Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 5 , 2016

Ov, Bibil Udandamedin Kuswimp Mwom Wey?

Ov, Bibil Udandamedin Kuswimp Mwom Wey?

“Itiyany akukarumunany mu yom yawonsu ni kukwinkishany manangu masu.”—ROM 12:2.

MIMINY: 29, 52

1-3. (a) Kuswimp ik kukutwisha kwa tukasiken kupwa kwa kutambul dibatish? (b) Anch tuyilap kurutu mu mutapu tukatina, yipul ik tukutwisha kwiyipul? (Tal chipich cha kwinsambishin.)

Mu mivu yivud, Kevin wasenganang masengan ma nfalang, wanangang ruwand, maar nakash ni yom yilewishena. [1] (Tal mazu ma kwinsudien.) Chad wileja piur pa Yehova ni wakata kwikal murund nend. Kusal mwamu kwa mwita kuswimp nakash mu mwom wend. Watwisha kuswimp kusutin ku ukwash wa Yehova ni usu wa Dizu diend, Bibil.—Hebereu 4:12.

2 Kupwa kwa Kevin kutambul dibatish, wadandamena kuswimp untu wend chakwel ikala mwin Kristu muwamp. (Efes 4:31, 32) Chilakej, wading kujiman pakad kulab. Wakashimuka pamanay anch chimukasikedin kuswimp mwikadil wend. Chawiy, Kevin walonda anch kwilej kuswimp mwikadil wend chading chimukasikedin kusutamu palikay yom yiyimp yasalangay kurutu kwa kutambul dibatish! Pakwez watwisha kuswimp mu kumwilembil Yehova chakwel amukwasha ni pilejay Bibil ni mushiku.

 3 Kurutu tutambula dibatish, avud pakach petu amekeshining kuswimp kujim mu mwom wau chakwel atwisha kushakam kukwatijan ni yilondinay Bibil. Pakwez ap katat, twij kamu anch kuchidi tuyom tukemp tuswirikedina kuswimp chakwel twikala mudi Nzamb ni Kristu. (Efes 5:1, 2; 1 Pita 2:21) Chilakej, tukutwish kuman anch tukwet yakamish nakash, mboj ni kulond yom yiyimp piur pa antu akwau. Ap yisu yimwing tukutwish kwov wom mulong wa yom yikutwishau kutongau akwetu ap yikulondau anch tukat kusal yom yakad kuwanyin. Pamwing ap twasadin usu wa kuswimp mu mivu yivud pakwez tudandamedin kusal yom yawiy yimwing. Chawiy tukutwish kwiyipul anch: ‘Mulong wak chinkasikedin kuswimp yom yiney yikemp? Yom ik nifanyidina kusal mulong nisadina yilondinay Bibil chakwel nidandamena kuwapish untu wam?’

UKUTWISH KUMUSANGARESH YEHOVA

4. Mulong wak tukutwishangap kumusangaresh Yehova mu yom yawonsu tusadining?

4 Tumukatin Yehova, ni tukatin kumusangaresh ni muchim wetu wawonsu. Pakwez cha ushon, tukumusangareshangap mu yisu yawonsu, mulong tudi akad kuwanyin. Tukat kwiyov mudi mwiyovay mupostol Paul, walonda anch: “Ap anch nikwetap nchik rusot ra kusal yom yiwamp, kinikutwishap kuyisal.”—Rom 7:18; Jakobu 3:2.

5. Kuswimp ik twasala kurutu kwa kutambul dibatish, Pakwez yilim ik tudandamedina kurish nich?

5 Kurutu kwa kwikal amwing a mu chikumangen, twalika kusal yom yiyimp yikisinay Yehova. (1 Korint 6:9, 10) Pakwez kushik ni katat tudi ching akad kuwanyin. (kolosay 3:9, 10) Chawiy tukat kudandamen kurumbuk ap anch twatambula dibatish kwasutin kal mivu yivud. Yisu yivud, tukweting maswir ni yovil yiyimp, ap chikat kutukasikenang kuswimp kuziy kwa untu wetu. Chawiy, tufanyidin kurish ni mwikadil wetu wa kurumbuk mu mivu yivud.

6, 7. (a) Chom ik chisadina anch twikal arund a Yehova ap anch tudi antu akad kuwanyin? (b) Mulong wak tufanyidinap kuziy mulong wa kwit dilikishin kudi Yehova?

6 Ap anch tudi akad kuwanyin, tukutwish kudandamen kwikal mu urund ni Yehova ni ku musadin. Vurikang chisu chawonsu mutapu wikala murund wa Yehova kapamp ka kusambish. Ndiy wamana yom yiwamp mudi ey ni ndiy wakata anch umwijik. (Yohan 6:44) Ndiy wading wij kand anch ukat kurumbuk, kuziy ni ukudandamen kurumbuk. Pakwez Yehova udandamedin kukat anch wikal murund nend.

7 Yehova watukata nakash chawiy watwinkisha chipan cha usey. Ndiy wamutuma mwanend Yesu panap pansh chakwel apana mwom wend mudi difut mulong wa yitil yetu. (Yohan 3:16) Anch twarumbuk, tukutwish kumwit Yehova chakwel atulikishina. Ni mulong wa difut, tukwet kashinsh anch ukutulikishin ni ukudandamen kamu kwikal murund netu. (Rom 7:24, 25; 1 Yohan 2:1, 2) Vurik anch, Yesu wafa mulong wa akayitil akarumuka. Chawiy ap anch twaman anch yom tusadina yidi yiyimp nakash, tufanyidinap kulik kumulembil Yehova mulong wa kwit dilikishin. Anch twalik kumulembil anch atulikishina, chikwikal mudi tulikin kowal mem ku makas metu anch mikisin. Musangar mudi ik tukweta pa kwijik anch Yehova wasala anch twikal arund nend ap anch tudi antu akad kuwanyin!—Tang 1 Timote 1:15.

8. Mulong wak tufanyidinap kuvuramen yilim yetu?

8 Mwawiy kamu, tufanyidinap kuvuramen anch tudi akayitil ap kudandamen kukimb mayingishin mulong wa mwikadil winou. Yehova utulejin mutapu wa antu tufanyidina kwikal chakwel twikal arund nend. (Kuseng 15:1-5) Chawiy anch twakimb anch tusej kudia ndiy tufanyidin kudandamen kusal usu wa kumwimburij ndiy ni mwanend. Tufanyidin kusal usu wa kuswimp maswir metu  mayimp ni tukutwish kand kulik yom yimwing. Ap anch atubatisha kal kwasutin kal mivu, tufanyidin kudandamen kuwapish untu wetu.—2 Korint 13:11.

9. Mutapu ik twija anch tukutwish kudandamen kumudjal muntu musu?

9 Mupostol Paul wayileja in Kristu anch : “Chawiy chifanyidin en ulikany yaku yen yikur, mudjolany muntu mukur wavunda kal nich maku mayimp ma kudimban. Chifanyidin michim yen ni manangu men kukarumuk kwikal yisu. Chad mudjalany muntu musu watangau mudi mudiay Nzamb mu kutentam kwakin ni mu kutumb.” (Efes 4:22-24) Chinech chirumburikin anch tufanyidin kudandamen kusal usu wa kuswimp ni wa ‘kumudjal muntu musu.’ Ap anch twasadin kal mivu yivud mu kumusadin Yehova, tukutwish yisu yawonsu kwilej yom yivud piur pa mikadil yend. Ni Bibil ukutukwash chakwel tudandamena kuswimp untu wetu chakwel twikala chad mudi ndiy.

MULONG WAK CHIKASIKEN?

10. Yom ik tufanyidina kusal chakwel tudandamena kuswimp nich ukwash wa Bibil, ni yipul ik tukutwisha kwiyipul?

10 Etu awonsu tukweting kuswir kwa kulondul yilondinay Bibil. Pakwez tufanyidin kusal usu nakash anch twakimb anch tudandamena kuswimp. Mulong wak tukwet kuswir kwa kusal usu mudi winou? Yehova kakutwishap wasal anch chituswapela kusal yom yitentamina?

11-13. Mulong wak Yehova utuchingejin anch tusala usu wa kurish ni yilim yetu?

11 Anch twatong piur pa diur ni yom yidiamu, tukutwishap kutadik anch Yehova ukwet dikand dia kusal chom chin chawonsu. Chilakej, wasala muten, ukweta usu nakash. Mu sekond ni sekond, muten ukat kumwang nsis ja chitokish, ni chirungul. Ka risis kwau kamwing kakwet usey panap pansh mulong mwom wikalaku. (Kuseng 74:16; Isay 40:26) Yehova uyinkishining kand atushalapol end adia panap pansh usu anch  auswiriken. (Isay 40:29) Chidi chakin anch, ang Yehova wakat, ukusal anch chituswapela kurish nich mwikadil wetu wa kurumbuk ni kulik maku mayimp. Mulong wak ulikinay kusal mwamu?

12 Yehova watwinka kal want mpetu. Utulikining tutond ayinetu anch tukumuziyin ap bwat. Anch twatond kumuziyin ni anch twasal usu mulong wa kusal rusot rend, tukumekesh anch tumukatin ni tukatin kumusangaresh. Satan walonda anch Yehova kadiap nyikel muwamp. Pakwez anch twamuziyin Yehova tukumekesh anch tukatin ndiy ikal Nyikel wetu. Ni tukutwish kwikal ni kashinsh anch tatukwetu mukatish ukwatin nich usey usu wawonsu tusadina mulong wa kumuziyin. (Job 2:3-5; Jinswir 27:11) Anch twasal usu mulong wa kurish nich mwikadil wa kurumbuk ap anch chikasiken kusal mwamu, tudi ashinshamena kudi Yehova ni kumekesh anch tukatin ndiy ikala Nyikel wetu.

13 Yehova utulejin anch tufanyidin kusal usu wa kwimburij mikadil yend. (Kolosay 3:12; tang 2 Pita 1:5-7.) Uchingejin kand anch tusala usu nakash mulong wa kuswimp yom tutongina ni mutapu twiyovila. (Rom 8:5; 12:9) Ap anch chidi mwamu tukusal usu nakash mulong wa kuswimp, ni anch twatwish tukwov musangar nakash.

EL DIZU DIA NZAMB DIDANDAMENA KUKUSWIMP

14, 15. Yom ik tukutwisha kusal mulong wa kukudish mikadil yikatinay Yehova? (Tal mushet ulondina anch “Bibil ni Malembil Yaswimpa Mwom Yau.”)

14 Yom ik tufanyidina kusal chakwel tukudisha mikadil yikatinay Yehova? Pa ndond pa kwikwatin mipak ayinetu mulong wa yom tukimbina kuswimp, tukwet kuswir kwa wintakel wa Nzamb. Rom 12:2 ulondin anch: “Kangal wifanakeshany ayinen nich yaku ya antu a mangand minam. Pakwez itiyany Nzamb akukarumunany mu yom yawonsu ni kukwinkishany manangu masu ni muchim usu. Mwamu ukutwishany kujingunin rusot ra Nzamb. Ndiy usotil yom yiwamp, yitentamina kamu, yikata kumusangarish.” Mulong wa kwijik yom yikatinay Yehova, tufanyidin kuchingejin ukwash utwinkishinay. Tufanyidin kutang Bibil dichuku diawonsu, kutongin pa yom tutangina, ni kumulembil Yehova chakwel atwinkisha spiritu wend utumbila. (Luka 11:13; Galatia 5:22, 23) Mu mitapu yiney, Yehova ukutukwash kwijik yom yimusangareshina, ni tukutwish kwilej kutong mutapu utonginingay. Mudi chibudikin, yom tukutonga, tukulonda, ni tukusala yikumusangaresh Yehova nakash, ni tukwilej mutapu wa kurish nich mwikadil wetu wa kurumbuk. Pakwez ap mwamu, tukwet kuswir kwa kudandamen kurish nich yom yiney.—Jinswir 4:23.

Kumangej mitu ya milong yidiokila mu mikand yetu ni mifund yidiokilamu Bibil yikukwashina kurish nich mwikadil wey wa kurumbuk ni yitanga chisu chawonsu (Tal paragraf 15)

15 Kuwejinaku ku kutang Bibil dichuku diawonsu, tukwet kuswir kwa kumwilej nich mikand yetu, mudi Chinong cha Kalam ni Réveillez-vous! Mitu ya milong yivud yidia mu magazet minam yitufundishin mutapu  tukutwisha kwimburij mikadil ya Yehova ni mutapu tukutwisha kurish nich mwikadil wetu wa kurumbuk. Tutaninamu kand mitu ya milong yikwau ap mifund ya Bibil yikutwisha kutukwash kamu pa kampwil. Tukutwish kukumangej mifund mudi yiney ya Bibil ni mitu ya milong mulong wa kuyitang chisu chawonsu.

16. Mulong wak tufanyidinap kuziy anch tutwishinap kuswimp swa?

16 Yitin chisu mulong wa kwilej kwimburij mikadil ya Yehova. Chawiy anch wiyov anch uswimpinap nakash mudi muwada ukatina, ufanyidin kushimpish muchim. Chakusambish, ufanyidin kwikasikesh kusal yilondinay Bibil. Pakwez piutongina nakash ni kwijik yikatinay Yehova kudi ey, chikukuswapel kutong mutapu ukatay kutongay ndiy ni kusal yom yitentamina.—Kuseng 37:31; Jinswir 23:12; Galatia 5:16, 17.

TONG PIUR PA MACHUKU METU MAWAMP MA KURUTU

17. Anch tudi ashinshamena kudi Yehova, Yom ik tukusangera mu machuku ma kurutu?

17 Tuchingejin machuku ma kurutu pitukwikala awanyidina ni kumusadin Yehova chikupu. Mu chisu chinicha, tukwikalap kand ni kuswir kwa kurish nich mwikadil wetu wa kurumbuk, ni chikutuswapel nakash kumwimburij Yehova. Pakwez katat tutwishin kumwifukwil Yehova mulong watwinkisha kal chipan cha difut. Ap anch tudi akad kuwanyin, tukutwish kumusangaresh anch twadandamen kusal usu wa kuswimp ni kulondul yom yitufundishinay yidia mu Bibil.

18, 19. Mutapu ik tukweta kashinsh anch Bibil ukwet usu wa kudandamen kuswimp mwom yetu?

18 Kevin wasala yawonsu yatwishay kusal mulong wa kuswimp mwikadil wend wa ujim. Watonginang nakash pa yadingay kutang mu Bibil ni wasala usu wa kuswimp mu mwom wend. Walondula kand yiyul ya mwinkishau kudi anamakwend in Kristu. Ap anch kwasuta mivu yikemp chakwel Kevin aswimp, chisu chimwing wasala mudi nkwash a mudimu. Ni kupwa kwa mivu 20, wasambisha kusal mudi mukurump mu chikumangen. Pakwez ni katat, wij anch ukwet kuswir kwa kudandamen kurish nich mwikadil wend wa kurumbuk.

19 Mudi Kevin, etu awonsu tufanyidin kudandamen kuwapish untu wetu. Anch twasal mwamu, tukudandamen kumusejin Yehova. (Kuseng 25:14) Ni anch twasal yawonsu tukutwisha chakwel tuswimp mulong wa kumusangaresh Yehova, ukutukwash chakwel tutwish. Tukwikal nich kashinsh anch nich ukwash wa Bibil, tukutwish kudandamen kuswimp mu mwom yetu.—Kuseng 34:8.

^ [1] (paragraf 1) Dijin adiswimpin kal.