Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 3 , 2016

 MUTU WA MULONG WA PA CHIBUR

Mulong Wak Yesu Wamana Mar ni Wafa?

Mulong Wak Yesu Wamana Mar ni Wafa?

“Yitil yandamina mu mangand ku muntu umwing , ndiy kamu Adam, chad yitil yend yaleta rufu.”—Rom 5:12

Chom ik ufanyidina kwakul ang akwipul anch: “Ov, ukatin kushakam chikupu?” Antu avud afanyidin kulond anch akatin kushakam, pakwez, amen anch chom chinech chidi chakad kuwanyin. Alondining anch, rufu chidi chom chidingaku mu mwom, didi disudiel dia mwom wetu.

Tong bil anch akarumun chipul ni kukwipul kand anch: “Ov, ukatin kufa?” Mu kulond kwakin, antu avud afanyidin kwakul anch bwat. Chom chinech chimekeshin ik? Mu uyakin tukatin kwikal ni mwom, chikalap nchik yakamish ni mar turishina nich. Bibil umekeshin anch Nzamb wayitanga antu nich rusot ra kwikal ni mwom chikupu. Ulondin anch: “Ndiy wateka mu michim yau rusot ra kushakam chikupu.”—Mulej 3:11, NWT.

Pakwez, uyakin udi anch, antu kashichap chikupu. Ov, chom ik chasadika? Chikwau kand, ov, Nzamb wasala chom kanang mulong wa kupwish mulong winou? Yakul yipaninay Bibil yikasikeshin ni yimekeshin patok mulong wak Yesu wamana mar ni wafa.

CHOM CHASADIKA

Ma shapitre masatu makusambish ma mukand wa Disambishil mu Bibil matulejin anch Nzamb wateka kurutu kwa Adam ni Eve, ambay a uruw a kusambish, ruchingej ra mwom wa chikupu ni wayileja chom chafanyinau kusal mulong wa kwikal ni mwom winou. Kupwa, rusangu ralejana mutapu wakanganyau kumuziyin Nzamb ni mwashadishau ruchingej riner. Arumburil rusangu riner mu mutapu wovikena—mu mutapu ulondinau antu amwing anch ridi ringany. Pakwez, Disambishil ni Jinsangu Jiwamp, yawonsu yilondin yom yimekeshina win kashinsh wa rusangu. *

Ov, chom ik chading chibudikin cha kulik kuziyin kwa Adam? Bibil wakwil anch: “Yitil yandamina mu mangand ku muntu umwing , ndiy kamu Adam, chad yitil yend yaleta rufu. Chawiy rufu riner rashika kudi antu awonsu, mulong antu awonsu asala yitil.” (Rom 5:12) Adam wasala chitil, mulong walika kumuziyin Nzamb. Mwamu washadisha ruchingej ra mwom wa chikupu ni washikena ku kufa. Tuswanin mwikadil wend wa chitil mulong tudi anend. Mudi chibudikin, tukat kuyel, kunanap ni kufa. Kurumburil kwinoku piur pa kufa kwetu kukwatijadin pamwing ni chitwija nlel chikatau in siyans  kurumbul piur pa mikadil yikatau an kuswan kudi anvajau. Ov, Nzamb wasala chom kanang mulong wa kupwish mulong winou?

CHASALAY NZAMB

Nzamb watenchika mulong wa kufut chashadishay Adam mulong wa anend, chitazukinau anch ruchingej ra mwom wa chikupu. Mutapu ik wasalay Nzamb chom chinech?

Bibil ulondin mu Rom 6:23 anch: “Difut dia yitil didi rufu.” Chinech chirumburikin anch rufu chidi chibudikin cha chitil. Adam wasala chitil, chawiy chafilay. Chilik chimwing, tusadin yitil ni tukat kutambul difut dia yitil, didia rufu. Pakwez, pakad rusot retu, tukat kuvadik nich mwikadil wa chitil. Chawiy lel, ku rukat rend, Nzamb wamutuma Mwanend, Yesu, mulong wa kwitiy ‘difut dietu dia yitil.’ Mutapu ik wasalay mwamu?

Rufu ra Yesu rapana njil ya musangar ni ya kwikal ni mwom wa chikupu

Kudiosh patuletinay Adam, muntu uwanyidina, chitil ni rufu mulong wa kubwambwil kwend, chading chifanyidin muntu uwanyidina ni uziyidina mulong wa kutukwol ku chisend chinech chilimina. Bibil urumburil mu mutapu winou anch: “Mwamu kand, antu avud ikala in yitil mulong wa kubwambul kwa muntu umwing, chawiy chimwing kand, antu avud akez kwikal atentamina mulong wa kuziyil kwa muntu umwing.” (Rom 5:19) “Muntu” winou wading Yesu. Wadiokala mwiur, wikala muntu uwanyidina *, ni wafa mulong wetwetu. Mudi chibudikin, chaswapela kudi etu mulong wa kwikal antu atentamina kudi Nzamb ni kwikal ni ruchingej ra mwom wa chikupu.

MULONG WAK YESU WAMANA MAR NI WAFA

Mulong wak chading cha usey anch Yesu afa mulong wa kuwanyish chom chinech? Nzamb wa Dikand Diawonsu kafanyinap kupwish mulong winou mu mutapu ukwau chakwel ayikwasha an a Adam kushakam chikupu? Wading ukwet usu wa kusal mwamu. Pakwez, chinech chela kumekan anch kudi kuvuramen mazu mend ma chijil malonday anch difut dia chitil didi rufu. Chijil chinech chidiap chakad usey chikutwishau kuswimp. Chidi cha usey mulong wa kutentam kwakin.—Kuseng 37:28.

 Anch Nzamb wasala mwamu, antu afanyina kwiyipul mulong wak wasalay mwamu. Chilakej, ov, wafanyina kutond nany pakach pa an a Adam uwanyidina kutambul mwom wa chikupu? Wakimba kuwanyish kushilamu kwend? Kutentam kwa Nzamb mulong wa dipandish dietu kutwinkishin kashinsh anch usadining chisu chawonsu yom yitentamina.

Kusutil ku cha kupesh cha rufu ra Yesu, Nzamb walejana mutapu wa kwikal nich mwom wa chikupu mu Paradis panap pansh. Shinshikin mazu malonday Yesu madia mu Yohan 3:16: “Mulong Nzamb wakata ngand nakash, ndiy wamupana Mwanend kapwokal chakwel muntu mwawonsu ukumwitiyija ndiy kakujiyap, pakwez ukez kwikal nich mwom wa chikupu.” Rufu ra Yesu ramekeshap kuburen kutentam kwa Nzamb, pakwez, ramekesha rukat rujim mulong wa antu.

Pakwez, mulong wak Yesu wamana mar ni wafa rufu riyimp mudi mulejenau mu Rusangu Ruwamp? Palikay kuziyil ku yoziu yikash ni pashalay ushinshamena, Yesu walika yom yawonsu yalonday Satan anch antu awonsu kakutwishap kushal ashinshamena kudi Nzamb padiau mu mar. (Job 2:4, 5) Kulond kwinoku kwakimba kumekan kwakin pasalay Adam muntu utentamina chitil, pamudimbau kudi Satan. Pakwez, Yesu—wading uwanyidina mudi Adam—waziyila chikalap nchik mar makash. (1 Korint 15:45) Wamekesha anch Adam nindiy wafanyina kumuziyil Nzamb anch watonda kusal mwamu. Pajijamanay mu yoziu, Yesu watushila chilakej cha kulondul. (Pita 2:21) Nzamb wamufuta Mwanend mwom uwanyidina wakad kufang mwiur, mulong wa kuziyil.

MUTAPU UKUTWISHA KUTANINAMU

Rufu ra Yesu rasadika kamu. Mutapu wamekana mulong wa kwikal ni mwom wa chikupu. Ov, ukatin kwikal ni mwom wa chikupu? Yesu wamekesha chom tufanyidina kusal palonday anch: “Winou wawiy mwom wa chikupu, ashikena kukwijik ey, Nzamb umwing kusu wakin, ni watuma ey, Yesu Kristu.”—Yohan 17:3, NWT.

In kupalangesh a gazet winou akwitin chakwel wileja yom yivud piur pa Yehova Nzamb wakin ni piur pa Mwanend, Yesu Kristu. Atuman a Yehova a mu teritwar wey akwikal ni musangar wa kukukwash. Ukutwish kand kutambul jinsangu jikwau ja ukwash anch waya pa kapend ka Web, www.jw.org.

^ par. 8 Tal “Historicité de la Genèse,” mu buku “Étude perspicace des Écritures,” volim1 paj 986-988, mu Français wapalangeshau kudi Atuman a Yehova.

^ par. 13 Nzamb washemunina mwom wa Mwanend kudiokal mwiur ni wauteka mwivumu mwa Mariy, ni spiritu utumbila wa Nzamb wamukinga Yesu chakwel kangal aswana kuburen kuwanyin kwa Mariy.—Luka 1:31, 35.

 

CHAKWEL WIJIKA YOM YIVUD

CHIVURIKISH

Kuvurik Rufu ra Yesu

Tukutazukin ni musangar mulong wa kukumangan pamwing niyetwetu ku chikumangan chinech cha usey. Ukwilej mutapu ukutwisha kutaninamu mu mwom ni rufu ra Yesu.