Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 4 , 2016

Kangal Kwiyandjik mu Mangand Maurokina

Kangal Kwiyandjik mu Mangand Maurokina

“Panany . . . kudi Nzamb yom yidia ya Nzamb.”—MATEU 22:21.

MIMINY: 33, 137

1. Mutapu ik tukutwisha kumuziyin Nzamb ni mant ma antu?

BIBIL utufundishin anch tuyiziyina antakel a mangand minam, pakwez utulejin kand anch tufanyidin yisu yawonsu kumuziyin Nzamb. (Midimu 5:29; Titus 3:1) Mutapu ik chiswapela? Yesu warumburila mbil yitukwashina kwijik nany tufanyidina kuziyin. Walonda anch tufanyidin kupan “kudi Kaisar yom ya Kaisar, ni kudi Nzamb yom yidia ya Nzamb.” [1] (Tal mazu ma kwinsudien.) (Mateu 22:21) Tupanining “kudi Kaisar yom ya Kaisar” patukata kuziyin ku yijil ya mant ma mangand, tuyilimishining antakel a mangand minam, ni tukat kulambul yitad. (Rom 13:7) Pakwez, anch ant a mangand minam atulej kusal yom yakad kukatay Nzamb, tukat kulik kusal yom yiney, ni tumekeshining kalimish chisu chawonsu.

2. Mutapu ik tumekeshina anch tulikin kwiyandjik mu milong ya politik ya mu mangand minam?

2 Mutapu umwing tukata kupan “kudi Nzamb yom yidia ya Nzamb” kuding kulik kwiyandjik mu milong ya politik ya mu mangand minam. Tuding pakach mu milong yiney. (Isay 2:4)  Kudiosh payilikinay Yehova ant inay kutakel, tukatap kuyibwambwil. Tukwandamangap kand mu yom ya mangand ap ya wan a ngand. (Rom 13:1, 2) Tukatap kupakish kuswimp mant ap kuyibachik antakel a chipolitik kusal chom kanang, ni tukatap kuvot mu mavot ma chipolitik ap kwikal in kusal politik.

3. Mulong wak tufanyidin kulik kwiyandjik mu milong ya mangand?

3 Kudi mayingishin mavud mamekeshina mulong wak Nzamb utulejin kulik kwiyandjik mu milong ya mangand. Diyingishin dimwing didi anch tukat kumwimburij Yesu walika kwikal “mu umwing nau in mangand.” Kiyandjikap mu milong ya politik ap mu milong ya njit. (Yohan 6:15; 17:16) Diyingishin dikwau didi anch tukwashin Want wa Nzamb. Mulong tukwashiningap mant ma an a antu, tukweting kom kishitwila patukata kulejan anch ching Want wa Nzamb wawiy ukupwisha milong yawonsu ya an a antu. Ma relijon ma makasu makat kwiyandjik mu politik, ni chom chinech chauril antu. Pakwez mulong tudi pakach, tuding mu umwing ni akadivar nau anambaz mu mangand mawonsu.—1 Pita 2:17.

4. (a) Mutapu ik twija anch chikukasikan kulik kwiyandjik mu milong ya mangand? (b) Mulong wak tufanyidin kwirijek kudiosh nlel mulong w kulik kwiyandjik mu milong ya mangand?

4 Tukutwish kushakam kwindond kwakadau antu kutuchingejin anch tukutwish kwandam mu milong ya politik. Pakwez, mutapu twashika kal kwinsudien kwa ditenchik dia Satan, milong yipandakena yikutwish kutushiken chakwel yitukangesha kushal pakach. Antu nlel unou adi “akad kwitiy jinkand” ni ‘akad kuyitongin antu akwau,’ ni adandamedin kamu kwaurok nakash. (2 Timote 3:3, 4) Akadivar netu amwing amana mar nakash mulong wa kuswimp kwa politik kwasadika mwingand yau. Chawiy tukweta kuswir kwa kwirijek katat mulong wa kushal pakach ap anch kwashiken milong yikash. El tushinshikinany yom yinying yitukutwisha kusal mulong wa kwirijek.

TONGIN PIUR PA MANT MA ANTU MUDI MUTONGINAY NZAMB

5. Mutapu ik utonginay Yehova piur pa mant ma an a antu?

5 Mutapu umwing tukutwisha kwirijek kasambish kamu katat mulong wa kulik kwiyandjik mu milong ya mant ma antu udi wa kutong mudi mutonginingay Yehova. Payitangay antu, Yehova kayinkishap usu wa kuyitakel antu akwau. (Jeremiy 10:23) Wayimana antu awonsu mudi dijuku dimwing. Pakwez mant ma antu makat kwaurol antu pa kulond anch ngand yau yipandaken kuwap nakash. Ap anch mant mameken anch madi mawamp, pakwez makutwishap kupwish milong yawonsu. Chikwau kand, akat kwikal akankuny a Want wa Nzamb, wasambisha kuyikel mu muvu wa 1914. Mu machuku ma kurutu, Want winou ukudiosh mant mawonsu ma pa mangand.—Tang Kuseng 2:2, 7-9.

Irijeka kudiosh nlel mulong wa kulik kwiyandjik mu milong ya mangand chikalap nchik yisu ya mar

6. Mutapu ik ufanyidina kuyiman antakel a mant ma an a antu?

6 Nzamb ulikin anch mant ma an a antu mikalaku mulong makutwish kulet chisambu ni kutenchik yom. Chinech chitukwashining  kulejan rusang ruwamp piur pa Want wa Nzamb. (Rom 13:3, 4) Nzamb utulejining kand anch tulembilang piur pa antu atakedina a mangand minam chakwel tumwifukwila mu chisambu. (1 Timote 2:1, 2) Anch katusadidinap mu mutapu uwamp, tukutwish kuyilej antakel a mangand minam chakwel atukwasha. Mwawiy mwasalay Paul. (Midimu 25:11) Ap anch Bibil ulondin anch Satan ndiy utakedina mant minam, pakwez kalondinap anch Satan ukat kumutakel muntu ukweta ulabu mu want panrend. (Luka 4:5, 6) Komb tufanyidinap kumwinkish muntu chitongijok cha kulond anch nyikel wa want kampand amutakedin kudi Djabul. Bibil ulondin anch tufanyidinap kuyiswingish antu akwau.—Titus 3:1, 2.

7. Yitongijok ik tufanyidina kulik?

7 Tukat kumuziyin Nzamb chidiap mulong wa kumukwash mukurump wa politik ap chisak cha politik, ap anch yitongijok yau ni manangu mau makutwish matukwash. Yisu yimwing, chikutwishap chatuswapel. Chilakej, tong bil anch antu abwambwil ku want uyimeshina mar nakash, pamwing nau Atuman a Yehova. Mwawiy, ap anch ukutwishap kwandam mu chisak cha ambwambol inay, ov, ukutong anch ambwambol inay ayingin nich ap akwet richingej anch akutwish? (Efes 2:2) Anch twakimb anch tulika kwandam mu milong ya mangand minam, tufanyidinap kutong anch chisak kapand chidi chiwamp kusutamu chikwau. Chinech chikumekan kukulond kwetu ni ku yom tusadina.

‘BABALANY’ NI ‘IKALANY AKAD MULONG’

8. Anch chikasiken kulik kwiyandjik mu milong ya mangand, mutapu ik tufanyidina “kubabal” ni ‘akad mulong’?

8 Njil ya kaad ya kulik kwiyandjik mu milong ya mangand yidi ya kushal ‘ababela mudi nnak ni ya kwikal akad mulong mudi atwinkudimb.’ (Tang Mateu 10:16, 17.) Tudi ‘ababela’ patukata kutong piur pa milong kurutu kwa chisu. Ni tudining ‘akad mulong’ pitulikining kwandam mu milong yikash ya mangand minam. El tushinshikinany yom yimwing ni tumanany mutapu tukutwisha kulik kwandam mu milong ya mangand minam.

9. Chom ik tufanyidina kubabel pitukata kwambamb ni antu akwau?

9 Mambamb. Tufanyidin kubabal nakash anch twatesh antu asambish kwambambin milong ya politik. Chilakej, anch tukat kulond nend muntu piur pa Want wa Nzamb, tufanyidinap kulond anch twitiyin ap twitiyinap yitongijok ya chisak cha politik kanang ap ya ntakel wa politik kanang. Pa ndond pa kwambambin yom yikimbinau kusal antu mulong wa kupwish milong, muleja mu Bibil mutapu Want wa Nzamb ukupwisha milong yiney chikupu. Anch antu akimb kutadikijan piur pa yom mudi, in kusal utun ap kudiosh madikaj, ufanyidin kuyilej chilondina Dizu dia Nzamb piur pa yom yiney ni mutapu usadina usu wa kusadin yom yiney mu mwom wey. Anch muntu walond anch chifanyidin kudiosh ap kuswimp yijil yimwing, tufanyidinap kwikal ku mutambu wend, ni tufanyidina kumushindin anch aswimpa chitongijok chend.

Fanikesh nich “mazu makin miwatesha” madia mu Bibil

10. Mutapu ik tufanyidina kwikal ni kashinsh anch twiyandjikinap mu milong ya mangand pitutadining ap kutang yom yipalangeshina jinsangu?

10 Yom yipalangeshina jinsangu. Yisu yimwing rusangu rimwing akat kurilond mu mutapu wa kukwash chikunku chimwing mu milong kanang. Chinech chidi chakin pakampwil mu jingand mukatau kutakel jinsang jinej kudi want wau. Anch jinsangu ja dirijek kapand ap a tubambansang ikal ku mutambu wau, tufanyidin kubabal chakwel kangal  tutonga mudi mutapu utonginau awiy. Chilakej iyipula amwiney anch, ‘Nikwet musangar wa kuyitesh in kukwat jinsang amwing mulong nitiyijin yilondinau piur pa politik?’ Mulong wa kukukwash ulika kwiyandjik mu yom ya mangand minam, likang kutal ap kutang yom yivud yilondina ching milong ya politik. Kimb kutang ching yom yakad kukasikesh chikunku kapand. Ni yisu yawonsu fanikeshang yom uteshina nich “mazu makin miwatesha” madia mu Bibil.—2 Timote 1:13.

11. Mutapu ik chikutwisha kutukasiken kulik kwiyandjik mu milong ya mangand chisu tumena anch yom tukweta yidi ya usey kudi etu?

11 Yom ya kumujimbu. Anch nfalang ni yom tukweta yikwet usey nakash kudi etu, tukutwish kuman anch chidi chikash kudi etu kulik kwiyandjik mu milong ya mangand. Kupwa kwa muvu wa 1970 Atuman avud a mwingand ya Malawi asha yom yawonsu yadingau nich mulong alika kwandam mu chisak cha politik kampand. Cha ushon, amwing kashap kwau yom yau yadingau nich. Nambaz utazukinau anch Ruth wavurika ni walonda anch, “Antu amwing aya mwi ngand yikwau ni yetwetu, pakwez asambisha kand kwandam mu chisak cha politik ni achirika mwingand yetu mulong awiy kakatap kwau kwikal ni mashakamin mayimp mu kapony wa in kuchin njit.” Pakwez antu a Nzamb avud kakatap kusal mwamu. Kakatap kwiyandjik mu yom ya mangand, ap anch akwet nfalang jikemp ap ashadisha yom yau.—Hebereu 10:34.

12, 13. (a) Yom ik yikatay Yehova kutong piur pa antu? (b) Mutapu ik tukutwisha kulond anch twasambish kwibaz piur pa ngand yetu?

12 Kwibaz. Yisu yivud antu akat kwibaz kamu ni kutongin piur pa ulombu wau wa chikit, muchid, yaku yau, musumb wau ap ngand yau. Pakwez Yehova kakutongangap anch muntu kampand ap chisak cha antu chidi chiwamp kusutamu chikwau. Kudi ndiy, etu awonsu tudi kwetu mutapu umwing. Mwawiy, Yehova watusala etu awonsu mu mitapu kushalijan umwing ni mukwau, ni tukutwish kusanger ni kukat mitapu yiney. Kakimbinap anch tulika yaku yetu ya kwol kwetu. Pakwez, kakatinap kand anch tutonga anch tudi awamp nakash kusutamu antu akwau.—Rom 10:12.

13 Tufanyidinap kwibaz mulong wa ngand yetu ap mulong wa muchidi wetu ni kutong anch yiwapin nakash kusut ngand yikwau. Anch tutongin mwamu, chikutukasiken nakash mulong wa kulik kwiyandjik mu milong ya mangand minam. Chom chinech chasadika mu mivu chitot yakusambish. Akadivar amwing in Hebereu kayisadinap nawamp adiaafu a in Grek. (Midimu 6:1) Mutapu ik tukutwisha kusal anch twasambish kumekesh mwikadil wa kwibaz? Anch mukadivar ap nambaz wa ndond yikwau wakwinkish chitongijok, ukutong kapamp kamwing anch, kunoku ‘Tusadining yom nawamp, ni walik chitongijok chinech? Anch mwawiy, vurik chiyul chinech cha usey chilondina anch: “Ikepishany, muntu ni muntu amumana mukwau mudi udi muwamp kumupandakanamu.”—Filip 2:3.

YEHOVA UKUKUKWASH

14. Mutapu ik utukwashina malembil, ni chilakej ik cha mu Bibil chimekeshina yom yiney?

14 Njil ya kasatu ya kulik kwiyandjik mu milong ya mangand yidi ya kumuchingejin Yehova. Lembil mulong wa spiritu utumbila,  ukutwisha kukwinkish kushimpish muchim ni kwitudish. Mikadil yiney yikukukwash anch mudi want wa mangand wasal chom chiyimp ap chakad kuwanyin. Mwita Yehova chakwel akwinkisha manangu chakwel wijika mashakamin madia makash mulong wa kulik kwiyandjik mu milong ya mangand. Mwita kand Yehova akukwasha kusal yom yitentamina pa mulong winou. (Jakobu 1:5) Akutwish kukutwal mu rukan ap kukupup mu mutapu ukwau mulong udi ushinshamena kudi Yehova. Anch mwawiy, lembil chakwel akwinkisha kutakaman mwamu, ukutwish kuyirumburil antu akwau patok mulong wak ukwiyandjikangap mu milong ya mangand. Ukutwish kwikal nich kashinsh anch Yehova ukukukwash chakwel ujijaman.—Tang Midimu 4:27-31.

Tongijokin pa maverse makutwisha kukukwash chakwel ulika kwandam mu milong ya mangand ni ma verse marumburila yom yiukutwisha kusanger pakampwil mwingand yisu

15. Mutapu ik ukutwishay Bibil kutukwash tulik kwiyandjik mu milong ya mangand? (Tal kand mushet ulondina anch “Dizu dia Nzamb Diakasikesha Yitiyij Yau.”)

15 Yehova watwinkisha Bibil mulong wa kutukasikesh. Tongijokin pa maverse makutwisha kukukwash chakwel ulika kwiyandjik mu milong ya mangand. Sal usu wa kutang maverse minam ni ma vurikang, mulong ma kukukwash ap anch ukwetap Bibil ndond yiudia. Bibil ukutwish kand kukasikesh richingej rey mu yom yilondinay Nzamb piur pa machuku ma kurutu. Tukwet kuswir kwa richingej riner mulong wa kujijaman mu mar. (Rom 8:25) Tond ma verse marumburila yom yiukutwisha kusanger pakampwil mwingand yisu, ni sal mudi udi mwinimwa.

TANINAMU MUDIAU ATUSHALAPOL ASHINSHAMENA A YEHOVA

16, 17. Yom ik tukutwisha kwilejin ku yilakej kudi atushalapol ashinshamena a Nzamb alika kwiyandjik mu milong ya mangand? (Tal chipich cha kwisambishil.)

16 Njil ya kanying yikutwisha kutukwash kulik kwiyandjik mu milong ya mangand kudi kutongin piur pa yilakej ya atushalapol ashinshamena a Yehova. Mu chisu chafundau Bibil antu avud ading atakamen, ni akwatang mipak ya manangu ya yikwashang kulik kwiyandjik mu milong ya mangand. Tong piur pa Shadirak, Meshak nend Abed nego alika kwifukwil mukish wading uumekeshina want wa Babilon. (Tang Daniel 3:16-18.) Rusangu riner ra mu Bibil riyikwashin atuman a Yehova  nlel kwikal atakamena ni kulik kwifukwil drapo wa mwingand mushichau. Yesu kiyandjikap mu politik ap mu milong yikwau yading yaurila antu. Wading wij anch chilakej chend chiwamp chikuyikwash in kwilej end. Walonda anch: ‘Takamanany! Am nawin kal mangand.’—Yohan 16:33.

17 Atuman a Yehova a mu chisu chetu chinech kakatap kwiyandjik mu milong ya mangand minam. Amwing pakach pau ayimesha mar nakash, ayiteka mu rukan ni ayijipa kand mulong ashala ashinshamena kudiay Yehova. Yilakej yau yikutwish kutukwash niyetu kwikal nich kutakaman. Mukadivar umwing wa mwingand ya Turquie walonda anch: “Franz Reiter wading nsand wajipau mulong walika kwandam mu chisak cha amasalay a Hitler. Mukand wamufundinay makwend uchuku kurutu kwa rufu rend wamekesha ritiy rikash nakash ni richingej rend mudiay Yehova, niyam nikimbin kulondul chilakej chend anch ampak mudi ndiy.” [2]—Tal mazu ma kwinsudien.

18, 19. (a) Mutapu ik ukutwishau antu a mu chikumangen chen kukukwash chakwel ulika kwiyandjik mu milong ya mangand? (b) Chom ik utongina kusal?

18 Akadivar nau anambaz mu chikumangen chen akutwish kukukwash chakwel ulika kwiyandjik mu milong ya mangand. Yileja amakurump katat kamu ajika milong ukweta. Akutwish kukwinkish yiyul yiwamp yidia mu Bibil. Chikwau kand, anch antu a mu chikumangen ijik milong yey mutapu uyidia, akutwish kukukasikesh. Yileja alembila mulong weyey. Pakwez niyetu tufanyidin kuyikwash akadivar netu ni kulembil mulong wa awiy. (Mateu 7:12) Mulong wa kutan list wa majin ma akadivar adia mu rukan, tal mu mutu wa mulong udia pa kapend ka jw.org ulondina anch “Témoins de Jéhovah Emprisonnés en Raison de leur Foi—par pays,” Pafundinau anch SALLE DE PRESSE > ACTUALITÉS JURIDIQUES. Tond majin makemp, ni mwita Yehova chakwel ayikwash akadivar nau anambaz inay ashala atakamena ni kushal ashinshamena kudi ndiy.—Efes 6:19, 20.

19 Mulong disudien diasej kal piswimp, mant ma mangand minam makutwish kamu kutubachik nakash chakwel twiyandjika mu milong yau. Chawiy chidi cha usey kudi etu kwirijek katat kamu mulong wa kulik kwiyandjik mu mangand minam maurokina!

^ [1] (paragraf 1) Yesu walonda piur pa mant pamujimbulay Kaisar. Pa chisu chinicha, Kaisar wading ntakel ukweta ulabu wa piur nakash.

^ [2] (paragraf wa 17) Tal buku les Témoins de Jéhovah—Proclamateurs du Royaume, paj wa 662, ni mushet ulondina anch “Wafa Mulong wa Katumb ka Nzamb” mu paj wa 150 wa buku Want wa Nzamb Wasambishin Kal Kuyikel!