Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 5 , 2016

 MUTU WA MULONG WA PA CHIBUR | ANCH MUNTU UKATINA WAFA

Kurish Nich Ushon Wey

Kurish Nich Ushon Wey

Kuding yiyul yivud yilondiningau piur pa mulong winou. Pakwez yiyul yawonsu yidiap yaukwash. Chilakej, ukutwish kutan yiyul yimwing yilondina anch kangal kudil ap anch mekesh yovil yey mu mutapu ukwau. Antu amwing akutwish kukubachik usala yom yishalijadina nich yiyul yeney ni ukukulej anch mekesh yovil yey yawonsu. Bibil ulejen yitongijok yiwamp, chitongijok chimwing achikasikeshin kudi in kukimbijol akatat.

Mu yaku ya antu amwing chidingap chiwamp kumuman muntu ikundj ukat kudil. Pakwez tufanyidin kwov usany piur pa kudil ap anch tudi pakach pa antu avud? In kwilej ukash wa manangu alejen anch kudil uding mutapu uwamp wa kumekesh ushon. Ni kudil kukutwish kukukwash chisu chimwing kupwish ushon ukweta piur pa muntu wafankal. Kukangesh kumekesh ushon kukutwish kwakusal nayimp. Bibil kalondinap anch chiyipin kudil ap kumekesh ushon. Tongin pa chilakej cha Yesu. Ap anch wading ukwet usu wa kumulangwish murund nend Lazar, pakwez ndiy wadila nakash mulong wa rufu rend!—Yohan 11:33-35.

Kwov ujim mu chisu chikemp yisu yivud uding mutapu wa kumekesh ushon, nakash kamu anch rufu rasadik pakad kutongin. Kudi mayingishin mavud makutwisha kusal anch muntu wafishang kal ova ujim, mudi kulond masu ap jitongijok yakad kuwanyin yidiokila kudi muntu ulimishinau. Ikundj utazukinau anch Mike ushicha mwi ngand ya Afrique du Sud ulondin anch “Tatukwam wafa pinading ni mivu 14.” “Kuchidil, ntakel umwing wa egliz wa Anglican walonda anch Nzamb ukwet kuswir kwa antu awamp mulong wa kuyisend. * Mazu minam mangovisha ujim nakash mulong twading tukwet kuswir kwa tatukwetu. Katat nikwet mivu 63, pakwez yom yiney yidandamedin kwinenganesh.”

Chidi nchik piur pa kwifish nich? Nakash kamu anch kwashiken rufu ra kukashimwish, muntu wafishang ukutwish kutong ni kwiyipul anch ‘Yom yiney yelangap kushiken anch nasalang chom kampand ap kanang.’ Pamwing ap mambamb mey manswidien ni muntu wafang madiap mawamp. Yom yiney yikutwish kwiwej pa yovil yey ya kwifish nich.

Anch ukwataken nich yovil mudi yiney ni ujim, chidi cha usey kumekesh mutapu wiyovila. Pakwez ufanyidin kumulej murund ney ukutwisha kukutesh nawamp ni ukukukasikesha anch yovil mudi yiney yikat kuyishiken antu avud akata kufish. Bibil utuvurishin anch: ‘Murund wakin ukat kumekesh rukat chisu chawonsu, ni mukadivar wavadika mulong wa kukwash mu yirung ya mar.’—Jinswir 17:17.

Murund muwamp ukutwisha kwikalay nich muntu ufishina udi Sakatang wetu, Yehova Nzamb. Pan muchim wey kudi ndiy mu malembil mulong ndiy ‘ukat kukutongin.’ (1 Pita 5:7) Pa chinech ndiy ushidinamu anch awonsu akata kusal mwamu yitongijok ni yovil yau akuyininetish kudi “chisambu cha Nzamb chisutina ronganyin.” (Filip 4:6, 7) Chikwau kand lik Nzamb akukoka kusutin Bibil, Dizu diend dia kungoj nich. Fund list wa ma verse makongoj nich. (Tal mushet ulondwilaku ou.) Ukutwish ap kulam maverse mamwing mu manangu mey. Kwikal nich yitongijok mudi yiney kukutwish kwa kukwash chisu udia amwiney uchuku ni piumena anch chikukasikedin kulal.—Isay 57:15.

Machuku ma kwinyim am, ikundj utazukinau anch Jack ukweta mivu 40, wafishin mukajend ni mayej ma kanser. Jack ulondin anch: yisu yimwing niyovang nakash anch nidi amwinam. Pakwez watana ukwash mu malembil. Ulondin anch “pinamulembilang Yehova,” “Niyovangap kand anch nidi amwinam. Yisu yivud nalankang mukach mwa uchuku ni nachirikangap kand pa ulal. Kupwa kwa kutang ni kutongijokin pa yitongijok yikasikeshina natangang mu Bibil, ni kumekesh yovil yam yidiokila mu muchim kusutin mu malembil niyovang kamu nawamp ni chisambu chanchirikinang, kutek manangu mam ni muchim wam mukwiswedish, yawiy yeney yankwashang kulal.”

Mband umwing utazukinau anch Vanessa wafisha makwend ni mayej. Nindiy wamana usu wa malembil. Ulondin anch “Panamana mar nakash,” “Nafanyina ching kutazuk dijin dia Nzamb ni kusambish kudil. Yehova wateshang malembil mam ni chisu chawonsu wangikishang usu nading niswirikedina.”

Antu amwing afishina kal akat kupan yiyul kudi antu arishina nich ushon pipaninau mukuyikwash antu akwau ap pasutishinau chisu chau mulong wakwipan mu chisak chinech. Kusal mwamu kukutwish kwaletish musangar ni kukepesh ushon wa muntu. (Midimu 20:35) In Kristu avud afishina kal amen anch kusal mudimu mulong wa kuyikwash antu akwau kukat kuyikasikesh nakash.—2 Korint1:3, 4.

^ par. 5 Kiyawiyap yifundishinay Bibil. Bibil ulejen yom yisatu yiletishining rufu.—Mulej 9:11; Yohan 8:44; Rom 5:12.