Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 4 , 2016

Mulong Wak Tufanyidina Kukumangan Pamwing Mulong wa Kwifukwil?

Mulong Wak Tufanyidina Kukumangan Pamwing Mulong wa Kwifukwil?

‘Ipana nich mushiku mulong wa kutesh malejan . . . imbomba pamwing.’—MIDIMU 2:42.

MIMINY: 20, 1

1-3. (a) Mutapu ik umekeshinau in Kristu anch akwet mushiku wa kukumangan? (Tal chipich cha kwisambishil.) (b) Yom ik tukwisambina mu mutu wa mulong winou?

PADINGAY Corinna ni mivu 17, amukwata makwend ni amutwala kulemp mu camp mulong wa kumusadish midimu ya ku usu. Kusut kwa machuku, Corinna niyend amukwata ni amutwala kulemp ku Siberia mu tunan twa akilometre. Kwinikwa kwawiy kwasalangay mudimu mu ferm ni amumeshanga mar mudi kabindj. Mu yisu yimwing amubachikanga kusal mudimu pol pading mashik nakash pakad kudjal koch mulong wa kwov chirungil. Ap anch chading mwamu, Corinna ni nambaz mukwau akwata mupak chakwel asala midimu yawonsu yayitau kusal pa dichiku dinidia mulong adiokal swa ku ferm chakwel aya ku yikumangan.

2 Corinna walonda anch: “Twadiokalanga urel kwindond ya mudimu ni kushik pa ndond ya kukandamin train pading ma kilometre 25. Train washikang pa saa ya kanying ya pamanch ni twasala masaa musamban mu train, akilometre dikum mulong  wa kushik kwindond ya chikumangan.” Corinna wasangara nakash mulong wa weny winou. Walonda anch: “Ku yikumangan, twileja Chinong cha Kalam,ni twawanga miminy ya Want. Yikumangan yiney yatukwasha ni yakasikesha ritiy retu.” Pachirikau anambaz inay kupwa kwa machuku masatu mwin ferm kijikap anch aya ku chikumangan.

3 Antu a Yehova achingedining mulong wa kutanijan umwing ni mukwau. Chilakej, in Kristu a mivu chitot ya kusambish ading ni mushiku wa kukumangan pamwing mulong wa kumwifukwil Yehova ni mulong wa kwilej piur pendendiy. (Midimu 2:42) Chakin kamu, niyey usangaredining kuya ku yikumangan. Pakwez, ijik anch mudi akadivar ni anambaz awonsu niyey chikutwish chakukasiken kukumangan chisu chawonsu ku yikumangan. Pamwing ap ukwet kuswir kwa kusal mudimu mu masaa mavud ap ukwet yom yivud ya kusal ap kand ukutwish kuziy. Pakwez, chom ik chikutwisha kutukwash kusal chom chawonsu tukweta cha kusal mulong tuya ku yikumangan yetu? [1] (Tal mazu ma kwinsudien.) Mutapu ik tukutwisha kuyikasikesh in kwilej etu a Bibil ni antu akwau chakwel ezang ku yikumangan yetu chisu chawonsu? Mutu wa mulong winou ukurumburil mulong wak kuya ku yikumangan (1) kudi kuwamp mulong wetwetu, (2) kuyikwashin antu akwau, ni (3) kumusangareshin Yehova. [2]—Tal mazu ma kwinsudien.

YIKUMANGAN YIDI YIWAMP MULONG WETWETU

4. Yikumangan yitukwashining mutapu ik kwilej yom yivud piur pa Yehova?

4 Yikumangan yikat kutufundish. Chikumangan ni chikumangan chitukwashining twileja yom yivud piur pa Yehova. Chilakej, yikumangen yivud yileja buku ulondina anch Sejany Piswimp Kudi Yehova ku Dilejan dia Bibil dia Chikumangen. Mutapu ik wiyova chisu twisambina pa mikadil ya Yehova ni piwatesha mutapu wovau akadivar ney piur pendendiy? Chakin kamu, chinech chakukwasha umukata Yehova nakash. Ku yikumangan, tukat kwilej kand yom yivud piur pa Bibil kusutil ku kutesh nawamp madiskur ni yakumenaku ni patanginingau Bibil. (Nehemiy 8:8) Tongin kand pa yom yivud tukata kujingunin rubing ni rubing pitukata kwirijek mulong wa kutang Bibil ni pitukata kuyitesh akadivar ni anambaz netu alond lel piur pa yom yilejinau mu Bibil.

5. Yikumangan yikukwashining nchik kusadil yom wilejina mu Bibil ni kuwapish mutapu wa kusal mudimu wa kulejan?

5 Yikumangan yitufundishining mutapu wa kusadin yom twilejininga mu Bibil mu mwom wetu. (1 Tesalonik 4:9, 10) Chilakej, wakumanganap kal ku Dilejan dia Chinong cha Kalam, kwa kukwasha usala nakash mu mudimu wa Yehova, uwapisha malembil mey ap kuyilikishin akadivar ni anambaz ney? Chikumangan tusadining mukach mwa rubing chitufundishining mutapu wa kulejan rusangu ruwamp ni mutapu wa kuyikwash antu akwau chakwel atesha uyakin udia mu Bibil.—Mateu 28:19, 20.

6. Mutapu ik ukata yikumangan kutukasikesh ni kutukwash ?

 6 Yikumangan yikat kutukasikesh. Mangand ma Satan makat kusal usu wa kuziyish ritiy retu ni twiyova anch tukwatiken nakash. Pakwez, yikumangan yetu yikat kutukasikesh ni kutwinkish usu wa kudandamen kumusadin Yehova. (Tang Midimu 15:30-32.) Yisu yivud, tukat kwisambin mutapu uwanyidina uprofet wa mu Bibil. Kwilej mudi kwinoku kutukwashining twikala nich kashinsh anch kushilamu kwa Yehova kwa machuku ma kurutu kukuwanyin. Akadivar ni anambaz etu akat kutukasikesh kadiap ching pakatau kusal yikunku yau ap madiskur mau, pakwez pakatau kand kwakul ni kumutumbish Yehova mu kumuwangin miminy ni muchim umwing. (1 Korint 14:26) Ni pitukata kwisamb nau kurutu kwa kusambish yikumangan ni kupwa kwa yikumangan, twiyoviling mudi antu akasikeshinau mulong tukwet arund akin akata kututongin.—1 Korint 16:17, 18.

Yikumangan yetu yitukasikeshining ni yitukwashining chakwel tudandamena kumusadin Yehova

7. Mulong wak chidia cha usey kuya ku yikumangan?

7 Ku yikumangan, tutambwiling ukwash wa spiritu utumbila wa Nzamb. Yesu usadidin spiritu utumbila mulong wa kutakel nich yikumangen. Kupwa kand, watuleja anch tufanyidin ‘kutesh yom yilondinay spiritu ku yikumangen.’ (Kujingunik 2:7) Spiritu utumbila ukutwish kutukwash tujijaman ku yoziu ni tulejana pakad wom. Spiritu winou ukutukwash kand tukwata mipak yiwamp. Chawiy lel, tufanyidin kusal usu wetu wawonsu mulong wa kukumangan chakwel tutambula ukwash wa spiritu utumbila wa Nzamb.

TUYIKWASHINING ANTU AKWAU KU YIKUMANGAN

8. Pakatau akadivar kutuman ku yikumangan ni kutesh kwakul ni kuwang kwetu, mutapu ik ukata yom yiney kuyikwash? (Tal kand mushet ulondina anch “ Wiyovang Yisu Yawonsu Nawamp.”)

8 Ku yikumangan, kwawiy tukweting mitapu ya kuyimekeshin akadivar ni anambaz etu anch tuyikatining. Akadivar ni anambaz etu avud adia mu yikumangen yetu akat kujijaman mu mar makash. Kambuy Paul wafunda anch: “Tutalijanany muntu ni mukwau.” (Hebereu 10:24, 25) Tukutwish kumekesh anch tukat kuyitongin akadivar  ni anambaz pitukata kukumangan nau pamwing mulong wa kukasikesijan. Pitukata kuya ku yikumangan, tuyilejining anch tukatining kwikal nau pamwing, kulond nau pamwing ni kutesh yovil yau. Tuyikasikeshining kand pateshiningau kwakul kwetu ku yikumangan ni kuwang kwetu kudiokila ku michim.—Kolosay 3:16.

9, 10. (a) Rumburil mutapu utukwashina mazu ma Yesu madia mu Yohan 10:16 kwijik mulong wak chidi cha usey kukumangan pamwing ni akadivar ni anambaz netu. (b) Anch tukat kukumangan yisu yawonsu, mutapu ik tukutwisha kumukwash muntu walikau kal kudi anamakwend?

9 Pituyilinga ku yikumangan, tukwashining chikumangen chishala mu umwing. (Tang Yohan 10:16.) Yesu wifanikesha amwinend ni kafung ni in kwilejend wayifanikesha ni chisak cha amikoku. Tongin bil pa mulong winou: Anch amikoku aad adi pa mukandu, akwau aad adi mwi nkurubuk, umwing udi mwindond kanang, ov, amikoku inay atan awonsu adi mu chisak chimwing? Bwat, mulong chisak cha amikoku chifanyidin kwikal pamwing ni kumulondul kafung wau. Chilik chimwing kand, tufanyidinap niyetu kwikal kulemp ni akadivar ni anambaz etu mu kulik kuya ku yikumangan. Chawiy, tufanyidin kukumangan pamwing chakwel twikala “chisak chimwing” chilondwila “kafung umwing.”

10 Yikumangan yetu yitukwashining kwikal mu umwing mudi dijuku didia mu rukat. (Kuseng 133:1) Antu amwing adia mu chikumangen ayopatin kal kudi anamakwau a mu dijuku. Pakwez, Yesu wayikana anch ukuyinkish dijuku dikutwisha kuyikat ni kuyikwash. (Marko 10:29, 30) Anch ukat kukumangan chisu chawonsu, ukutwish kwikal mudi, tatuku, maku, yay ikundj ap mband mulong wa muntu udia mu chikumangen. Anch twatongijokin pa yom mudi yiney, tukusal  usu wetu wawonsu chakwel tukumangan ku yikumangan yawonsu.

TUKUMUSANGARESH YEHOVA

11. Kukumangan kutukwashining mutapu ik kumwinkish Yehova yom yimusangareshina?

11 Ku yikumangan, tumwinkishining Yehova yom yimusangareshina. Mulong udi Sakatang wetu, tufanyidin kumujikitish, kumwinkish uyaj ni kumutumbish. (Tang Kujingunik 7:12.) Tukutwish kusal mwamu ku yikumangan pitukumulembila, pitukumuwangina ni kulond piur pa Yehova. Chidi chisend chiwamp mud ik tukweta cha kumwifukwil Yehova rubing ni rubing!

Wij usu wetu tusadininga mulong wa kukumangan ni uukwatining nich usey

12. Mutapu ik wiyovilingay Yehova pitukata kuziyin kwi mbil yend ya kukumangan?

12 Yehova ndiy watutanga, chawiy tufanyidina kumuziyin. Utulejin anch tufanyidin kudandamen kukumangan pamwing mulong nsudien yidi piswimp. Chawiy, anch twaziyil kwimbil Yehova ukusangar nakash. (1 Yohan 3:22) Wij usu wetu tusadininga mulong wa kukumangan ni uukwatining nich usey.—Hebereu 6:10.

13, 14. Mutapu ik tukata kumusejin piswimp Yehova ni Yesu ku yikumangan?

13 Pitukata kukumangan, tumulejining Yehova anch tukatin kumusejin piswimp ni kusej piswimp ni Mwanend. Ku yikumangan, twilejining Bibil ni twilejining piur pa Yehova, piur pa yom yitufanyidina kusal ni mutapu wa kushakam. (Isay 30:20, 21) Ap anch muntu wakad kwikal kaman wa Yehova wez ku yikumangan, ukuman anch Nzamb ututakedin. (1 Korint 14:23-25) Yehova ndiy ukata kutakel yikumangan yetu nich spiritu wend utumbila ni yom twilejining yidiokiling kudi ndiy. Chawiy lel, pitukata kuya ku yikumangan tuteshining yom yilondiningay Yehova, twoviling mutapu utukatiningay ni tusejining piswimp nend.

14 Yesu, Ntakel wa chikumangen walonda anch: “Mulong kwawonsu kukukumanganau antu aad ap asatu mu dijin diam, am nikwikal nau pamwing.” (Mateu 18:20) Bibil ulondin kand anch Yesu ‘ukat kwendil’ mukach mwa chikumangen. (Kujingunik 1:20–2:1) Chimeken patok anch, Yehova ni Yesu adi pamwing niyetwetu mulong wa kutukasikesh ku yikumangan. Utongin nchik piur pa mutapu wiyovilingay Yehova pakumeningay ukat kusal usu wey wawonsu chakwel umusejina piswimp ni useja piswimp ni Mwanend?

15. Mutapu ik kuya ku yikumangan kumekeshin anch tukatining kumuziyin Nzamb.

15 Pitukata kukumangan, tumulejining Yehova anch tukatin kumuziyin. Yehova kakatap kutushindin kusal yom yilondinay. (Isay 43:23) Chawiy lel, anch twatond kuziyin kwi mbil yend ya kukumangan, tukumekesh anch tumukatin ni twitiyijin anch ndiy ukweta mbil ya kutulej yom yiwamp yitufanyidina kusal. (Rom 6:17) Chilakej, yom ik tukusala anch mukurump wetu wa mudimu watulej kusal mudimu nakash chakwel tukanganyang kukumangan ku yikumangan chisu chawonsu? Pamwing ap anch antakel alond anch, ang aman muntu ukukumangana mulong wa kumwifukwil Yehova, akumufutish chibau, akamutek mu rukan, akumupup mu mutapu uyimp. Ap yisu yimwing, tukutwish kusal chom chikwau chikutwisha  kutukangesh kuya ku yikumangan. Mu mikadil yiney yawonsu, ijik anch tufanyidin kukwat mupak wa yom tukusala. (Midimu 5:29) Pakwez, chisu ni chisu tutondining kumuziyin Yehova, tukat kumusangaresh.—Jinswir 27:11.

DANDAMEN KUKUMANGAN PAMWING NI AKADIVAR NEY

16, 17. (a) Mutapu ik twija anch yikumangan yading yikwet usey nakash kudi in Kristu a mu mivu chitot ya kusambish? (b) Mutapu ik wiyovay Mukadivar George Gangas piur pa yikumangan ya win Kristu?

16 Kupwa kwa kukumangan ku Pentekot mu muvu wa 33, in Kristu akumanganang yisu yawonsu mulong wa kumwifukwil Yehova. Awiy ‘Ipana nich mushiku mulong wa kutesh malejan ma atwimbuy, imbomba pamwing.’ (Midimu 2:42) Kalikangap kukumangan pamwing ap anch ayimesha mar kudi mwant wa in Rom ni antakel a in Yuda . Ap anch chadingap chiyiswapedina, asala usu wau wawonsu mulong wa kudandamen kukumangan pamwing.

17 Nlel unou kand, atushalapol a Yehova oviling musangar nakash wa kukumangan. Pasuta mivu 22 George Gangas, wading umwing wa Chisak Chitakedina walonda anch: “Kudi am, kukumangan pamwing ni akadivar nam chading chom chimwing cha musangar nakash mu mwom wam ni musul wa kukasikesh. Nakatang kushik wa kusambish ku Chot cha Want ni kudiokal wa nsudien anch chading chinswapedin. Novang musangar nakash wa kwambamb pamwing ni antu a Nzamb. Pinadinga pakach pau niyovang mudi nidi kwol kwam pamwing ni dijuku diam, mu paradis wa muspiritu.” Uwejidinaku anch: “Yitongijok yam ni maswir mam mading ma kukumangan.”

18. Mutapu ik wiyovilinga piur pa yikumangan yetu ni mupak ik ufanyidina kukwat?

18 Niyey wiyoviling mutapu umwing piur pa mutapu wa kumwifukwil Yehova? Anch chidi mwamu, dandamen kusal yawonsu ukutwisha kusal mulong wa kwikal pamwing nau akadivar ku yikumangan ap anch chikasiken. Mekesh kudi Yehova anch niyey wiyovil mudi mwovay Mwant David, palonday anch: “[Yehova] nikatil kushakam mu chikumbu chey.”—Kuseng 26:8.

^ [1] (paragraf 3) Akadivar ni anambaz amwing katwishiningap kuya ku yikumangan chisu chawonsu mulong yom kanang yikutwish kuyishiken. Chilakej, akutwish pamwing ap kuyel nakash. Akutwish kwikal nich kashinsh anch Yehova wij nawamp mashakamin mau ni ukat kusanger yom yisadiningau mulong wa kumwifukwil. Amakurump akutwish kuyikwash akadivar ni anambaz mudi inay chakwel atesha yikumangan, pamwing ap kusutil ku kuyikwash mu kusadin telefon ap kukwat program wa yikumangan mu maband.

^ [2] (paragraf 3) Tal mushet ulondina anch “ Mayingishin ma Kukumangan ku Yikumangan.”