Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 3 , 2016

 MUTU WA MULONG WA PA CHIBUR | MULONG WAK YESU WAMANA MAR NI WAFA?

Ov, Yom Yiney Yasadika Kamu?

Ov, Yom Yiney Yasadika Kamu?

Pa chisu cha kapepil mu muvu wa 33 C.C., amujipa Yesu wa ku Nazaret. Amudimbena yom ya makasu, amubula nakash ni kupwa amupampina pa mutond. Wafa rufu riyimp. Pakwez, Nzamb wamuvumbula, ni kupwa kwa machuku 40, Yesu waya mwiur.

Rusangu riner rishimokishena turitambwil mu mikand yinying ya Rusangu ruwamp ya mu Mifund ya Grek ya in Kristu, yitazukinau anch Manswik Masu. Ov, yom yiney yasadika kamu? Chinech chidi chipul chiwamp ni cha usey nakash. Anch yasadikap mwamu, ing ritiy ra in Kristu ridi ra chamwamu ni ruchingej ra mwom wa chikupu mu Paradis ridi kwau mudi chilat chamwamu. (1 Korint 15:14) Chikwau kand, anch yom yiney yasadika kamu, komb kudi ruchingej ra machuku ma kurutu mulong wa antu ukutwisha niyey kulejan. Chawiy, ov, jinsangu ja Rusangu Ruwamp jidi jakin anch jidi jingany?

CHIMEKESHINA YOM YASADIKA

Chinyim ni jingany, in kufund a Rusangu Ruwamp afunda yom yidia salal ni ashinshikina yom yawonsu. Chilakej, afunda majin ma jindond jakin, ni jindond jimwing muntu ukutwish kujendin nlel. Ajimbula antu akin ikalaku, antu inay ayijimbula kand kudi in kufund rusangu ra antu.—Luka 3:1, 2, 23.

 Amufunda piur pa Yesu kudi in kufund jinsangu a mu mivu chitot ya kusambish ni ya kaad. * Mutapu wamujipau aumekeshin mu Jinsangu jading jitiyikina mu mitapu ya kujipan ya in Rom pa chirungu chinicha. Chikwau kand, jinsangu ajilonda salal—ap jading jilondina piur pa yom yiyimp yasalau in kwilej a Yesu. (Mateu 26:56; Luka 22:24-26; Yohan 18:10, 11) Yom yawonsu yiney yimekeshin anch, in kufund a Rusangu Ruwamp ading akwet win kashinsh ni ading atentamin pafundau rusangu piur pa Yesu.

CHIDI MUTAPU IK PIUR PA KUVUMBUK KWA YESU?

Ap anch antu avud itiyin anch Yesu wikalaku ni wafa, amwing akat kutadik piur pa kuvumbuk kwend. Ap atwimbuy end kitiyap rapor wa kusambish wapanau piur pa kuvumbuk kwa Yesu. (Luka 24:11) Pakwez, ntad jawonsu japwa chisu chamumanau Yesu kupwa kwa kuvumbuk kudi in kwilejend awonsu mu yisu kushalijan. Chikwau kand, pa chisu chimwing, antu 500 ni kusut amumana kapamp kamwing.—1 Korint 15:6.

Ap anch ading mu ubaj wa kuyikwat ni kuyijip, in kwilej alejana nich mushiku kuvumbuk kwa Yesu kudi antu awonsu—ap kudi antu amujipa. (Midimu 4:1-3, 10, 19, 20; 5:27-32) Ov, in kwilej avud kafanyinap kwikal ni wom anch kadingap akwet kashinsh anch Yesu wavumbuka chakin kamu? Pakwez, uyakin wa kuvumbuk kwa Yesu chidi chom chikash chisadina anch win Kristu wikalaku pa mangand kudiosh pakuru djat ni nlel.

Jinsangu jilondinau mu Rusangu Ruwamp piur pa rufu ni kuvumbuk kwa Yesu, jikwet yom yawonsu ya usey yimekeshina win kashinsh wa rusangu. Kujitang nawamp kukukubachik kwikal nich kashinsh anch yom yiney yasadika kamu. Kashinsh key kakutwish kukasikan kamu anch wijik mulong wak yom yiney yasadika. Mutu wa mulong ulondwilaku ukurumburil yom yiney.

^ par. 7 Tacite, wavadika piswimp ni muvu wa 55 C.C., wafunda anch “Kristu, kudiokila dijin dia [in Kristu], amumesha mar nakash pa chirung cha winyikel wa Tiber kudiay Pons Pilat, umwing wa pakach pa anyikel etu.” Yesu amujimbwil kand kudi Suétone (mu mivu chitot ya kusambish); mwin kufund jinsangu mwin Yuda, Josèphe (mu mivu chitot ya kusambish); ni Nsand Pline, guverner wa Bitiniy (kwi nsambishil kwa mivu chitot ya kaad).