Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 12 , 2016

‘Kutek Manangu Mey ku Yom ya mu Spiritu Kurumburikin Mwom ni Chisambu’

‘Kutek Manangu Mey ku Yom ya mu Spiritu Kurumburikin Mwom ni Chisambu’

“Awiy akata kulondul Spiritu [atekining manangu mau] ku yom ya mu spiritu.”—ROM 8:5.

MIMINY: 45, 36

1, 2. Mulong wak mukand wa Rom shapitre 8 uyitadin in Kristu azizidilau many?

UKAT kutang mukand wa Rom 8:15-17 mu chisu cha chivurikish cha rufu ra Yesu. Ma verse minam marumburil mutapu wijingau in Kristu azizidilau many anch akwet ruchingej ra kushakam chikupu mwiur. Rom 8:1 ulondin piur pa azizidilau many mudi ‘adia mu umwing ni Kristu.’ Pakwez Rom shapitre 8 uyitadin ching kwau azizidilau many? Ov, ukutwish kand wayikwash akweta ruchingej ra mwom wa chikupu panap pansh?

2 Rom shapitre 8 amufunda mulong wa azizidilau many. Akat kutambulang “spiritu” mudi antu akata ‘kuchingel chisu chikuyikadishay Nzamb anend a uswan ni kuyikwol kwa mijimbu yau.’ (Rom 8: 23) Mu machuku ma kurutu akwikal an a Nzamb mwiur. Yehova wayilikishina kal yitil yau kusutin difut. Walonda anch atentamin chawiy akutwish kwikal anend.—Rom 3:23-26; 4:25; 8:30.

3. Mulong wak antu akweta ruchingej ra kushakam chikupu pa divu akutwish niyau kwilej mukand wa Rom shapitre 8?

3 Chawiy, kwinsambishin kwa mukand wa Rom, Paul  wafunda piur pa muntu wakad kuzizilau many pakwez wading umenau kudi Yehova anch utentamin. Muntu winou wading Aburaham. Muntu winou ushinshamena washakama mivu yivud kurutu Yesu eza apan mwom wend mudi difut. (Tang Rom 4:20-22.) Nlel, Yehova ukutwish kand kuyiman in Kristu ashinshamena akweta ruchingej ra kushakam pansh chikupu anch atentamin. Akutwish kand niyau kutaninamu ku chiyul chidia mu Rom shapitre 8.

4. Pitutangina Rom 8:21, yom ik tufanyidina kwiyipul?

4 Mu Rom 8:21, tutanin kushilamu kwa Yehova piur pa ngand yend yisu yikweza ni anch antu akukolik ku chitil ni ku rufu. Verse winou ulondin anch akez kasanger “[kukolik] kwa uyaj wa an a Nzamb.” Ov, wimen amwiney kwikal mwi ngand yisu? El twambambinany yom tufanyidina kusal mulong wa kushakam mwinimwa.

‘KUTEK MANANGU KU YOM YA KU MUJIMBU’

5. Yom ik yilondinay Paul mu Rom 8:4-13?

5 Tang Rom 8:4-13. Mu shapitre wa chinan wa Rom, Paul ulondin piur pa mitapu yaad ya antu, ashicha ‘kukwatijan ni yom ya mujimbu’ ni ashicha ‘kukwatijan ni yom ya mu spiritu.’ Antu amwing atongining anch Paul walonda mulong wa antu akad kwikal in Kristu ni adia a Kristu. Pakwez mu ma verse minam Paul wafunda mulong wa in Kristu ‘atazukau kwikal antu a pakampwil.’ (Rom 1:7) Chawiy awonsu ashakama ‘kukwatijan ni yom ya mujimbu’ ni ashakama ‘kukwatijan ni yom ya mu spiritu’ ading in Kristu. Mutapu ik wading ushalijadinau umwing ni mukwau?

6, 7. (a) Yisu yimwing dizu “mujimbu” dirumburikining yom ik mu Bibil? (b) Mutapu ik usadidinau dizu “mujimbu” mu Rom 8:4-13?

6 Anch Bibil wajimbul dizu “mujimbu,” dikutwish kurumburik yom yivud. Yisu yimwing dirumburikining mujimbu wetu wa mbij. (Rom 2:28; 1 Korint 15:39, 50) Dikutwish kand kulond piur pa divar. Chilakej, Bibil ulondin anch Yesu ‘wadiokala kwi mbut ja David kukwatijan ni ku mujimbu,’ ni Paul wayitazuka in Yuda anch ‘anamakwend ku mujimbu.’—Rom 1:3; 9:3.

7 Chawiy, yom ik yakimbay kulond Paul  palonday piur pa antu ashicha ‘kukwatijan ni yom ya ku mujimbu,’ yidia mu Rom 8:4-13? Chakwel tutana chakul, tukutwish kutang Rom 7:5. Mwinomu Paul wafunda anch: “Pitwadinga etu atukasidin ku yitil ya kuvadik nich mu wuntu wetu, Yijil yasarumuna maku ma yitil chakwel yisala midimu yau mu mijimbu yetu.” Mu verse winou Paul urumburil anch antu ashicha ‘kukwatijan ni yom ya ku mujimbu’ adi antu akata kushinshikin ni kulondul maku mau ma yitil ni kusal yom yin yawonsu yikatinau kusal.

8. Mulong wak Paul wayibabesha a Kristu azizidilau many piur pa kushakam ‘kukwatijan ni yom ya kumujimbu’?

8 Mulong wak Paul wayibabesha a Kristu azizidilau many piur pa kushakam ‘kukwatijan ni yom ya ku mujimbu’? Ni mulong wak in Kristu nlel awonsu akwet kuswir kwa kubabesh kwinoku? Mulong kashalapol win mwawonsu ushinshamena wa Nzamb ukutwish kusambish kusal anch maku mend mikala dishin dia yom mu mwom wend. Chilakej, Paul wafunda anch akadivar amwing a mu Rom ading aswik a “maku mau mayimp ma mujimbu.” Chinech chirumburikin anch ading aswik a masandj, yakudia, ni kusanger yom yikwau yading ya usey mu mwom wau. (Rom 16:17, 18; Filip 3:18, 19; Jud 4, 8, 12) Ni chisu chimwing mu chikumangen cha Korint mwading mukadivar umwing wasala masandj “ni mband wa tatukwend.” (1 Korint 5:1) Mu kulond patok in Kristu akusambish ading ni kuswir kwa kubabesh kwa Paul piur pa kushakam ‘kukwatijan ni yom ya ku mujimbu’. —Rom 8:5, 6.

9. Rom 8:6 kalondinap piur pa chom ik?

9 Kubabesh kwinoku kututadin kand niyetu nlel. Ap muntu wamusadina kal Yehova mu mivu yivud ukutwish kusambish kushakam ‘kukwatijan ni yom ya ku mujimbu.’ Kwawiy kulond anch Paul walonda ang tufanyidinap kutong mulong wa yom mudi yakudia, mudimu, kwipuwangej, ap yom ya rukat? Bwat. Chiyipinap kutong yom mudi yiney mu mwom. Ni Yesu wasangera yakudia ni wayidisha antu akwau. Wading kand ukwet kuswir kwa kwiswedish. Ni Paul wafunda anch mu uruw, kumanijan kuding kwa usey.

Mambamb metu mamekeshining yom ik? (Tal paragraf wa 10, 11)

10. Dizu ‘kutek manangu mau ku’ dirumburikin ik?

 10 Yom ik yafilay kulond Paul palonday anch: ‘Kutek manangu ku’? Dizu dia Grek diasadinay Paul dirumburil kutek manangu min mawonsu ni yitongijok ku chom kanang. Mwin kwilej umwing urumburil anch dizu dined adisadidin mulong wa antu “ipanina nakash chisu chawonsu piur pa yom yilondinau,” ni kushinshikin nakash maku mau mayimp. Akat kwitiy anch maku minam mayitakel mu mashakamin mau.

11. Yom ik yimwing yikutwisha kwikal ya usey kudi etu?

11 In Kristu a ku Rom ading afanyidin kwishinshikin ayinau ni kwijik anch atekin manangu mau ku yom ik. Ov, yading ‘yom ya ku mujimbu’? Nlel, niyetu tufanyidin kutong piur pa yom yikweta usey nakash. Yom ik tukatining kulond nakash? Yom ik tukatining kusal nakash? Amwing akutwish kujingunin anch akatining kutong nakash piur pa kusadin mitapu kushalijan ya maar, kuwapish yikumbu yau, kuland masun masu, kukimb nfalang, ap kwirijek mulong wa kuya mu konje. Yom yiney yiyipinap kwau. Yikutwish kwikal yom ya usey mu mwom wetu. Chilakej, Yesu niyend wasala maar ku musambu wa uruw, Paul niyend wamuleja Timote kuna, ‘tu maar tukemp’ mulong wa ukash wa mujimbu wend. (1 Timote 5:23; Yohan 2:3-11) Pakwez maar madingap ma usey mu mwom yau. Chidi nchik mulong wetwetu? Yom ik yidia ya usey nakash mu mwom wetu?

12, 13. Mulong wak tufanyidin kubabal piur pa yom tushinshikidina?

12 Paul wababesha anch: ‘Kutek manangu ku yom ya ku mujimbu chirumburikin rufu.’ (Rom 8:6) Yom ik yafilay kulond palonday mwamu? Anch tushich ‘kukwatijan ni yom ya ku mujimbu’ tukutwish kushadish urund wetu ni Yehova katat, ni kupwa tukushadish mwom mu machuku ma kurutu. Pakwez yom yiney yikushikenap. Muntu ukutwish kuswimp. Umuvurikin muntu wading ni yaku yiyimp mu Korint wopatau? Waswimpa ni walika kulondul maku mend mayimp. Wasambisha kand kumusadin Yehova mu mutapu uwamp.—2 Korint 2: 6-8.

13 Muntu winou wading chilakej chiyimp nakash cha kushakam ‘kukwatijan ni yom ya ku mujimbu,’ ni watwisha kuswimp. Chawiy anch mwin Kristu nlel wasambishin kal kulondul maku mend ma chitil pa ndond pa kulondul mbil ja Yehova, ni ndiy ukutwish kuswimp. Kuvurik kubabesh kwa Paul kukutwish kutubachik tuswimp yom tukweta nich kuswir kwa kuswimp.

‘KUTEK MANANGU KU YOM YA MU SPIRITU’

14, 15. (a) Paul utulejin kutek manangu metu ku yom ik? (b) ‘Kutek manangu ku yom ya mu spiritu’ kurumburikinap yom ik?

14 Kupwa kwa Paul kulond piur pa ubaj wa ‘kutek manangu ku yom ya ku mujimbu,’ warumburila anch: ‘Kutek manangu ku yom ya mu spiritu kurumburikin mwom ni chisambu.’ Did difut diwamp mudi ik tukutwisha kwikal nich!

15 Pakwez ‘kutek manangu ku yom ya mu spiritu’ kurumburikinap anch muntu kakutwishap kwikal ni yom yikwetay nich kuswir. Chirumburikinap kand anch muntu atonga ni alonda ching kusu piur pa  Yehova ni Bibil. Chilakej, atushalapol a Nzamb a mu mivu chitot ya kusambish ashakama mashakamin mawamp. Asangerang kudia ni kuna, kwatijan, kwikal ni majuku, ni kwikal ni midimu.—Marko 6:3; 1 Tesalonik 2:9.

16. Chom ik chading cha usey nakash mu mwom wa Paul?

16 Pakwez Paul nau in Kristu akwau akusambish kitiyap anch yom yiney yikala ya usey nakash mu mwom wau. Chilakej, twij anch Paul wading kusalang minkand. Pakwez mudimu wend wadingap wa usey nakash mu mwom wend. Chom chading cha usey nakash mu mwom wa Paul kwading kumusadin Nzamb. Paul washinshikina nakash mudimu wa kulejan ni kufundish. (Tang Midimu 18:2-4; 20:20, 21, 34, 35.) Akadivar nau anambaz a mu Rom akata kumwimburij Paul, niyetu tusadin mwamu.—Rom 15:15, 16.

17. Yom ik tukutaninamu anch ‘twatek manangu metu ku yom ya mu spiritu’?

17 Mwom wetu ukwikal mutapu ik anch twipan kumusadin Yehova? Rom 8:6 ulondin anch: ‘Kutek manangu ku yom ya mu spiritu kurumburikin mwom ni chisambu.’ Kusal mwamu kwitin kwitiy anch spiritu wa Yehova atakel manangu metu ni kwilej kutong mutapu utonginingay. Yehova utukana mwom uwamp ni wa musangar katat, ni mu machuku ma kurutu mwom wa chikupu.

18. Mutapu ik tukutwisha kwikal ni chisambu anch twatek ‘manangu ku yom ya mu spiritu’?

18 Yom ik yafilay Paul kulond palonday anch: ‘Kutek manangu ku yom ya mu spiritu’ kukutuletin chisambu? Muntu mwawonsu ukweting kuswir kwa chisambu, pakampwil chisambu cha mu manangu, pakwez antu akemp awiy akata kuchitan. Kujikitish nakash kudi Yehova mulong tukutwish kwikal ni chisambu chakin cha mu manangu. Tukutwish kand kwikal ni chisambu nau antu a mu dijuku dietu ni antu a mu chikumangen. Mulong tudi antu akad kuwanyin, yisu yimwing tukutwish kwikal ni mulong nau akadivar nau anambaz netu. Anch yom yiney yashiken tukulondul chiyul cha Yesu chilondina anch: “Yang swa, ukachakulany nend mwanamakwey.” (Mateu 5:24) Vurik anch mukadivar ap nambaz ney niyend umusadidining Yehova, “Nzamb ukata kupan chisambu.”—Rom 15:33; 16:20.

19. Mutapu ik umwing wa chisambu tufanyidina kusanger?

19 Anch twatek ‘manangu metu mu yom ya mu spiritu,’ tukwikal kand mu chisambu ni Nzamb. Muprofet Isay wafunda anch: ‘Ey, [Yehova] ukuyilam antu akata kukuchingejin, ukuyinkish chisambu chakad musul mulong akat kukukumangen ey.’—Isay 26:3; tang Rom 5:1.

20. Mulong wak ujikitishin nakash mulong wa chiyul chidia mu Rom 8?

20 Ap anch tukwet ruchingej ra kushakam chikupu mwiur ap pansh, etu awonsu tukutwish kutaninamu mu chiyul cha manangu chidia mu Rom shapitre 8. Tujikitishin nakash mulong Bibil utukasikeshin kushinshikin kumusadin Yehova kusutamu maswir metu. Twij anch kusutin ku kutek ‘manangu metu ku yom ya mu spiritu,’ tukutwish kwikal ni difut diwamp. Paul wafunda anch: “Chipan cha Nzamb udi mwom wa chikupu mu Kristu Yesu Nsalejetu.”—Rom 6:23.