Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 4 , 2016

Mudimu Wey wa Kulejan Udi Mudi Maum?

Mudimu Wey wa Kulejan Udi Mudi Maum?

MUDIMU wetu wa kulejan ukwet usey nakash. Pakwez, kadiap muntu win mwawonsu tukata kulej wijing mwamu. Ap anch antu akatining kutesh yom yilondinay Bibil, kakatap kamu kwiyovu chisu chawonsu anch chiding cha usey kwilej Dizu dia Nzamb niyetwetu.

Tal chilakej cha Gavin. Wakumanganang ku yikumangan mu Chot cha Want, pakwez kakatap kwilej Bibil. Gavin urumburil anch wading wij yom yikemp piur pa Bibil, pakwez kakatap anch antu akwau niyawiy ijika mwamu. Wovang wom anch chamwamu akumulej andama mu relijon winiwa, ni kakatangap kumurumbangesh. Utongin nchik? Chading chiswapel kumukwash Gavin? Tutongin pa yibudikin yiwamp yikutwishay muntu kwikal nich kusutil ku yom yilejinay mu Bibil. Yehova wayileja in Isarel anch: “Mazu mam madja mudi maum, mudi ruval unakina pakemp pakemp pa masuku matalel.” (Kuvurik Yijil 31:19, 30; 32:2) Komb el twilejany yom yimwing piur pa maum ni tufanikeshany nich mudimu wetu wa kulejan chakwel tutwisha kamu kuyikwash ‘antu a mitapu yawonsu.’—1 Timote 2:3, 4.

 MUTAPU IK UKUTWISHA MUDIMU WETU WA KULEJAN KWIKAL MUDI MAUM?

Maum madutining. Maum madiokiling pakemp pakemp ku chitosh ni makat kudja mudi manans ma mem. Mutapu ik ‘udjila mazu ma Yehova mudi maum’? Walonda nau antu end mu mutapu uwamp ni witudishina. Tukat kumwimburij ndiy anch twalimish yitiyij ya antu akwau. Tuyikasikeshining antu inay kutong ayinau ni ikwatina mipak yau ayinau. Anch twayimekeshin mikadil yiney, akwitiy yom tuyilejina, ni mudimu wetu wa kulejan ukuya kamu kurutu.

Maum makat kulet chitalosh. Mudimu wetu wa kulejan ukutwish kuyipizurish antu akwau anch twatond mitapu kushalijan ya kusal chakwel tuyikwasha ileja yom yivud piur pa uyakin. Mukadivar utazukinau anch Chris, wamufundisha Gavin kapamp ka kusambish Bibil, chad kamushindinap anch ching wilej. Pakwez, wasadina mitapu kushalijan mulong amukwasha Gavin chakwel ileja nend Bibil mu mutapu uwamp. Chris wamuleja Gavin anch kudi rusangu rikweta usey risambidinau mu Bibil ni anch wilej piur pa rusangu riner ukutwish kwijik usey wa kukumangan. Kupwa, Chris urumburil anch uprofet udia mu Bibil wamukwasha kamu pakampwil kwijik anch Bibil udi wakin. Mudi yibudikin, ambamba nakash piur pa mutapu wawanyina uprofet. Mambamb minam ma mukwasha kamu Gavin, ni witiyija kwilej Bibil.

Maum makwet usey mu mwom. Mu chishipu, chisu cha chirungul mu Isarel ruval kanakangap angond avud. Anch kwaburen chitosh chidiokila ku maum, mitond yikat kuwum. Yehova watakela kulond anch mu machuku metu kukez kwez chang chikuyiletisha antu impu ‘yakutesh dizu dia [Yehova].’ (Amos 8:11) Washilamu anch azizidilau many akez kwikal ‘mudi maum madiokila kudi [Yehova]’ palejenau rusangu riwamp ra Want, payikwashinau kudi “amikoku akwau.” (Mika 5:7; Yohan 10:16) Rusangu tulejena didi ditenchik dia yom ya Yehova yipanina kudi antu akweta impu ya uyakin. Ov, tukwatining rusangu riner nich usey?

Maum madi chiyukish chidiokila kudi Yehova. (Kuvurik Yijil 33:13) Mudimu wetu wa kulejan ukutwish kwikal chiyukish, ap chipan kudi antu akata kwitiy. Dilejan dia Bibil diading chiyukish kudi Gavin mulong diamukwasha kutan yakul yawonsu ku yipul yend. Waya kurutu nakash, watambula dibatish ni katat ukwet musangar wa kulejan rusangu ruwamp ra Want pamwing ni mukajend Joyce.

Atuman a Yehova apalangeshin rusangu ruwamp ra Want pa mangand mawonsu

KWAT MUDIMU WEY WA KULEJAN NICH USEY

Kwisikej mudimu wetu wa kulejan ni maum kukutwish kwatukwash twijika anch usu wetu utusadina mulong wa kwipan mu mudimu wa kulejan udi wa usey. Mutapu ik? Dinans ni dinans dia mem didjilinga dikwashin pakemp, pakwez anch manans minam ma mem mikal mavud makutwish kutalesh chom kanang. Chilik chimwing kand, yom tusadininga mu mudimu wa kulejan yikutwish kumekan mudi yidi yikemp kudi etu. Pakwez, chibudikin chikwikal anch twambomb usu wa mamiyilon ma atushalapol a Yehova, uman aupanin “ku michid yawonsu.” (Mateu 24:14) Ov, mudimu wetu wa kulejan akuuyukish kudi Yehova bil anch kudi antu akwau? Mwaning, uruu wetu ukwikal mudi maum, uwamp ni wongojina ni wa usey mu mwom!