Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 5 , 2016

“Yangany kudi Antu a Michid Yawonsu, . . . Yikarumunany Kwikal in Kwilejam”

“Yangany kudi Antu a Michid Yawonsu, . . . Yikarumunany Kwikal in Kwilejam”

“Yangany kudi antu a michid yawonsu, . . . yikarumunany kwikal in kwilejam, Yibatishany . . . , Yilejany kuziyil ku yom yawonsu yinakulejanya.”—MATEU 28:19, 20.

MIMINY: 47, 17

1, 2. Mazu ma Yesu madia mu Mateu 24:14 malangwishin yipul ik yimwing?

YESU walonda anch machuku mansudien, rusangu ruwamp ra want akez kurilejan kudi antu a michid yawonsu. (Mateu 24:14) Pitudia Atuman a Yehova, atwij pa mangand mawonsu mulong wa mudimu wetu wa kulejan. Antu amwing akatining rusangu tulejeninga, pakwez akwau kakatiningap. Ap anch amwing kakatiningap rusangu retu pakwez atulimishining mulong wa mudimu wetu. Tulondining anch tuding antu asadina mudimu walejanay Yesu kusal. Tukwet diyingishin dia kulond mwamu? Mutapu ik tukweta kashinsh anch mudimu wetu wa kulejan udi mudimu walejanay Yesu kusal?

2 Yisak yivud ya marelijon yikat kulond anch yifundishining rusangu ralonday Yesu. Pakwez mudimu wau wa kulejan wimedining ching pa kufudish mu egliz, ku televizion ap ku Internet ap kand ayilejin antu akwau mutapu wa kwilej piur pa Yesu. Marelijon makwau mamening anch kuyikwash antu akweta kuswir ap kusal mudimu wa ukwash mudi dokter, mwingang, ap kufundish kushikol wawiy mutapu wau wa kulejan. Ov, yiney yawiy midimu ya kulejan yalonday Yesu kusal?

3. Kukwatijan ni Mateu 28:19, 20 yom ik yinying yifanyidinau in kwilej a Yesu kusal?

 3 Yesu wakimba anch antu eza kudi in kwilej end chakwel ayifundisha? Bwat! Kupwa kwa kuvumbuk kwend Yesu wayileja yitot ya in kwilej end anch: “Yangany kudi antu a michid yawonsu, yikarumunany kwikal in kwilejam, yibatishany. . . , yilejany kuziyil ku yom yawonsu yinakulejanya.” (Mateu 28:19, 20) Mulong tudi in kwilej a Yesu, tufanyidin kusal yom yinying. Tufanyidin kuyikarumun antu kwikal in kwilej, kuyibatish, ni kuyilej. Pakwez, chakusambish tufanyidin kuya kudi antu. Mwin kwilej umwing wa Bibil urumburil anch: “ ‘Kuya’ chid chisend cha mwin kwitiyij mwawonsu ap anch ukwawuk njil ap wit.”—Mateu 10:7; Luka 10:3.

4. Yom ik yovikeshina kwikal “chibind wa antu”?

4 Yom ik yachingejinay Yesu kudi in kwilej end? Wakimba anch alejana mu mutapu wau, anch wakimba anch irijeka mudi chisak? Mulong chikwikal chikash kudi muntu umwing kuyilej “antu a michid yawonsu,” komb in kwilej a Yesu adi afanyidin kwirijek mudi chisak. Chinech chawiy chirumburikana payitazukay Yesu in kwilej end chakwel ikala “ayibind a antu.” (Tang Mateu 4:18-22.) Yesu kalondap piur pa chibind umwing wa ansh usadidina dilau diend ni ridish uchingedina anch insh eza adia. Pakwez ubind walonday Yesu wading urumburikin kusadin wand. Ubind wamutapu winou witining kusal usu nakash, witining kwirijek, ni witining antu avud kusal pamwing.—Luka 5:1-11.

5. Yipul ik yinying tuswiridina kwakul, ni mulong wak?

5 Chakwel twijika anany alejena rusangu ruwamp nlel, tukwet kuswir kwa kwakul ku yipul yinying ey:

  • Rusangu ik rifanyidinau kulejan in kwilej a Yesu?

  • Mayingishin mau mafanyidin kwikal ik?

  • Mitapu ik yifanyidinau kusadin?

  • Mudimu wau ufanyidin kwikal ni kujimb ik, ni ukudandamen kushik ni chisu ik?

Kwakul ku yipul yiney kukutukwash kuyijingunin antu asadina mudimu wa kupandish mwom, ni tukukasikesh maswir metu ma kudandamen kulejan.—1 Timote 4:16.

RUSANGU RINER RIFANYIDIN KWIKAL MUTAPU IK?

6. Mulong wak ukweta kashinsh anch Atuman a Yehova awiy kamu alejena rusangu ruwamp?

6 Tang Luka 4:43. Yesu walejana “Rusangu Ruwamp ra Want,” ni wakimba anch in kwilej end asala niyau mwamu. Chisak ik cha antu chilejena rusangu riner kudi antu awonsu? Ching kamu Atuman a Yehova! Ap antu atukisining akat kwitiy. Chilakej, tal yalonday mwimpel uwming mishoner washakama mu jingangand kushalijan wamuleja Kaman wa Yehova umwing. Mwi ngand ni ngand, mwimpel winou wayipulang Atuman a Yehova anch rusangu ik rilejeningau. Mwimpel walonda anch, “Awonsu ading ayisup mulong akulang kwau mutapu umwing: anch ridi ‘Rusangu ruwamp ra Want.’” Kulond kwa mwimpel kumekeshinap anch tudi ayisup pakwez, tudi mu umwing mudi in Kristu akin. (1 Korint 1:10) Want wa Nzamb udi kand rusangu ra dishin ra Chinong cha Kalam Chilejena Want wa Yehova. Gazet winou udiaku mu mazu 254 ni achapin makopi uvud wa 59 000 000 ngond ni ngond, udi gazet upalangeshinau nakash pa mangand mawonsu!

7. Mutapu ik twija anch antakel a Kristendom kakatap kamu kulejan rusangu ruwamp?

7 Antekel a Kristendom kakatap kulejan piur pa Want wa Nzamb. Anch alond piur pa Want, antu avud alondining anch udi mu muchim mwa muntu. (Luka 17:21) Kakatap kuyifundish antu anch Want udi winyikel wa mwiur utakedinau kudi Yesu. Pakwez, akat kwisambin yisu yivud piur pa Yesu chisu cha Nowel ni Pasak. Kakatap kurumburil anch  Want wawiy ukupwisha milong yawonsu ya antu ni piswimp ap ukudiosh uyimp wawonsu udia pa mangand. (Kujingunik 19:11-21) Chakin kamu, antakel a Kristendom kijap yom yikezay kusal mudi Mwant wa Want wa Nzamb. Mulong kijingap kwau kurumburik kwa rusangu ra Yesu, chawiy kijap kwau mulong wak afanyidin kulejan.

MAYINGISHIN IK TUKWETA MA KUSAL MUDIMU WINOU?

8. Mayingishin ik mayimp masadidinau mulong wa mudimu wa kulejan?

8 In kwilej a Yesu kafanyidinap kulejan mulong wa kwikal ni nfalang ap mulong wa kutung yikumbu yiwamp. Yesu walonda anch: ‘En watambwilany chamwamu, panany chamwamu.’ (Mateu 10:8) Chawiy, mudimu wa kulejan ufanyidinap kwikal mudimu wa kwisak. (2 Korint 2:17) In kwilej a Yesus kafanyidinap kwit nfalang mulong wa mudimu wau wa kulejan usadinau. (Tang Midimu 20:33-35.) Ap mwamu, mafundish malonday Yesu mwoviken nawamp mulong ma egliz mavud makwet kampuw pa milong ya kusangul nfalang chakwel alama ma egliz mau ni kuyifut antakel au ni kuyifut kand in kusal midimu akwau. Mudi chibudikin, antakel avud a Kristendom adi katat ampich.—Kujingunik 17:4, 5.

9. Mutapu ik umekeshinau Atuman a Yehova anch ipanin mu mudimu wa kulejan nich diyingishin diwamp?

9 Ov, Atuman a Yehova akat kulambwish nfalang ku Yot yau ya Want ap kuyitentam yau? Bwat! Mudimu wau awukwashin nich yipan ya kwikatin. (2 Korint 9:7) Muvu wasutang ou, Atuman a Yehova asalang ma saa mabiliyon tunan twaad mu kulejan rusangu ruwamp ni atakedin malejan ma Bibil a miliyon chidivu ni kusut ngond ni ngond. Kakuyifutangap mulong wa mudimu winou, pakwez akweting musangar wakusadin nfalang jau mulong wa kukwash mudimu winou. Mwin kukimbijol umwing walonda piur pa mudimu wa Atuman a Yehova anch: “Chitongijok chau chiding mulong wa kulejan ni mulong wa kufundish.” Walonda kand anch Atuman a Yehova kakatap kuyifut amakurump au. Chad anch tukulejanangap mulong wa nfalang, diyingishin ik tukweta? Twipanining mu kusal mudimu winou mulong tumukatining Yehova ni tuyikatining antu. Mwikadil winou wawiy uwanishina uprofef udia mu Kuseng 110:3. (Tang.)

MITAPU IK YIFANYIDINAU KUSADIN?

Tukat kulejan ndond yawonsu tutanining antu (Tal paragraf wa 10)

10. Mitapu ik yasadinay Yesu ni in kwilej end mulong wa kulejan?

10 Mitapu ik yasadinay Yesu ni in kwilej  end mulong wa kulejan? Ayangang kwindond yawonsu kwafanyinau kutan antu. Chilakej, alejanang mu jinjil ni musok. Ayilondulang kand antu ku yikumbu yau. (Mateu 10:11; Luka 8:1; Midimu 5:42; 20:20) Kulejan ku chikumbu ni chikumbu wading mutapu uwamp warijekau mulong wa kutan antu a mitapu yawonsu.

11, 12. Palejeningau rusangu ruwamp, usu ik usadinau in Kristendom mulong wa kufanikesh ni usu usadinau antu a Yehova?

11 Ov, ma egliz ma Kristendom makat kulejan rusangu ruwamp mudi mwalejanangay Yesu? Yisu yivud, akat kuyifut antakel akata kuyifundish antwau. Antakel inay kakatap kukarumun in kwilej asu pakwez asading usu wakulam antwau akur adinga mu ma egliz mau. Yisu yivud, akat kusal usu wakuyikasikesh antwau chakwel asala mudimu wa kulejan. Chilakej, mu muvu wa 2001, Pape Jean Paul II walonda mu mukand wafunday anch antu adia mu egliz afanyidin kulejan rusangu ruwamp ni kwikal ni mushiku mudi wadingay nich mupostol Paul, walonda anch: ‘Riyind kudi am anch nilejenap rusangu ruwamp.’ Pape walonda kand anch mudimu wa kulejan kafanyidinap ku usal kudi antu akemp afumbinau pakwez afanyidin ku usal kudi antu awonsu adia mu egliz. Pakwez, antu akemp awiy asadina mazu mend.

12 Chidi nchik piur pa Atuman a Yehova? Awiy kwau alejena anch Yesu uyikedin mwiur kudiosh kamu mu muvu wa 1914. Amuziyidin Yesu ni akwatin mudimu wa kulejan nich usey mu mwom wau. (Marko 13:10) Buku Pillars of Faith—American Congregations and Their Partners ulondin anch kudi Atuman a Yehova mudimu wa kulejan aukwatin nich usey nakash. Ulondin kand anch ang atan muntu ukweta ujim, wiyovila kwikal amwinend, ni uyedina asadining usu wa kumukwash, pakwez kuvuramediningap anch chitongijok chau cha dishin chiding cha kulejan piur pa disudien dia mangand ni kuyifundish antu piur dipandish. Atuman a Yehova adandamedin kulejan rusangu riner ni kwimburij mitapu yafundishangay Yesu ni in kwilej end.

MUTAPU IK UFANYIDINA KWIKAL KUJIMB KWA MUDIMU, NI UKUDANDAMEN KUSHIK NI CHISU IK?

13. Mudimu wa kulejan ufanyidin kwikal ni kujimb ik?

13 Yesu walonda anch in kwilej end afanyidin kulejan ni kufundish rusangu ruwamp “ku mangand mawonsu.” Ayileja kuyikarumun antu a michid yawonsu” kwikal in kwilej. (Mateu 24:14; 28:19, 20) Chinech chirumburikin anch rusangu ruwamp afanyidin kurilejan pa mangand mawonsu.

14, 15. Yom ik yimekeshina anch Atuman a Yehova awanyishin uprofet walonday Yesu, piur pa kujimb kwa mudimu usadinau? (Tal chipich cha kwinsambishin.)

14 Ching kwau Atuman a Yehova awiy awanyishina uprofet walonday Yesu anch chifanyidin rusangu ruwamp arilejana pa mangand mawonsu. Mulong wak tulondin mwamu? Mu États-Unis mudi uvud wa antakel a Kristendom 600 000 pakwez Atuman a Yehova alejena rusangu ruwamp mwi ngand yiniya adi uvud wa 1 200 000 ni kusut. Pa mangand mawonsu padi uvud wa a mwimpel a in katolik piswimp 400 000, pakwez kudi ma miliyon 8 ma Atuman a Yehova alejena rusangu ruwamp mu jingand 240. Komb chimeken kamu patok anch Atuman a Yehova alejen rusangu ruwamp pa mangand mawonsu, riletina uyaj ni ntumb padiay Yehova!—Kuseng 34:1; 51:15.

15 Chitudia Atuman a Yehova, chitongijok chetu chidi cha kuyilej antu avud rusangu ruwamp anch chiswapel kurutu disudien dishika. Chakwel anch tusala mudimu winou, tukat kukarumun ni kupalangesh ma miliyon ni ma miliyon ma mabuku, ma gazet, ma trakt, maladikij ma chitentam ni ma  Chivurikish mu mazu 700 ni kusut. Tuyinkishining antu yom yiney chamwamu. Muvu wasutina ou, twachapin uvud piswimp tunan twa a miliyon 4.5 mikand yimedina pa Bibil. Twapalangeshin kand ma kopi ma miliyon 200 ni kusut ma Les Saintes Écritures Traduction du monde nouveau mu mazu 130 ni kusut. Ni kapend ketu ka web kadiaku mu mazu 750 ni kusut. Ching kwau Atuman a Yehova awiy asadina mudimu mudi winou ushimokishena.

16. Mutapu ik twija anch Atuman a Yehova akwet spritu wa Nzamb?

16 Mudimu wakulejan ukudandamen kushik ni chisu ik? Yesu walonda anch rusangu ruwamp akez kurilejan kushik ni pakwezina disudien. Pitudia Atuman a Yehova, tutwishin kujijaman mukusal mudimu winou mu machuku minam mansudien mulong tukwet spritu utumbila wa Yehova. (Midimu 1:8; 1 Pita 4:14) In ma relijon amwing akutwish kulond anch: “Tukwet spiritu utumbila.” Ov, atwishin kusal mudimu usadiningau Atuman a Yehova mu machuku minam mansudien? Yisak yimwing yapakisha kulejan mudi tusadininga pakwez, akanganya. Akwau akweting kamu kuswir kwa kulejan, pakwez alejening kusu mu ka chisu kakemp. Akwau akat kupakish kulejan ku chikumbu ni chikumbu, pakwez kakatap kulejan rusangu ruwamp ra Want. Komb katwishiningap kusal mudimu walonday Yesu kusal.

ANANY KAMU ALEJENA RUSANGU RUWAMP NLEL?

17, 18. (a) Mulong wak tukweta kashinsh anch Atuman a Yehova awiy kamu alejena rusangu ruwamp ra Want nlel unou? (b) Mutapu ik chituswapedina tudandamena kusal mudimu winou?

17 Ov, anany kamu alejena rusangu ruwamp ra Want nlel? Adi kamu ching atuman a Yehova! Mutapu ik twija mwamu? Mulong tulejen rusangu rakin, rusangu ruwamp ra Want. Tukat kuyang kuyikimb antu mu mudimu wetu wa kulejan, ni tukat kusadin mitapu yiwamp. Tukwet mayingishin mawamp mulong wa kulejan, chawiy tumukatininga Yehova ni antu. Mudimu wetu wa kulejan ujimbin nakash mulong tuyilejin antu a michid yawonsu ni a mazu mawonsu. Ni tukudandamen kulejan rusangu ruwamp ra Want djat ni pakwezina nsudien!

18 Chisangareshin mudi ik pa kuman mudimu ushimokishena usadinau antu a Yehova mulong wa kulejan rusangu ruwamp mu machuku minam mansudien. Mutapu ik tutwishininga kusal mudimu winou? Kambuy Paul walonda anch: “Nzamb ukat kusal machuku mawonsu mu en chakwel wikalany nich rusot, wikalany kand nich usu wa kusal mudi mudia kutenchik kwend.” (Filip 2:13) El amboku Yehova adandamena kutwinkish usu tuswirikedina chakwel tusal usu wetu wawonsu mu kudandamena kulejan rusangu ruwamp!—2 Timote 4:5.