Yang pafundinau anch yidiamu

Yang pafundinau anch yidiamu

Ukutwish Kukasikesh Uumwing wa Win Kristu—Mutapu ik?

Ukutwish Kukasikesh Uumwing wa Win Kristu—Mutapu ik?

“Mwi ndiy yikunku yawonsu ya mujimbu yaurokina yinungin pamwing.” —EFES 4:16.

MIMINY: 53, 16

1. Kudiosh kwisambishin midimu ya Nzamb yamekana nchik?

YEHOVA ni Yesu ading mu umwing kudiosh kwinsambishin kwa kutang yom. Yehova wamutanga Yesu kurutu kwa kutang yom yawonsu. Kupwa, Yesu wasala nend pamwing ni ‘wading nend pamwing mudi mwant wa mudimu.’ (Jinswir 8:30) Atushalapol a Yehova niyawiy ovijanang umwing ni mukwau mulong wa kusal mudimu wading ukwetau. Chilakej, Nowa ni dijuku diend asala waat pamwing. Kupwa, in Isarel asala niyau midimu pamwing mulong wa kusal dizang (tabernacle), kuditek ndond kanang, ni kudishemunin ndond yimwing ni yikwau. Mu tempel, awangang ni asadilang yom ya kuwang nich pamwing mulong wa kumutumbish Yehova nich miminy yiwamp. Antu a Yehova atwisha kusal yom yiney pamwing mulong ovijanang umwing ni mukwau.—Disambishil 6:14-16, 22; Kuchind Michid 4:4-32; 1 Jinsangu 25:1-8.

2. (a) Chom ik cha usey chadinga mu chikumangen cha in Kristu a kusambish? (b) Yipul ik tukwambambina?

2 In Kristu a mu mivu chitot ya kusambish ovijana niyau umwing ni mukwau. Kambuy Paul warumburila ang ap anch  ading akwet ukaliweny ni yisend kushalijan, ading mu uumwing. Awonsu amulondula Mwant wau, Yesu Kristu. Paul wayifanikesha nich mujimbu ukweta yid yivud yisadina yawonsu pamwing. (Tang 1 Korint 12:4-6, 12.) Pakwez, yidi nchik kudi etu nlel? Mutapu ik tukutwisha kwovijan umwing ni mukwau mu mudimu wa kulejan, mu chikumangen, ni mu dijuku?

KWOVIJAN MU MUDIMU WA KULEJAN

3. Chishimushimu ik chamanay Yohan?

3 Mu mivu chitot ya kusambish, kambuy Yohan wamana mu chishimushimu angel sambwad ading mu kubul mpuny. Pabulay mwangel wa katan mpuny yend, Yohan wamana “katumbu waturik mwiur wawil pansh.” “Katumb” winou wasadina anfungul mulong wa kufungul ku chis cha dibuku dikweta mididim yikurikina. Chakusambish, mish yadiokala mu dibuku, ni kupwa chisak cha atubwol (ampasu) atwika ni abudika mu mish. Pa ndond pa kushesh mitond, atubwol inay aya ching kudi “antu kusu akad chijingidij cha Nzamb pa mpal pau.” (Kujingunik 9:1-4) Yohan wading wij anch chisak cha atubwol chafanyina kushesh yom yivud; chashesha kand yom yivud mu Idjibit chisu cha Moses. (Kubudik 10:12-15) Atubwol amanay Yohan amekeshin in Kristu azizidilau many asadina mudimu wa kulejan rusangu rikash mulong wa relijon wa makasu. Ni ma miliyon ma antu akwau achingedina mwom wa chikupu pa divu inunga kudi awiy. Awonsu adi mu umwing mu mudimu wa kulejan. Mudimu winou uyikwashin antu avud kudiokal mu ma relijon ma makasu ni kulik kwikal mu wintakel wa Satan.

4. Mudimu ik usadiningau antu a Nzamb ni mutapu ik umwing ukutwishau kusal mwamu?

4 Tukwet chisend cha kulejan “rusangu ruwamp” kudi antu a pa mangand mawonsu kurutu kwa disudiel kwez. Chinech chidi chisend chijim nakash! (Mateu 24:14; 28:19, 20) Tuyitazukin awonsu ovila “impu” mulong wa kuna “mem ma mwom” chawiy, tuswiridina kuyifundish antu awonsu akatina kutesh uyakin wa Bibil. (Kujingunik 22:17) Pakwez, tukutwish kusal mwamu ching anch ‘twinungin umwing ni mukwau’ ni kwovijan umwing ni mukwau mu chikumangen.—Efes 4:16.

5, 6. Mutapu ik tudinga mu umwing pitulejening rusangu ruwamp?

5 Mulong wa kuyilej antu avud, tufanyidin kwikal irijekina nawamp mu mudimu wetu wa kulejan. Ukwash tutambwiling mu yikumangen utukwashin kusal mwamu. Kupwa kwa kusal chikumangan cha mudimu wa kuya kulejan, tukat kuya kwambamb ni antu piur pa rusangu ruwamp ra Want. Tukat kuyinkish kand mikand yimedina pa Bibil. Pakwez, tupanin ma miliyon ma mikand yiney mu mangand mawonsu. Yisu yimwing, akat kutwitang mulong wa kusal kampany wa pakampwil wa kulejan. Anch wasal mudimu winou, udi mu umwing ni ma miliyon ma antu akwau pa mangand ma kabuj alejena rusangu riner rumwing! Usadin kand mu umwing ni angel, ayikwashina antu a Nzamb kusal mudimu wa kulejan rusangu ruwamp.—Kujingunik 14:6.

6 Chisangareshin mud ik chisu tutangina mu Annuaire piur pa yibudikin ya mudimu wa kulejan pa mangand mawonsu! Tong kand piur pa mutapu tudia mu umwing chisu tuyitazukina antu ku yitentam yetu. Kwinikwa, tukat kutesh jinsangu ja mutapu umwing. Ma diskur, ma dram, ni yakumenaku yikata kutukasikesh kumwinkish Yehova yom yetu ya usey. Tudi kand mu umwing ni akadivar nau anambaz netu a pa mangand mawonsu pitukata kukumangan ku Chivurikish muvu ni muvu. (1 Korint 11:23-26) Tukat kukumangan pamwing mu dichuku dimwing dia 14 Nisan, kupwa kwa muten kwandam mulong wa kumekesh kujikitish kwetu kudi Yehova mulong wa yom yatusadinay ni mulong wa kuziyin kwi mbil ya Yesu. Mwi mbing kurutu kwa Chivurikish,  tukat kusal mudimu pamwing mulong wa kuyitazuk antu avud eza tukumangana nau ku Chivurikish chinech cha usey.

7. Pitusadininga mudimu pamwing, yom ik tukutwisha kusal?

7 Kabwol umwing kakutwishap kusal yom yivud, chilik chimwing, muntu umwing kakutwishap kuyilej antu avud. Pakwez, mulong tusadin pamwing, tutwishin kuyilej antu avud (ma miliyon) piur pa Yehova ni kuyikwash amwing kumutumbish ni kumulimish.

KWOVIJAN MU CHIKUMANGEN

8, 9. (a) Chilakej ik chisadinay Paul mulong wa kuyifundish in Kristu ikala mu umwing? (b) Mutapu ik tukutwisha kwovijan mu chikumangen?

8 Paul wayirumburila in Efes mutapu urijekinau chikumangen, ni walonda anch antu awonsu mu chikumangen aswiridin “kukul . . . mu mitapu yawonsu.” (Tang Efes 4:15, 16.) Paul wasadina chilakej cha mujimbu mulong wa kurumburil anch mwin Kristu mwawonsu ukutwish kukwash chikumangen chikala mu umwing ni chimulondula Yesu, Ntakel wa chikumangen. Walonda anch yid yawonsu ya mujimbu ‘yinungin pamwing, chawiy yisadin pamwing.’ Ap anch tudi ansand ap amakurump, twikala ni mujimbu ukash ap bwat, chom ik chifanyidinay muntu mwawonsu kusal?

9 Yesu ukat kutond amakurump mulong wa kutakel chikumangen, ni ukatining anch tuyilimish ni kulondul wintakel utwinkishinau. (Hebereu 13:7, 17) Chinech chiswapelingap kusal. Pakwez, tukutwish kwit ukwash kudi Yehova. Spiritu wend utumbila ukutwish kutukwash chakwel tuziyina ku wintakel wawonsu utwinkinau kudi amakurump. Tong kand piur pa mutapu tukutwisha kukwash mu chikumangen chetu anch twikepishin ni kwovijan pamwing nau amakurump. Chikumangen chetu chikwikal mu umwing ni rukat retu umwing ni mukwau rikukasikan.

10. Mutapu ik ukwashiningau ankwash a mudimu chakwel chikumangen chikala mu umwing? (Tal chipich cha kwinsambishin.)

10 Ankwash a mudimu niyawiy akwashining uumwing wa chikumangen. Akat kusal mudimu ukash mulong wa kuyikwash amakurump, ni tuyijikitishin nakash mulong wa yawonsu yisadinau. Chilakej, ankwash a mudimu afanyidin kwikal ni kashinsh anch tukwet mikand yivud ya kusadil mu mudimu wa kulejan, ni akat kuyak angendj ezining ku yikumangan yetu. Asadin kand mudimu ukash mulong wa kurijek Chot cha Want ni kuchilam chinangina. Anch tukat kwovijan ni akadivar inay, tudi mu uumwing ni tumusadidin Yehova mu mutapu uwamp.—Ilikej nich Midimu 6:3-6.

11. Chom ik chifanyidinau ansand kusal mulong wa kukwash chikumangen chikala mu umwing?

11 Amakurump amwing asadin kal mudimu nakash mu chikumangen mivu yivud. Pakwez, pamwing ap kakutwishap kusal yom yivud mulong ananap kal. Akadivar ansand akutwish kuyikwash. Anch ayifumb, akutwish kwikal ni yisend yivud mu chikumangen. Ni anch ankwash a mudimu asal mudimu nakash, akutwish kuwanyin mulong wa kusal mudi amakurump mu machuku ma kurutu. (1 Timote 3:1, 10) Amakurump achidia ansand aya kurutu nakash. Nlel unou asadin mudi atulam a munyingumuku ni akat kuyikwash akadivar ni anambaz mu yikumangen yivud. Tukweting musangar pitumening ansand akat kwipan mulong wa kuyisadin akadivar nau anambaz.—Tang Kuseng 110:3; Mulej 12:1.

KWOVIJAN MU DIJUKU

12, 13. Chom ik chikutwisha kuyikwash antu awonsu adia mu dijuku kwovijan umwing ni mukwau?

12 Mutapu ik tukutwisha kuyikwash antu a mu dijuku dietu chakwel ovijana umwing ni mukwau? Kwifukwil kwa mu dijuku rubing ni rubing kukutwish kwatukwash. Anch anvaj nau anau asutish chisu pamwing mulong wa kwilej piur pa Yehova, rukat rau  umwing ni mukwau rikukasikan. Chisu chinech, akutwish kusadin yom yikulondau mu mudimu wa kulejan, yikuyikwasha antu awonsu kwikal irijekina nawamp. Ni anch atesh umwing ni mukwau walond piur pa uyakin ni kuman anch awonsu mu dijuku amukatin Yehova ni akatin kumusangaresh, awonsu akwikal mu umwing.

13 Mutapu ik ukutwishay ikundj ni mband kwovijan umwing ni mukwau? (Mateu 19:6) Anch awonsu aad amukatin Yehova ni akat kumusadin pamwing, akwikal nich musangar ni mu umwing mu uruw wau. Afanyidin kand kumekesh rukat umwing ni mukwau, mudi mwasalau Aburaham ni Sara, Isak nend Rebeka, ni Elikana nend Ana . (Disambishil 26:8; 1 Samwel 1:5, 8; 1 Pita 3:5, 6) Anch ikundj ni mband asal mwamu, akwikal mu umwing ni akushej piswimp ni Yehova.—Tang Mulej 4:12.

Difukwil dia mu dijuku dikutwish kuyikwash ansand ni amakurump pamwing (Tal paragraf 12, 15)

14. Anch nfumwey ap mukajey kadiap kaman wa Yehova, chom ik ukusala mulong uruw wen wikala ukash?

14 Bibil ulondin patok anch tufanyidinap kwatijan ni muntu wakad kumusadin Yehova. (2 Korint 6:14) Pakwez, kudi akadivar ni anambaz adia mu uruw ni muntu wakad kwikal Kaman wa Yehova. Amwing ileja uyakin kupwa kwa kwatijan, ni ambay au a uruw kikalap Atuman. Akwau atijana ni muntu wading kumusadin Yehova, chad ikundj ap mband wadiokala mu dirijek. Mu mashakamin minam, in Kristu afanyidin kusal yawonsu yikutwishau kusal mulong wa kukasikesh uruw wau mu kuziyin ku yiyul yidiokila mu Bibil. Chom chinech chidingap chiswapela. Chilakej, Mary ni nfumwend, David, amusadila Yehova pamwing. Kupwa, David wimika kuya mu yikumangan. Pakwez, Mary wasala usu wa kwikal mband muwamp ni kumekesh mikadil ya win Kristu. Wayifundisha kand anend musamban piur pa Yehova ni wadandamena kuya ku yikumangan ni ku yitentam. Kupwa kwa mivu, papamau anend ni padiokalau ku chikumbu, Mary wadandamena kumusadin Yehova ap anch chading chikasiken kusal mwamu. Chad, kupwa, David wasambisha kutang ma gazet mamushilangau kudi Mary. Chisu chinicha, wasambisha kand kuya ku yikumangan yimwing. Mwijukurend wa mivu musamban wading kumulaminang ndond ya kushakam mu yikumangan, ni anch David kezinap mu yikumangan, mwan winou walondang anch, “Ngak novangap musangar panalikang kukuman mu yikumangan.” David  wamuchirikina Yehova kupwa kwa mivu 25, ndiy ni mukajend akwet musangar mulong katat akat kumusadin Yehova pamwing.

15. Mutapu ik ukutwishau antu alabina kal mu uruw kuyikwash antu atijadina katat?

15 Satan ukat kurishikish majuku nlel. Diawiy diyingishin dimwing disadina anch ikundj ni mband amusadidina Yehova nlel ikala ni kuswir kwa kwovijan umwing ni mukwau. Ap anch wasadinany kal mivu yivud mu uruw, tong piur pa yiukutwisha kulond ap kusal mulong wa kukasikesh uruw wen. Anch walabinany kal mu uruw, ukutwishany kwikal chilakej chiwamp kudi antu atijadina katat. Pamwing ap ukutwish kuyitazuk antu atijadina katat eza usalany nau pamwing difukwil dia mu dijuku. Akuman anch chikalap nchik uvud wa mivu wasadilanya kal mu uruw, afanyidin kumekeshijadin rukat umwing ni mukwau ni kwikal mu umwing.—Titus 2:3-7.

“EZANY TUKANDAMANY KU MUKANDU WA YEHOVA”

16, 17. Yom ik yichingejinau atushalapol a Nzamb adia mu umwing mu machuku ma kurutu?

16 Chisu chayangangau in Isarel ku Yerusalem mulong wa misambu yau, ading kwovijan umwing ni mukwau. Atenchikang yom yawonsu yadingau nich kuswir mulong wa weny. Kupwa, asalang weny pamwing ni akwajijanang umwing ni mukwau. Ku tempel, amutumbishang ni kumwifukwil Yehova pamwing. (Luka 2:41-44) Nlel, pitwitenchikina mulong wa mwom mwi ngand yisu, tukwet kuswir kwa kwikal mu umwing ni kusal usu wetu wawonsu mulong wa kwovijan umwing ni mukwau. Ov, ukutwish kutong mutapu ukutwisha kusal yivud?

17 Antu a mu mangand minam kakovijanangap ni akat kutend piur pa yom yivud. Pakwez, tumujikitishin Yehova mulong utukwashin kwikal ni chisambu ni kutesh uyakin! Antwend pa mangand mawonsu akat kumwifukwil mu mutapu ukatinay. Ni nakash kamu machuku minam ma nsudiel, antu a Yehova adi mu umwing nakash. Mudi mwabwakay Isay ni Mika, tuyil etu awonsu ku “mukandu wa [Yehova].” (Isay 2:2-4; tang Mika 4:2-4.) Musangar mud ik tukwikala nich mu machuku ma kurutu pakwikalau antu awonsu pa divu ‘mu umwing’ ni kwovijan umwing ni mukwau mulong wa kumwifukwil Yehova!