Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 4 , 2016

‘Muchim wa Kujijaman Ufanyidin Kuwanyish Mudimu’

‘Muchim wa Kujijaman Ufanyidin Kuwanyish Mudimu’

‘Muchim wa kujijaman ufanyidin kuwanyish mudimu chakwel wikalany antu akash awanyidina,wakad kuburen chom.’—JAKOBU 1:4.

MIMINY: 24, 7

1, 2. (a) Chom ik tukutwisha kwilejin ku kujijaman kwa Gedeyon nau amasalay end 300? (Tal chipich cha kwisambishin.) (b) Kukwatijan ni Luka 21:19, mulong wak kujijaman kudi kamu kwa usey?

TONGIN bil pa mar ni njit jiziyishena jading pakach pa amasalay a mu Isarel, atakelau kudi Nzwij Gedeyon, ni akankuny au. Gedeyon ni amasalay end ayilondula in Madian ni antu ayikwasha uchuku wawonsu piswimp ni ma kilometre 32! Bibil utulejin yom yashikena anch: “Gedeyon washika ku wit wa Yordan, wauk ushad pamwing ni antu yitot yisatu adingay nau.” Pakwez ading kand kal awina njit, ni adandamena kurish ni amasalay 15 000. Akankuny inay ayimesha in Isarel mar mu mivu yivud, chad in Isarel kaziyap. Chawiy lel, Gedeyon ni amasalay end adandamena kuyilondul akankuny au, ni kupwa ayiwina!—Ankalansambu 7:22; 8:4, 10, 28.

2 Chilik chimwing kand niyetu turishining ni mar ni njit jiziyishena. Akankuny etu adi Satan, mangand mend, ni kuburen kuwanyin kwetu. Amwing pakach petu arishin kal nau  akankuny inay mu mivu yivud. Nich ukwash wa Yehova, twawinin kal njit jivud. Pakwez, kand kal tuwina njit ja nsudien. Yisu yimwing tukutwish twaziy mulong wa kurish kwinoku. Ap tukutwish kuziy mulong wa kuchingel nsudien ya ditenchik dined diyimp. Yesu watubabesha anch tukurish ni yoziu ni mar makash mu machuku ma nsudien. Pakwez watuleja kand anch, anch twajijaman tukutwish kuwin. (Tang Luka 21:19.) Kujijaman chom ik? Chom ik chikutukwasha chakwel tujijamana? Yom ik tukutwisha kwilejin kudi antu ajijamana? Ni mutapu ik tukutwisha ‘kuwanyish mudimu wa kujijaman ufanyidina’?—Jakobu 1:4.

KUJIJAMAN CHOM IK?

3. Kujijaman chom ik?

3 Mu Bibil, kujijaman kurumburikinap kusu kupipej ap kulik mikadil yikash yitushikedina. Pakwez udi mutapu tukata kutong ni kwiyov piur pa yoziu. Kujijaman kutukwashining twikala atakamena, ashinshamena, ni ashimpishina michim. Buku umwing ulondin anch kujijaman udi mwikadil utukwashining kwikal ni ruchingej rikash ni kulik kuziy mulong wa yoziu tukweta. Kutukwashining twimana dang mu yoziu yikash pakad kuziy. Ni kutukwashining tushinshikina mutapu tukutwisha kuwin yoziu yiney,ni kushinshikin pa chitongijok chetu pa ndond pa kushinshikin pa mar metu.

4. Mulong wak tukutwisha kulond anch kujijaman kwimedin pa rukat?

4 Rukat rawiy ritubachikining tujijamana. (Tang 1 Korint 13:4, 7.) Rukat ritukwashin mu mitapu ik? Rukat mulong wa Yehova rawiy ritukwashining kujijaman yom yawonsu yitiyinay anch yishiken. (Luka 22:41, 42) Rukat mulong wa akadivar etu rawiy ritukwashining kujijaman kuburen kuwanyin kwau. (1 Pita 4:8) Rukat rawiy riyikwashining ambay a uruw kujijaman “mar” makata kuyishiken mu uruw ni rikwashining kukasikesh uruw wetu.—1 Korint 7:28.

CHOM IK CHIKUKUKWASHA CHAKWEL UJIJAMANA?

5. Mulong wak Yehova ndiy uwanyidina kutukwash chakwel tujijamana?

5 Mwita Yehova akwinkisha usu. Yehova ndiy ‘Nzamb ukata kupan kujijaman ni kongoj.’ (Rom 15:5) Ndiy amwinend wija nawamp mashakamin metu, yovil yetu, ni yisal yetu. Chawiy wij nawamp yom tuswirikedina chakwel tujijamana. Bibil ulondin anch: “Ukuwanyish rusot ra awiy akata kumwov wom, ukwov kudil kwau ni kuyipandish.” (Kuseng 145:19, TMK) Pakwez, mutapu ik ukwakulay Nzamb ku malembil metu chakwel atwinkisha usu wa kujijaman?

Yehova utwija nawamp, wij yom tukweta nich kuswir mulong wa kujijaman

6. Mudi mukaninay Yehova mu Bibil, mutapu ik ‘utulejinay mutapu wa kukusinik’?

6 Pitumwitining Yehova mulong atukwasha tujijaman, utukanin anch ‘ukutulej mutapu wa kukusinik.’ (Tang 1 Korint 10:13.) Mutapu ik usadiningay mwamu? Yisu yimwing ukutwish kukangesh yoziu. Pakwez yisu yivud, ukutwinkish usu chakwel ‘tutwisha kujijaman mu yom yawonsu ni kushimpish  muchim nich musangar.’ (Kolosay 1:11) Mulong utwij nawamp, wij manangu metu, yovil yetu, chawiy Yehova kakwitiyap ap pakemp anch mikadil yikash yitukangesh kwikal ashinshamena.

7. Let chilakej chimekeshina mulong wak tukweta kuswir kwa yakudia ya mu spiritu chakwel tujijamana.

7 El amboku yakudia ya mu spiritu yikasikesha ritiy rey. Mulong wak yakudia ya mu spiritu yidi ya usey? Chilakej: Mulong wa kukandam ku Mukandu wa Everest, muntu ukwet kuswir kwa ma kalori piswimp 6 000 pa dichuku. Winou wawiy uvud wa ma kalori maswirikedinay muntu. Mulong ajijamana ni ashika kuyilay, mwin kukandam winou ufanyidin kudia yom yivud yikweta ma kalori anch chitwishikin. Chilik chimwing kand, ni yetu tukwet kuswir kwa kudia yakudia ya mu spiritu chakwel tujijamana ni tuwanyisha maswir metu. Tufanyidin kukwat mupak wa kusutish chisu cha kwilej muntu panrend ni kukumangan ku yikumangan yetu. Yom yiney yawiy yikutwinkisha yom tuswirikedina mulong wa kulam ritiy retu rikala rikash.—Yohan 6:27.

8, 9. (a) Kukwatijan ni Job 2:4, 5, yoziu ik turishining nich ? (b) piurishina nich yoziu, yom ik yakad kumekan ufanyindina kutongin?

8 Vurik kushinshaman kwey kudi Nzamb. Pitudinga mu yoziu, kudi yom yivud yitufanyidina kusal kulik ching kushinshikin pa mar metu. Kushinshaman kwetu kudi Nzamb akutwish akupak. Mutapu tukutwisha kusal anch tudi mu yoziu ukumekesh anch tumumening Yehova mudi Ntakel wakin wa mangand mawonsu. Mutapu ik chidia mwamu? Satan, mukankuny wa Nzamb umubwambwidina, wamusaala Yehova masaal palonday anch antu amusadidin Nzamb mulong wa kutaninamu kwau. Satan walonda anch: “Yom yawonsu yikwetay muntu ukuyipan mulong wa kuchidij mwom wend.” Satan walonda kand piur pa Job anch: “Pakwez tandjek bil chikas chey, ushesha mafup mend ni mujimbu wend, chakin, ukukushing patok.” (Job 2:4, 5) Satan waswimpa palonday mwamu? Bwat! Kwasuta mivu yivud, amudiosha mwiur amudjibul pansh, wadandamena kuyifund atushalapol ashinshamena a Nzamb pakad kuziy. (Kujingunik 12:10) Nlel unou, Satan udandamedin kulond anch antu amwifukwidin Nzamb mulong wa kutaninamu kwau. Ukatining kutuman etu tulika winyikel wa Nzamb utetamina ni tulik kumusadin Nzamb.

9 Piumeninga mar chisu udia mu yoziu, pakish kutongin pa yom yakad kumekan. Satan ni ayilembil end awiy asadina yom yiney. Atadin amana yom ik yiukusala ni alondin anch ukuziy. Ku mutambu ukwau kudi Yehova, Yesu Kristu Mwant wetu, azizidinau many avumbukina ni tunan twa angel. Niyau amen usu usadina, pakwez awiy akat kukusanger! Asanger pakuman anch ukwet usu wa kijijaman ni wa kushal ushinshamena kudi Yehova. Ni kupwa ukutesh Yehova ukulejin anch: “Mwanam ikundj, ikal mwin manangu chakwel wez usangarish muchim wam, mwamu ni yam nikez katwish kumwakul muntu unkwisarumuna.”—Jinswir 27:11, NWT.

Yesu washinshikina pa difut diend dia kujijaman

10. Mutapu ik ukutwisha kumwimburij Yesu pa kushinshikin pa difut mulong wa kujijaman?

10 Shinshikin piur pa difut. Tong bil anch  uyil mu weny. Mwinjil uyila ukutan kajil kakwau kalemp kasul kal. Kwawonsu utadina kudi mididim. Pakwez, wij anch, ang wadandamen djat ni kushik kwisudiel kwa kajil kinak ukuman kand chitokish. Mwom ukutwish kwikal mudi weny winou. Ukutwish kuman mar makash ni ukutwish kand kuwin mar minam. Yesu niyend wiyova mwamu. Pamujipau pa mutond wa mar, amupipeja nakash ni wamana mar makash. Chom chinech chading chisu chimwing cha mar makash mu mwom wend! Chom ik chamukwasha chakwel ajijamana? Bibil ulondin anch washinshikina pa ‘musangar wadinga kurutu kwend.’ (Hebereu 12:2, 3) Yesu washinshikina pa difut dia kujijaman kwend, kutumbish dijin dia Nzamb chading chom cha usey nakash kudi ndiy ni kukwash usu wend wa kutakel. Ndiy wading wij anch yoziu yiney yading kwau ya ka chisu kakemp ni difut diend diading dia mwiur dikwikal dia chikupu. Nlel unou, yoziu turishina nich yikutwish yapandikan ni kwikal yisansena, pakwez tufanyidin kuvurik anch yidi kwau ya chisu chikemp.

‘ANTU AJIJAMANA’

11. Mulong wak tufanyidina kushinshikin pa yom yamanau ‘antu ajijamana’?

11 Tukatap kujijaman ayinetu. Mulong wa kuyikasikesh in Kristu ikala ajijamena mu yoziu yivud yidiokila kudi Satan, kambuy Pita wafunda anch: “Imanany dang mu ritiy, rishany nend, ijikany anch anamakwen in Kristu apalangena mu mangand akat kuman kand niyau mar ma mutapu umwing.” (1 Pita 5:9) Yom yamanau ‘antu ajijamana’ yitufundishin mutapu wa kushal ashinshamena, tukutwish kuwin ni atuvurishin anch akez kutufut mulong wa kushinshaman kwetu. (Jakobu 5:11) El amboku tushinshikinany yilakej yikemp. [1]—Tal mazu ma kwinsudien.

12. Chom ik twilejina ku chilakej cha asherub atekau mu chir cha Eden?

12 Asherub ading angel akweta ndond ya piur. Kupwa kwa Adam ni Ev kusal chitil, Yehova wayinkisha asherub chisend chisu panap pa divu. Chisend chinech chashalijana nich chadingau nich mwiur. Chilakej chau chikutwish kutufundish mutapu wa kujijaman patwinkishinau chisend chikash. Bibil ulondin anch Yehova ‘wateka asherub ku mutambu wa kwingangel kwa chir cha Eden ni mpak ya musamun ya mizwizu ya kasu yend yipay mulong wa kulam njil ya mutond wa mwom.’ [2] (Tal mazu ma kwinsudien.) (Disambishil 3:24) Bibil kalondinap anch asherub inay inana ap amana anch chisend chinech chayinkishau chisu chading cha usey. Kwovap usweral ap kulik chisend chinech. Pakwez, adandamena kuwanyish chisend chau djat ni papwila mudimu wau,  pamwing ap chisend chinech chadandamena kushik ni chisu cha Mabeb kupwa kwa mivu 1600!

13. Mutapu ik watwishay Job kujijaman mu yoziu?

13 Job muntu ushinshamena. Yisu yimwing ukutwish kwiyov nayimp mulong wa murund ney ap mwanamakwey ukutwisha kulond chom chikutwisha kukuziyish. Pamwing ap ukutwish kuyel nakash ap kuman mar mulong wa muntu kanang ukatina wafa. Chikalap nchik chom chikutwisha kukushiken, ukutwish kutan kwongoj mu chilakej cha Job. (Job 1:18, 19; 2:7, 9; 19:1-3) Job kijikap mulong wak wamanay mar nakash pakwez, kaziyap. Chom ik chamukwasha kujijaman? Chom chakusambish chading anch wading umukatin Yehova ni wakata kumusangaresh. (Job 1:1) Job wakata kumusangaresh Nzamb mu yisu yiwamp ni yiyimp. Chikwau kand, Yehova wamukwasha Job amana usu Wend kusutil ku kumulej piur pend ni piur pa yom yishimokishina Yatangay. Yawiy yamwinkisha Job kashinsh anch Yehova ukupwish mar mawonsu pa chisu chiwanyidina. (Job 42:1, 2) Chawiy chashikena. “[Yehova] wapwisha mar madingay nich Job ni wamuchirishina yom yadingay nich. [Yehova] wamuchirishina yom tupamp twaad kupandakan yadingay nich pakusambish.” Job “wafa mu upal wa mivu yivud.”—Job 42:10, 17, NWT.

14. Kukwatijan ni 2 Korint 1:6, kujijaman kwa Paul kwayikwasha antu akwau mutapu ik?

14 Kambuy Paul. Warishinap kal ni mar makash ap rupompat? Ov, udi mukurump wa chikumangen ap kalam wa munyingumuku wiyovila anch ukwatiken nakash mulong wa yisend yivud yiukweta? Anch chidi mwamu, chilakej cha Paul chikutwish kukukwash. Paul amupompata nakash ni wading ni kuyitongin nakash akadivar a mu yikumangen chisu chawonsu. (2 Korint 11:23-29) Pakwez, Paul kaziyap ni chilakej chend chayikasikesha antu akwau. (Tang 2 Korint  1:6.) Kujijaman kwey kukutwish kwayikwash antu akwau niyau chakwel ajijamana.

KUJIJAMAN ‘KUWANYISHIN MUDIMU’ KUDI EY?

15, 16. (a) Kujijaman kukuwanyish ‘mudimu’ ik? (b) Let yilakej yimekeshina anch tukutwish kulik ‘Muchim wa kujijaman uwanyisha mudimu.’

15 Mwin kwilej Jakobu amupepila pafunday anch: ‘Muchim wa kujijaman ufanyidin kuwanyish mudimu chakwel wikalany antu akash awanyidina, wakad kuburen chom.’ (Jakobu 1:4) Mutapu ik kujijaman kukutwisha kuwanyish ‘mudimu’ kudi etu? Piturishininga ni yoziu, tukutwish kuman anch tukwet kuswir kwa kushimpish muchim nakash, kwikal ni musangar ap kumekesh rukat. Anch twajijaman mu yoziu, tukwilej kumekesh mikadil yiney nakash ni mu mutapu winou tukumekesh kand untu wetu wa win Kristu.

Pitukata kujijaman mu yoziu, untu wetu wa win Kristu ukwikal uwamp nakash (Tal paragraf 15, 16))

16 Mulong kujijaman kukutukwash twikala in Kristu awamp, tufanyidinap kujip yijil ya Yehova mulong wa kupwish mar metu bwat. Chilakej anch ukat kurish nich yitongijok yiyimp ya kusal masandj, kangal walik choziu chinech chikushikena! Mulembila Yehova chakwel akukwasha ulika yitongijok yiney yiyimp. Ukwet anamakwey akata kukupompat? Kangal walik ap pakemp! Kwat mupak wa kudandamen kumusadil Yehova. Mudi chibudikin, ukukasikesh ruchingej rey mudiay Yehova. Vurik anch: Mulong wa kwitapil dilau kudi Nzamb, tufanyidin kujijaman.—Rom 5:3-5; Jakobu 1:12.

17, 18. (a) Let chilakej chimekeshina usey wa kujijaman djat ni kwinsudien. (b) Pitusejina piswimp ni disudiel, kashinsh ik tufanyidina kwikal nich?

17 Tufanyidinap kujijaman kwau mu chisu kanang, pakwez tufanyidin kujijaman kushik ni kwinsudien. Tong bil anch waat wasambish kal kujiy. Mulong wa kupand, antu afanyidin kwisay mulong wa kushik ku chikum. Muntu ukuziya pisayinay ukutwish kufa. Chilik chimwing kand muntu, ukulika kwisay mulong wa kushik ku chikum ukufa. Anch tukatin kwandam mwi ngand yisu, tufanyidin niyetu kudandamen kujijaman. El amboku twikal ni chitongijok cha chilik chimwing chadingay nich kambuy Paul palonday anch “Kitukuziyap.”—2 Korint 4:1, 16.

18 Mudi Paul, tukwet kamu kashinsh anch Yehova ukutukwash chakwel tujijamana djat ni kwinsudien. Paul wafunda anch: ‘Pakwez mu yom yiney yawonsu yikata kutushiken, etu tukat kuwin nakash mulong wa ndiy watukata. Mulong am nij nawamp, kwikil chom chikutwisha kutwauril etu ku rukat rend, ap rufu, ap mwom, ap angel a mwiur, ap ayilembil, ap ukash wa Sakudimban, ap yom yimekena, ap yom yikeza kumekan kurutu, ap chom chidia piur pa ngand, ap chom chidia pansh pa mangand. Kwikil chom chimwing chatangay Nzamb chikutwisha kutwauril etu ku rukat ra Nzamb ritukweta mulong wa Kristu Yesu Nsalejetu.’ (Rom 8:37-39) Chakin kamu, yisu yimwing tukutwish kuziy. Pakwez, el amboku tumwimburijany Gedeyon ni amasalay end. Aziya, pakwez kalikap.‘Adandamena kurish’!—Ankalansambu 8:4.

^ [1] (paragraf 11) Ukutwish kutan kand yom yikwau yikasikeshina yachirikidinau mulong wa kujijaman kwa antu a Nzamb a katat. Chilakej, mu Annuaire wa 1992, 1999, ni 2008 mudi raport ukasikeshina wa akadivar a mu mwingand ya Ethiopie, Malawi, ni Russie.

^ [2] (paragraf 12) Bibil kalejenap kwend uvud wa asherub inkishau chisend chinech.