Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 5 , 2016

Taninamu Nakash mu Yom Yidiokila Kudi Yehova

Taninamu Nakash mu Yom Yidiokila Kudi Yehova

“Yam Yehova, Nzamb wen, nikat kukufundishany mulong wa kutaninamu kwen.”—ISAY 48:17, NWT.

MIMINY: 20, 37

1, 2. (a) Mutapu ik mwiyovilingau Atuman a Yehova piur pa Bibil? (b) Chikunku ik cha Bibil chiukatininga?

PITUDIA Atuman a Yehova, tukatining Bibil. Bibil utwongojining, utwinkishining ruchingej ni mbil yitukutwisha kuchingejin. (Rom 15:4) Buku winou kakwetap yitongijok ya antu pakwez didi “dizu dia Nzamb.”—1 Tesalonik 2:13.

2 Chisangareshina chidi anch, antu amwing pakach petu akwet chikunku cha Bibil. Amwing akatining Mikand ya mu Bibil Yinying Yilejena Rusangu ra Yesu mulong mwinomu Yehova umekeshin untu wa Yesu. (Yohan 14:9) Pakwez, antu akwau akatining mikand ya uprofet mudi Kujingunik mwawiy mutulejiningau “yom yikushika mu chisu chikemp.” (Kujingunik 1:1) Antu amwing atanining kwongoj patanginingau Kuseng ni antu akwau akat kusanger kutan yiyul ya ukwash patanginingau mu Jinswir. Chawiy komb, chimeken patok anch Bibil udi buku wa antu awonsu.

3, 4. (a) Mutapu ik twiyovilinga mulong wa mikand yetu? (b) Mikand ik tukata kutambul yitadina ching chisak kampand cha antu?

3 Mulong tukatining Bibil ni tukatining kand mikand yetu mulong yimedining pa Dizu dia Nzamb. Mabuku mawonsu, ma broshir, magazet ni mikand yikwau tutambwilinga yidi yom yidiokila  kudi Yehova. Yom yiney yawonsu yitukwashining kwikal piswimp ni Yehova ni kulam ritiy rikash.—Titus 2:2.

4 Mikand yetu yivud ayifundining mulong wa Atuman a Yehova. Pakwez, kudi mikand yifundiningau yisu yimwing mulong wa chisak kampand cha antu, mudi ansand ap anvaj. Pakwez, mikand yivud ni ma video yidia pa kapend ketu ka web ayifundining pakampwil mulong wa antu akad kwikal Atuman a Yehova. Kushalijan kwa yom mudi yiney kumekeshin anch Yehova udandamedin kuwanyish kushilamu kwend kwatenchikay mulong wa kuyifundish antu a mitapu yawonsu.—Isay 25:6.

5. Tukwikal ni kashinsh anch Yehova ukat kusanger yom ik?

5 Etu awonsu pakach petu tukatining kwitekin chisu cha kutang Bibil ni mikand yetu. Chawiy, tukutwishap etu awonsu kusutish chisu chimwing mulong wa kwilej mikand yawonsu tutambwilinga. Tukwikal nich kashinsh anch Yehova usangaredining mutapu tukata kusadin chisu chetu ni manangu mulong wa kutang ni kwilej Bibil ni mikand yetu. (Efes 5:15, 16) Pakwez, kudi ubaj umwing tufanyidina kubabel ni kwipuk. Udi ubaj ik?

6. Yom ik yimwing yikutwisha kusal anch tukangany kutanimu mu yom yidiokila kudi Yehova?

6 Anch tubabelap, tukutwish kutong pamwing ap anch yikunku yimwing ya Bibil ap mikand yikwau yidiap ya usey kudi etu. Chilakej, chikwikal nchik anch chikunku chimwing cha Bibil chimeken anch chidiap cha usey mu mwom yetu? Ap chikwikal nchik anch kwabudik mukand uyisangareshina antu akwau ey bwat? Ukutwish kutang jinsangu jinej mau mau anch ukulik kujitang? Anch chidi mwamu, tukutwish twashadish jinsangu ja usey jikutwisha kutukwash. Mutapu ik tukutwisha kwipuk ubaj winou? Tufanyidin kwijik anch jinsangu jawonsu tutambwilinga jidia mu mikand yiney jidiokiling kudi Yehova. Tutangin mu Bibil anch: “Yam Yehova, Nzamb wen, nikat kukufundishany mulong wa kutaninamu kwen.” (Isay 48:17, NWT.) Mu mutu wa mulong winou, tukushinshikin yiyul yisatu yikutukwasha kutaninamu mu yom yawonsu yitwinkishiningay Yehova.

YIYUL YA UKWASH MULONG WA KUTANG KWA BIBIL

7. Mulong wak tufanyidina kwilej Bibil ni chitongijok chiwamp?

7 Tang nich chitongijok chiwamp. Chidi kamu chakin anch yikunku yimwing ya Bibil ayifunda mulong wa kukwash antu kanang pakampwil. Pakwez, Bibil ulondin patok anch: ‘Mazu mawonsu ma mukand wa Nzamb amapepila kudi Nzamb madi ma ukwash.’ (2 Timote 3:16) Chawiy, tufanyidin kwikal ni chitongijok chiwamp pitutangina Bibil. Mukadivar umwing uvurikin anch ukutwish kwilej malejen mavud pa rusangu rumwing. Chawiy chimukwashininga kulik kushinshikin pa malejan mamwing makad usey. Chawiy, kurutu tutanga Bibil, tufanyidin kumwit Yehova chakwel atwinkisha chitongijok chiwamp ni manangu ma kutesh yom yikatinay anch twileja.—Ezra 7:10; tang Jakobu 1:5.

Ukutwish kutaninamu mukutang kwey kwa Bibil? (Tal paragraf 7)

8, 9. (a) Anch twatang Bibil, yipul ik tukutwish kwiyipul? (b) Yom yiyitinau amakurump in Kristu kuwanyish yitufundishin ik piur pa Yehova?

8 Ipul yipul. Piutangina Bibil, imik ni iyipula yipul yilondwilaku ey: ‘Chom chinech chifundishin ik piur pa Yehova? Mutapu ik nikutwisha kusadin malejan minam mu mwom wam? Mutapu ik nikutwisha kusadin maleja minam mulong wa kuyikwash antu akwau?’ Anch twatongijokin pa yipul yiney, tukutaninamu nakash mu yom tutangina mu Bibil. El tushinshikinany pa chilakej chimwing. Bibil wisambidin pa yom kanang yifanyidinau kuwanyish kudi amakurump in Kristu. (Tang 1 Timote 3:2-7.) Ap anch etu awonsu tudiap amakurump, pakwez tukutwish kutong anch  malejan minam makutwishap ap pakemp kutukwash. Pakwez, el tusadinany yipul yisatu twisambinanga kwisambishin chakwel tumana mutapu yom yiney yikutwisha kutukwash etu awonsu.

9 “Chom chinech chinfundishin ik piur pa Yehova?” Yehova watwinkisha yom yivud yifanyidinau amakurump kuwanyish. Ndiy wateka mbil ya piur mulong wa amakurump inay alamininga chikumangen. Chinech chimekeshin anch chikumangen chidi cha usey kudi Yehova. Bibil ulondin anch walanda chikumangen nich ‘mash ma ma Mwanend.’ (Midimu 20:28) Chawiy, Yehova uyitining amakurump ikala yilakej yiwamp mulong Yehova ukez kuyirumburish kulondwish mutapu ulaminau antu adia mu chikumangen. Ndiy ukatin anch twiyova anch tudi mu diking diau. (Isay 32:1, 2) Anch twatang yom yiney yiyitinau amakurump kuwanyish, tukwilej mutapu Yehova ukatay kututongin.

10, 11. (a) Anch twatang yom yiyitinau amakurump kuwanyish, mutapu ik tukutwisha kusadin malejan minam mu mwom wetu? (b) Mutapu ik tukutwisha kusadin malejan minam mulong wa kuyikwash antu akwau?

10 “Mutapu ik nikutwisha kusadin malejan minam mu mwom wam?” Anch uding kal mukurump, ufanyidin kuchirikin chisu chawonsu yom yiney yitinau ni kusal usu wa kuwapish mwikadil wey. Anch “usotil kwikal mukurump,” ufanyidin kusal usu wa kuwanyish yom yitinau mu mutapu uwamp kulondwish ni ukaliweny wey. (1 Timote 3:1) Pakwez in Kristu awonsu afanyidin kwilejin ku yom yiney. Chilakej, Yehova ukimbin anch muntu win mwawonsu ikala nich manangu ni asadina yitongijok yiwamp. (Filip 4:5; 1 Pita 4:7) Anch amakurump ikal ‘chilakej chiwamp kudi yisak ya amikoku,’ tukutwish kwilejin kudi awiy ni ‘kwimburij ritiy rau.’—1 Pita 5:3; Hebereu 13:7.

11 “Mutapu ik nikutwisha kusadin malejan minam mulong wa kuyikwash antu akwau?” Tukutwish kusadin yom yiyitinau amakurump in Kristu kuwanyish mulong wa kuyikwash in kwilej Bibil ni antu akwau akata kusanger chakwel ijika kushalijan kudia pakach pa amakurump ni antakel a chirelijon. Yom yiney yikutwish kand kutukwash tuvurika mudimu ukash usadiningau amakurump mu chikumangen chetu. Ni chinech, chikutukwash chad kuyilimish akadivar inay. (1 Tesalonik 5:12) Anch twayilimish chipandikena, niyau akuwanyish chisend chau ni musangar nakash.—Hebereu 13:17.

12, 13. (a) Anch twasadin yom tukweta, kukimbijol ik tukusala? (b) Let chilakej chimekeshina anch malejan makwau maswakelap kumatesh anch watang kapamp kamwing.

12 Kimbijol. Anch twilej Bibil, tukutwish kukimb yakul ku yipul yilondwilaku ey:

  • Nany wafunda chikunku chinech cha Bibil?

  • Kwisu ni chisu ik chachifundau?

  • Yom ik ya usey yasadika chisu cha fundau buku winou?

Yom mudi yiney yikutukwash kutan malejan mitwakadi kal kwijik nawamp.

13 Chilakej, Ezekiel 14:13, 14 ulondin anch: “Mwan a muntu, anch ngand yimwing yanrumbukin am, yasal chitil cha kwinbwambwil, am nikez kushesh yakudia yau nich usu wam. Nikez kulet kamungun kuyishesh antu ni annam. Anch Nowa, ni Daniel, ni Job ading ashicha mwi ngand yiniya, ing kutentam kwau kwayipandisha kusu ayinau. [Yehova] Nsalejen ndiy ulondila.” Anch twakimbijol, tukwilej anch Ezekiel wafunda mazu minam piswimp mivu 612 kurutu kwa Kristu. Nowa nend Job ading afil kal kwasutin kal yitot ya mivu, pakwez Yehova wading uvurikin kushinshaman kwau. Pakwez Daniel, wading uchidi mwom. Chimeken anch wading ukwet mivu piswimp 20 chisu chamwelau kudi Yehova anch wading utentamin mudi Nowa ni Job. Yom ik twileja kal? Yehova umening ni ukwatining atushalapol end ashinshamena nich usey pamwing nau ansand.—Kuseng 148:12-14.

 TANINAMU KUSUTIN KU MIKAND KUSHALIJAN

14. Yom yibudishinau mulong wa ansand, yiyikwashin mutapi ik, ni mutapu ik ukutwishau antu akwau kutaninamu? (Tal chipich cha kwinsambishin.)

14 Mikand yilondina piur pa ansand. Twilejin anch tukutaninamu mu Bibil mwawonsu wakabuj. Mutapu wawiy umwing, ukutaninamu kand mu mikand yawonsu. El tushinshikinan yilakej yikemp. Mu mivu yasutang ey, Yehova waletin malejan mavud mulong wa ansand . [1] (Tal mazu ma kwinsudien.) Malejan minam mayikwashin kurish ni yibachikin yiyimp ku shikol ni milong ya kupam kwa mujimbu. Pakwez mutapu ik tukutwisha kutaninamu etu awonsu mu mitu ya milong yiney ni mu ma buku? Anch twatang malejan minam, tukwilej mutapu urishinau nich ansand milong yiney ni tukwijik mutapu tufanyidina kuyikwash nawamp ni kuyikasikesh.

15. Mulong wak in Kristu apamina kal afanyidin kwipan ku malejan mafundinau mulong wa ansand?

15 In Kristu apamina kal kafanyidinap kulik kutang malejan minam anch mulong madi ma ansand. Yom yivud yisambidinau mu mitu ya milong yiney yikwet usu padiau in Kristu awonsu. Chilakej, etu awonsu tukwet kuswir kwa kuchidij yitiyij yetu, kuman mutapu wa kusadin yovil yetu, kulik yibachikin yiyimp, ni kuyiyep arund ayimp ni kwipuwangej kuyimp. Ap anch mikand yiney ayifunda mulong wa ansand, malejan madiamu madiokil mu Bibil ni in Kristu awonsu akutwish kutaninamu.

16. Yom ik yikwau yidia mu mikand yetu yikutwisha kuyikwash ansand anch ayisadin?

16 Mikand yifundinau mulong wa ansand yikutwish kand kukasikesh urund wau nend Yehova. (Tang Mulej 12:1, 13.) Ni antu apamina kal akutwish kand kutaninamu. Chilakej, nimero wa Réveillez-vous! wa ngond wa 4, 2009 mudi mutu wa mulong ulondina anch “Les jeunes s’interrogent . . . Comment trouver du plaisir à lire la Bible ?” Mutu wa mulong winou wading ukwet yiyul ya ukwash nakash ni mwading kand mushet ukutwishau kudiosh, kuulam, ni kuusadin mu dilejan diau. Ov, antu amakurump ataninamu mu mutu wa mulong winou? Maku umwing walonda anch kutang Bibil chisu chawonsu kwading kumukasikedin nakash. Pakwez wasadina yiyul yidia mu mutu wa mulong winou ni katat uyil kurutu mu kutang kwa Bibil. Ulondin anch ukwet musangar wa kuman mutapu urumburila ma buku madia mu Bibil, malondin yom yisu yiwamp, uwejidinaku kand anch, “Kandi kal  novangap musangar mudi winou kupwa kwa kutang Bibil.”

17, 18. Mutapu ik tukutwisha kutaninamu mu kutang yom yifundinau mulong wa antu awonsu? Let chilakej.

17 Mikand ya antu awonsu. Kudiosh muvu wa 2008 twasangera Chinong cha Kalam cha kwilej. Dichap dined adifundin mulong wa Atuman a Yehova, tukwet kand magazet makwau mafundinau mulong wa antu awonsu. Mutapu ik tukutwisha kutaninamu mu yichap yiney? El tusadinany chilakej. Anch wamutazuk muntu chakwel eza ku Chot cha Want ni anch wez, ukwov musangar. Anch muntu usadin diskur, ukutongin piur pa muntu watazukang. Ukutwish kwiyupul mutapu ukwiyovay muntu winou piur pa yom yiteshinay ni mutapu ukutwisha malejan minam kuswimp mwom wend. Mudi chibudikin, muchim wey ukusangar ni kumekesh kujikitish nakash mulong wa yom yiyey.

18 Chom mudi chinech chikutwish kutushiken anch twatang mikand yifundinau mulong wa antu awonsu. Chilakej, dichap dia Chinong cha Kalam cha antu awonsu ni mitu ya milong yikwau yidia pa kapend ka jw.org yirumburil mutapu wakusadin mazu madia mu Bibil ni kulond kukwau kuswapela kutesh. Anch twatang malejan minam, tukwikal ni kutesh kuwamp kwa yom ni kukat uyakin udia mu Bibil twija kal nawamp. Chikwau kand, tukutwish kwilej mitapu yisu ya kurumburil yitiyij yetu mu mudimu wa kulejan. Mutapu wawiy umwing, gazet wa Réveillez-vous! ukasikeshin yitiyij yetu anch kuding Sakatang. Utukwashin kand kwilej mutapu wa kuchidij yitiyij yetu.—Tang 1 Pita 3:15.

19. Mutapu ik tukutwisha kumekesh kujikitish kwetu kudi Yehova mulong wa yom yend?

19 Chidi chakin anch Yehova ukat kupan yiyul ni mbil mulong wa kutaninamu kwetu. (Mateu 5:3) El tudandamen kutang ni kusadin malejan mawonsu matwinkinau kudi Yehova. Anch twasal mwamu, tukutaninamu ni tukumekesh kujikitish kudi Yehova mulong wa yom yawonsu yitwinkishinay.—Isay 48:17.

^ [1] (paragraf 14) Malejan minam mudi kand buku Les jeunes S’interrogent—Réponses Pratiques, Volim 1 ni 2, kudi kand mitu ya milong yikwau “Les jeunes S’interrogent,” yibudishinau katat pa kapend.