Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 12 , 2016

Yehova Ukat Kuyifut Antu Akata Kumusurab

Yehova Ukat Kuyifut Antu Akata Kumusurab

“Muntu mwawonsu ukuseja piswimp kudi Nzamb ufanyidin kwitiy anch, Nzamb udiaku, ndiy ukat kufutan kuwap kudi antu awonsu akata kumusurab.”—HEBEREU 11:6.

MIMINY: 136, 139

1, 2. (a) Mutapu ik ukwatijadina rukat ni ritiy? (b) Yipul ik tukushinshikina?

YEHOVA Tatukwetu, washilamu ku yiyukish atushalapol end ashinshamena. Winou wawiy mutapu umwing umekeshinay Yehova rukat rend mulong wetwetu, ni tumukatin ‘mulong ndiy watukata wakusambish.’ (1 Yohan 4:19) Payila rukat retu kupam mulong wa Yehova, ritiy retu mudiay ndiy riyil kukasikan ni tukwet kashinsh anch Yehova ukuyifut antu akatinay.—Tang Hebereu 11:6.

2 Yehova udi mwin kufutan! Chidi cha usey kwijik anch udi nany ni usadining ik. Chawiy, ritiy retu mudiay Nzamb rikwikalap rakin ang twalik kwitiyij anch ukat kuyifut antu akata kumusurab. Mulong wak tulondina mwamu? Mulong “ritiy rikat kutwijikish win yakin wa yom yituchingejina.” (Hebereu 11:1) Ritiy rirumburikin kwikal nich kashinsh anch Nzamb ukuyiyukish antwend ashinshamena. Mutapu ik tutanidinamu mu richingej ra kutufut? Mutapu ik wafutay Yehova atushalapol end a pakur ni mutapu ik ufutinay atushalapol end a nlel? El tumanany.

 YEHOVA WASHILAMU KUYIYUKISH ATUSHALAPOL END

3. Kushilamu ik tutanina mu Malakiy 3:10?

3 Yehova Nzamb washilamu kuyifut atushalapol end ashinshamena. Utwitin kumwinkish yom yetu ya usey ni kuchingej anch ukutufut. Yehova ulondin anch: “Mpakany am.” Udandamedin kulond anch: “Chad wez umanany yiyukish yivud ya mitapu ni mitapu yikudiokala mwiur.” (Malakiy 3:10) Tumekeshin kujikitish kwetu mulong wa chipan chinech pitwitiyina kutazuk kwa Yehova mulong wa kumupak.

4. Mulong wak tukutwisha kuchingejin mu kushilamu kwa Yesu tutanina mu Mateu 6:33?

4 Yesu wayishilamu in kwilej end ang anch atek Want pa ndond yakusambish, Nzamb ukuyikwash. (Tang Mateu 6:33.) Yesu walonda mwamu mulong wading wij anch kushilamu kwa Nzamb kuding kwakin chisu chawonsu. (Isay 55:11) Chawiy niyetu tukutwish kwikal ni kashinsh ang anch twamekesh ritiy rakin mudiay Yehova, ukulam kushilamu kwinoku kulondina anch: “Kinikukushap, kinikez kukulikap chikupu.” (Hebereu 13:5) Kushilamu kwinoku kwa Yehova kutukwashin kuchingejin mazu ma Yesu madia mu Mateu 6:33.

Yesu walonda anch in kwilejend akuyifut mulong wa kwipan kwau (Tal paragraf wa 5)

5. Mulong wak mutapu wamwakulau Pita kudi Yesu utukasikeshin etu awonsu?

5 Kambuy Pita wamwipula Yesu anch: “Etu twashil kal yom yawonsu, twakulondul ey, ov, yom ik yitukeza kwikal nich?” (Mateu 19:27) Yesu kamupupap Pita mulong wamwipula chipul chinech. Pakwez, Yesu wayileja in kwilej end anch akuyifut mulong wa kwipan kwau. Apostol ni antu akwau ashinshamena akuyikel pamwing ni Yesu mwiur mu machuku ma kurutu. Pakwez Yesu walonda kand anch ap katat kudi difut: “Muntu mwawonsu washila  kal yikumbu yend, ap anamakwend amakundj ni amband, ap tatukwend, ap makwend, ap anend, ap yir yend, mulong wa [kwinlondul] am, ukez kutambul yom yiney kupandakan tupamp chitot. Ukez kutambul kand mwom wa chikup.” (Mateu 19:29) Antu awonsu amulondwila Yesu akutwish kutan a tatuku, a maku akadivar, anambaz, ni an mu chikumangen nlel. Yiney yidi kamu chakin yom ya usey nakash kusutamu chom chin chawonsu twapana mulong wa Want wa Nzamb.

‘NKAL MULONG WA KUCHIDIJ MWOM’

6. Mulong wak Yehova washilamu anch ukuyifut atushalapol end?

6 Mulong wa kuwejinaku musangar wa yiyukish yiwamp ya katat, tuchingedin yiyukish yipandakena kujimb mu machuku ma kurutu. (1 Timote 4:8) Yehova washilamu kuyiyukish atushalapol end ashinshamena, ni kwijik mwamu kutukwashin kujijaman mu yirung yikash. Mu kwikal nich kashinsh anch Yehova “ndiy [ukata] kufutan kuwap kudi antu awonsu akata kumusurab,” tukutwish kushal ashinshamena.—Hebereu 11:6.

7. Mutapu ik mudia ruchingej mudi nkal ?

7 Mu mafundish mend ma pa mukandu, Yesu walonda anch: “Sangarany kwen ni kuzangijal, mulong akulamidinany difut dijim mwiur. Wawiy kand mutapu wayizengolau aruu a Nzamb pakur.” (Mateu 5:12) Atushalapol amwing a Nzamb akutambul difut mwiur. Ni akwau akutambul difut dia mwom wa chikupu panap pansh mu paradis. Dined didi kand diyingishin mulong wa “kasangar nakash ni kuzangijal.” (Kuseng 37:11; Luka 18:30) Pakwez etu awonsu, richingej retu rikutwish kwikal mudi ‘nkal mulong wa kuchidij mwom, ridi rakin ni ridandamedin.’ (Hebereu 6:17-20) Mudi mukatay nkal kulam waat ujim chisu cha rinkind mukash, richingej retu rikash rikutwish kutukwash kwiman dang. Rikutwish kutwinkish usu mulong wa kujijaman mu yisu yikash.

8. Mutapu ik utukwashina richingej kukepish yakamish?

8 Richingej retu rikutwish kutukwash kukepish yakamish. Mudi many makutwisha kuziyish chikit, Kushilamu kwa Nzamb kukutwish kukepish yakamish yidia ku michim yetu. Chidi chikasikeshina kwijik anch Yehova ukutulam anch twatek yisend yetu kudi ndiy. (Kuseng 55:22) Tukutwish kwikal nich kashinsh kawonsu anch Nzamb ukutwish kusal ‘yom yivud yipandakena yom twitina.’ (Efes 3:20) Yehova ukutwinkish kadiap kusu yom yivud ap yivud nakash, pakwez ‘yipandakena kuvul nakash’!

9. Mutapu ik tukutwisha kwikal nich kashinsh ka kutambul chiyukish cha Yehova?

9 Mulong wa kutambul difut, tufanyidin kwikal ni ritiy rakin mudiay Yehova ni kuziyin ku wintakel wend. Moses wayileja in Isarel anch: “ [Yehova] ukez kukuyukishany mwi ngand yikwinkishinanyay [Yehova] Nzamb wen kuyiswan. Ukukuyukishany ching anch en waziyilany chakin dizu dia [Yehova] Nzamb wen, kulam ni kusadil yijil yiney yawonsu yinakulejanya kal ilel unou. [Yehova] Nzamb wen ukez kukuyukishany mudi mwakushilanyayimu, niyen ukez kuyisondjikany michid yivud, pakwez awiy kakez kakuyikelanyap en.” (Kuvurik Yijil 15:4-6) Ov, ukwet kashinsh anch Yehova ukukuyukish anch wadandamen kumusadin nich kushinshaman? Ukwet diyingishin diwamp mulong wa kashinsh kinak.

YEHOVA WADING MWIN KUYIFUT

10, 11. Mutapu ik wamufutau Josef kudi Yehova?

10 Bibil amufunda mulong wa kutaninamu kwetu. Tutaninamu yilakej yivud yilejena mutapu wafutay Nzamb atushalapol end ashinshamena a pakur. (Rom 15:4) Josef wading chilakej chiwamp pa yilakej yiney. Chakusambish, anamakwend amulandisha mudi  muswik. Kupwa mband wa mukurump wend wa mudimu wamudimbena makasu ni amuteka mu rukan mu Idjibit. Chisu chadingay Josef mu rukan, ov, wading kulemp ni Yehova? Ap pakemp bwat! Bibil ulondin anch: ‘Yehova wading nend, wamumekeshina kuwap kwa rukat rend rishinshamena.’ Ulondin kand anch: “[Yehova] wading ni Josef, ni mu yom yawonsu yasalangay, [Yehova] wamukwasha kusal.” (Disambishil 39:21, 23) Ap anch wasutina mu yisu ya mar makash, Josef wamuchingejina Nzamb wend pakad kuswel.

11 Kupwa kwa mivu, Farao wamudiosha Josef mu rukan, ni kashalapol winou mwin kwikepish wikala ntakel wa kaad wa usu mu Idjibit. (Disambishil 41:1, 37-43) Pavalau Josef ni mukajend an aad amakundj, “Josef wamupila mwan wa kusambish dijin anch Manase, walonda anch: ‘Mulong Nzamb wanvurameshin kal mar mam mawonsu, ni chikumbu chawonsu cha [tatukwam].’ Dijin dia mwan wa kaad wamupila anch Eferayim, ndiy walonda anch: ‘Mulong Nzamb [wanginkishin kal rivaj] mwi ngand ya mar mam.’” (Disambishil 41:51, 52) Yehova wamufuta Josef mulong wa kushinshaman kwend, ni wayipandisha in Isarel nau in Idjibit kwi nzal. Ni Josef wading wij anch Yehova ndiy wamufuta ni kumuyukish.—Disambishil 45:5-9.

12. Mutapu ik washalay Yesu ushinshamena pa mupakau?

12 Yesu Kristu niyend wamuziyina Nzamb padingay mu yoziu yivud, ni Yehova wamufuta. Yom ik yamukwasha Yesu kushal ushinshamena? Dizu dia Nzamb dilondin anch: ‘Mulong wa musangar watekau kurutu kwend, ndiy wakasikena pa mutond wa mar, kovap usany.’ (Hebereu 12:2) Yesu wova musangar mu kutumbish dijin dia Nzamb. Ni Yesu amwitiyija kudi Tatukwend ni amwinkisha yisend yivud yiwamp. Bibil ulondin anch “ushich ku chisak cha katatuku cha ditand dia Nzamb.” Tutangin kand anch: “Nzamb wamujimbisha, wamutek piur pa yom yawonsu, wamupil kand dijin dipandakena majin mawonsu.”—Filip 2:9.

YEHOVA KAVURAMEDINAP YOM TUSADINA

13, 14. Mutapu ik wiyovilay Yehova piur pa yom tumusadidina?

13 Tukutwish kwikal ni kashinsh anch Yehova ukwatin nich usey yom yawonsu tumusadidina. Ndiy ukat kututesh anch tukwetap kashinsh ka usu tusadina ap anch twidjidjekin piur pa ukaliweny wetu. Ukat kututongin nakash anch tudi mu yakamish mulong wa mudimu ap mulong wa dijuku dietu. Ni ukat kututesh anch tutwishinap kusal mutapu twading kusalang mu mudimu wend mulong wa mayej. Tukutwish kwikal ni kashinsh kawonsu anch Yehova ukwatin nich usey kushishaman kwetu chikalap nchik milong tukweta.—Tang Hebereu 6:10, 11.

14 Vurik kand anch Yehova “ukat kwakul kulembil kwetu.” Tukutwish kwikal ni kashinsh ang anch twamulembil, ukututesh. (Kuseng 65:2) “Mwin riy, ndiy Nzamb ukata kupan kwongoj kwawonsu” ukutwinkish chom chin chawonsu mulong wa kushal piswimp ni ndiy. Yisu yivud ukutwish kusadin akadivar nau anambaz mulong wa kutukasikesh. (2 Korint 1:3) Yehova ukweting musangar anch twayovil antu akwau riy. “Mwin kumwovil kazwendj riy ukat kumusondjik [Yehova], ni [Yehova] ukez kamuchirishin mulong wa chom chasalay.” (Jinswir 19:17; Mateu 6:3, 4) Chawiy anch tukat kupan ni kuyikwash akadivar netu, Yehova umen yom yiwamp tusadina mudi tumusondjikin ndiy. Ni ushidinamu kuyifut uwamp winou.

DIFUT KATAT NI CHIKUPU

15. Difut ik uchingejina kurutu oku? (Tal chipich cha kwinsambishin.)

15 In Kristu Azizidilau Many akwet ruchingej  ra kutambul “chibangul cha kutentam,” difut dikuyinkishau kudi Yesu. (2 Timote 4:7, 8) Pakwez ukwetap usey ukemp ku mes kwa Nzamb anch ruchingej rey rishalijangen ni riner. Ma miliyon ma “amikoku akwau” a Yesu akwet richingej ra difut dia mwom wa chikupu mu machuku ma kurutu mu paradis panap pansh. Mwinimwa “akez kasangar nakash mu kuvul kwa chisambu.”—Yohan 10:16; Kuseng 37:11.

16. Kukasikesh ik tutanina mu mukand wa 1 Yohan 3:19, 20?

16 Yisu yimwing tukutwish kuman anch tusadinap yom yivud mu mudimu wa Yehova, ap tukutwish kwiyipul anch Yehova ukat kusanger yom tusadina. Tukutwish kwiyov anch tuwanyidinap kutambul difut diwamp ap dimwing. Pakwez tufanyidinap kuvuramen anch “Nzamb udi mujim kupandakanamu michim yetu, ndiy wij kand yom yawonsu.” (Tang 1 Yohan 3:19, 20.) Anch twamusadin Yehova mulong wa ritiy ni rukat retu mulong wendendiy, tukutwish kwikal ni kashinsh anch ukutufut, ap anch yom tusadina yimeken kudi etu kwikal yikweta usey ukemp nakash.—Marko 12:41-44.

17. Kufut ik kumwing kutusangaredina nlel ?

17 Ap mu machuku minam ma nsudien mu ditenchik diyimp dia Satan, Yehova uyiyukishin antu end. Ukwet kashinsh anch tukwet ronganyin nakash ni tukwet chisambu pitudia mu dijuku dia akadivar nau anambaz a mwi ngand yakabuj. (Isay 54:13) Mwaning, mudi mwakanay Yesu, Yehova utufutin katat kusutin kutwinkish dijuku dia akadivar nau anambaz atukatina adia pa mangand mawonsu. (Marko 10:29, 30) Chikwau kand, antu amusurabina Nzamb ayifutin chisambu cha mukach ni musangar.—Filip 4:4-7.

18, 19. Mutapu ik wiyovilau atushalapol a Nzamb piur pa difut ditambwilau?

18 Atushalapol a Yehova mwi ngand yakabuj atambwiling difut didiokila kudi Tatukwetu. Chilakej, Bianca wa mwi ngand ya Allemagne ulondin anch: “Nimujikitishin Yehova nakash mulong wa kwinkwash mu yakamish yam ni mulong wa kwikal niyam dichuku diawonsu. Mangand makwet kanrumbangesh ni madi makad musangar. Pakwez mudi munidia piswimp ni Yehova, niyovil kwikal mu diking. Chisu chawonsu nikata kwipan kudi ndiy, ukat kwinyukish nakash.”

19 Tushinshikin rusangu ra Paula ukweta mivu 70 wa mu Canada. Ulondin anch ap anch mayej mend mamukangeshin kwend ni kushemunik, yom yiney yimukangeshinap kusal mudimu wa kulejan. Uwejidinaku anch: “Nitanidinamu mu kusadin mitapu kushalijan ya kulejan mudi ku telefon ni kupan uman wa kukashimwish. Mulong wa kwikasikesh amwinam, nilamin kaye wam mudia ma verse ni yitongijok nikata kufund pinikata kutang mikand yetu, yinikata kutang yisu yawonsu. Nimutazukining kaye winou anch ‘Kaye wam wa kwimpandish.’ Kuziy kudi kwa chisu chikemp anch twashinshikin mu kushilamu kwa Yehova. Yehova udiaku yisu yawonsu mulong wa kutukwash, kulondwish ni yishiken yetu.” Milong yey yikutwish kushalijan nakash ni ya Bianca ap ya Paula. Anch chidi mwamu, ukutwish kutongin ku mutapu ukatay Yehova kukufut ni kuyifut antu akunyingumukina. Chidi chiwamp mudi ik kutongin mutapu ukufutinay Yehova katat ni mutapu ukukufutay mu machuku ma kurutu!

20. Yom ik tukutwisha kuchingej anch twadandamen kusal usu wa kumusadin Yehova nich kushinshaman?

20 Kangal kuvuramen anch malembil mey makashinsh ‘makukuletin difut dijim.’ Ukutwish kwikal nich kashinsh anch ‘kupwa kwa kusal rusot ra Nzamb, ukutambul yom yashilayamu.’ (Hebereu 10:35, 36) Chawiy el tudandamenany kukasikesh ritiy retu ni kusal chom chin chawonsu tukutwisha kusal mulong wa kumusadin Yehova. Tukwet kashinsh anch Yehova ukutufut!—Tang Kolosay 3:23, 24.