Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 4 , 2016

 RUSANGU RA MWOM

A Ma Soeur Ashikena Kwikal A Nambaz In Kristu Akin

A Ma Soeur Ashikena Kwikal A Nambaz In Kristu Akin

KWASUTA mivu yivud, mwancham mband Araceli wajimana nakash ni wanleja nich dizu dia piur anch: “Kangal kand wanlondish. Nikatinap kutesh chom ap chimwing piur pa relijon wey. Mazu minam manyedisha nakash. Nikukisin!” Mazu mend manenganesha nakash. Katat nikwet mivu 91 nidandamedin kuvurik mazu minam. Pakwez mudi mulondina mu Mulej 7:8 anch “dipwishil dia mulong ukumanay muntu didi diwamp [kusutamu] disambishil.”—Felisa.

Felisa: Napamina mu dijuku diau atuzwendj mwi ngand ya Espagne. Dijuku diam diading dia in Katolik, twipana nakash mu milong ya relijon. Pakwez anamakwam 13 ading a mwimpel asadinanga mu egliz. Musanyend a maku wading mwimpel wafundishang ku shikol ya Katolik. Pafay mwimpel winou, Pape Jean Paul II ndiy wamuyukisha. Tatuku wading mwin kuchil yikung ni maku wading ndim. Twading an chinan yam nading mwan wa kusambish.

Pinadinga ni mivu 12, njit ja an angand jasambisha mwi ngand ya Espagne. Kupwa kwa njit, tatuku amuteka mu rukan, mulong amakurump a ngand kakatap chitongijok chend cha politik. Chamukasikena nakash maku kukimb yakudia yivud mulong wa kutudish etu awonsu. Chawiy lel, wayituma ancham ayangadim asatu, Araceli, Lauri, ni Ramoni, chakwel aya mu couvent ashakama pamwing nau a ma soeur mu musumb wa Bilbao. Kwawiy kwatanau ancham yakudia yivud.

Araceli: Pa chisu chinicha am nading ni mivu 14, Lauri wading ni mivu 12, ni Ramoni wading ni mivu 10. Twadingap pamwing ni dijuku dietu. Ku couvent twading ni mudimu wa kukomb ni kukorop. Pasuta mivu yaad, a ma souer atutuma mu couvent mujim wa Saragosse mulong wa kuyilam amapal. Twading ni mudimu ukash wa kukomb ni wa kukorop mwi mpish ni mudimu winou watuziyishanga nakash.

Felisa: Payau ancham mu couvent wa Saragosse, maku ni mantu wading mwimpel, akwata mupak  chakwel niyam niyilondula akwetu. Akimba kwintwal kulemp mulong wa nsand umwing wading winkatin. Natonga nakash mulong wa chisu nafanyina kusutish mu couvent mulong nading nimukatina Nzamb. Nayangang ku egliz dichuku ni dichuku ni nading nikatin kwikal mishoner mwin Katolik mudi mwadingay musanyam udia mu Afrique.

Couvent wa Saragosse mu Espagne (ku chikas cha kamaku) Bibil utazukinau anch Nácar-Colunga. (ku chikas cha katatuku)

Pakwez, nelap kutwish kusal yom yivud anch naya mu couvent. A ma soeur kankasikeshap kuya kusadin mwi ngand yikwau mulong wa kumusadin Nzamb, mudi munading nitongina. Kwasuta muvu umwing, nachirika kwol kwetu mulong wa kumutal mantu wading mwimpel. Namukwashanga kusal midimu ya mu chikumbu ni twalembilang pamwing nend mu kusadin Shapelet urel wawonsu. Nakatang kand kurijek yisalamb mu egliz ni kukukumwon ku yifatul ya Mariy ni ya “ansant.”

Araceli: Pinadinga mu Saragosse, nachipa machip kapamp ka kusambish mulong nikala ma soeur. Chawiy, a ma soeur akwata mupak wa kwingawuril nau ancham. Antwala ku couvent wa Madrid pakwez Lauri amutwala ku couvent wa Valence. Ramoni washala mu Saragosse. Mu Madrid, mwawiy nachipa machip mam kapamp ka kaad mulong wa kwikal ma soeur. Antu avud, mudi ansand a shikol ni amapal ezang kushakam ku couvent. Pakwez, kwading midimu yivud ya kusal. Am nasalanga ku hopital wa mu couvent winou.

Mashakamin mam mading kamu mudi ma soeur. Natonga anch twafanyina kusutish chisu chilemp mulong wa kutang Bibil ni kumwilej. Pakwez, naziya nakash mulong twasalap mwamu. Kwikil muntu ap umwing wasadinang Bibil ap wisambina piur pa Nzamb ni Yesu. Nileja yom yimwing mu Latin, nileja mashakamin ma “asant” a mu Katolik ni mutapu wa kumwifukwil Mariy. Pakwez yisu yivud, twasalang midimu yikash.

Nasambish kwinan ni kwov wom. Natonga anch nafanyina kukimb nfalang mulong wa kukwash dijuku diam pa ndond pa kusal mudimu mu couvent mulong wa kuyipitish antu akwau. Chawiy, namuleja mukurump wa a ma soeur piur pa mulong winou anch nakimba kudiokal kwam. Pakwez, wanfungina mu chikumbu. Watonga anch chisal chinech chawiy chikwinkangesha kuya.

A ma soeur ambudisha pol, pakwez pijikau anch nikimbin kudiokal mu couvent ampatina kand mu chikumbu. Kupwa kwa kusal mwamu tupamp tusatu, anleja anch nikutwish kudiokal mu couvent anch nafund mazu am: “Nadiokal kal mulong nikatin kuya kumusadin Satan pa ndond pa kumusadin Nzamb.” Nova kuyip nakash. Chakin kamu nakimba kudiokal pakwez, nakatap kufund mazu minam. Kupwa, nalonda anch nikwambamb ni mwimpel ni kumulej yom yisadikina. Amwinkisha bishop mbil ya kwinchirish ku couvent wa Saragosse. Kupwa  kwa angond akemp angitiya kudiokal. Kupwa kwa machuku, Lauri ni Ramoni niyawiy adiokala mu couvent.

BUKU WATWAWURILA

Felisa

Felisa: Kusut kwa machuku, angata ni twashakama mu musumb wa Cantabria mwi ngand ya Espagne. Nayangang chisu chawonsu mu egliz. Diarubing dimwing, mwimpel wajimana nakash ni walonda ni dizu dia piur anch “Talany buku winou!” Watuleja buku ulondina anch La vérité qui conduit à la vie éternelle. Walonda kand anch, “Anch muntu ukwet buku winou, anginkishay ap aya akamudjibula kulemp!”

Nadingap ni buku winou, pakwez nakimba kumwikal nich. Kupwa kwa machuku makemp, amband aad eza kwol kwam. Amband inay ading Atuman a Yehova ni anginkisha buku winou. Namutanga uchuku winiwa. Pachirikau amband inay angipula anch nikatin kwilej nau Bibil, am nitiya.

Buku wa Uyakin

Nakata yisu yawonsu kumusangaresh Nzamb. Kupwa nileja uyakin piur pa Yehova ni nasambisha kumukat nakash. Nakata kuyilej antu akwau piur pa Yehova. Natambula dibatish mu muvu wa 1973. Chawiy, nasambisha kusal usu wa kuyilej anamakwam uyakin. Pakwez, mwancham Araceli, wadandamena kwinlond anch yom nitiyija yading ya makasu.

Araceli: Mulong ansadina mu mutapu uyimp pinadinga mu couvent najimana ni nasangarap mulong wa relijon wam. Pakwez nadandamena kuya mu egliz Diarubing ni nalembilang shapelet dichuku ni chikuchu. Nakimba kutesh nawamp Bibil ni namwita Nzamb chakwel ankwasha. Kupwa Felisa wanleja yom yilejay. Wasangara kwilej piur pa yom yitiyijay ni natonga anch wading chizarik. Nitiyap yom yalonday.

Araceli

Kupwa, nachirika mu Madrid mulong wa kusal mudimu ni angata. Kupwa kwa mivu, namana anch antu akata kuya mu egliz chisu chawonsu kashichingap kwau kukwatijan ni malejan ma Yesu. Chawiy, nalika kuya mu egliz. Nitiyijap kand mu “ansant” ap mu karung ka kasu ni nitiyap kand anch amwimpel akutwish kulikishin yitil. Nasambisha kudiosh yifatul yawonsu nading nich ya ma relijon. Kinadingap nija anch nading ni kusal yom yiwamp. Nova kuziy, pakwez nadandamena kumulembil Nzamb  anch: “Nikatin kukwijik. Nkwashaku” Nivurikin chisu chakokalau Atuman a Yehova ku chis mu chisu chilemp pakwez, nazurilap. Nadingap ni kuchingejin relijon ap umwing.

Yayam Lauri wading ushich mu France, ni Ramoni wading ushich mu Espagne. Mu muvu wa 1980, asambish kwilej Bibil nau Atuman a Yehova. Nikwet kashinsh anch mudi Felisa, kakwijikap anch ilejin yom ya makasu. Kupwa, twamanijana ni Angelines, wading mutej nam ni twashikena ku kwikal arund a piswimp. Ni ndiy wading Kaman wa Yehova. Angelines ni nfumwend angipula anch nikukat kwilej nau Bibil. Ajingunina anch yitongijok yam ni mutapu wam wa kulond wamekesha anch nikatinap relijon, pakwez nikatin kwijik yom piur pa Bibil. Kupwa nayileja anch: “Chiwamp. Nikwitiy kwilej nen anch nasadin Bibil wam!” Nading ni Bibil utazukinau anch Nácar-Colunga.

BIBIL WATUTEKA MU UMWING

Felisa: Pinatambula dibatish mu muvu wa 1973, mu ul wa Santander mu musumb wa Cantabria mwading Atuman uvud piswimp ni 70. Twayanga mu weny mulong wa kuyilej antu awonsu mu ul ujim wading ni tumal yitot. Chawiy twayanga ni motak mu ul ni ul.

Pasuta mivu, nileja Bibil ni antu avud, ni antu 11 pakach pau atambula dibatish. Antu awonsu nileja nau ading in Katolik. Nafanyina kushimpish muchim mulong wa awiy. Mudi am, antu inay ading ni kuswir kwa chisu chakwel ijika anch yom yitiyijau yading ya makasu. Nijika anch ching Bibil ni spiritu utumbila wa Yehova yawiy yom yikutwisha kumukwash muntu chakwel aswimpa yitongijok yend ni atesha kurumburik kwa uyakin. (Hebereu 4:12) Nfumwam, Bienvenido, mpurish, watambula dibatish mu muvu wa 1979 ni maku wasambisha kwilej Bibil kurutu afa.

Araceli: Pinasambisha kwilej Bibil nau Atuman a Yehova, niyova anch nafanyinap kuyichingejin. Pakwez, pasuta chisu, nasambisha kwov mu mutapu ukwau. Atuman a Yehova kakatap ching kufundish Bibil pakwez akat kuziyin yom yifundishinau. Ritiy ram kudiay Yehova ni mu Bibil rapama ni nova musangar nakash. Amutej nam amana kuswimp kwinoku ni angela anch “Araceli, dandamen kulondul njil yiwatonda kal!”

Nivurikin malembil, “Wajikit Yehova, mulong wanlikap ni wanginkisha mitapu yivud chakwel nitana yom nading ni kukimb—ronganyin rakin ra mu Bibil.” Namwita kand yayam Felisa chakwel anlikishinaku mulong wa yom yiyimp namulonda. Kudiosh pinapa, nasala usu wa kulik kuyovish antu akwau ujim, tusangaredin kwisambin piur pa Bibil. Natambula dibatish pinadinga ni mivu 61 mu muvu wa 1989.

Felisa: Katat nikwet mivu 91. Nfumwam wafil kal, nitwishinap kusal yom yivud mudi pasak. Pakwez, nidandamedin kutang Bibil dichuku ni dichuku, nikat kuya ku yikumangan ni mu mudimu wa kulejan anch chitwishikin.

Araceli: Nikatining kwisamb ni amwimpel nau a ma soeur awonsu piur pa Yehova, pamwing ap mulong niyam nading ma soeur. Nasangera kwisamb nau amwing pakach pau ni avud atambula ma buku ni magazet. Nivurikin mwimpel umwing. Kupwa kwa kwambamb nend mu yisu yikemp, witiya yom namuleja. Kupwa wanleja anch: “Kwisu nikuya chipim cham ech? Yom ik yikulondau akwetu tudia nau mu couvent ni anamakwam?” Namwakula anch: “Yom ik yikulonday Nzamb?” Wamana anch nading nich kashinsh ni namana anch wading ni ushon. Pakwez, chamekena anch kadingap ni kuswir kwa kuswimp.

Nivuramedinap mazu manlejay nfumwam anch wakata kuya ku yikumangan pamwing niyamam. Pezay kapamp ka kusambish ku yikumangan wading ni mivu 80 kudiosh pinipa kashalangap kand ku yikumangan. Wasambisha kwilej Bibil ni wasambisha kand kulejan. Nivurikin yom yiwamp yitwasala nend mu mudimu wa kulejan. Wafa angond aad kurutu atambula dibatish.

Felisa: Pinasambisha kumusadin Yehova, ancham amband asatu ankisa. Kupwa, itiya niyawiy uyakin. Yawiy yom yimwing yiwamp yanshikena mu mwom wam. Kupwa, twasangera kusutish chisu pamwing mu kwisambin piur pa Nzamb wetu mukatish Yehova ni piur pa Dizu diend! Chawiy, twikala etu awonsu in kumwifukwil Yehova. *

^ par. 29 Araceli ukwet mivu 87, Felisa ukwet mivu 91, ni Ramoni ukwet mivu 83. Awonsu adandamedin kumusadin Yehova nich kushinshaman. Lauri wafa mu muvu wa 1990, pakwez washala ushinshamena kudi Yehova.