Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 4 , 2016

Kwikal Ushinshamena Kuletin Dilau dia Nzamb

Kwikal Ushinshamena Kuletin Dilau dia Nzamb

“Iyilakejany in ritiy ashimpishina michim akata kutambul yom yashilayimu Nzamb.”—HEBEREU 6:12.

MIMINY: 3, 54

1, 2. Mulong ik warishay nich Jefite ni mwanend?

CHANGADIM uyil mau kumusankan tatukwend. Ukwet musangar nakash wa kuman tatukwend uchirikin kwi njit mukash. Kuwin kwend kujim kumubachikin mwan awanga ni aja maj nich musangar. Pakwez yom yasalay ni yalonday tatukwend yafanyina kumukashimwish. Wapola maswin mend ni watoya anch: “A! Mwanam mband! Wanletin kal mar nakash.” Kupwa, wamuleja mwanend anch washilamu kudi Yehova kushilamu kwafanyina kuswimp mwom wend chikupu. Kushilamu kwend kwarumburika anch mwanend kafanyinap kwachik ap kuval. Pakwez, kapamp kamwing wamwakula tatukwend nawamp, wamukasikesha kuwanyish kushilamu kwend kudi Yehova. Kwakul kwend kwamekesha anch wading ukwet kashinsh anch chom chawonsu chitay Yehova chading chom chiwamp. (Ankalansambu 11:34-37) Pamanay tatukwend ritiy rend, wibaza nakash mulong wendendiy mulong wamana  anch rusot rend rading ra kumusangaresh Yehova.

2 Jefite ni mwanend amuchingejina Yehova nakash ni mutapu wend wa kusal yom. Ading ashinshamen ap anch chading chiyikasikedin kusal mwamu. Ading akimbin kwikal ni dilau dia Yehova, ni anch diading dia usey nakash.

3. Mulong wak chilakej cha Jefite ni cha mwanend chikutwish kwikal cha ukwash kudi etu nlel?

3 Chiswapelingap chisu chawonsu kushal ashinshamena kudi Yehova. Tufanyidin ‘kurish nakash mulong wa ritiy.’ (Jud 3) Mulong wa kutukwash kusal mwamu, twilejany amboku mutapu warishay Jefite ni mwanend nich milong mu mashakamin mau. Mutapu ik washalau ashinshamena kudiay Yehova?

KUSHAL USHINSHAMENA CHIKALAP NCHIK YIBACHIKIN YA MANGAND

4, 5. (a) Chijil ik chayinkishau in Isarel kudi Yehova chisu chandamau mwi Ngand ya Kushilamu? (b) Kukwatijan ni Kuseng 106, yom ik yayishikena in Isarel mulong wa kubwambwil kwau?

4 Dichuku ni dichuku, Jefite ni mwanend mband afanyina kuvurik yibudikin ya in Isarel pamubwambwilau Yehova. Piswimp ni mivu 300, Yehova wayileja in Isarel kuyijip in kwifukwil a makasu mwi Ngand ya Kushilamu, pakwez, kamuziyinap. (Kuvurik Yijil 7:1-4) In Isarel avud asambisha kuyimburij in Kanan, ifukwilang anzamb a makasu ni ading ni mashakamin mayimp.—Tang Kuseng 106:34-39.

5 Mulong wa kubwambwil kwa in Isarel, Yehova kayikingap kudi akankuny nau. (Ankalansambu 2:1-3, 11-15; Kuseng 106:40-43) Chading chikasiken nakash kudi majuku mading mamukatina Yehova ni kushal ashinshamena mu mivu yiney ya mar makash. Pakwez, Bibil ujimbwil majin ma antu ading ashinshamena mudi Jefite ni mwanend mband, Elikana, Ana, ni Samwel. Akwata mupak wa kumusangaresh Yehova.—1 Samwel 1:20-28; 2:26.

6. Yibachikin ik ya mangand yidiaku nlel, ni chom ik tufanyidina kusal?

6 Mu machuku metu minam, antu akat kutong ni kusal yom mudi in Kanan. Ipanin nakash mu milong ya masandj, chisum, ni mu milong ya nfalang. Pakwez, Yehova utubabeshin patok. Ukimbin kutuking mudi mwakimbay kuyiking in Isarel ku yibachikin yiyimp. Ov, tukwilejin ku kurumbuk kwau? (1 Korint 10:6-11) Tufanyidin kusal usu wetu wawonsu mulong wa kwiyep yitongijok ya mangand. (Rom 12:2) Ov, tukusal usu wetu wawonsu mulong wa kusal mwamu?

JEFITE WASHALA USHINSHAMENA CHIKALAP NCHIK YAKAMISH

7. (a) Mar ik mamumeshau Jefite kudi anamakwend? (b) Chom ik chasalay Jefite?

7 Pa chirungu cha Jefite, ayimesha in Isarel mar kudi in Filistin ni in Amon mulong in Isarel amubwambwila Yehova. (Ankalansambu 10:7, 8) Kuwejinaku ku akankuny nau, Jefite warishang kand nau anamakwend ni antakel a Isarel. Mulong anamakwend ading akwet mukau ni ading amukisin, amwopata mwi ngand yend. (Ankalansambu 11:1-3) Jefite walika chakwel mwikadil wau uyimp kangal wayipish mikadil yend. Mutapu ik twija mwamu? Mulong amakurump a mwi ngand yend pamwilembinau anch ayikwasha, wasala kapamp kamwing. (Ankalansambu 11: 4-11) Chom ik chamubachika Jefite kusal mwamu?

8, 9. (a) Mbil ik yading mu Yijil ya Moses yamukwasha Jefite? (b) Yom ik yading yikweta usey nakash kudi Jefite?

8 Jefite wading mwin kurish njit mukash, ni wading wij nawamp rusangu ra in Isarel ni Yijil ya Moses. Mutapu wayisadilay Yehova antwend wamufundisha mbil ja Nzamb piur pa yom yiwamp ni yom yiyimp. (Ankalansambu 11:12-27) Jefite wasadila ronganyin riner mu mwom wend pakwatangay mipak. Wading wij nawamp chitongijok cha Yehova piur pa ujim ni kufundakesh ni mutapu ukimbiningay Nzamb anch antwend akatijana umwing ni mukwau. Chikwau kand, Yijil yamufundisha mutapu wa kuyisadil antu akwau, ap antu ading amukisina.—Tang Kubudik 23:5; In Levi 19:17, 18.

9 Chilakej cha Josef chamukwasha Jefite. Wafanyina kwilej mutapu wayimekishinay Josef anamakwend ranaken ap anch amukisa. (Disambishil 37:4; 45:4, 5) Kutongin piur pa chilakej chinech kwamukwasha Jefite kusal mu mutapu umusangareshina Yehova. Yom yamusadinau kudi anamakwend yamunenganesha kamu Jefite. Pakwez, kurish mulong wa dijin dia Yehova ni mulong wa antwend kwading kwa usey nakash mu yitongijok ya Jefite. (Ankalansambu 11:9) Wakwata mupak wa kushal kamu ushinshamena kudi Yehova. Mwikadil winou waletisha yiyukish yidiokila kudi Yehova, kudi ndiy ni kudi in Isarel.—Hebereu 11:32, 33.

Tufanyidinap kulik yovil yiyimp yitukangesha kumusadin Yehova

10. Mutapu ik ukutwisha mbil ja Nzamb kutukwash kusal yom mudi in Kristu nlel?

10 Chom ik tukwilejina ku chilakej cha Jefite? Chom ik tukusala anch akadivar netu in Kristu aturumbukin ap anch twiyov anch katusadidinap nawamp? Tufanyidinap Kulik yovil yiyimp yitukangesha kumusadin Yehova. Kangal kulik kuya ku yikumangan ya win Kristu ap kusutish chisu pamwing ni antu a mu chikumangen. El amboku tumwimburijany Jefite ni tumuziyilany Yehova. Chinech chikutukwash kuwin milong tukweta mwamu niyetu tukwikal chilakej.—Rom 12:20, 21; Kolosay 3:13.

KWIPAN KWA KWIKATIN KUMEKESHIN RITIY RETU

11, 12. Kushilamu ik kwasalay Jefite, ni chinech charumburika ik?

11 Jefite wading wij anch wading ukwet kuswir kwa ukwash wa Nzamb mulong wa kuyikwol in Isarel mu makas ma in Amon. Washilamu kudi Yehova anch ang wamukwash chakwel awina, wafanyina kulambul mudi “yakupesh ya kwosh” muntu wa kusambish wa mu chikumbu chend ukweza kumwak pakuchirikay kwi njit. (Ankalansambu 11:30, 31) Chirumburikin ik?

12 Yehova ukisin kulambul antu, chawiy twij anch Jefite kamwoshap muntu. (Kuvurik Yijil 18:9, 10) Mu Yijil ya Moses, mulambu wa kwosh wading chipan cha  pakampwil chapanangay muntu kudi Yehova. Chawiy lel, chirumburikin anch Jefite wafanyina kupan kudi Yehova muntu wafanyina kusadin ku dizang mu mwom wend wawonsu. Yehova wamutesha Jefite ni wamukwasha kuwin njit. (Ankalansambu 11:32, 33) Pakwez nany wafanyinay Jefite kupan kudi Yehova?

13, 14. Mazu ma Jefite madia mu Ankalansambu 11:35 mamekeshin ik piur pa ritiy rend?

13 Tongin piur pa yom yilondinau kwinsambishil kwa mutu wa mulong winou. Pachirikay Jefite kwi njit, muntu wa kusambish weza kumwak wading mwanend changadim mukatish, mwanend umwing! ov, Jefite, wafanyina kwikal ushinshamena ku kushilamu kwend? Ov, wafanyina kupan mwanend changadim kudi Yehova mulong asadina ku dizang mu mwom wend wawonsu?

14 Chikwau, mbil yading mu Yijil ya Nzamb yafanyina kumukwash Jefite kutond nawamp. Pamwing ap wavurika mazu madia mu Kubudik 23:19, mayilejang antu a Nzamb kupan yom yau ya usey kudi Yehova. Yijil yalonda kand anch muntu washilamu kudi Yehova, “kangal ndiy wez wapipej dizu diend, bwat, pakwez ukez kasal yom yawonsu mudi [mwalonday] ku kan kwend.” (Kuchind Michid 30:2) Mudi mwin kushinshaman Ana, wadingaku pa chirungu chend, Jefite wawanyisha kushilamu kwend, ap anch wading wij kurumburik kwa chom chinech kudi ndiy ni kudi mwanend. Mulong mwanend wafanyina kusal ku dizang, kafanyinap kuval. Chawiy, kwadingap muntu wafanyina kuswan dijin dia Jefite ni kuswan ngand. (Ankalansambu 11:34) Chikwau kand, Jefite walonda nich kushinshaman anch: “Nachipil kal kurutu [kwa Yehova], chawiy kinikutwishap kand kuchirish kuchip kwam.” (Ankalansambu  11:35) Yehova witiyija mulambu ujim wa Jefite ni wamuyukisha. Niyey ukutwish kwikal ushinshamena mudi mwadingay Jefite?

15. Kushilamu ik kusadinau antu avud pakach petu, ni mutapu ik tukutwisha kumekesh kushinshaman?

15 Anch twapan mwom wetu kudi Yehova, tukat kushilamu anch tukusal rusot rend ap anch kwashiken milong kanang. Twij anch chiswapelingap kulam kushilamu kwetu. Pakwez, mutapu ik tukusala anch atulej kusal chom kanang chitwakad etu kukat? Anch twawin yovil yetu ni twamuziyin Nzamb kwa kwikatin, tumekeshin anch tushinshamen mu kushilamu kwetu. Kwipan kwetu kukutwish kwikal kwa mar, pakwez, yiyukish ya Yehova yiding chisu chawonsu yijim. (Malakiy 3:10) Pakwez chidi nchik piur pa mwan mband wa Jefite? Mutapu ik wasalay mu kushilamu kwa tatukwend?

Mutapu ik tukutwisha kumekesh ritiy mudi ra Jefite ni ra mwanend changadim? (Tal paragraf wa 16, ni wa 17)

16. Mutapu ik wasalay mwan changadim wa Jefite piur pa kushilamu kwa tatukwend? (Tal chipich cha kwisambishil.)

16 Kushilamu kwa Jefite kwading kushalijadin ni kwa Ana. Ana washilamu kumupan mwanend Samwel mulong wa kusadin ku dizang mudi Nazir. (1 Samwel 1:11) Mwin Nazir amwitiyijang kwatan ni kwikal ni an. Pakwez mwan changadim wa Jefite amupana mudi “yakupesh ya kwosh,” chawiy kafanyinap kwikal nich musangar wa kwachik ni wa kuval an. (Ankalansambu 11:37-40) Tong pa chinech! Wafanyina kamu kwachik kudi ikundj muwamp mwingand yiniya, mulong tatukwend wading uyitakedin in Isarel. Pakwez, wikala kashalapol wikepishina ku dizang. Mutapu ik wasalay changadim winou? Wamekesha anch mudimu wa Yehova wading pa ndond yakusambish pamulejay tatukwend anch: “Sal kwey kudi am mudi dizu diabudika mu kan mwey.” (Ankalansambu 11:36) Walambula maswir mend ma chivadik ma kwachik ni ma kuval an mulong wa kumusadin Yehova. Mutapu ik tukutwisha kwimburij mwikadil wend wa kwipan?

Mwan changadim wa Jefite wapana aswir mend ma chivadik ma kulik kwachik ni kuval an mulong wa kumusadin Yehova

17. (a) Mutapu ik tukutwisha kwimburij ritiy ra Jefite ni mwanend changadim? (b) Mazu madia mu Hebereu 6:10-12, makukasikeshin mutapu ik mulong wa kwipan kwey amwiney?

 17 Tunan twa ansand in Kristu amakundj nau amband ipanin kwa kwikatin kulik kwachik ap kwatan ap patondinau kulik kuval mu machuku minam. Mulong wak? Mulong akimbining kwipan mu kumusadin Yehova nakash. Chikwau kand, amapal etu avud akat kupan chisu chau chifanyidinau kusutish pamwing ni anau ap ijikurau. Pakwez, apanining chisu chau ni usu wau mu kumusadin Yehova. Amwing pakach pau akat kusal mudimu wa kutung ap kuya ku Shikol ya in Kulejan a Want ni akat kushemunik mulong wa kuya mu chikumangen chikweta maswir majim ma in kulejan. Akwau akat kwirijek mulong wa kutwal mudimu wa Yehova kurutu chisu cha Chivurikish. Kakutwishap wavuramen milambu yau ya rukat ya antu awonsu ashinshamena. (Tang Hebereu 6:10-12.) Chidi nchik kudi ey? Ukutwish niyey kwipan nakash mulong umusadina Yehova chipandakena?

MALEJAN IK TWILEJA KAL?

18, 19. Yom ik twileja kal mu Bibil piur pa rusangu ra Jefite ni ra mwanend changadim, ni mutapu ik tukutwisha kuyimburij?

18 Yom ik yamukwasha Jefite chakwel awina milong yend? Walika anch Yehova atakela kutond kwend mu mwom. Watonda kulik kwikal ubachikinau kudi antu adingay nend. Jefite washala ushinshamena ap chisu chamurumbukinau kudi antu akwau. Yehova wamuyukisha Jefite ni mwanend changadim mulong wa kwipan kwau kwa kwikatin ni wayisadina awonsu aad mulong wa kutwal difukwil diakin kurutu. Ap anch akwau alika kwau kusal yom yiwamp, Jefite ni mwanend changadim ashala kamu ashinshamena kudi Yehova.

19 Bibil ulondin anch: “Iyilakejany in ritiy ashimpishina michim akata kutambul yom yashilayimu Nzamb.” (Hebereu 6: 12) Elany amboku tumwimburijany Jefite ni mwanend changadim, pa kwijik anch ang twashal kamu ashinshamena Yehova ukutuyukish.