilakej, mwi njit ja kaad ja ma ngand mawonsu, ajipa antu piswimp amiliyon 55. Pakwez antu a Yehova kajipap muntu ap umwing mwi njit jinija. (Tang Mike 4:1, 3.) Chinech chayikwasha kushal ‘itokishina ku mash ma antu awonsu.’—Midimu 20:26.

4. Mulong wak kuya kurutu kwa antu a Yehova kudi kwa kushimok?

4 Uvud wa antu a Nzamb udandamedin kuya kurutu ap anch akwet mukankuny ukweta usu, Satan. Ndiy ‘nzamb uyikedila mangand minam.’ (2 Korint 4:4) Satan utakedin yitenchik ya politik ya mangand minam, mudi yom yisu ya kupalangesh nich jinsangu, ni usadidin yom yiney mulong wa kupakish kwimik mudimu wa kulejan rusangu ruwamp. Pakwez kakutwishap kwimik mudimu winou. Mulong Satan wij anch ukwet kachisu kakemp, chawiy udandamedin kupakish kutukangesh kumwifukwil Yehova.—Kujingunik 12:12.

UKUSHAL USHINSHAMENA AP ANCH AKWEN ARUMBUK?

5. Mulong wak yisu yimwing antu akwau akutwish kutwovish kuyip? (Tal chipich cha kwinsambishin.)

5 Atushalapol a Nzamb ilejin anch chidi cha usey nakash kumukat Yehova ni antu akwau. Yesu walonda anch: “‘Mukata [Yehova] Nzamb wey nich muchim wey wawonsu, ni mupim wey wawonsu, ni manangu mey mawonsu.’ Chinech chawiy chijil chipandakena ni chakusambish. Chijil cha kaad, chidia mudi chinech, chawiy ech: ‘Mukata mukwen mudi muwikatila ey amwiney.’” (Mateu 22:35-39) Pakwez, Bibil ulejen anch antu awonsu akat kuvadik akad kuwanyin mudi chibudikin cha chitil cha Adam. (Tang Rom 5:12, 19.) Chawiy yisu yimwing antu amwing mu chikumangen akutwish kusal ap kulond chom chikutwisha kutwovish kuyip. Anch chom chinech chashiken, yom ik tukusala? Ov, rukat retu mulong wa Yehova rikushal rikash? Ukwikal ushinshamena kudi Yehova ni kudi antu end? Bibil utulejin piur pa atushalapol a Nzamb alonda ap asala yom ya yovisha antu akwau kuyip. El tuman yom tukutwisha kwilejin ku yom yayishikena.

Anch wading mu Isarel mu muchirung cha Eli ni an end amakudj, yom ik wakimba kusal? (Tal paragraf 6)

6. Mutapu ik wakanganyay Eli kuyipup an end amakundj?

6 Chilakej, Eli wading mwin kupesh mujim wa mu Isarel, pakwez an end amakundj aad ading kubwambwil ku yijil ya Yehova. Bibil ulondin anch: “An amakundj a Eli ading antu amwamu, kadingap ni kumulimish [Yehova].” (1 Samwel 2:12) Eli wading wij anch an end asalang yom yiyimp nakash. Ap mwamu,  kayipupap. Chisu chawanyina, Yehova wamupupa Eli nau an end. Kupwa, Yehova kitiyap kand anch an a mudijuku dia Eli asal mudi in kupesh ajim. (1 Samwel 3:10-14) Anch wadingaku mu chisu cha Eli ni anch wijika anch uyilikin an end asal yom yiyimp, ov, yakimba Kukupwakesh? Yom yiney yakimba kuziyish ritiy rey mudiay Yehova, ni mudi chibudikin, wakimba kulik kumusadin Yehova?

7. Yitil ik yijim yasalay David, ni chom ik chasalay Nzamb mulong wa yitil yiney?

7 David wading ni mikadil yiwamp, chawiy chasala anch Yehova amukata nakash. (1 Samwel 13:13, 14; Midimu 13:22) Pakwez David wasala chom chimwing chiyimp. Padingay Uria kwi njit, David wasala masandj ni mband wa Uria, Batisheba, ni wikala ni madikaj. David kakatap anch muntu ap umwing ijika yom yasalay. Chawiy wamutazuka Uria ni wamuleja anch achirika ku chikumbu. David wachingeja anch Uria ukulal ni mukajend Batisheba chakwel antu ijik anch Uria ndiy tatuku wa mwan winawa. Pakwez Uria walika kuchirik ku chikumbu. David wikala ni kashinsh anch Uria ukufa kwi njit. Mulong wa yitil yiney yijim, David ni dijuku diend amana maar nakash. (2 Samwel 12:9-12) Pakwez Yehova wamwovila riy ni wamulikishina. Wading wij anch David wakimba kusal yom yiwamp. (1 Ant 9:4) Anch wadingaku pa chisu chinicha, mutapu ik wakimba kwiyov mulong wa yom yasalay David? Ov, wakimba kulik kumusadin Yehova?

8. (a) Mutapu ik wakanganyay Pita kulimish mazu mend malonday? (b) Kupwa kwa Pita kusal yom yiyimp, mulong wak Yehova wadandamena kumusadin?

 8 Chilakej chikwau chidia mu Bibil chidi cha Pita. Yesu wamutonda mulong ikala kambuy wend. Ap mwamu, yisu yimwing Pita wasalang ni walondang yom yakad kuwanyin. Chilakej, Pita walonda anch kakezap kumulik Yesu ap anch antu akwau asal mwamu. (Marko 14:27-31, 50) Pakwez, pamukwatau Yesu atwimbuy awonsu amulika ni Pita wamulika. Pakwez, tupamp tusatu, Pita wamutuna Yesu. (Marko 14:53, 54, 66-72) Chawiy Pita, wanenganana nakash mulong wa yom yasalay. Chad Yehova wamulikishina ni wadandamena kumusadin. Anch wading kambuy chisu chinicha ni wijika yom yasalay Pita, ov, wela kudandamen kumuchingejin Yehova?

Tufanyidin kwikal nich kashinsh anch Yehova yisu yawonsu usadining yom yitentamina ni yiwanyidina

9. Mulong wak uchingejina anch Nzamb uding yisu yawonsu utetamina?

9 Kusutin yilakej yiney, twaman kal anch atushalapol amwing a Yehova asala yom yiyimp ni ayipwakesha antu akwau. Anch yom yiney yashiken nlel unou, ukusal nchik? Ukulik kuya kuyikumangan ap ukumulik Yehova ni antu end rawonsu? Ap ukujingunin anch Yehova udi mwin riy ni ukata kushimpish muchim anch muntu ita dilikishin ni akarumuka? Pakwez chisu chimwing muntu ukutwish kusal yitil yijim, chad walik kwit dilikishin piur pa yitil yasadinay. Ukutwish kuchingejin anch Yehova wij mulong winou ni ukutwish kusal chom kanang pa chisu chiwanyidina? Ukez kand kumwopat muntu winou mu chikumangen anch chitwishikin. Witiyijining anch Yehova usadining yisu yawonsu yom yitentamina ni yiwanyidina?

SHAL USHINSHAMENA

10. Mutapu ik wasalay Yesu piur pa kurumbuk kwa Yudas Isakariot ni Pita?

10 Tutangin mu Bibil piur pa antu avud ashala ashinshamena kudi Yehova ni kudi antu end ap anch antu ading ashichau nau asala yitil yijim. Yesu udi chilakej chiwamp. Kupwa kwa kusutish uchuku wawonsu mu malembil mulong wa kwit ukwash kudi Tatukwend, watonda atwimbuy 12. Pakwez umwing pakach pau, Yudas Isakariot, wamulandisha. Chikwau kand, kambuy Pita walonda anch kamwijap Yesu. (Luka 6:12-16; 22:2-6, 31, 32) Yesu kamufishap nich Yehova ap in kwilej akwau pamutunau kudi amwing a in kwelej end. Pakwez, Yesu washala piswimp ni Tatukwend ni wadandamena kumusadin ni kushinshaman. Mudi chibudikin, Yehova wamufuta pamuvumbulay ni kupwa wamuteka kwikal Mwant wa Want wa mwiur.—Mateu 28:7, 18-20.

11. Chom ik chasambelay kulond Bibil piur pa atushalapol a Yehova mu machuku minam?

11 Chilakej cha Yesu chitufundishin kwikal ashinshamena kudi Yehova ni antu end. Ni tukwet mayingishin mawamp ma kusal mwamu. Tukuman anch Yehova utakedin antu end mu machuku minam ma nsudiel. Uyikwashining chakwel alejan uyakin pa mangand mawonsu,  ni ching kwau awiy asadina mudimu winou. Adi kand mu umwing wakin ni akwet musangar mulong awonsu ayifundishining kudi Yehova. Yehova walonda piur pa chom chinech anch: “Talany! Atushalapol am akez kawang nich musangar mulong wa mwikadil uwamp wa muchim.”—Isay 65:14, NWT.

Chidi kuburen manangu ni cha ushon kumulik Yehova ni antu end mulong muntu kanang walonda ap wasala chom kanang chakad kuwanyin

12. Mutapu ik tufanyidina kuman kurumbok kwa antu akwau?

12 Tukwet chakin kamu musangar mulong Yehova ututakedin ni utukwashin tusala yom yivud yiwamp. Chinyim ni antu adia mu mangand ma Satan, kakwetap musangar ni kakwetap kand ruchingej rakin mulong wa machuku ma kurutu. Chidi kuburen manangu ni cha ushon mudi ik kumulik Yehova ni antu end mulong muntu kanang walonda ap wasala chom kanang chakad kuwanyin mu chikumangen! Pakwez, tufanyidin kushal ashinshamena kudi Yehova ni kulondul wintakel wend. Tufanyidin kand kwilej mutapu wa kuman ni mutapu wa kusal piur pa kurumbok kwa antu akwau.

MUTAPU IK UFANYIDINA KUSAL?

13, 14. (a) Mulong wak tufanyidina kushimpish muchim mulong wa antu akwau? (b) Kushilamu ik kongojina tufanyidina kuvurik?

13 Chom ik ukusala anch mukadivar ney walond ap wasal chom kanang chikutwisha kukwovish kuyip? Bibil utuyudin anch: “Kangal wikal mwin kwov ujim swa, mulong ujim ukat kwikal mu muchim mwa chisup.” (Mulej 7:9) Etu awonsu tudi antu akad kuwanyin ni tukat kurumbok. Chawiy tufanyidinap kuyichingejin akadivar yisu yawonsu anch akusal ni akulond ching yom yiwamp. Ni chiwapinap kudandamen kutongin pa kurumbok kwau. Anch twadandamen kusal mwamu, tukumusadinap Yehova ni musangar. Chikwau kand, chikwikal chiyimp nakash mulong ritiy retu rikuziy, ni tukudiokal mu dirigek dia Yehova. Kupwa, tukumusadinap Yehova ap tukushadish ruchingej ra kushakam mwi ngand yisu.

14 Chom ik chikukukwasha udandamena kumusadin Yehova ni musangar anch antu akwau asal yom yikutwisha kukwovish nayimp? Yisu yawonsu ufanyidin kuvurik kushilamu kongojina kulondina anch: ‘Tal! Am nikat kutang mangand masu ni maur masu. Yom yawonsu ya pakur akez kayivuramen, ni kakezap kayivurik.’ (Isay 65:17; 2 Pita 3:13) Yehova ukez kukuyukish nich yom yiney anch washal ushinshamena kudi ndiy.

15. Yom ik yalonday Yesu yitufanyidina kusal anch aturumbukin kudi antu akwau?

15 Chakin kamu, kandikal twandama mwi ngand yisu. Chawiy, anch muntu kanang watwovish kuyip, tufanyidin kutongin pa yom yikatinay Yehova anch tusal. Chilakej, Yesu walonda anch: “Anch wayilikishinany akwen akusalanya nayimp, Tatukwen udia mwiur ukukulikishinany kand niyen. Pakwez anch en walikany kuyilikishin akwen, Tatukwen kakez kukulikishinanyap  kuyip kuwasalanya.” Ni Pita wamwipula Yesu anch tupamp twinch tufanyidina kulikishin ‘ov, tupamp sambwad?,’ Yesu wamwakula anch: ‘Tupamp sambwad, bwat, pakwez tupamp 77.’ Yesu watufundisha anch tufanyidin kuyilikishin antu akwau kwa kwikatin.—Mateu 6:14, 15; 18:21, 22.

16. Chilakej ik chiwamp chashay Josef?

16 Chilakej cha Josef chitufundishin mutapu tufanyidina kusal anch antu akwau aturumbukin. Josef ni mwanamakwend ading an amakundj a Jakob ni Rashel. Jakob wading ni an akwau amakundj dikum, pakwez wamukata Josef kusutamu an akwau. Chinech chawiy chasala anch anamakwend amwovil Josef mukau. Chakin kamu, amukisa nakash ni ashikena kumulandish mudi muswik, ni amulandisha mu Idjibit. Kwasuta mivu yivud, mwant wa mu Idjibit wamuteka Josef kwikal muntu mujim wakaad mwi ngand yiniya mulong mwant winou wasangera midimu yiwamp yasalay Josef. Kupwa, anamakwend a Josef eza mu Idjibit mulong wa kuland yakudia, mulong mwi ngand yau mwading kamungun. Pamumanau Josef kudi anamakwend kamwijikap, pakwez ndiy wayijika. Ap anch amusadina nayimp, Josef kayifishap nich, pakwez wayipaka chakwel ijik anch aswipin kal yisal yau yiyimp. Pamanay Josef anch aswipin kal, wayileja anch nidi mwanamakwen. Kupwa wayikasikesha ni walonda anch: ‘Kangal wakamany kwen. Yama kamu nikukudishanya en nau ijukur en.’—Disambishil 50:21.

17. Tukusal nchik anch antu akwau aturumbukin?

17 Ijik anch muntu mwawonsu ukat kurumbukang, niyey ukutwish kuyirumbukin antu akwau. Anch wajingunin anch wamurumbukinang muntu kanang, londul chiyul cha Bibil. Mwita dilikishin, ni sal usu wa kwikal nend mu chisambu. (Tang Mateu 5:23, 24.) Tukatining anch atulikishin kudi antu akwau. Chawiy niyetu tufanyidin kuyilikishin. Kolosay 3:13 utulejin anch: ‘dandamenany kulikishijadin ayinen umwing ni mukwau, anch muntu ukwet mulong ni mukwau. Mudi mwakulikishinanyau en kudi Yehova. Niyen salany kand mwamu.’ Anch tuyikatin chakin kamu akadivar netu, tukudandamenap kuyilamin rukuny mulong wa yom ya tusalau. (1 Korint 13:5) Anch twayilikishin antu akwau, Yehova ukutulikishin niyetu. Chawiy anch antu aturumbukin, tufanyidin kuyovil riy mudi mukatay Tatukwetu Yehova kutwovil riy.—Tang Kuseng 103:12-14.