Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 5 , 2016

 MUTU WA MULONG WA PA CHIBUR | ANCH MUNTU UKATINA WAFA

Chidi Chiyimp Kwov Ushon?

Chidi Chiyimp Kwov Ushon?

Ov, kandikal wovangap ushon mu chisu chikemp piur pa mayej? Pamwing ap wova nawamp piwasala swa mulong uvuramena ushon winou. Chakin kamu ushon udiap mudi chom chinech. Dokiter. Alan Wolfelt wafunda mu buku wend Healing a Spouse’s Grieving Heart anch: “Kwikil chom chipandikena kuyip mudi ‘kwov ushon’ nakash.” Chawiy, uwejidinaku kand anch: “Yisu yivud nich ukwash wa antu akwau ushon wey ukukep.”

Mudi chilakej, tal mutapu wasalay nshankur Aburaham chisu chafay mukajend. Bibil ulondin anch: “Aburaham wateka chidil cha Sara, wamudila nakash.” Dizu kulond anch “wateka” chimekeshin anch wasala machuku mavud mulong wa kurish nich ushon wend. * Chilakej chikwau chidi cha Jacob, wadimbau pamulejau anch mwanend Josef amujipa kudi nnam wa chidiany. Wova ushon “machuku mavud” ni anamakwend katwishap kumwongoj. Mu kusut kwa mivu, rufu ra Josef rading ridandamedin kwikal mu manangu mend.—Disambishil 23:2; 37:34, 35; 42:36; 45:28.

Chidi mutapu umwing nlel kudi antu avud amekeshina ushon mulong wa rufu ra mwanamakwau. Shinshikin yilakej yaad ey.

  • “Nfumwam Robert, wafa machuku ma ngond 9, ngond wa 7, mu muvu wa 2008. Pamanch pa dichuku pasadika akisida winou muyimp, kwadingap kushalijan ni machuku makwau. Kupwa kwa yakudia yetu ya pamanch, yatwadiagang kurutu kwa kuya ku mudimu twasusujana, twabwikatijan, ni twalond anch ‘Tukatijadin.’ Ap anch kwasuta mivu musamban ushon wadandamena kwikal mu muchim wam. Natongap anch nikutwish kuvuramen rufu ra Robert.”—Gail, ukweta mivu 60.

  • “Ap anch nashala pakad mukajam mukatish mu mivu 18 ni kusut, namushadisha kamu ni nading nikwet ushon mulong wa rufu rend. Anch naman chom chatangau chinsangareshina namuvurikang ni nakimbap kumukwash mutapu wafanyinay kusanger pa kuman yom yinamanang.”—Etienne, ukweta mivu 84.

Chimeken patok anch, ushon mudi winou ni yovil ya machuku mavud yiding kamu ya chivadik. Muntu ni muntu ukat kumekesh ushon mu mutapu wend, ni chidiap cha manangu kumurumburish muntu piur pa mutapu ukusalay anch mar mamushiken. Yisu yimwing tukweting kuswir kwa kulik kwifish nich ayinetu anch mutapu wetu wa kumekesh ushon wapandakan. Mutapu ik tukutwisha kurish nich ushon?

^ par. 4 Isaac mwan wa Aburaham ni ndiy wikala ni ushon mu machuku mavud. Mudi mulejenau mu buku “Imitez Leur Foi “ mu mutu wa mulong umwing wa buku winou ulejen anch, Isaac wadandamena kwikal ni ushon nakash mulong wa rufu ra makwend Sara mu mivu yisatu.—Disambishil 24:67.