Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 12 , 2016

Mwikadil wa Kwitudish—Njil ya Manangu

Mwikadil wa Kwitudish—Njil ya Manangu

Toñi, ukweta chisend cha kulam ayej ap antu ananapina kal, wakokala ku chis, ni mband ukweta mivu pakach pa 40 ni 60 wamwakula. Mband winou wamusaala Toñi ni kumuswejen mulong kashikap kurutu kwa chisu mulong wa kumutal makwend a mband winou wananapina kal. Toñi washika kwend chisu chiwamp. Chawiy wamudutisha mband winou pamwitay dilikishin mulong wa kulik kwovijan.

PEZAY kand kapamp kakwau, mband winou wamuswingisha kand Toñi. Mutapu ik wasalay? Toñi ulondin anch: “Wading mwikadil umwing ukash, kulond kwend kuyimp kwadingap kwau ni mayingishin.” Chawiy, Toñi wita kand dilikishin ni wamuleja mband winou anch umen mar mamenay.

Anch wading Toñi, utongin anch wela kusal nchik? Ov, wakimba kupakish kumekesh mwikadil wa kwidutish? Chakimba kukukasiken kuyikel mwikadil wey? Pakad ntaad, chiswapelap kuninet piur pa yom twadiokala kal kulond kwiur oku. Chisu tukweta yakamish ap anch aturumbukin, chikutwish chatukasiken kulam mwikadil wa kwitudish.

Pakwez, Bibil, uyikasikeshin in Kristu kwikal ni mwikadil wa kwitudish. Chawiy, Dizu dia Nzamb dibombakeshin mwikadil winou nich manangu. Jakobu wipula anch: ‘Nany ukweta manangu ni ronganyin pakach pen? Chifanyidin amekesh yom yiney ku mwom wend uwamp, ni ku yisalijok yend yiwamp yidiokila ku kwitudish ni manangu.’ (Jak. 3:13) Mu mutapu ik mwikadil wa kwitudish umekeshin patok manangu  madiokila mwiur? Ni chom ik chikutwisha kutukwash kukudish mwikadil winou wa winzamb?

MANANGU MA MWIKADIL WA MU SPIRITU WA KWITUDISH

Mwikadil wa kwitudish ukutwish kudutish ujim. “Kwakul [kudutina] kukat kudiosh ujim, pakwez dizu dikash dikat [kupandakesh] ujim.”Jinsw. 15:1.

Mwikadil wa ujim ukutwish kusal chom chading chiyimp chipandakan kuyip mulong chidi mudi kuwejin many pa kasu. (Jinsw. 26:21) Pakwez, mwikadil wa kwitudish yisu yivud ukat kukepish milong. Ukutwish ap kumudutish muntu utukisina.

Toñi wamana mutapu wasadika yom yiney. Pateshay kwakul kwa kwitudish kwa Toñi, mband winou wasambisha kudil. Walonda anch milong yend ni ya dijuku diend yading yimurumbangeshin mu manangu. Toñi wapana uman uwamp, ni dilejan dia Bibil diasambisha—Yiney yawonsu yidi yibudikin ya kwitudish kwend ni mwikadil wend wa chisambu.

Mwikadil wa kwitudish ukutwish kutuletin chiyukish. “Ayuk kwau itudishina mulong awiy akez kaswan ngand.”Mat. 5:5, TMK.

Mulong wak antu itudishina ayukin? Kusutin kwitudish kwau, antu avud adinga in matend adi katat ni chiyukish. Awapishin kal mikadil yau, ni ij anch machuku mawamp ma kurutu mayichingedin. (Kol. 3:12) Adolfo, udia kalam wa munyingumuku mwi ngand ya Espagne, uvurikin mutapu wadinga mwom wend kurutu ijika uyakin.

Adolfo ulondin anch “mwom wam wadingap ni chitongijok ap chimwing. Mwikadil wam wading uyimp nakash, chawiy ap arund nam angovang wom mulong wa dizaz ni chisum nading nich. Kupwa yom yakarumuku mu mutapu ukwau. Mu matend antapa yitat musamban, ni nakimba kufa.”

Chawiy, katat, kusutin mazu ni chilakej, Adolfo uyifundishin antu akwau kwikal ni mwikadil wa kwitudish. Antu avud akat kumusejin mulong wa chirungul ni untu wend usangarishina. Adolfo ulondin anch uyukin mulong wa kuswimp kwasalay. Ni umujikitishin Yehova mulong wamukwasha kukudish mwikadil wa kwitudish.

Mwikadil wa kwitudish ukat kumusangaresh Yehova. “Mwanam ikundj, ikal mwin manangu chakwel wez usangarish muchim wam, mwamu ni yam nikez katwish kumwakul muntu [ukwinsarumuna].”Jinsw. 27:11.

Yehova, amusarumwining kudi mukankuny wend Djabul. Nzamb ukwet diyingishin diakujiman mulong wa masaal minam mayimp, pakwez Bibil ulejen anch Yehova udi “wakad kwovang ujim swa.” (Kub. 34:6) Anch twimburij mwikadil wa Nzamb wa kulik kwov ujim swa ni wa kwitudish, tulondwil njil ya manangu yikumusangaresha Yehova nakash.—Efes. 5:1.

Mangand ma katat madi mayimp nakash. Tukutwish kuyichin antu ‘in kwibaz, in kwishimek, in masaal, . . . in matungu, akad kwikand ayinau, in chisum.’ (2 Tim. 3:2, 3) Yom yiney yikutwishap yamukangesh mwin Kristu kukudish mwikadil wa mu spiritu wa kwitudish. Dizu dia Nzamb dituvurishin anch “manangu madiokila mwiur . . . makwet chisambu, ni kwitudish.” (Jak. 3:17) Kusutin ku kwikal ni chisambu ni spiritu wa kwitudish, tukwikal nich kashinsh anch tukwet manangu ma winzamb. Manangu mudi minam makutwish kutubachik kwakul kwa kwitudish anch atusarumun ni makutusejish piswimp ni Musul wa manangu makad mwimbu, Yehova.