Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 6 , 2016

Witiyin Anch Mwin Kuumb Mujim Akuumb?

Witiyin Anch Mwin Kuumb Mujim Akuumb?

“Chakin, en udiany mu makas mam mudi mudiay kam mu makas ma muumb a mannung.”—JEREMIY 18:6.

MIMINY: 23, 22

1, 2. Mulong wak Nzamb wamumana Daniel mudi ‘muntu ukweta usey,’ ni mutapu ik tukutwisha kwikal aziyidina mudi Daniel?

PAYIKWATAU in Yuda mu Babilon, andama mu musumb wizwila nich akish ni antu ifukwilang aspirit ayimp. Pakwez, in Yuda ashinshamena, mudi Daniel ni arunend asatu alika kwikal aumbinau kudi antu a mu Babilon. (Daniel 1:6, 8, 12; 3:16-18) Daniel ni arunend amwitiya Yehova mudi muumb wau ni adandamena kumwifukwil ching ndiy. Ap anch Daniel washakama mwi ndond yiyimp mu machuku mavud ma mwom wend, mwangel wa Nzamb walonda anch wading ‘muntu ukweta usey.’—Daniel 10:11, 19.

2 Chisu chafundau Bibil, mwin kuumb warijekang kam chakwel aumba yom kushalijan. Nlel, in kwifukwil akin ij anch Yehova udi Nyikel wa mangand mawonsu ni ukwet usu wakuumb antu a michidi yawonsu. (Tang Jeremiy 18:6.) Nzamb ukwet kand usu wa kuumb muntu win mwawonsu. Chawiy, Yehova kakatap kumushindin muntu chakwel aswimp. Pakwez, ukatining anch twipana kudi ndiy chakwel atuumb. Mu mutu wa mulong winou, tukwilej mutapu tukutwisha kushal mudi kam muwamp mu makas ma Nzamb.  Tukwisambin yipul yisatu yilondwila ey: (1) Mutapu ik tukutwisha kwipuk yom yikutwisha kutusal tulik kwitiy yiyul ya Nzamb ni twikal mudi kam ukasikena? (2) Mutapu ik tukutwisha kukudish mikadil yikutwisha kutukwash kushal aziyidina ni kwikal mudi kam muwamp? (3) Mutapu ik ukutwishau anvaj in Kristu kusal pamwing ni Nzamb chisu chiumbinau anau?

LIK YISAL YIKUTWISHA KUCHINCHIKISH MUCHIM

3. Yisal ik yikutwisha kuchinchikish muchim? Let chilakej.

3 Jinswir 4:23 ulondin anch: “Kupandikan yom yawonsu, lam muchim wey, mulong mwawiy mudia misul ya mwom.” Chakwel tulama michim yetu yilika kuchinchik, tufanyindin kulik yisal yiyimp mudi chibud, kusal yitil, ni kuburen ritiy. Anch tubabelap, yom yiney yikutwish kutusal twikal in kubwambwil. (Daniel 5:1, 20; Hebereu 3:13, 18, 19) Yawiy yamushikena Mwant Ozias wa mu Yuda. (Tang 2 Jinsangu 26:3-5, 16-21.) Kwinsambishin, Ozias wading uziyidin ni wading mu urund uwamp ni Nzamb, chiwiy Nzamb wamukasikesha. Pakwez “Chikalay kal nich usu uvud, muchim wend wibaza kwa kujiy.” Wikala ni chibud chawiy wandama mu tempel ni wosha diseng dia malash, mudimu winou wading ching wa in kupesh. Pamulejau kudi in kupesh anch wasal kal nayimp, Ozias wajimana nakash! Yehova wamukwatisha usany mwant winou mwin chibud, ni wayela musong wa kasu kushik ni pafilay.—Jinswir 16:18.

4, 5. Yom ik yikutwisha kusadik anch twakangany kwilam ku chibud ? Let chilakej.

4 Anch twipukinap chibud, tukusambish kutong anch tudi awamp kusutamu akwetu ni tukusambish kulik kwitiy yiyul yitwinkinau yidiokila mu Bibil. (Jinswir 29:1; Rom 12:3) Chawiy chamushikena mukurump utazukinau anch Jim. Kitiyap yom yalondau amakurump akwau piur pa yom yasadika mu chikumangen. Jim ulondin anch, “nayileja akadivar anch ukwetanap rukat, ni nabudika mu chikumangan.” Kupwa kwa angond musaban, waya mu chikumangen chikwau, pakwez kwinakwa kamutekap mudi mukurump. Jim waziya nakash. Ndiy wamana anch wading uyingin nich, chawiy walika kumusadin Yehova mu mivu dikum. Ulondin anch wading ni chibud ni wasambisha kumufish nich Yehova mulong wa yom yasadika. Mu mivu yinying, akadivar ayangang kumutal ni asala usu wa kumukwash, pakwez Jim walika ukwash wau.

5 Jim ulondin anch, “nadandamena kwimen pa yom yiyimp yansalau akwetu.” Chilakej chend chimekeshin kudi etu anch chibud chikutwish kutusal tusambish kwikangesh mulong wa mwikadil wetu uyimp. Anch yom mudi yiney yatushiken, tukwikalap kand mudi kam muwamp. (Jeremiy 17:9) Ov, kandikal akurumbukinangap kudi mukadivar ap kudi nambaz? Wovilap kal ushon mulong wa kushadish chisend? Mutapu ik wasala? Wikala ni chibud, anch wamana anch kwikal ni chisambu pamwing ni akadivar ney ni kulam kushinshaman kudi Yehova kudi kwa usey?—Tang Kuseng 119:165; Kolosay 3:13.

6. Yom ik yikutwisha kushiken anch twasal chitil?

6 Anch muntu wadandamen kusal yitil ni wajindjik yom yisadinay, chikumukasiken kwitiy chiyul cha Nzamb. Chikutwish kumuswapel kusal chitil. Mukadivar  umwing walonda anch yisu yimwing mwikadil wend uyimp wamukangeshangap kusal yom yawonsu yiyimp. (Mulej 8:11) Mukadivar mukwau, yisu yimwing wading ni chaku cha kutal pornografi, kupwa walonda anch, “Nakudisha mwikadil uyimp wa kuyilond amakurump.” Chaku chend chayipisha urund wend ni Yehova. Chisu chijikau akwau yom yasalangay, watambula ukwash kudi amakurump. Chidi chakin anch etu awonsu tudi akad kuwanyin. Pakwez anch tukat kulond nayimp mulong wa antu akata kutuyul ap anch tukat kukimb mayingishin anch twasal chom chiyimp, pandond pa kumwit Nzamb atulikishin ni atukwash, michim yetu yikutwish kwikal yichinchikina.

In Isarel abwambwila afila mwi mpay mulong wa michim yau yichinchikina ni mulong wakuburen ritiy

7, 8. (a) Mutapu ik wamekeshau in Isarel a pakur yisal yichinchikina yakad ritiy? (b) Yom ik twilejakal?

7 Chisu chayikolau an a Isarel kudi Yehova kudiokal mu Idjibit, amana mutapu wayisadinay yilay yivud yishimokishena. Ap mwamu, pashikau piswimp ni kwandam mwi ngand ya kushilamu michim yau yachinchika. Mulong wak? Mulong kadingap kand ni ritiy mudiay Nzamb. Pandond pa kumuchingejin Yehova, ova wom ni asambisha kununganijan piur pa Moses. Akimba kand kuchirik mu Idjibit mwadingau asuk! Yehova wanenganana nakash ni walonda anch: ‘Ov, chisu ik chikez kanlimishau antu inay?’ (Kuchind Michid 14:1-4, 11; Kuseng 78:40, 41) In Isarel inay afila mwi mpay mulong wa michim yau yichinchikina ni mulong wakuburen ritiy.

8 Nlel, tudi piswimp ni ngand yisu, ritiy retu akutwish kuripak. Chawiy tukwet kuswir kwa kushinshikin pa mwikadil wa ritiy retu. Mutapu ik tukutwisha kwikal nich kashinsh anch ridi rikash? Tufanyidin kushinshikin mazu ma Yesu madia mu Mateu 6:33. Iyipula anch: ‘yitongijok ni mipak yam yimekeshin anch nitiyijin mazu ma Yesu? Nikutwish kuburen yikumangan ap kulik kusal mudimu wakulejan mulong wa kukimb nfalang jivud? Yom ik nikutwisha kusal anch mudimu wam witin chisu chivu ni usu nakash? Nikwitiy anch mangand minam maumb ni pamwing ap kwikangesh kumusadin Yehova?’

9. Mulong wak tufanyidin “kudandamem kupak” anch tudi mu ritiy retu, ni mutapu ik tukutwisha kusal mwamu?

9 Anch tulondwilap yom yilondinay Bibil piur pa arund ayimp, antu opatinau kal, kwipuwangej, michim yetu yikutwish kuchinchik. Chom ik ufanyidina kusal anch yom yiney yasambish kukushiken? Ufanyidin kushinshikin ritiy rey pakad kulab! Bibil ulondin anch: “Ipakany ayinen, irumburishany ayinen, utalany anch ukwetany ritiy.” (2 Korint 13:5) Ikal nich kashinsh, ni sadin Dizu dia Nzamb chisu chawonsu mulong wa kuwapish yitongijok yey.

DANDAMEN KUSHAL MUDI KAM MUWAMP

10. Yom ik yikutukwasha kwikal mudi kam muwamp mu makas ma Yehova?

10 Mulong wa kutukwash kushal mudi  kam muwamp, Nzamb watwinkisha kal Dizu diend, chikumangen cha win Kristu, ni mudimu wa kulejan. Anch twatang Bibil ni kutongijokin pa yom yidiamu dichuku diawonsu, chikutukwash twikala awamp mu makas ma Yehova ni tukwitiy atuumba. Yehova wayileja ant a mu Isarel kufund mukand wa yijil ya Nzamb ni kuutang dichuku diawonsu. (Kuvurik yijil 17:18, 19) Atwimbuy ading ij anch kutang Mifund ya mu Bibil ni kutongijokin pa yom yitanginau kwading kwa usey nakash mulong wa mudimu wa kulejan. Asadina yikunku yimwing ya mifund ya Hebereu mu yitot ya mivu pafundau, ni chisu chayilejangau antu, ayikasikeshang kusadin mifund yiney nawamp. (Midimu 17:11) Mutapu wawiy umwing, ni yetu tumen anch chidi cha usey kutang ni kutongijokin pa Dizu dia Nzamb dichuku diawonsu. (1 Timote 4:15) Chinech chikutukwash twikal ikepishina ni Yehova ukutwish kutuumb.

Sadin yom yipaninay Nzamb chakwel yikukwash kushal mudi kam muwamp (Tal paragraf 10-13)

11, 12. Mutapu ik usadidinay Yehova chikumangen cha win Kristu mulong wa kutuumb kukwatijan ni maswir ma muntu ni muntu ? Let chilakej.

11 Yehova wij yom yikwetay nich muntu ni muntu kuswir, ni ukat kusadin chikumangen cha win Kristu mulong wa kutuumb. Jim, twajimbulang kwinsambishin wasambisha kuswimp mwikadil wend payau kumutal kudi mukurump umwing. Jim ulondin anch : “Mukurump  winou kanfishap nich kapamp kamwing mulong wa mashakamin mam ap kwinlond nayimp. Pakwez, wading ni chitongijok chiwamp ni wamekesha maswir ma kwinkwash.” Kupwa kwa angond asatu, mukurump winou wamutazuka Jim ku chikumangan. Jim ulondin anch chikumangen changaka nakash ni rukat rau rankwasha kuswimp yitongijok yam. Wasambisha kuman anch yovil yend yadingap yikweta usey. Amakurump a mu chikumangen cha Jim ni mukajend asambisha kumukasikesh Jim, ni wasambisha kumuchirikin Yehova pakemp pakemp ni kumusadin. Jim wataninamu kand mu kutang mitu ya milong yilondina anch “Jéhovah n’est pas à blâmer “ ni “Servons Jéhovah fidèlement,” yidia mu Chinong cha Kalam cha 15 Ngond wa 11, 1992 mu Français.

12 Kwasuta machuku, Jim wikala kand mukurump. Kudiosh pinipa, wayikwasha antu akwau kupwish milong ya mutapu mudi winou ni kukasikesh ritiy rau. Ulondin anch watonga anch wading ni urund wa piswimp ni Yehova pakawez kasalap mwamu! Ushimokin anch walika chibud chimubachik imena pa kurumbuk kwa antu akwau pandond pa kwimen pa yom yikweta usey.—1 Korint 10:12.

Anch twamwimburij Kristu, antu akusanger uruu wetu ni kuswimp yitongijok yau piur petu

13. Mudimu wetu wa kulejan ukutwish kutukwash kukudish mikadil ik ni tukutaninamu ik?

13 Mudimu wa kulejan ukutwish niwawiy kutuumb ni kutukwash chakwel twikala antu awamp. Mutapu ik? Chisu tulejening rusangu ruwamp, tufanyidining kumekesh mikadil mudi kwikepish ni mikadil kushalijan ya dibuj dia spiritu wa Nzamb. (Galatia 5:22, 23) Tong piur pa mikadil yiwamp yakukwashina kukudish mudimu wa kulejan. Anch twamwimburij Kristu, antu akusanger uruu wetu ni kuswimp yitongijok yau piur petu. Chilakej, Atuman aad a mwi ngand ya Australie apakisha kumulej mband umwing kol kwend, pakwez mband winou wajimana nakash ni wayiswingisha. Chad, Atuman inay amutesha kamu nich kalimish. Kupwa, mband winou washimoka mulong wa yisal yend yasalay ni wafunda mukand wend wautum ku biro wa mutiy. Wita dilikishin mulong wa yisal yend. Walonda anch, “Nading mudi nizarikin panimana kurutu kwa antu aad alejanang Dizu dia Nzamb ni nakimba kuyopat.” Yom mudi yiney yamanau, tukutwish kuman usey wa kwikal itudishina chisu tulejena. Chakin kamu, mudimu wetu wa kulejan ukat kuyikwash antu akwau, pakwez utukwashining kand kuwapish untu wetu.

KIMB UKWASH WA NZAMB CHISU UYIUMBINANYA ANEN

14. Yom ik yifanyidinau anvaj kusal anch akimb anch ikal nich usu wa kuyiumb anau?

14 An achida kal akemp nakash ikepishining ni akweting mushiku wa kwilej. (Mateu 18:1-4) Komb chidi cha manangu kudi anvaj kuyikwash anau kwilej uyakin ni kuukat chisu chichidiau kal anikanch. (2 Timote 3:14, 15) Mulong wa kutwish, anvaj afanyidin kukat uyakin ayinau ni kusadin yilondinay Bibil  mu mashakamin mau. Anch anvaj asal mwamu, chikuyiswapel anau kukat uyakin. Chikwau kand, an akwijik nawamp anch dipup dia anvajau dimekeshin anch ayikatin ni ayikatin kand kudi Yehova.

15, 16. Mutapu ik ukutwishau anvaj kumekesh anch atekin ruchingej rau mudiay Nzamb anch amwopat mwanau mu chikumangen?

15 Ap anch anvaj akat kuyifundish anau uyakin, an amwing akat kumulik Yehova ni akat kuyopat mu chikumangen. Anch yom mudi yiney yashiken, dijuku dikat kuman mar nakash. Nambaz umwing wa mwi ngand ya Afrique du Sud walonda anch: “Pamwopatau mpanyam mu chikumangen, chamekana mudi wafa kal. Yom yiney yaziyishana!” Pakwez yom ik yafanyinau kusal ndiy nau anvaj end? Alondula mbil jidia mu Bibil. (Tang 1 Korint 5:11, 13.) Anvaj ading ij anch kuziyin ku chiyul cha Nzamb kukumukwash muntu ni muntu kutaninamu. Ni ijika anch kumwopat muntu kudi kupup kwa rukat kudiokila kudi Yehova. Chawiy ambambang ni mwanau ching anch kudi milong ya usey mu dijuku.

16 Mutapu ik wiyovay mwan winou? Kupwa walonda anch, “Nijika anch dijuku diam diankisap, pakwez asala mwamu mulong wa kumuziyin Yehova ni dirijek diend.” Walonda kand anch, “Anch wasal usu wa kumwilembin Yehova mulong wa ukwash ni dilikishin, ukuman anch ukwet nend kuswir nakash.” Tong mutapu wasangara dijuku dined pachirikay nsand winou kudi Yehova! mwawiy, tukutwish kamu kwikal ni musangar ni kuya kurutu anch twamuziyin Nzamb chisu chawonsu.—Jinswir 3:5, 6; 28:26.

Anch tudi ikepishina ni amuziyidina Yehova chisu chawonsu, tukwikal ni usey kudi ndiy

17. Mulong wak tufanyindin kumuziyin Yehova mu mwom wetu wawonsu ni anch twasal mwamu tukutaninamu ik?

17 Muprofet Isay watakela kulond anch in Yuda adia mu Babilon afanyidin kukarumuk ni kulond anch: ‘O Yehova, ey udi mwin kutuumb, etu tudi mudimu wa makas mey.’ Amwilembina kand Yehova palondau anch: ‘Kangal kutuchindil yitil yetu chikupu. Etu tudi antwey, itwovilap riy.’ (Isay 64:8, 9) Anch tudi ikepishina ni amuziyidina Yehova chisu chawonsu, tukwikal ni usey mudi mwadingay Daniel. Yehova ukudandamen kutuumb mukusadin Dizu diend, spiritu, ni dirijek diend chakwel mu machuku ma kurutu tukwikal awanyidina mudi “an a Nzamb.”—Rom 8:21.