Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 5 , 2016

 MUTU WA MULONG WA PA CHIBUR | ANCH MUNTU UKATINA WAFA

Kuyikasikesh Antu Adidila

Kuyikasikesh Antu Adidila

Kandikal wovangap kuziy anch muntu udia nend piswimp ukwet ushon mulong wa manamakwend wafila? Yisu yivud ukwiyov anch ukwetap yom ya kulond ap ya kusal—chawiy tukutwishap kulond ap kusal chom kanang. Pakwez, kudi ukwash wa yom ukutwisha kusadin.

Yisu yivud, antu avud aswirikedin kukuman ni kulond mazu mudi “nikwet ushon nakash.” Mu yaku ya antu avud, kumukwat muntu chikas udi mutapu uwamp wakumekesh anch umutongidin. Anch muntu wafishang kal ukat kukulej, mutesha kumu nawamp. Chidia chiwamp nakash kusal yom ku dijuku dia antu afishang kal, pamwing ap yikukanganyau kusal antu afishang kal, mudi kuyisukin yakudia, kuyilamin an, ap kuyikwash mulong wa kujikan anch chiswapel. Kusal yom mudi yiney kukwet usey kusut kulond kwau ku kan.

Yisu yimwing, ukutwish kulond piur pa muntu wafang, pamwing ap kukasikeshin pa mikadil yend yiwamp ap yom yisangareshina piur pendendiy. Mambamb mudi minam makutwish ma musangaresh muntu wafishang kal. Chilikej, Pam—wafisha mukajend Ian, pasutin kal mivu musamban ulondin—anch: “Yisu yimwing antu avud anlejang yom yiwamp yasalangay lan yinakad am kwijik yom yiney yasangareshang muchim wam.”

Rapor wa in kukimbijol ulondin anch in kufish avud akat kuyikwash kwau kapamp ka kusambish, pakwez maswir mau makurutu akat kumavuramen mulong arund nau akat kukwatikan ni maswir mau ma mu mwom. Pachinech salang usu wakuya kumutal murund ney wafishina chisu chawonsu kupwa kwa kufish. * Antu avud akweta ushon akat kujikitish nakash piur pa mwikadil winou ukata kuyikwash kukepish yovil yau ya ushon.

Shinshikin chilakej cha Kaori, mband changadim wa mwi ngand ya Japon wamana mar mulong wa rufu ra makwend kupwa kwa angond 15 yayend mband wafa kand. Wajikitisha nakash mulong wa ukwash wadandamenay kutambul kudi arund nend ashinshamena. Umwing ading amutazukin anch Ritsuko wading mukurump kumusutamu Kaori ni wipana kwikal murunend wa piswimp. Kaori ulondin anch “kulond win kashinsh,” “nadingap nitiyina pa mulong winou. Nakatap anch muntu ap umwing ikala pandond ya maku, ni natonginap anch kudi muntu ukutwisha. Pakwez, mulong wa mutapu wansadinay maku Ritsuko, Niyova kamu anch nidi nend piswimp. Rubing ni rubing twasalang nend mudimu wa kulejan pamwing, ni twayangang nend ku yikumangan ya win Kristu pamwing. Yisu yivud wantazukang mulong wa kuna chay, wanletinang yakudia, wanfundinang mikand ni wantuminang nfalang. Mwikadil uwamp wa maku Ritsuko wikala nich usu padi am.”

Pasutin kal mivu dikum ni yaad kudiosh pafilay makwend wa Kaori, ni nlel unou ndiy ni nfumwend akat kusal mudimu wa kulejan wa chisu chawonsu. Kaori ulondin anch “Maku Ritsuko,” “udandamedin kwintongin. Anch nachirik ku chikumbu, nayangang kumutal chisu chawonsu ni nasangerang mambamb mend makasikeshina.”

Chilakej chikwau cha muntu wataninamu ku ukwash wa chisu chawonsu wading Poli, kaman wa Yehova wa mwi ngand ya Chypre. Poli wading ni ikundj muwamp dijin diend Sozos, washa chilakej chiwamp mudi kufung mwin Kristu payitazukangay an anshon ni adiaafu ku chikumbu chau mulong wa kwambamb ni kudia pamwing. (Jakobu 1:27) Cha ushon pawanyishay mivu 53, Sozos wafa ni mayej makata kuyipish wong. Poli ulondin anch “Nafisha nfumwam ushinshamena wanasala nend mivu 33 mu uruw wetu.”

Kupwa kwa chidil, Poli washemunika waya mwin ngand ya Canada pamwing ni mwanend Daniel wa mivu 15. Nikala mu umwing ni chikumangen cha atuman a Yehova. Poli ulondin anch “Arund nam mu chikumangen chisu,’’ “kadiap kwau ija chom ap chimwing piur pa mashakamin metu makur ni mar metu twamana.” Pakwez chinech  chayikangeshap kutusejin piswimp ni kutukasikesh ni mazu mau mawamp ni kutukwash yom. Ukwash uwamp mudi ik pa chisu cha swirikenay mwanam kumuman tatukwend! Antu ading atakedina chikumangen amekesha kwipan kwau nakash kudiay Daniel. Umwing wamutongina Daniel pasangerangay urund ni akwau ap pabulangay ndundu.” Nlel unou awonsu aad maku ni mwan asadin nawamp.

Ikal ni kashinsh anch kudi mitapu kushalijan ya kupan ukwash ni ya kuyikasikesh antu akweta ushon. Bibil utukasikeshin kand kusutin usu tusadina mulong wa ruchingej ra machuku ma kurutu.

^ par. 6 Amwing afunda kal machuku ma ngond mafay muntu mulong wa kuvurik chakwel apanang ukwash —pa dichuku ap piswimp ni dichuku dinidia.