Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 12 , 2016

Letany Yakamish Yen Yawonsu Kudi Yehova

Letany Yakamish Yen Yawonsu Kudi Yehova

“Letany yakamish yen yawonsu kudi [Yehova], mulong ukat kukulamany.”—1 PITA 5:7.

MIMINY: 38, 7

1, 2. (a) Mulong wak tukweting yakamish? (Tal chipich cha kwinsambishin.) (b) Yom ik tukushinshikina mu mutu wa mulong winou?

NLEL, Satan “ukat kuzomb mudi ntambu wonyina ukata kukimb nany ukudiay.” (1 Pita 5:8; Kujingunik 12:17) Mudi chibudikin, mwom yidi mu yakamish nakash, ni atushalapol a Nzamb niyau adi mu yakamish. Atushalapol a Nzamb a pakur niyau ading ni yakamish. Chilakej, Bibil ulondin anch Mwant David wading ni yakamish yisu yimwing. (Kuseng 13:2) Ni mupostol Paul wading ni “yakamish nakash mulong wa [Yikumangen] yawonsu.” (2 Korint 11:28) Pakwez yom ik tukutwisha kusal anch tudi mu yakamish?

2 Tatukwetu mukatish udia mwiur wayikwasha atushalapol a pakur kutan ukwash mulong wa yakamish, ni ukatin kusal mwamu mulong wetwetu nlel. Bibil utukasikeshin anch: “Letany yakamish yen yawonsu kudi ndiy, mulong ukat kukulamany.” (1 Pita 5:7) Mutapu ik ukutwisha kusal mwamu? Tushinshikin mitapu yinying. Ukutwish (1) kulembil, (2) kutang ni kutongijokin pa Dizu dia Nzamb, (3) kwitiy spiritu utumbila wa Yehova akukwash, ni (4) kumulejamu muntu mukwau uchingejidina mutapu  wiyovila. Pitushinshikidina mitapu yiney yinying, sal usu wa kwijik yom yiukukata kurijek.

‘TEK CHISEND CHEY KUDI YEHOVA’

3. Mutapu ik ukutwisha ‘kutek chisend chey kudi Yehova’?

3 Mutapu wa kusambish tukutwisha kutek yakamish yetu kudi Yehova udi kusutin malembil makin. Anch udi mu yakamish, Tatukwey mukatish udia mwiur ukatining anch umuleja mutapu wiyovila kamu. Nfund a kuseng David wamwilembina Yehova anch: “Tesh kulembil kwam, A! [Yehova].” Mu kuseng winou, David walonda kand anch: “Tek chisend chey kudi Yehova, ndiy ukukukwash.” (Kuseng 55:1, 22 NWT.) Kupwa kwa kusal yawonsu ukutwisha kusal mulong wa kupwish mulong, kumulembil Yehova ni muchim umwing kukukukwash nakash pa ndond pa kwiyakamish. Pakwez malembil makwet ukwash ik? Makutukwash nchik tulik kwiyakamish nakash?—Kuseng 94:18, 19.

4. Anch tudi mu yakamish, mulong wak kulembil kudi kwa usey nakash?

4 Tang Filip 4:6, 7. Mutapu ik wakwilingay Yehova ku malembil metu madiokila ku muchim ni ma chisu chawonsu? Ukutwish kutukwash kwiyov zong ni kwiyep yitongijok ni yovil yiyimp. Pa ndond pa kwikal ni yakamish ni wom, Nzamb utukwashin twikala ni chisambu cha mukach. Akadivar nau anambaz netu avud akwet chisambu chinech. Niyey ukutwish kwikal ni chisambu chinech. “Chisambu cha Nzamb” chikutwish kukukwash kuwin yakamish yin yawonsu! Ukutwish kuchingejin kushilamu kwa Yehova anch: ‘Kangal wiyakamishany, mulong am nidi Nzamb wen. Nikukukasikeshan ni kukukwashany kand.’—Isay 41:10.

CHISAMBU CHA MUKACH CHIDIOKIL MU DIZU DIA NZAMB

5. Mutapu ik ukutwisha Dizu dia Nzamb kukukwash kwikal ni chisambu cha mukach?

5 Mutapu wa kaad wa kwikal ni chisambu cha mukach udi kutang ni kutongijokin pa ma verse ma mu Bibil. Mulong wak chidi cha usey? Bibil udi Dizu dia Nzamb. Mudi manangu ni yiyul ya kusadin ya ukwash yidiokila kudi Sakatang wetu. Ap anch udi mu yakamish, ukutwish kutang nakash piur pa yitongijok ya Nzamb ni kutongijokin mutapu chiyul chend chinech chikutwisha kukukasikesh. Yiney yikukukwash kuwin, kukepish, ni kwipuk yakamish. Yehova utwitin pakampwil kutang Dizu diend mu kwikal ‘atakamena ni akasikena’ ni pikil kwikal ni ‘wom ni kangal atwovish wom.’—Joshua 1:7-9.

6. Mutapu ik ukutwisha kukukwash mazu ma Yesu?

6 Mu Dizu dia Nzamb, tutangin mutapu walonday Yesu mulong wa antu. Antu ading akatin kumutesh mulong mazu mend mading kukasikeshan ni ma ukwash, pakampwil kudi antu ading aziyina ni anenganena. (Tang Mateu 11:28-30.) Yesu watongang nakash piur pa mutapu wiyovangau antu akwau. (Marko 6:30-32) Mudi kamu mwakanay Yesu kuyikwash apostol endangay nend, ukutukwash niyetu nlel. Tukwetap kuswir kwa kwikal ni Yesu chakwel tutaninamu. Mudi Mwant wetu mwiur, Yesu udandamedin kutumekeshin rukat. Chawiy anch udi mu yakamish ukutwish kwikal ni kashinsh anch ukwikal ni yeyey ni kukukwash pa chisu chiwanyidina. Yesu ukat kutwinkish richingej ni kutakaman, yikata kutukwash kuwin yakamish.—Hebereu 2:17, 18; 4:16.

MIKADIL YIDIOKILA KU SPIRITU WA NZAMB

7. Mutapu ik tutanidinamu mu spiritu utumbila wa Nzamb?

7 Yesu wakana anch Tatukwetu wa mwiur  ukutwinkish spiritu utumbila anch twamwit. (Luka 11:10-13) Mutapu ik ukwashina mutapu winou wa kasatu kukepish yakamish? Spiritu utumbila wa Nzamb, ap usu wend, utukwashin kwikal ni mikadil yiwamp yikwetay Nzamb wetu mwin dikand. (Kolosay 3:10) Mu Bibil, mikadil yiney ayitazukining anch ‘dibuj dia spiritu.’ (Tang Galatia 5:22, 23.) Anch twakudish mikadil yiney, urund wetu ni antu akwau ukwikal uwamp, ni tukwiyep milong yikutwisha kutuletin yakamish. El tushinshikin mutapu ukutwisha kutukwash dibuj dia spiritu mu mitapu ya pakampwil.

8-12. Mutapu ik ukutwisha kukukwash dibuj dia spiritu utumbila wa Nzamb?

8 “Rukat, musangar, chisambu.” Anch uyisadidin antu akwau nich kalimish, ukuman anch ukwet yakamish yikemp. Mutapu ik? Anch wamekesh rukat ra ukadivar, rukat rikurikina, ni kalimish, ukutwish kwiyep yisu yivud yom yikutwisha kuletish yovil yiyimp mudi ujim, kunenganan, ni ushon. Yom yiney yikukwash kulam chisambu ni antu akwau.—Rom 12:10.

9 “Kushimpish muchim, kudimuk, kuwap.” Bibil ulondin anch: “Pakwez ikalany antu adimukina, in kwanakenijan muntu ni mukwau, in kulikishijadin muntu ni mukwau mudi mwakulikishinanyau en kudi Nzamb [kusutin] Kristu.” (Efes 4:32) Anch twalondul chiyul chinech, tukwikal ni urund wa chisambu ni antu akwau, ni tukutwish kukangesh yom yikutwisha kutuletin yakamish. Chikwau kand, chikuswapal kupwish milong yikutwisha yatushiken mulong wa kuburen kuwanyin kwetu.

10 “Ritiy.” Nlel, twiyakamishining nakash mulong wa nfalang ni yom ya ku mujimbu. (Jinswir 18:11) Mutapu ik tukutwisha kwiyep yakamish yiney? Tufanyidin kulondul chiyul cha kambuy Paul chilondina anch “sangerany nich yom yiukwetanya.” Kukasikesh ritiy mudiay Yehova kukutukwash kumuchingejin anch ukutwinkish nich rukat yom tukweta nich kuswir. Washilamu anch: “Kinikukushap, kinikez kukulikap chikupu.” Chawiy tukutwish kulond mudi Paul anch: “[Yehova], ndiy mwin kwinkwash, kinikez kwovap wom. Ov, muntu ukwinsal chom ik?”—Hebereu 13:5, 6.

11 “Kwitudish, kwilam.” Tong mutapu ukutwisha kusadin ni kukukwash anch wamekesh kwitudish ni kwilam. Mikadil yiney yikukukangesh kulond ap kusal yom yikutwisha kukuletin yakamish, ni ukutaninamu anch wipuk “rukuny rawonsu, ujim wawonsu, kuswej kwawonsu, kusalan masaal, ni [kulond kuyimp].”—Efes 4:31.

12 Ukwet kuswir kwa kwikepish mulong wa kuchingejin “chikas cha dikand cha Nzamb” ni mulong wa ‘kulet yakamish yey yawonsu kudi ndiy.’ (1 Pita 5:6, 7) Anch wikepishin, Yehova ukukukwash ni kukulam. Anch wijik yom ufanyidina kusal, ni yom yiufanyidina kulik kusal ukwichingejinap amwiney. Ukwikal ni yakamish yikemp mulong umuchingejidin Nzamb.—Mike 6:8.

“KANGAL WIYAKAMISHANY”

13. Yom ik yafilay kulond Yesu palonday anch: “Kangal wiyakamishany”?

13 Mu Mateu 6:34 (tang), tutaninamu chiyul cha Yesu cha manangu anch: “Kangal wiyakamishany.” Chiyul chinech chikutwish kumekan anch chitukasikedin kuchisadin. Pakwez, yom ik yafilay Yesu kulond? Twilej kal anch David ni Paul ikala mu yakamish yisu yivud. Yesu kafilap kulond anch muntu umusadidina Nzamb kakutwishap kwikal ni yakamish. Pakwez, Yesu wayikwasha in kwilej end kutesh anch kulik kwiyakamish,  ap kwiyakamish nakash kukutwishap kupwish milong. Milong yikat kushiken dichuku diawonsu, chawiy in Kristu kafanyidinap kwiwejin yakamish mu kutong piur pa milong yasuta kal ap ya kurutu. Mutapu ik ukutwisha kukukwash chiyul cha Yesu kukepish yakamish yikash?

14. Mudi David, mutapu ik ukutwisha kukepish yakamish?

14 Yisu yivud, antu akat kwiyakamish mulong wa kurumbok kwasalau pakur. Akat kwifish nich piur pa yom yasalau ap anch kwasutin kal mivu yivud. Mu yisu yivud Mwant David wiyakamishang mulong wa kurumbok kwend. Walonda anch: ‘Muchim wam ulimin mulong wa yitil.’ (Kuseng 38:3, 4, 8, 18) Mu chisu chinicha, David wasala chom chimwing cha manangu nakash. Wachingejina mu riy ra Yehova ni kulikishin kwend. Ni David wova kand musangar pa kwijik anch Nzamb wamulikishina.—Tang Kuseng 32:1-3, 5.

15. (a) Yom ik yikwau tukutwisha kwilejin kudi David? (b) Yom ik tukutwisha kusal chakwel tukepisha yakamish? (Tal mushet “ Mitapu Yimwing ya Kusadin Mulong wa Kukepish Yakamish.”)

15 Mu yisu yikwau, ukutwish kwiyakamish piur pa yom ya katat. Chilakej, chisu chafunday David kuseng 55, wading ukwet wom anch akimbin kumujip. (Kuseng 55:2-5) Pakwez, kalikap anch yakamish yiyipish ruchingej rend mudiay Yehova. David wamwilembina Yehova chakwel amukwasha piur pa milong yend, pakwez wijika kand anch chading cha usey kusal chom kanang piur pa mulong wend. (2 Samuel 15:30-34) Ukutwish kwilejin kudi David. Pa ndond pa kulik anch yakamish yikupandakan, sal yawonsu ukutwisha kusal mulong wa kupwish mulong, ni chingej anch Yehova ukukukwash.

16. Mutapu ik ukukwashina kurumburik kwa Dijin dia Nzamb kukasikesh ritiy rey?

16 Yisu yimwing mwin Kristu ukutwish kwiyakamish piur pa milong ya machuku ma kurutu. Pakwez ufanyidinap kwiyakamish piur pa yom yakad kal kushiken. Mulong wak? Mulong yisu yivud, yom yikusadikangap kwau mu mutapu uyimp mudi mutapu twada tutongina. Vurik kand anch kwikil mulong ukukanganyay Nzamb kupwish. Dijin diend dirumburikin anch ‘Ukat Kwikadish.’ (Kubudik 3:14) Chawiy, tufanyidinap kwakam piur pa machuku ma kurutu, mulong dijin dia Nzamb dimekeshin anch yom yawonsu yitonginay mulong wa antu yikuwanyin. Ukutwish kwikal ni kashinsh anch Nzamb ukuyukish antwend awonsu ashinshamena, ni kuyikwash kukepish yakamish yau piur pa yom ya machuku masutina kal, ya katat, ni ya machuku ma kurutu.

KUMULEJAMU MUNTU UCHINGEJIDINA

17, 18. Mutapu ik ukutwisha mambamb mawamp kukukwash chisu chiudia mu yakamish?

17 Mutapu wa kanying ukukukwasha chisu udia mu yakamish udi wa kulond yom patok  ni win kashinsh chisu wambambina ni muntu uchingejidina. Mbay ney wa uruw, murund ney wa piswimp, ap mukurump wa chikumangen ukutwish kukukwash kutesh mulong wey nawamp. Bibil utulejin anch: “Kwakam mu muchim kukat kumuziyish muntu, pakwez dizu diwamp dikat kumuletin musangar.” (Jinswir 12:25) Bibil ulondin kand anch: “Kwakad chiyul kutenchik kukat kuwa, pakwez in chiyul avud kutenchik kukat kujamish.”—Jinswir 15:22.

18 Yikumangan yetu yitukwashining kukepish yakamish. Ku yikumangan rubing rawonsu, ukat kusutish chisu pamwing nau akadivar nau anambaz ney, akutongidining ni akatina kukukasikesh. (Hebereu 10:24, 25) Mudi ‘kukasikeshijan’ ku kukukasikesha ni kukusal anch chikuswapel kuwin yakamish yin yawonsu.—Rom 1:12.

URUND WEY WA PISWIMP NI NZAMB KUDI KUKASIKESH KUKASH

19. Mutapu ik ukutwisha kwikal ni kashinsh anch urund wey wa piswimp ni Nzamb ukukukasikesh?

19 Mukurump umwing wa chikumangen wa mu Canada wileja mutapu chidia cha usey kudjibul yakamish yend kudi Yehova. Wading ni mudimu umwing umuletidina yakamish nakash, wading mulej ni mwin kuyiyul ansand a shikol, wading kand ni chijil chamwinkau ku hopital chamuletina yakamish. Yom ik yamukwasha kwikal ni usu? Piur pa yiney yawonsu, wasala usu nakash wa kukasikesh urund wend ni Yehova. Arund akin ading kand ukwash kudi ndiy mu yirung ya mar, ni wamuleja mukajend yom patok ni win kashinsh piur pa mutapu wadingay wiyovilay. Chikwau kand, amakurump akwau ni kalam wa munyingumuku amukwasha kuman mulong wend mudi muumenay Yehova. Dokiter niyend wamukwasha mukadivar winou kwov kurumburik kwa chijil chamwinkau ku hopital, ni chamuswapela kuswimp program wend ni kwikal ni chisu cha kupim ni kusengan. Pakemp pakemp wileja mutapu wa kushinshikin mulong wend ni mutapu wiyovangay. Ang kudi chom chakaday kutwish kupwish, wamuchingejinang Yehova chakwel amukwash.

20. (a) Mutapu ik tukutwisha kutek yakamish yetu kudi Nzamb? (b) Yom ik tukwambambina mu mutu wa mulong ulondwilaku ou?

20 Mu mutu wa mulong winou, twilej kal mutapu chidia cha usey kutek yakamish yetu kudi Nzamb kusutin kumulembil Yehova ni kutang Dizu diend ni kutongijokin pa yom tutangina. Twilej kal kand mutapu chidia cha usey kwitiy anch spiritu utumbila wa Yehova atukwash, kwambamb ni muntu tuchingejidina, ni kukumangan ku yikumangan ya win Kristu. Mu mutu wa mulong ulondwilaku ou, tukwilej mutapu utukwashinay Yehova kusutin ku kutwinkish ruchingej ra kutufut. —Hebereu 11:6.