Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 12 , 2016

Akukolanya Kusutin ku Ranaken ra Nzamb

Akukolanya Kusutin ku Ranaken ra Nzamb

“Mulong yitil kiyikez kaswanip padi en. . . udiany mwinshin mwa ranaken.”—ROM 6:14,TMK.

MIMINY: 46, 13

1, 2. Mutapu ik ukutwisha kutukwash Rom 5:12?

ROM 5:12 ulondin anch: “Yitil yandamina mu mangand ku muntu umwing, ndiy kamu Adam, chad yitil yend yaleta rufu. Chawiy rufu riner rashika kudi antu awonsu, mulong antu awonsu asala yitil.” Winou udi verse twijing nawamp ni tukata kusadin chisu tuyifundishining antu Bibil.

2 Verse winou amusadidin nakash mu buku Chom ik Chakin Kamu Chifundishinay Bibil? ni Chom ik Chitufundishinay Bibil? Anch twilej shapitre wa 3, 5, ni wa 6 pamwing ni anetu ap antu akwau, tukukat kamu kutang Rom 5:12. Tukutwish kusadin verse winou mulong ijika mulong wak divu didiap paradis, mulong wak tukwet kuswir kwa difut, ni mulong wak tukat kufa. Pakwez verse winou ukutwish kutukwash kand etu awonsu kumekesh kujikitish kwetu mulong wa urund wetu ni Yehova. Ukutwish kutukwash kukwat mipak yimusangareshina ni kudandamen kuchingejin yom ya kurutu yatushilayimu kal.

3. Yom ik tufanyidina kuvurik piur pa mwikadil wetu?

3 Cha ushon, etu awonsu tudi akayitil. Tukat kurumbuk dichuku  diawonsu. Pakwez Yehova udi mwin riy. Wij anch tudi antu akad kuwanyin, ni ukatining kutulikishin. (Kuseng 103:13, 14) Yesu watuleja anch tufanyidin kumwit Nzamb chakwel atulikishin yitil yetu. (Luka 11:2-4) Anch Yehova watulikishin yitil yitwasala pakur, tufanyidinap kand kudandamen kuyitongang. El tushinshikin mutapu ukatay Yehova kutulikishin.

MUTAPU UKUTWISHAY YEHOVA KUTULIKISHIN

4, 5. (a) Yom ik yitukwashina kutesh Rom 5:12? (b) “Ranaken ra Nzamb” rirumburikin ik?

4 Mukand wa Rom, pakampwil shapitre wa 6, utukwashin kwijik nawamp mutapu ukutwishay Yehova kutulikishin yitil yetu. Mu shapitre wa 3, twilejin anch “antu awonsu asala chitil.” Kupwa Paul walonda anch: “Antu awonsu asala yitil, adi kwau kulemp nend Nzamb mwin kuyipandish. Mulong wa kupan kwa riy kwa ranaken rend, Nzamb wayikadisha antu atentamina kurutu kwend. Ndiy wasala mwamu mu Kristu Yesu ukata kuyikwol ku yitil yau.” (Rom 3:23, 24) Dizu dia Grek dikarumwinau anch “ranaken” dilejen chitongijok cha kusal yom mu mutapu uwamp pakad kuchingejin anch akuchirishin ap kukufut chom kanang.

5 Mwin kwilej umwing warumburila anch dizu dia Grek dilejening yom yasalay Nzamb ni Kristu mulong wa kuyipandish antu ku chitil ni ku rufu. Chawiy chikarumwidinay Traduction du monde nouveau mu Inglish dizu dined dia Grek anch “ranaken.” El tumanany yasalay Nzamb mulong wetwetu ni mutapu tukutwisha kutaninamu mu ranaken rend katat ni kutwinkish ruchingej mulong wa machuku ma kurutu.

6. Nany ukutwisha kutaninamu mu ranaken ra Nzamb, ni mutapu ik?

6 Mulong Adam wasala chitil, chitil ni rufu yayikwata antu awonsu akad kuwanyin. Chawiy chilondinay Bibil anch “rufu rayiyikela antu awonsu mulong wa chitil cha muntu winiwa umwing.” Pakwez Yehova wamekesha ranaken ni mutapu wa kuyipandish antu awonsu kusutin “muntu umwing, ndiy kamu Yesu Kristu.” (Rom 5:12, 15, 17) “Antu avud akez kwikal atentamina mulong wa kuziyil kwa muntu umwing.” Ni akutwish kuchingejin “mwom wa chikupu [kusutil] Yesu Kristu.”—Rom 5:19, 21.

7. Mulong wak chipan cha Nzamb cha difut chidi chiwamp ni cha ranaken?

7 Tong piur pa chom chinech: Yehova katwinkishap Mwanend kusu mudi difut. Pakwez wamekesha ranaken rijim pasalay mwamu mulong wa kutupandish ku chitil ni rufu. Kwikil muntu ap umwing wading uwanyidina kutambul yom yatusadinay Nzamb ni Yesu. Kujikitish mudi ik tukweta mulong asala chiswapala kutulikishin yitil ni tushakama chikupu! Tukutwish kumekesh kujikitish kwetu kudiay Nzamb kusutin mutapu tushicha mu mwom wetu.

KUJIKITISH MULONG WA RANAKEN RA NZAMB

8. Mwikadil ik tufanyidina kulik?

8 Twij anch Nzamb ukutwish kutulikishin yitil, ap yitil yijim. Pakwez tufanyidinap kusadin ranaken ra Yehova mudi diyingishin dia kusal yom yiyimp ni kutong anch, ‘Yehova ukwinlikishin.’ Mu mivu chitot ya kusambish, in Kristu amwing ading ni mwikadil winou ap anch apostol ading achid kal aom. (Tang Jud 4.) Nlel, niyetu tufanyidin  kubabal chakwel kangal atubachik kudi antu akwau ni pakemp pakemp tusambish kutong mutapu winou.

9, 10. Mutapu ik wamukolau Paul ni antu akwau ku chitil ni ku rufu?

9 Paul wayileja in Kristu anch chidi chiyimp kutong anch ang adandamen kusal yitil, Nzamb ukudandamen kuyilikishin. Paul wayileja anch afanyidin kulik yitongijok yiney mulong ading ‘afil kal kukwatijan ni chitil.’ (Tang Rom 6:1, 2.) Chirumburikin ik?

10 Kusutin difut, Nzamb wamulikishina Paul nau in Kristu akwau a mu mivu chitot ya kusambish yitil yau. Yehova wayizizila many nich spiritu utumbila mulong wa kwikal anend. Anch ashala ashinshamena, afanyina kushakam mwiur ni kuyikel pamwing ni Kristu. Mulong ading achidi kal aom pansh, mutapu ik ‘wafau kukwatijan ni chitil’? Paul wasadina kufanikesh mulong wa kumekesh anch mutapu wau wa mwom waswimpa kapamp kamwing. Walonda anch kupwa kwa Yesu kufa, amuvumbula mudi spiritu wakad kufang. Chawiy chasala anch rufu ‘rilik kumuyikel.’ Mu mutapu wawiy umwing, chading kand mwamu kudi in Kristu afa. Mwom yau yaswimpa kapamp kamwing mulong kitiyijap anch maswir mau ma chitil mayiyikela. Chawiy, asala usu wau mulong wa kushakam mu mutapu umusangareshina Nzamb. Ading ‘afil kal kukwatijan ni chitil pakwez ashich nend Nzamb kusutil Kristu Yesu.’—Rom 6:9, 11.

11. Mutapu ik in Kristu nlel ‘mwafilau kal kukwatijan ni chitil’?

11 Chidi nchik piur petwetu? Mutapu ik ‘twafila kal kukwatijan ni chitil’? Pakur, twasalang pamwing ap yom yiyimp pakad kwijik mutapu wading umenay Yehova mikadil yetu. Twading mudi ‘aswik a yom yipandakena kuyip ni akad chijil,’ chinech chirumburikin anch, “aswik a yitil.” (Rom 6:19, 20) Pakwez chisu twileja mu Bibil mutapu ukatinay Nzamb anch tushakam, twaswimpa mashakamin metu, twipana kudi ndiy, ni twatambula dibatish. Twikala ni maswir nakash ma kumuziyin Yehova ni kushakam mu mutapu umusangareshina. ‘Atukola ku yitil,’ ni “twikala kal aswik in kusal yom yitentamina.”—Rom 6:17, 18.

12. Kutond ik kufanyidinay muntu mwawonsu kusal?

12 Chikwau kand, tufanyidin kudandamen kutond. Paul walonda anch: “Yitil kiyifanyidinap kand kuyikel mijimbu yen chakwel uziyilany ku maku mayimp ma mijimbu yen.” (Rom 6:12) Etu awonsu tufanyidin kulik yitongijok yetu ya chitil ni maku mayimp ap tufanyidin kwijik mutapu wa kumayikel. Iyipula anch: ‘Ov, nikat kulikidil maku mayimp madandamena kuya kurutu chakwel nisala yom yiyimp? Ap nikat kumalik kapamp kamwing?’ Anch twamekesh kamu kujikitish mulong wa ranaken ra Nzamb, tukusal kamu yom yidia yiwamp mulong wa kumusangaresh.

UKUTWISH KURISHIKISH CHITIL

13. Mulong wak tufanyidin kwikal ni kashinsh anch tukutwish kusal yom yidia yiwamp?

13 Mu mivu chitot ya kusambish, antu amwing mu Korint adinga in kwiy, in utun wa amakundj ni amakundj ap amband ni amband, akamakaj, in kwifukwil akish, ni in kuleu maar amwijika Yehova ni amukata, ni aswimpa yaku yau. Ova usany mulong wa yom yading kusalangau. (Rom 6:21; 1 Korint 6:9-11) In Kristu a ku Rom ading akwet  kuswir kwa kuswimp mudi kwinoku. Paul wayileja anch: “Kangal wapanany yid ya mijimbu yen kwikal yom ya kusal nich yitil. Pakwez ipanany ayinen kudi Nzamb mudi antu adiokila kal ku rufu kwikal aom. Panany yid ya mijimbu yen kudi Nzamb kwikal yom ya kusal nich yom yitentamina.” (Rom 6:13) Paul wading nich kashinsh anch akutwish kusal yom yidia yiwamp ni kudandamen kutaninamu mu ranaken ra Nzamb.

14, 15. Yom ik tufanyidina kwiyipul?

14 Chidi mutapu umwing nlel. Akadivar ni anambaz netu amwing ading ni mashakamin mudi madingau nich in Korint. Pakwez kupwa kwa kumwijik Yehova, aswimpa. Chikala mudi ayitokisha. Mulong wa kumusangaresh Yehova, etu awonsu tufanyidin kuswimp mashakamin metu.Ni katat tukimbin kumekesh anch tupanin kujikitish mulong wa ranaken ra Nzamb. Chawiy tufanyidin kukwat mupak wa kurishikish maku metu mayimp ni kusadin mwom wetu mulong wa kumusadin Yehova.

15 Chidi chakin, tufanyidin kulik kusal yitil yijim mudi yasalau antu amwing a ku Korint. Tukutwishap twadandamen kusal yom mudi yiney mu chisu chawiy chimwing twachingejin anch Nzamb ukutumekeshin ranaken rend ni kutulikishin. Pakwez chidi nchik piur pa yitil yimenau antu amwing anch yidi yikemp? Ov twakwatin kal mupak wa kusal yom yiwamp mulong wa kumuziyin Yehova mu yom yawonsu?—Rom 6:14, 17.

16. Mutapu ik twija anch tufanyidin kulik yitil yakad kufundau mu mukand wa 1 Korint 6:9-11?

16 Tong piur pa kambuy Paul. Wafunda anch: ‘Am nidi muntu wa mujimbu wa mbij anlandisha kal mu uswik wa yitil. Kinovilap nawamp yom yinisadila, mulong kinikat kusalap yom yinikatila kusal, pakwez yom yinikisina, yawiy yinikata kusal.’ (Rom 7:14, 15) Ap anch kasalap yom yifundinau mu mukand wa 1 Korint 6:9-11, Paul walonda anch udandamedin kusal yitil. Wading ukatin kumusangaresh Yehova, chawiy charishikishay maku mayimp. (Tang Rom 7:21-23.) El twimburijany chilakej chend ni kusal yawonsu tukutwisha kusal mulong wa kumuziyin Yehova.

17. Mulong wak ukatina kwikal mwin kashinsh?

17 Chilakej, twij anch mulong wa kumusadin Yehova tufanyidin kwikal in kashinsh. (Tang Jinswir 14:5; Efes 4:25.) Tukatinap kwikal mudi Satan, udia “tatuku wa makasu mawonsu.” Ni Tuvurikany anch Ananias ni mukajend afa mulong adimbana makasu. Chawiy tufanyidinap kudimban. (Yohan 8:44; Midimu 5:1-11) Pakwez win kashinsh urumburikin yom yivud kulik kwau ching kudimban makasu. Anch tumekeshin chakin kujikitish kwetu mulong wa ranaken ra Nzamb, tukwikal kand in kashinsh mu mitapu yikwau.

18, 19. Chirumburikin ik kwikal mwin kashinsh?

18 Muntu ukutwish kuburen win kashinsh ap anch kalondinap makasu. Chilakej, Yehova wayileja in Isarel anch: “Kangal kwiy, ap kudimban, ap kulond makasu kudi muntu ni mukwau.” Mulong wak ading afanyidin kusal mwamu? Yehova walonda anch: “Ikalany atumbila, mulong am, [Yehova] Nzamb wen, nitumbil.” (In Levi 19:2, 11) Ap anch tufanyidinap kulond makasu, pakwez anch twayisal antu akwau itiyij chom chakad kwikal chakin, twaburen kal win kashinsh.

Ov, twakwatin kal mupak wa kulik kulond makasu? (Tal paragraf wa 19)

 19 Chilakej, muntu ukutwish kumulej mukurump wend wa mudimu ap ambayend a mudimu anch ukudiokal ku mudimu kurutu kwa chisu mulong wa kuya kumanijan ni mwingang wakanijadinay nend mulong wa kumwok. Pakwez dined didiap kwau diyingishin diakin mulong ukimbin kudiokal kurutu kwa chisu mulong wa kuya kupim. “Kumanijan kwend ni mwingang” kudi kwau kwa ka chisu kakemp, kwandam mu farmasi ap kwandam mu biro mulong wa kufut nfalang. Ov, udi mwin kashinsh anch wayidimbang akwau? Muntu winou wasalang anch akwau itiyija yom yakad kwikal yakin. Yisu yiney, antu akat kuyidimb akwau mulong wa kutambul chom kanang chikatinau ap mulong wa kwiyep dipup kanang. Pakwez etu tumuziyidin Yehova, walonda anch: “Kangal kudimban.” Tufanyidin kusal yom yilondinay anch yidi yiwamp ni yitentamina.—Rom 6:19.

20, 21. Anch tujikitishin mulong wa ranaken ra Nzamb, yom ik yikwau tufanyidina kwiyep?

20 Chakin, tukat kwiyep masandj, kuleu maar, ni yitil yikwau yijim. Kupandakan yiney, tufanyidin kwiyep yom yawonsu yikulika kumusangaresh Yehova. Chilakej, tukatap ching kwiyep masandj, pakwez tukat kwiyep kand kwipuwangej kuyimp. Kadiap kusu anch tukulewangap, pakwez tufanyidinap kuna maar nakash makutushikija piswimp ni kuleu. Chikutwish chatukasiken kujijamen yoziu mudi yiney, pakwez chiswapel.

21 Tufanyidin kwikal ni chitongijok mudi cha Paul walonda anch: “Yitil kiyifanyidinap kand kuyikel mijimbu yen chakwel uziyilany ku maku mayimp ma mijimbu yen.” (Rom 6:12; 7:18-20) Chidi chakin anch tukutwishap kwiyep yitil yawonsu. Pakwez anch twarishikish mitapu yawonsu ya yitil, tumekeshin anch tujikitishin kamu mulong wa ranaken ratumekeshinay Nzamb ni Kristu.

22. Difut ik tufanyidina kuchingejin mu machuku ma kurutu anch twadandamen kumekesh kujikitish mulong wa ranaken ra Yehova?

22 Yehova watulikishidin kal yitil yetu ni udandamedin kutulikishin. Kujikitish mudi ik tukweta mulong wa ranaken rend! Chawiy el tusal usu wa kwiyep kusal yom yilondinay anch yiyipin, ap anch antu akwau kayimenap kwikal yitil. Difut ik tukutwisha kuchingejin anch twasal mwamu? Paul walonda anch: ‘Pakwez en akukwodilany kal kudiokal ku uswik wa chitil, chad katat udiany aswik a Nzamb. Watambulany kal mabuj men ma kwishitul, chawiy kwinyim ukutambulany mwom wa chikupu.’—Rom 6:22.