Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 3 , 2016

Ansand—Wirijekinany Kal Mulong wa Kutambul Dibatish?

Ansand—Wirijekinany Kal Mulong wa Kutambul Dibatish?

“Nany wa mukach mwen, anch [wakimb] kutung chikumbu walik kushakam pansh ni kuchind usey, anch ukwet ya kupwish nich?”—LUKA 14:28.

MIMINY: 6, 34

Mutu wa mulong winou ni ulondwilaku ayifunda mulong wa ansand akimbina kutambul dibatish

1, 2. (a) Chom ik chiyinkishina antu a Nzamb musangar nlel? (b) Mutapu ik ukutwishau anvaj in Kristu ni amakurump kuyikwash ansand chakwel atesha chirumburikina dibatish?

MWIN Kristu umwing wananapa kal wamuleja Christopher nsand wading ni mivu 12 anch: “Nikwij kudiosh ku kuvadik kwey, ni nikwet musangar pa kutesh anch ukimbin kutambul dibatish. Nikimbin kukwipul, ‘Ov, mulong wak ukimbin kusal chom chinech?’” Mukurump winou wading ukwet mayingishin mawamp pa kwipul chipul chinech. Chituletidining musangar pa kuman muvu ni muvu tunan twa ansand mwi ngand yawonsu akat kutambul dibatish. (Mulej 12:1) Pakwez, anvaj in Kristu ni amakurump a mu chikumangen afanyidin kwikal nich kashish anch ansand inay ikwatidin mipak ni ateshin nawamp chirumburikina kutambul dibatish.

2 Twilejin mu Bibil anch kwipan ni dibatish yidi nsambishil ya mwom usu wa mwin Kristu. Mwom usu winou ukulet yiyukish  yivud yidiokila kudi Yehova ni rupompat rudiokila kudi Satan. (Jinswir 10:22; 1 Pita 5:8) Chawiy, anvaj in Kristu afanyidin kwitekin chisu cha kuyifundish anau chirumburikina kwikal mwin kwilej wa Kristu. Anch ansand kakwetap anvaj in Kristu, amukurump a mu chikumangen akuyikwash nich rukat chakwel ijika chirumburikina kwipan ni kutambul dibatish. (Tang Luka 14:27-30.) Mudi mukatay muntu kwitenchik mulong wa kupwish mudimu wend wa kutung, ansand afanyidin kwitenchik kurutu kwa kutambul dibatish, mwamu akutwish kumusadil Yehova nich kushinshaman “kushik kwisudiel.” (Mateu 24:13, TMK) Yom ik yikuyikwasha ansand chakwel adandamena kumusadil Yehova chikupu? El tumanany.

3. (a) Yom ik twilejina ku mazu ma Yesu ni ma Pita piur pa usey wa dibatish? (Mateu 28:19, 20; 1 Pita 3:21) (b) Yipul ik tukwisambina, ni mulong wak?

3 Nsand, ov, ukimbin kutambul dibatish? Anch chidi mwamu, chidi chitongijok chiwamp! Kutambul dibatish mudi Kaman wa Yehova chidi chisend chijim nakash. Chidi kand chom chimwing chifanyidinay mwin Kristu kusal, ni chidi chom cha usey kudi antu akupanda ku mar makash. (Mateu 28:19, 20; 1 Pita 3:21) Anch watambul dibatish, umekeshin anch washilamu kal kumusadil Yehova chikupu. Anch ukimbin kamu kulam kushilamu kwinoku, yipul yilondwilaku ey yikukukwash chakwel wijika anch witenchikin kal mulong wa dibatish: (1) Ov, naswil kal mulong wa kukwat mupak winou? (2) Nikwet kuswir kwa kusal mwamu? (3) Niteshin chirumburikina kwipan kudi Yehova? El twisambinany yipul yiney.

ANCH WASWIL KAL NAKASH

4, 5. (a) Mulong dibatish didiap ching dia amakurump? (b) Kwikal uswila, kurumburikin ik kudi Mwin Kristu?

4 Bibil kalondinap anch ching amakurump ap antu a chimbu kanang awiy akutwisha kutambul dibatish. Mu Jinswir 20:11, tutangin anch: “Chawiy chimwing ni yend mwan ukat kwimekeshil ku yisalijok yend, [...] anch yidi zwang ni kutentam.” Chawiy lel, mwan ukutwish kutesh kurumburik kwa kusal yom yidia yiwamp ni kwipan kudi Sakatang wend. Mwamu, dibatish didi chom cha usey ni chiwanyidina kudi nsand umekeshina anch waswil kal ni wipanin kal kudi Yehova.—Jinswir 20:7.

5 Kuswa kurumburikin chom ik? Kuswa kudiap ching kupam kwa mujimbu. Bibil ulondin anch antu aswila adi antu akata kusadil “manangu mau” mulong wa kwijik kushalijan kudia pakach pa uwamp ni uyimp. (Hebereu 5:14) Muntu uswila wij yom yidia yiwamp ni ukat kukwat mupak udiokila mu muchim wend wa kusal yom yiwamp. Chawiy, kakutwishap kumubachik chakwel asala yom yiyimp. Ni kakwetap kuswir kwa muntu mukwau kumulej yom yiwamp yifanyidina kusal. Chidi cha manangu kuchingejin anch nsand utambwila dibatish ukutwish kusal yom yiwamp ap anch anvajend ap antu amakurump kadiap nend piswimp.—Ilikej nich Filip 2:12.

6, 7. (a) Jimbul milong yamushikena Daniel padingay mu Babilon. (b) Mutapu ik wamekeshay Daniel anch wading uswil?

 6 Nsand, ukutwish kumekesh kuswa kwa mutapu winou? Shinshikin chilakej cha Daniel. Wading nsand chisu chayishay anvajend kuya nend ni waya mu Babilon. Cha ushon, Daniel washakama pakach pa antu ading akad kuziyil ku yijil ya Nzamb. Pakwez, el tushinshikinany piswimp mashakamin ma Daniel. Amukwata nich usey nakash mu Babilon. Wading umwing wa pakach pa ansand akemp atondau mulong wa kumusadil mwant. (Daniel 1:3-5, 13) Chimeken anch Daniel amukwata nich usey nakash kusutamu padingay mu Isarel.

7 Chom ik chasalay nsand Daniel? Ov, witiya chakwel antu a mu Babilon amuswimpa ap aziyisha ritiy rend? Bwat! Bibil ulondin anch ap anch wading mu Babilon, Daniel wakwata mupak ‘udiokila mu muchim wend wa kulik kwijondish,’ ni wafanyina kulik chom chin chawonsu chading chikwatijadina ni difukwil dia makasu. (Daniel 1:8) Chom chinech chamekesha kuswa kwakin!

Nsand uswila kafanyidinap kwikal mudi murund wa Nzamb ku Chot cha Want pakwez murund wa mangand ku shikol (Tal paragraf wa 8)

8. Chom ik ukutwisha kwilejin ku chilakej cha Daniel?

8 Chom ik ukutwisha kwilejin ku chilakej cha Daniel? Nsand uswila ukwiman dang mu yitiyij yend, ap anch udi mu milong yikash. Kafanyidinap kwikal mudi kangalanseng, nnam ukata kuswimp ulombu kulondulijan ni ndond yidiay. Kufanyidinap kwikal mudi murund wa Nzamb ku Chot cha Want pakwez murund wa mangand ku shikol. Pakwez, ukushal ushinshamena ap anch amupak.—Tang Efes 4:14, 15.

9, 10. (a) Mutapu ik ukutwishay nsand ap changadim kutaninamu ku kutongijokin piur pa mutapu wasalay papakau ritiy rend kapamp ka nsudien? (b) Dibatish dimekeshin ik?

9 Chidi chakin anch, kwikil muntu ap umwing udia uwanyidina. Yisu yimwing, ansand ap amukurump akat kurumbuk. (Mulej 7:20) Pakwez, anch ukimbin kutambul dibatish, chidi cha manangu kwijik piur pa mupak wey wa kuziyil ku yijil ya Yehova.  Iyipula anch: ‘Ov, nikat kumuziyil Yehova chisu chawonsu?’ Tongin piur pa mutapu wasala chisu chapakau ritiy rey kapamp ka nsudien. Watwisha kwijik chom chiwamp cha kusal? Mudi Daniel, kudi muntu kanang wakukasikesha kusadin ukaliweny wey mu mangand ma Satan? Anch chom mudi chinech chakushiken, ukutwish kwijik rusot ra Nzamb?—Efes 5:17.

10 Mulong wak chidi cha usey kwijik yakul ku yipul yiney ya pakampwil? Mulong yikukukwash chakwel umana usey wakin wa dibatish. Dibatish kudi kumekesh kudi antu akwau anch wasadin kal kushilamu kwa usey kudiay Yehova. Wamukanin anch ukumukat ni ukumusadin chikupu ni muchim wey wawonsu. (Marko 12:30) Muntu win mwawonsu akimbina kutambul dibatish ufanyidin kukwat mupak wa kulam kushilamu kwend kudiay Yehova.—Tang Mulej 5:4, 5.

OV, MAWIY MASWIR MEY?

11, 12. (a) Muntu utongina piur pa kutambul dibatish ufanyidin kwikal ni kashinsh pa chom ik? (b) Chom ik chikukukwasha kuman dibatish mutapu umeningay Yehova?

11 Bibil ulondin anch antu awonsu a Yehova, ap ansand, akumusadil ‘kwa kwikatin.’ (Kuseng 110:3) Chawiy, muntu ukimbina kutambul dibatish ufanyidin kwikal ni kashinsh anch minam madi maswir mend ma pakampwil. Chinech chitin kushinshikin nawamp maswir mey, pakampwil anch wapamina mu uyakin.

12 Piupamina, ukat kuman chakin kamu antu atambwila dibatish, pamwing ap amwing pakach pa arund ney ap anamakwey. Pakwez ufanyidin kubabal mulong kangal utong anch ufanyidin kutambul dibatish mulong ukwet chimbu kanang ap mulong antu akwau atambwil dibatish. Mutapu ik ukutwisha kwikal ni kashinsh anch umen dibatish mutapu umeningay Yehova? Itekina chisu cha kutongin mulong wak dibatish didi dia usey. Ukutan mayingishin mawamp mu mutu wa mulong winou ni ukulondula.

13. Mutapu ik ukutwisha kumekesh anch mupak wa kutambul dibatish udiokil mu muchim wey?

13 Mutapu umwing ukutwisha kumekesh anch mupak wey wa kutambul dibatish udiokil mu muchim wey udi kushinshikin malembil mey. Ov, ukweting chaku cha kumulembil Yehova chisu chawonsu? Ulembiling mulong wa yom ik? Yakul ku yipul yiney yikutwish kumekesh mutapu udia urund wey ni Yehova. (Kuseng 25:4) Yisu yivud, Yehova ukat kwakul ku malembil metu kusutin Bibil. Chawiy, mutapu ukwau ukutwisha kumekesh anch ukatin kamu kwikal piswimp ni Yehova ni kumusadin nich muchim wey udi kushinshikin pa program wey wa kwilej. (Joshua 1:8) Iyipula anch: ‘Mutapu ik udia dilejan diam dia Bibil? Nikat kwandam mu difukwil dia mu dijuku dietu kwa kwikatin?’ Yakul ku yipul yiney yikukukwash kuman anch mupak wey wa kutambul dibatish madi maswir mey.

CHIRUMBURIKINA KWIPAN

14. Mekesh kushalijan kudia pakach pa kwipan ni kutambul dibatish.

14 Ansand amwing kijingap kamu kushalijan kudia pakach pa kwipan ni dibatish. Amwing akutwish kulond anch apanin kal mwom wau kudi Yehova pakwez kandikal itenchika mulong wa kutambul dibatish. Chom chinech chikutwish kusadik chakin? Kwipan kudi kumulej Yehova mu malembil anch washilamu kal kumusadin chikupu. Pakwez anch watambul dibatish, wamekesh kal kudi antu akwau anch wipanin kal kudi Yehova. Chawiy, kurutu kwa  kutambul dibatish ufanyidin kwijik chom ik chirumburikina kwipan kudi Nzamb.

15. Kwipan kurumburikin chom ik?

15 Anch wapan mwom wey kudiay Yehova, umulejin anch wikal kal wendendiy. Washilamu kal anch kumusadin mudimu chikwikal chom cha usey nakash mu mwom wey. (Tang Mateu 16:24.) Kushilamu kwinoku kudiay Nzamb kudi kwa usey nakash! (Mateu 5:33) Chawiy, mutapu ik ukumekesha anch wij anch usadilap yom mulong weyey amwiney pakwez katat udi wa Yehova?—Rom 14:8.

16, 17. (a) Pan chilakej chimekeshina kurumburik kwa kwitun amwiney. (b) Chom ik chilondiningay kamu muntu ukata kwipan?

16 El tushinshikinany chilakej. Tong bil anch murund ney wakwinkish kal motak mudi chipan. Wakwinkish mbil ni walond anch: “Motak udi weyey.” Kupwa, murund ney walond anch: “Am nikulam anfungul. Ni yama nikusambisha kwendish motak, ey bwat.” Ukutong nchik piur pa chipan chinech? Ukutong mutapu ik piur pa murund ney wakwinkishang chipan cha motak?

17 Anch muntu wapan mwom wend kudi Yehova, umulejin Nzamb anch: “Nakwinkish kal mwom wam. Nidi weyey.” Yehova ukwet diyingishin dia kuchingel anch muntu winou awanyisha kushilamu kwend. Pakwez chikwikal nchik anch muntu winou wasambish kumubwambwil Yehova mu kuta urund wa piswimp mu ujindj ni muntu wakad kumusadil Nzamb? Ap chikwikal nchik anch muntu winou witiy mudimu ukumusenda chisu chivud chakwel akanganya kusal mudimu wa kulejan ap kuya ku yikumangan ya chikumangen? Mwamu muntu winou kakuwanyishap kushilamu kwend kudi Yehova. Chikwikal mudi kulam anfungul a motak. Anch twapan mwom wetu kudi Yehova, tumulejin anch: “Mwom wam udi weyey, udiap wamam.” Chawiy lel, tukusal ching yom yikatinay Yehova ap anch yidiap yom yitukatina etu kusal. El amboku tumwimburijany Yesu, walonda anch: “Am kinadiokalap mwiur [mulong wa] kusal rusot ram amwinam, pakwez neza ni kusal rusot rendendiy wantuma am.”—Yohan 6:38.

18, 19. (a) Mutapu ik umekeshina mazu ma Rose ni ma Christopher anch kutambul dibatish chidi chisend chiletina yiyukish? (b) Mutapu ik wovila piur pa chisend cha dibatish?

18 Chakin kamu, kutambul dibatish udi mupak wa usey nakash. Kwipan kudi Yehova ni kutambul dibatish chidi chisend chijim. Ansand amukatina Yehova ni ateshina kurumburik kwa kwipan kakwidjidjekap mulong wa kupan mwom yau kudi Nzamb ni kutambul dibatish. Kakatap kunenganan mulong wa mupak wau. Rose watambula dibatish nich mivu dikum ni kusut ulondin anch: “Nimukatin Yehova, ni nikutwishap kwikal nich musangar pa kusal chom chikwau ching kumusadil ndiy. Kwikil chom chinginkishina kashinsh mu mwom wam mudi mupak wam wa kutambul dibatish.”

19 Chidi nchik piur pa Christopher, utwajimbulang kwinsambishil kwa mutu wa mulong winou? Mutapu ik wovilay piur pa mupak wend wa kutambul dibatish padingay nich mivu 12? Ulondin anch ukwet musangar nakash pa kukwat mupak winou. Pawanyishay mivu 17, wasambisha kusal mudi chibol wa rawonsu ni wikala nkwash wa mudimu nich mivu 18. Nlel usadidin ku Betel. Ulondin anch: “Kutambul dibatish wading mupak uwamp. Mwom wam wizwil nich mudimu usangareshina wa Yehova ni dirijek diend.” Anch ukimbin kutambul dibatish, mutapu ik ukutwisha kwitenchik mulong wa chom chinech? Mutu wa mulong ulondwilaku ukwakul ku chipul chinech.