Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 3 , 2016

Yehova Uyitakedin Antu End Mwinjil Yitwadina ku Mwom

Yehova Uyitakedin Antu End Mwinjil Yitwadina ku Mwom

“Njil ya kuya yawiy ey. Yangany mwinimwa.”—ISAY 30:21.

MIMINY: 32, 48

1, 2. (a) Antu avud, apandishin mwom yau ku kubabesh ik? (Tal chipich cha kwinsambishil.) (b) Antu a Nzamb akwet wintakel ik ukutwisha kupandish mwom yau?

“IMAN, TAL, TESH.” Mazu minam amafunda pa mabay matekau pa ndond yisankanijadina njil ya motak ni ya train mu Amerik wa Kwiyand kwasutin kal mivu 100 ni kusut. Mulong wak? Mulong kangal akonga motak kudi train pakusutay mau nakash pa mansang minam. Kulimish kubabesh kwinoku kupandishin mwom ya antu avud.

2 Yehova wasala chom chimwing chiwamp chisutinamu kubabesh kwinoku. Uyitakedil antwend chakwel atwisha kutambul mwom wa chikupu ni kwiyep ku ubaj. Yehova udi mudi kafung ukweta rukat ukata kuyitakelang ni kuyilam amikoku end chakwel kangal endina mwi njil ya ubaj.—Tang Isay 30:20, 21.

YEHOVA UKAT KUYITAKEL ANTWEND CHISU CHAWONSU

3. Mutapu ik ulondwilau antu awonsu njil ya rufu?

3 Kudiosh kwi nsambishil ya rusangu ra muntu, Yehova ukat kuyinkish antu mbil jovikena nawamp ap wintakel. Chilakej, mu chir cha Eden, Yehova wapana mbil ja patok jafanyina kuyitakel antu ku mwom wa chikupu ni ku musangar. (Disambishil 2: 15- 17) Pakwez, Adam ni Eve alika wintakel wa Tatukwau wa rukat. Eve witiya yom yamulejau kudi nnak, ni Adam watesha yom yamulejau kudi mukajend. Nich chibudikin ik? Awonsu aad amana mar ni afa pakad ruchingej. Chikwau kand, mulong wa kubwambwil kwau, antu awonsu alondula njil yiney, njil yitwadila ku rufu.

4. (a) Mulong wak wintakel usu wading uswirikedin kupwa kwa Mabeb? (b) Mashakamin masu minam, mamekesha nchik chitongijok cha Nzamb?

4 Nzamb wamwinkisha Nowa wintakel mulong wa kupandish mwom ya antu. Kupwa kwa Mabeb, Yehova wayileja anch alika kudia ap kuna mash. Mulong wak? Yehova wayileja antu kudia mbij. Mulong wa mashakamin masu minam, antu afanyina kulondul wintakel winou usu ulondina anch: “Ching kusu kangal kwez kudia mbij jikweta mwom, charumburik anch mash mau.” (Disambishil 9:1-4) Ku chijil chinech twilejin chitongijok cha Nzamb piur pa mwom, anch mwom yawonsu yidi yendendiy. Udi Sakatang ni utwinkishin mwom, chawiy ukwet usu wa kututekin yijil piur pa mwom wetu. Chilakej, walonda anch muntu kafanyidinap kumujip mukwau. Nzamb umen mwom ni mash anch yidi yom yitumbila ni ukumupup muntu win mwawonsu ukuyisadina nayimp.—Disambishil 9:5, 6.

5. Yom ik tukwileja katat, ni mulong wak?

5 Kupwa kwa machuku ma Nowa, Nzamb wadandamena kuyitakel antwend. Mu mutu wa mulong winou, tukwilej yilakej yimwing yikemp yimekeshina mutapu wayitakelay. Kuchirikin yom yiney kukukasikesh mupak wetu wa kulondul wintakel wa Yehova mwi ngand yisu.

MUCHID USU, WINTAKEL USU

6. Mulong wak chading cha usey kudi antu a Nzamb kuziyil ku yijil yayinkau kusutil kudi Moses, ni chom ik chafanyinau kusal?

6 Pa chisu cha Moses, Yehova wayinkisha antwend wintakel wovikena nawamp piur pa mikadil yau ni piur pa difukwil. Mulong wak? Mulong, mashakamin maswimpa. Mu mivu yitot yaad ni kusut, in Isarel ading mu uswik mu Idjibit mwadingau antu kwifukwil afu, ni akish, ni kusal yom yivud yamupipejang Nzamb. Chisu chadiokalau antu a Nzamb mu Idjibit, aswirikena wintakel usu. Ading afanyidin kwikal muchidi ulondwila kamu Yijil ya Yehova. Mikand yimwing yilondin anch dizu dia Hebereu dikarumwinau anch “chijil” dimekeshin mazu marumburikina “kutakel, ukwash, kufumb.” Yijil yayikingang in Isarel ku kusal yom yiyimp ni ma relijon ma makasu ma michid yading yiyinyingumukina. In Isarel pamuteshangau Nzamb, atambulang yiyukish yend. Pamubwambwilangau, amanang mar nakash.—Tang Kuvurik Yijil 28:1, 2, 15.

7. (a) Rumburil mulong wak Yehova wapana wintakel kudi antwend. (b) Yijil yading kalam wa in Isarel mutapu ik?

7 Wintakel usu winou auswirikena kand mulong wa diyingishin dikwau. Yijil yading kuyitenchik in Isarel mulong wa chom cha usey nakash mu chitongijok cha Yehova, kwez kwa Mesia, Yesu Kristu. Yijil yading kuyivurish kand in Isarel anch ading akad kuwanyin. Yading kuyikwash kand kwijik anch ading akwet kuswir kwa difut, diading chipan cha difut chiwanyidina chafanyina kudiosh yitil yau chikupu. (Galatia 3:19; Hebereu 10:1-10) Chikwau kand, Yijil yading kulam dijuku diafanyinay Mesia kubudikin ni kuyikwash in Isarel kumwijik chisu chikumekanay. Mwaning, Yijil yading mudi ntakel wa chisu chikemp, ap “kalam,” ututwadina kudiay Kristu.—Galatia 3:23, 24, TMK.

8. Mulong wak tufanyidin kwikal atakedinau nich mbil yidia mu Yijil ya Moses?

8 Mulong tudi in Kristu, tukutwish niyetu kutaninamu mu wintakel wa Yehova wapanay  mu Yijil. Mu mutapu ik? Tukutwish kwiman ni kutal mbil pimedina chijil. Ap anch tudiap mwishin mwa yijil, tukutwish kudandamen kuyichingejin mudi ntakel mu mwom wetu wa pichuku pichuku ni mu kumwifukwil Yehova. Wafunda yijil yiney mu Bibil mwamu tukutwish kwilejin ku yijil yiney, kwikal atakedilau kwi mbil pimedina yijil yiney, ni kwikal ni kujikitish mulong wa yom yatufundishay Yesu yading yipandikenamu yijil yiney. Tesh yalonday Yesu anch: “En akulejanya kal anch: ‘Kangal wimikany dis.’ Pakwez katat am nakulejany kal anch, muntu mwawonsu [ukudandamena kumutal, NWT] mband wamwovil ris ra kulal nend, muntu mwinou wasal kal chitil cha kulal nend mu muchim wend.” Chawiy, tukwetap kuswir kwa kwipuk ching kusal masandj, pakwez, tukwet kand kuswir kwa kudiosh yitongijok ni maku ma masandj.—Mateu 5:27, 28.

9. Mashakamin ik masu masala anch chikala cha usey kudi Nzamb kupan wintakel usu?

9 Kupwa kwa Yesu kwez mudi Mesia, Yehova wapana malejan masu ni wayileja yom yivud piur pa chitongijok chend. Mulong wak chidia cha usey? Mu muvu wa 33, Yehova walika muchidi wa Isarel ni watonda chikumangen cha win Kristu kwikal antwend. Mwamu, mashakamin ma antu a Nzamb mikala kand masu.

WINTAKEL USU MULONG WA ISAREL WA MUSPIRITU

10. Mulong wak wapanau yijil yisu ku chikumangen cha win kristu, ni yijil yiney yading yishalijadin mutapu ik ni yayinkau in Isarel?

10 Yehova wayinkisha in Isarel Yijil ya Moses mulong wa kuyifundish mutapu wa kushakam ni wa kumwifukwil. Kusambishin mu mivu chitot ya kusambish, antu a Nzamb kadiokalap kand mu muchid umwing pakwez mu michid yivud ni mu jindond kushalijan, ni asambisha kuyitazuk anch Isarel wa muspiritu. Asala chikumangen cha win Kristu ni ikala mu manswik masu. Yehova wayinka ap wayirumburila malejan masu piur pa mutapu wa kushakam ni wa kumwifukwil. Chakin kamu, “Nzamb kakwetap kasolikany pakach pa antu, bwat. Ku michid yawonsu, muntu mwawonsu ukata kumulimish ni kusal yom yitentamina, Nzamb ukat kumwitiy.” (Midimu 10:34, 35) In Kristu alondula “yijil ya Kristu,” yading yimedina pa mbil yading yifundinau, kulik pa mayal, pakwez mu michim yau. Yijil yiney yafanyina kuyitakel ni kuyikwash in kristu ndond yawonsu yidingau.—Galatia 6:2, TMK.

11. Mitapu ik yaad ya mashakamin ma win Kristu yidia mwinshin mwa “yijil ya Kristu”?

11 In Isarel a muspiritu ataninamu nakash ku ukwash wa Yehova kusutin kudiay Yesu. Kurutu kwa kusal manswik masu, Yesu wapana yijil yaad ya usey nakash. Chimwing chading piur pa mudimu wa kulejan. Chikwau chading piur pa mutapu wading ufanyidinau in Kristu kusal ni kuyisadin akwau. Malejan minam mading mulong wa in Kristu awonsu, chawiy tukutwish kumasadin etu awonsu nlel, twikalap nchik ni ruchingej ra kushakam chikupu mwiur ap panap pansh.

12. Chom ik chading chisu piur pa mudimu wa kulejan?

12 Pasak, antu a michid yikwau ezang mu Isarel mulong wa kumusadil Yehova. (1 Ant 8:41-43) Pakwez Yesu wapana chijil chitutanina mu Mateu 28:19, 20. (Tang.) Yesu wayileja in kwilejend anch “yangany” kudi antu awonsu. Chisu cha Pentekot wa mu muvu wa 33, Yehova wamekesha anch wakata anch rusangu ruwamp arulejana mu mangand mawonsu. Dichuku dinidia, antu mudi 120 in mu chikumangen chisu izula nich spiritu utumbila ni asambisha kulond mu mazu kushalijan kudi in Yuda  ni akamichid akarumuka. (Midimu 2:4-11) Chikwau, teritwar wajimba ni washika ni ku Samaria. Kupwa, mu muvu wa 36, teritwar washika djat kudi akamichid ading akad kutwalau ku mukand. Chinech chirumburikin anch in Kristu alejana kudi antu awonsu mu mangand!

13, 14. (a) “Chijil chisu” chom ik? (b) Chom ik tukutwisha kwilejin ku chilakej chashay Yesu?

13 Yesu wapana kand “chijil chisu” piur pa mutapu wa kuyisadin akadivar ni anambaz netu. (Tang Yohan 13:34, 35.) Tufanyidin kuyimekeshin rukat retu dichuku diawonsu, pakwez, tufanyidin kand kupan mwom yetu mulong wawawiy. Chom chinech chadingap mu Yijil ya Moses.—Mateu 22:39; 1 Yohan 3:16.

14 Yesu udi chilakej chijim cha muntu wamekesha rukat rakad choy. Wayikata nakash in kwilejend chawiy wafa mulong wawawiy. Wading uchingejin anch in kwilejend awonsu asala mwamu. Chawiy tufanyidin kujijaman mu mar ni ap kufa mulong wa akadivar ni anambaz netu.—1 Tesalonik 2:8.

WINTAKEL WA NLEL NI WA MACHUKU MA KURUTU

15, 16. Mashakamin ik tukweta katat ni mutapu ik ututakedinay Nzamb?

15 Yesu wamuteka “Kashalapol ushishamena ni kubabal,” mulong wa kupan ‘yakudia [ya muspiritu] pa chisu chiwanyidina’ kudi in kwilejend. (Mateu 24:45-47) Yakudia yiney yidi wintakel wa usey kudi antu a Nzamb chisu chiswimpina mashakamin. Mashakamin masu madi mutapu ik?

16 Tudi mu “machuku ma kwisudiel,” ni piswimp ap tukuman mar majim makad kumekanangap kal. (2 Timote 3:1; Marko 13:19) Kupwa, Satan ni ayilembil end ayidiosha mwiur ni kuyidjibul panap pansh, ni aletishin mar nakash kudi antu. (Kujingunik 12:9, 12) Chikwau kand, tukat kuziyin ku chijil cha Yesu pitulejena pa mangand  mawonsu kudi antu avud ni mu mazu mavud!

17, 18. Mutapu ik tukutwisha kwakul ku wintakel utwinkishinau?

17 Dirijek dia Nzamb ditwinkin yom yivud mulong wa kutukwash mu mudimu wa kulejan. Ov, ukat kuyisadin? Mu yikumangan yetu, tukat kutambul wintakel mulong wa mutapu wa kuyisadin nawamp. Ukat kuman anch wintakel winou udiokil kudi Nzamb?

18 Mulong wa kutambul yiyukish ya Nzamb, tufanyidin kushinshikin wintakel wawonsu upaninau kusutil ku chikumangen cha win Kristu. Anch twaziyin nlel, chikutuswapel kulondul wintakel winou pa chisu cha “mar makash,” chisu chikusheshau mangand mayimp ma Satan. (Mateu 24:21) Kupwa, tukwikal ni kuswir kwa wintakel mulong wa mwom mu mangand masu matentamina makulika kwikal mwinshin mwa wintakel wa Satan.

Mwi ngand yisu, tukutambul mivungur yikwikala nich wintakel usu mulong wa mwom mu Paradis (Tal paragraf 19, 20)

19, 20. Mivungur ik yikufungulau, ni yikwikal nich yibudikin ik?

19 Pa chirungu cha Moses, muchidi wa Isarel wading ukwet kuswir kwa wintakel usu, chawiy Nzamb wayinkisha Yijil. Kupwa, chikumangen cha win Kristu chalondula ‘yijil ya Kristu.’ Chilik chimwing, Bibil utulejin anch mwi ngand yisu, tukutambul mivungur yisu yikwikala ni wintakel usu. (Tang Kujingunik 20:12.) Chimeken anch, mivungur yiney yikez kurumburil yikwitay Nzamb kudi antu chisu chinicha. Mu kwilej mivungur yiney, antu awonsu, ni akuvumbuka, akutwish kwijik yom yiyitinau kudi Nzamb. Mivungur yiney yikutukwash kwilej yom yivud piur pa mutapu utonginingay Yehova. Tukutesh kand Bibil nawamp, chawiy mu Paradis tukuyimekeshin antu awonsu rukat, kalimish, ni ntumb. (Isay 26:9) Tong mutapu tukwileja yom yivud ni kuyifundish antu akwau mu wintakel wa Mwant, Yesu Kristu!

20 Anch twalondul wintakel ‘ufundinau mu mivungur’ ni twashal ashinshamena kudi Yehova chisu cha kupak kwa nsudiel, ukufund majin metu chikupu mu ‘muvungur wa mwom.’ Tukutwish kutambul mwom wa chikupu! Mwamu, tukwet kuswir kwa KWIMAN mulong wa kutang chilondinay Bibil, KUTAL mulong wa kutesh chirumburikina yom yiney kudi etu, ni KUTESH mulong wa kuziyin ku wintakel wa Nzamb nlel. Anch twasal yom yiney, tukupand ku mar majim ni tukudandamen kwilej yom yivud piur pa manangu metu ni kumukat Yehova Nzamb, chikupu.—Mulej 3:11; Rom 11:33.