Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 5 , 2016

 MUTU WA MULONG WA PA CHIBUR | ANCH MUNTU UKATINA WAFA

Afu Akez Kwikal Kand Aom!

Afu Akez Kwikal Kand Aom!

Ukutwish kuvurik anch Gail, wajimbulangau kwinshambishin kwa mitu ya milong yiney, wading ukat kwidjidjek piur pa nfumwend wafa kal anch kakez kamumanap. Pakwez, uchingejin kumumam kand mu machuku ma kurutu mwin ngand yisu yashilayamu Nzamb. Ulondin anch “Mufund wam nikatininga nakash,” “udi wa Kujingunik 21:3, 4.” Ulondina anch: “Nzamb amwinend ukez kushakam nau pamwing, chad ukwikal Nzamb wau. Ndiy ukez kayikusol mansoj mawonsu ku mes mau. Kukez kikalap kand rufu, ap madil, ap kwishikokin, ap kusansan, mulong yom yikur kiyamekanap kand.”

Gail ulondin anch: “Kushilamu kwinoku kudi kwakin. Yovil yam yikat kwinkwash kuyanaken antu afishina muntu ukatinau, pakwez kakwetap ruchingej anch akez kamuman kand muntu winou.” Gail wasala kukwatijan ni yitiyij yend mu kwipan mu mudimu wa kulejan wa chisu chawonsu, pipanangay mu kuyilej amutej nend piur pa kushilamu kwa Nzamb kwa machuku ma kurutu chisu ‘chikuburena rufu.’

Ukutwish kulond anch ‘nitiyijinap!’ Pakwez tal chilakej cha muntu utazukinau anch Job. Wayela nakash. (Job 2:7) Ap anch Job wading wij anch ukufa, wading utekin ritiy mu usu wa Nzamb anch ukumuvumbul kumuchirish kand ku mwom pa divu. Walonda nich kashinsh anch: ‘A! Ing njindjika kwam mwi ndond ya afu. . . Ukez katazuk, niyam nikez kakwakul. Ukez kaswir kwiman kand, yam kamu mudimu wa makas mey.’ (Job 14:13, 15) Job wading nich kashinsh anch Nzamb wend ukez kamuvurik ni kumuchirish ku mwom.

Mu machuku ma kurutu am Nzamb nikusal mwamu mulong wa Job ni mulong wa antu akwau atwakad kujimbul pinap chisu chikukarumunay divu kwikal paradis. (Luka 23:42, 43) Bibil ulondin mu Midimu 24:15 anch ‘Kukez kwikal divumbuk.’ Yesu utukasikeshin anch: “Kangal washimwokany mulong wa chom chinech,” “Chisu chikat kwez chikez kuteshau afu awonsu adia mwi nzay dizu dined chad akez kuvumbuk kwikal kand aom.” (Yohan 5:28, 29) Job ukez kuman kuwanyin kwa kushilamu kwinoku. Ukwikal ni mutapu wa kwikal kand ni usu wa “usand wend.” Chawiy mbij jend jikez kachirik chikupu “sinin mudi mujimbu wa mwan.” (Job 33:24, 25) Chom chinech chikusadik kudi awonsu akusangera chipan cha riy cha Nzamb cha kuyivumbul antu kwikal kand ni mwom pa divu.

Anch umen mar mulong wa mwanamakwey wafila, yom twambambina kal ey yikutwishap yadiosh ushon wey kapamp kamwing. Pakwez anch watongijokin kushilamu kwa Nzamb kudia mu Bibil, ukutwish kutan ruchingej rakin ni usu chakwel udandamen kuya kurutu.—1 Tesalonik 4:13.

Ov, ukimbin kwilej yom yivu piur pa mutapu wa kurish nich ushon? Ap wiyipwilap kal yipul mudi anch “Mulong wak Nzamb ulikidinay uyimp ni mar?” Yang amboku pa kapend ka jw.org, ni tal mutapu upaninay Bibil kukasikesh ni yakul ya ukwash.

 

CHAKWEL WIJIKA YOM YIVUD

CHINONG CHA KALAM

Chom ik Chikata Kushikenang Kupwa kwa Kufa?

Antu chinan avumbuka kudiokal ku rufu, jinsangu jau jidi mu Bibil. Yom ik yalondau piur pa mwikadil wa afu?