Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 5 , 2016

Kupwish Milong Nich Muchim wa Rukat

Kupwish Milong Nich Muchim wa Rukat

“Shakamany nich chisambu kudi muntu ni mukwau.”—MARKO 9:50.

MIMINY: 39, 35

1, 2. Milong ik ya antu yifundinau mu Disambishil, ni mulong wak yidi ya usey kudi etu?

OV, Kandikal utongangap piur pa milong ya antu afundinau mu Bibil? Anch twatal ma shapitre makemp makusambish ma mukand wa Disambishil, twilejin anch Kain wamujipa Abel (Disambishil 4:3-8); Lamek wamujipa nsand umwing mulong wa mutapa (Disambishil 4:23); Atufung a Aburaham atendang nau atufung a Lot (Disambishil 13:5-7); Hagar wiyovang anch udi piur nakash kumusutamu Sara, ni Sara wamwovila Aburaham ujim (Disambishil 16:3-6); Isamayel wayipompata antu awonsu ni antu amupompata niyend.—Disambishil 16:12.

2 Mulong wak milong yiney ayifunda mu Bibil? Mulong tukutwish kwilejin ku yilakej ya antu akad kuwanyin adinga ni milong yakin. Niyetu tudi akad kuwanyin, ni anch twikal ni milong ya mutapu winou mu mwom wetu, tukutwish kwimburij yilakej yiwamp yidia mu Bibil ni tukulik kuyimburij antu ayimp. (Rom 15:4) Yom yiney yikutwish kutukwash kwilej mutupu wa kulam chisambu nau antu akwau.

3. Tukwisambin yom ik mu mutu wa mulong winou?

3 Mu mutu wa mulong winou tukwilej mulong wak tukwet kuswir kwa kupwish milong ap kulik kovijan ni mutapu ik tukutwisha kusal  mwamu. Tukwilej kand mbil jimwing ja pa dishin ja mu Bibil jikutwisha kutukwash kupwish milong ni kulam urund wetu ni Yehova nawamp ni akwetu.

MULONG WAK ATUSHALAPOL A NZAMB AKWET KUSWIR KWA KUPWISH MILONG

4. Mwikadil ik upalangena mu mangand mawonsu, ni yibudikin ik yidiaku?

4 Satan ndiy dishin dia diyingishin waurila antu ni ikal ni milong yivud. Mulong wak tulondin mwamu? Mu Eden, Satan walonda anch muntu win mwawonsu ukutwish ni ufanyidin kukwat mupak amwinend wa yom yidia yiwamp ap yiyimp pakad kumutakel kudi Nzamb. (Disambishil 3:1-5) Pakwez anch twatal mu mangand nlel, tumen anch mwikadil mudi winou uletishin milong. Antu avud atongining anch akwet usu wa kukwat mipak ayinau piur pa yom yidia yiwamp ap yiyimp. Akat kwibaz, akwet choy, akatin kwikal akusambish, ni kakatap kutongin anch mipak yau yikat kuyinenganesh antu akwau. Mwikadil mudi winou wawiy ukata kuletish matend. Bibil utuvurishin anch ang tukat kujiman swa tukutwishap kovijan ni antu avud ni tukutwish kusal yitil yivud.—Jinswir 29:22.

5. Yesu wayifundisha antu yom ik mulong wa kupwish kulik kovijan?

5 Chisu chasalay Yesu Diskur diend dia pa Mukandu, wayifundisha in kwilej end mutapu wa kwikal nich chisambu ni mutapu wa kupwish kulik kovijan, ap anch malejan minam madingap mayitadina. Chilakej, wayileja kwikal antu awamp, kwikal ni chisambu ni antu akwau, kulik kwikal ni yovil ya ujim, kupwish milong pakad kulab, ni kuyikat akankuny nau.—Mateu 5:5, 9, 22, 25, 44.

6, 7. (a) Mulong wak chidi cha usey kupwish milong pakad kulab? (b) Yipul ik yifanyidinau kwiyipul antu awonsu a Yehova?

6 Nlel, tukat kumwifukwil Yehova chisu tulembiling, tulejening, ni patuyiling ku yikumangan yetu. Anch tusadinap chisambu nau akadivar netu, Yehova kakwitiyijap difukwil dietu. (Marko 11:25) Anch twakimb anch twikal arund a Yehova, tufanyidin kuyilikishin akwetu chisu chikuturumbukinau.—Tang Luka 11:4; Efes 4:32.

7 Yehova uyitin atushalapol end awonsu ikala in kulikishijadin ni kwikal mu urund wa chisambu ni antu akwau. Tukutwish kwiyipul ayinetu anch: ‘Am nikat kuyilikishin akadivar pakad kulab? Nikweting musangar wa kwikal nau pamwing?’ Anch waman anch ukwet kuswir kwa kwikal mwin kulikishin nakash, mulembila Yehova ni muleja akukwasha pa mulong winou. Tatukwetu wa mwiur ukutesh ni ukwakul ku malembil minam mikepishina.—1 Yohan 5:14, 15.

UKUTWISH KUVURAMEN ANCH AKURUMBUKIN?

8, 9. Yom ik tufanyidina kusal anch aturumbukin?

8 Etu awonsu tudi akad kuwanyin, chawiy tukutwish kuchingejin anch antu akutwish kulond ap kusal yom yikutwisha yatwovish kuyip. (Mulej 7:20; Mateu 18:7) Mutapu ik ukusala? Tukutwish kwilejin dilejan dia usey ku yom yilondwilaku ey: Nambaz umwing wayilangwisha akadivar aad kwindond kukata ku kumangenang antu avud. Pakwez mukadivar umwing wova kuyip mu mutapu wa mulangwishau. Pashalau akadivar inay ayinau, mukadivar warumbukinau wasambisha kwinan piur pa nambaz winou. Pakwez, mukadivar mukwau wa muvurisha anch nambaz winou wamusadidin kal Yehova nich kushinshaman mu mivu 40 chikalap nchik mar mavud. Wading nich kashinsh anch nambaz winou kamurumbukinap. Mutapu ik wasalay mukadivar warumbukinau? Walonda anch, “Uyingin kwey nich.” Watonda kuvuramen piur pa yom yiney yasadika.

9 Yom yiney yitufundishin ik? Anch muntu waturumbukin, tufanyidin kutond mutapu tukusala. Muntu ukweta rukat ukat kulikishinang. (Tang Jinswir 10:12; 1 Pita 4:8.) Anch tukat ‘kudiul uyimp,’ chidi chom chiwamp kudi Yehova. (Jinswir 19:11; Mulej 7:9) Chawiy dichuku dikwau anch muntu walond ap wasal chom chikutwisha ku kwovish kuyip,  iyipula anch: ‘Nikutwish kuvuramen uyimp winou? Ov, nikudandamen kutong piur pa yom yiney?’

10. (a) Mutapu ik wasalay nambaz umwing piur pa mazu mayimp mamwelangau kapamp ka kusambish? (b) Mufund ik wa Bibil wamukwasha nambaz winou kulam chisambu chend?

10 Anch akwetu alond yom yiyimp piur petwetu, chikutwish cha tukasiken kuvuramen mazu mau. Tal yom yamushikena changadim umwing chibol utazukinau anch Lucy. Antu amwing mu chikumangen amulondang piur pa mwikadil wa mudimu wend wa kulejan ni mutapu wasadinangay chisu chend. Wova ushon nakash ni wayipula akadivar aswila kal chakwel amukwasha. Watana chibudikin ik? Ulondin anch akadivar asadina Bibil chakwel nilika kutong nakash piur pa yitongijok yiyimp ya akwetu, pakwez nasambisha kutong nakash piur pa Yehova. Amukasikesha nakash patangay mukand wa Mateu 6:1-4. (Tang.) Maverse minam mamuvurisha anch kumusangaresh Yehova kwawiy kukweta usey nakash. Chawiy watonda kulik kwimen pa mazu mayimp ma mulondangau. Katat, ap anch akwau alond mazu mayimp piur pa mudimu wend wa kulejan, ukweting musangar mulong wij anch usadining usu wa kusal yom yiwamp mulong wa kumusangaresh Yehova.

CHISU ULIKINA KUVURAMEN UYIMP WAKUSALANGAU

11, 12. (a) Mutapu ik ufanyidinay mwin Kristu kusal anch wijik anch ‘ukwet mulong’ ni mukadivar nend? (b) Yom ik tukutwisha kwilejin mu mutapu wapwishay Aburaham matend? (Tal chipich cha kwinsambishin.)

11 Bibil ulondin anch: “Etu awonsu tukat kurumbok.” (Jakobu 3:2). Tong bil anch wijik anch wamurumbukinang mukadivar kanang kusutil ku yom walondanga ap wasalanga. Chom ik ufanyidina kusal? Yesu walonda anch: Ang “[ukimbin] kupan yakupesh yey kudi Nzamb pa chintamb, kwinikwa anch wavurik anch: Mwanamakwam mu ritiy ukwet mulong ni yamam, shang yakupesh yey pa chintamb. Yang swa, ukachakulany nend mwanamakwey wa mu ritiy, chad uchirik lel ni kupan yakupesh yey kudi Nzamb.” (Mateu 5:23, 24) Komb ambamb nend mukadivar ney. Anch wasal mwamu, chitongijok chey chidi mulong wa kwikal mu chisambu ni ndiy. Ufanyidinap kwitiy kurumbuk kwey ni kangal kumufish nich. Kwikal mu chisambu pamwing nau akadivar netu chiding chom cha usey nakash.

12 Bibil umekeshin mutapu ukutwishau atushalapol a Nzamb kulam chisambu ap anch kovijadinap. Chilakej, Aburaham ni mwipwend Lot awonsu aad adinga nich annam avud, pakwez atufung au asambisha kutend mulong ndond ya kudishin annam yakepa. Mulong Aburaham wakata chisambu, wamulika Lot atonda ndond yiwamp. (Disambishil 13:1, 2, 5-9) Chilakej chiwamp mudi ik kudi etu! Aburaham wamana mar chikupu pashadishay yom mulong wa muchim wend wa kupan? Bwat. Kapamp kamwing kupwa kwa yom yiney, Yehova washilamu anch ukumuyukish Abraham nich yom yivud kusutamu yashadishay. (Disambishil 13:14-17) Yom ik twileja kal? Ap anch twaman mar ma kushadish yom yimwing, Yehova ukutuyukish anch twapwish milong nich rukat. [1]—Tal mazu ma kwinsudien

13. Mutapu ik wasalay kalam umwing piur pa mazu mayimp mamwakulau, ni chom ik tukutwisha kwilejin ku chilakej chend?

13 Tal chilakej cha katat. Kalam musu wa departema wa chitentam wamutazuka mukadivar wamulej anch ang ukutwish kusadin mu departema winiwa. Pakwez mukadivar winou walonda yom yiyimp ni wakatula telefon mulong wading uchikwet ujim mulong amurumbukina kudi kalam mukwau wa departema wasadina machuku makwinyim mu departema winiwa. Kalam winou musu kwovap kwend kuyip pakwez, wading uvurikin yom yiney yasadika. Kupwa kwa saa umwing, wamutazuka kand mu kadivar ni wamuleja anch asal usu wa kumanijan nend. Rubing ralondulaku akadivar inay atanijana ku Chot cha Want, ni kupwa kwa kumulembil Yehova ambamba mu saa umwing. Mukadivar wa murumburila yom yasalay kalam watakela kusal machuku ma kwinyim. Kalam musu winou wamutesha kamu nawamp ni watanga nend  mifund ya ukwash yidia mu Bibil. Mudi chibudikin, akadivar inay asala chisambu ni asala mudimu pamwing ku chitentam. Mukadivar wajikitisha nakash mulong kalam winou wamuleja mu mutapu uwamp.

UKUTWISH KUYANDJIKAMU A MAKURUMP?

14, 15. (a) Chisu ik tufanyidina kusadin chiyul chidia mu mukand wa Mateu 18:15-17? (b) Yom ik yisatu yalonday Yesu tufanyidina kusadin ni chitongijok ik tufanyidin kwikal nich mulong wa kusadin yom yiney?

14 Milong yivud yiding pakach pa in Kristu aad akutwish ni afanyidin kuyipwish ayinau mu ujindj. Pakwez, chiswapelingap yisu yimwing. Milong yimwing yitining ukwash wa antu akwau kulondulijan ni mukand wa Mateu 18:15-17. (Tang.) “Chitil” chilondinay Yesu pinap chidiap kulik kwovijan kukemp kudia pakach pa in Kristu. Mutapu ik twija mwamu? Yesu walonda anch ang mukayitil walikwend kukarumuk kupwa kwa kwambamb ni mukadivar nend, atuman, akadivar akweta yisend, ufanyidin kumukwat mudi “kadiap kand mwanamakwey mu ritiy ap muchinda mudi mwin kulambwish yitad.” Nlel, chirumburikin anch afanyidin kumwopat mu chikumangen. “Chitil” chinech mudi yom mudi wij, kafukej, pakwez yidiap chitil mudi makaj, utun, kupumbok, ap kand kwifukwil akish. Yitil mudi yiney afanyidin kuyipwish kudi a makurump.

Chidi cha usey kwambamb nend muntu tupamp tuvud mulong wa kuchirish chisambu (Tal paragraf wa 15)

15 Chitongijok cha Yesu cha kupan chiyul chinech chimekeshin mutapu tufanyidina kumukwash mukadivar mulong tumukatin. (Mateu18:12-14) Mutapu ik tukulondula chiyul chinech? (1) Tufanyidin kusal usu wa kusal chisambu ni mukadivar netu pa ndond pa kuyandjikamu antu akwau. Tufanyidin kwambamb nend tupamp tuvud. Pakwez chom ik tukusala anch chisambu chimekenap? (2) Tufanyidin kwambamb ni mukadivar netu pamwing ni muntu wija mulong winou ap muntu wamena mutapu wasadinay chom chinech chiyimp. Anch mulong winou wapwa nawamp, “divar dien dia mu ritiy diachirikal kand.” Pakwez ching anch  wambambin kal ni mukadivar ney tupamp tuvud ni walik kwitiy kutek chisambu (3) pawiy ukutwala mulong winou kudi a makurump.

16. Chom ik chimekeshina anch kulondul chiyul cha Yesu udi mutapu uwamp wa kusadin ni wa rukat?

16 Yisu yivud, chidingap cha usey kusadin yom yiney yawonsu yisatu yifundinau mu Mateu 18:15-17. Yom yiney yidi yakukasikesh. Mulong wak tulondin mwamu? Mulong yisu yivud mukayitil ukat kwijik kurumbuk kwend ni kulejan mulong wend, chawiy kakwikalap kand nikuswir kwa kumwopat mu chikumangen. Muntu warumbukinangau ufanyidin kumulikishin mukadivar winou ni kutek nend chisambu. Komb yoviken nawamp chiyul cha Yesu chilondina anch tufanyidinap kuya kuyilej a makurump anch mulong winou uchidi kal kwinsambishin. Tufanyidin kulejan mulong winou ching anch twasal chom chakusambish ni cha kaad ni anch kudi kamu uman umekeshina anch chom chinech chiyimp chasadikin.

17. Yiyukish ik tukusanger anch ‘twakimb chisambu’ ni antu akwau?

17 Mulong tudi antu akad kuwanyin, tukutwish kudandamen kamu kuyirumbukin akwetu. Chawiy chafunday mwin kwilej Jakobu anch: “ Anch muntu kand kal arumbukangap pa kulond, ndiy [udi] muntu uwanyidina, ukutwisha kulam mujimbu wend wawonsu.” (Jakobu 3:2) Chakwel anch tupwisha milong, tufanyidin kusal yom yiwamp mulong wa ‘kukimb chisambu ni kuchilam.’ (Kuseng 34:14) Anch twadandamen kusal chisambu pamwing nau akwetu, tukwikal ni urund uwamp pamwing nau akadivar ni anambaz netu, ni chinech chikulam uumwing wetu. (Kuseng 133:1-3) Chipandakena usey, tukwikal mu urund wa piswimp ni Yehova, “Nzamb ukata kupan chisambu.” (Rom 15:33) Tukusanger yiyukish yiney yawonsu ching anch twapwish milong yiney nich rukat.

^ [1] (paragraf wa 12) Antu akwau apwisha milong mu chisambu ading Jakob ni Esau (Disambishil 27:41-45; 33:1-11); Josef nau anamakwend (Disambishil 45:1-15); Gedeyon nau in Efrayim (Ankalansambu 8:1-3). Pamwing ap ukutwish kutongin pa yilakej yamutapu winou yidia mu Bibil.