Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 11 , 2016

 MUTU WA MULONG WA PA CHIBUR | KWOVIKESH KUWAMP KWA YISHIMUSHIMU PIUR PA NGAND YA MU SPIRITU

Yishimushimu ya Antu Akad Kumekan Adia

Mwiur

Yishimushimu ya Antu Akad Kumekan Adia

Mwiur

Bibil ulejen uvud wa yishimushimu yisangareshina, yitukwashina kuman mwiur ngand yakad kumekanang. Tukwitin ushinshikin nawamp yishimushimu yiney. Ap anch chom chin chawonsu chijimbwilau mu yishimushimu yiney achifanikeshin, yom yiney yikutwishap kusu kutukwash kuman antu adia mwi ngand ya mu spiritu, pakwez yikutukwash kand kwijik mutapu ukutwishau kwikal ni usu padi etu.

YEHOVA UDI PIUR PA YOM YAWONSU

‘Namana nkwas ayishichikin mwiur, ni umwing ushich pa nkwas; mpal yend yading ni kulay mudi diyal dia usey ukash ni diyal dia sardis; kwading nkongal uyingumukin nkwas, wading ni kuzut mudi diyal dia emeral.’—Kujingunik 4:2, 3.

“Kuns [kwend] kwading kuzutil. Kuzut kwau kwading mudi kwa mutapu wa nkongal. Chimunyik chinech chijadishena pa mes chilejen uyaj wa [Yehova].”—Ezekiel 1:27, 28.

Yishimushimu yiney, yamanau kudi kambuy Yohan ni muprofet Ezekiel, yirumburil kujimb kwa Nzamb udia wa Piur Nakash, Yehova, nich yom tukutwisha kutongin mudi—mayal malayina madia ma usey, nkongal, ni kujimb kwa ditand. Yom yiney yitulejin anch kwikalaku kwa Yehova kudi kuwamp nakash, kusangareshina ni kwakin.

Mutapu winou umurumburilau Nzamb ukwatijadin ni mazu ma nfund a kuseng wafunda anch: “Mulong [Yehova] Ndiy kwend mujim, ufanyidina [kushiman] nakash. Ufanyidin kumwov wom kupandikan anzamb awonsu a pansh. Mulong anzamb awonsu a antu adi anzamb amwamu. Pakwez [Yehova] Ndiy kwend watanga maur. Kulim ni uyaj wa want yidi kurutu kwend, uyaj ni kujimb yidi mu chikumbu chend.”—Kuseng 96:4-6.

Ap anch Yehova udi wa Piur nakash, utwitin kumusejin piswimp mu malembil ni utwinkin kashinsh anch ukat kututesh. (Kuseng 65:2) Nzamb utukatin ni ukat kututongin nakash, chawiy chafunday kambuy Yohan nich kashinsh anch: “Nzamb udi rukat.”—1 Yohan 4:8.

YESU UDING NI NZAMB

“[Mwin kwilej Stefan],wizula sens ni spiritu utumbila, watal mwiur neng, waman uyaj wa Nzamb, walond anch: ‘Talany, naman kal maur ma kwanzuril, ni mwan a muntu wiminy ku chikas cha katatuku cha Nzamb.’”—Midimu 7:55, 56, TMK.

Kurutu Stefan amana chishimushimu chinech, Yesu amujipa kudi antu alejangay Stefan—antakel a in Yuda. Chishimushimu chinech chitwinkishin kashinsh anch Yesu wading mwom ni amuvumbulang kal ni kumutumbish. Piur pa chom chinech, kambuy Paul wafunda anch: ‘Yehova wamuvumbula Yesu kudiokal ku rufu kwikal kand mwom, wamushichika ku chikas chend cha katatuku mwiur. Kwinikwa Kristu udi piur pa in kutakel awonsu, pa ayilabu awonsu, ni pa in ukash akwau awonsu, ni pa anyikel awonsu, ni pa majin mawonsu majimbwilau mu chirung chinech, ni mu chirung chikeza kwez.’—Efes 1:20, 21.

Chikwau kand, mulong wa kurumburil ndond yend yikweta usey, Bibil ulejen anch mudi Yehova, Yesu niyend ukat kuyitongin antu. Chisu chasalay mudimu wend wa kulejan panap pansh, Yesu wayoka ayej, ayilim, ni kuvumbul afu. Kusutin ku rufu rend, wamekesha rukat rikurikina kudi Nzamb ni  kudi antu. (Efes 2:4, 5) Pashichay ku chikas cha katatuku cha Nzamb, Yesu ukusadin ulabu wend ni kulet yiyukish kudi antu awonsu aziyidina adia mu jindond jawonsu.

ANGEL AMUSADIDIN NZAMB

‘Nadandamena kutal, [muprofet Daniel] matand akat kumatek mwi ndond yau. Umwing wading ukweta mwom kudiokal pakur wakad disambishil [Yehova], washakama mu ditand dimwing. . . . Kwading tunan tuvud akat kumusadil ndiy, akwau tunan dikum tupamp tunan dikum ading iminy kurutu kwend.’—Daniel 7:9, 10.

Mu chishimushimu chinech cha mwiur, Daniel wamana angel avud. Chishimushimu chinech chading chishimokishen mudi ik! Angel adi yitang yitumbila ya mu spiritu, yikweta manangu ni yikweta usu. Mu yisak yau mudi chisak cha asherub ni aserafin. Bibil ujimbwil angel tupamp 250 ni kusut.

Angel kadiap antu ashakama panap pansh akarumuka. Nzamb watanga angel kurutu kwa kuyitang antu. Patangay Divu, angel adingaku, amana mutanginau ni abulang nkash.—Job 38:4-7.

Mutapu umwing umusadidinau Nzamb kudi angel ashinshamena udi wa kwiyandjik mu mudimu ukweta usey usadikina panap pansh nlel—wa kulejan rusangu ruwamp ra Want wa Nzamb. (Mateu 24:14) Kwiyandjik mu mudimu winou kwamekana mu chishimushimu cha kambuy Yohan, pafunday anch: “Chad namana mwangel mukwau ukat kutwik pakach pa diur, ukwet rusangu ruwamp ra chikupu rayilejay [ashicha] pansh ni kudi michid yawonsu, ni majuku ni jindim, ni antu.” (Kujingunik 14:6) Ap anch angel kakulondangap ni antu nlel mudi mwalondangau pakur, ayikwashin antu alejena rusangu ruwamp kudi antu akweta michim yiwamp.

SATAN UPUMBWIL MA MILIYON MA ANTU

‘Njit jijim jamekana mwiur: Mikael [Yesu Kristu] ni angel end ading ni kurish nend nnak mujim, nnak mujim ni angel end arisha nau; awiy kapandakanap, ap kusu ndond yau kayitanap mwiur. Nnak mujim amudjibula pansh, ndiy nnak mukur upidilau anch Djabul ni Satan, ndiy kamu mwin kuyipumbol antu a mangand mawonsu; Amudjibula pa mangand pamwing nau angel end.’—Kujingunik 12:7-9.

 Mwiur mwadingap chisu chawonsu chisambu. Kudiokal kwinsambishin kwa rusangu ra antu, mwangel umwing, wakudisha maku ma kumwifukwil, wamubwambwila Yehova, wikala Satan chirumburikina anch “Mwin Kubwambwil.” Angel akwau niyau amulondula pa bwambwilau ni ikala ayilembil. Kusutin ku uyimp winou, amubwambwidin Yehova chipandakena ni akat kuyitwal antu mwi njil yishalijadina ni kutakel kwa Yehova kwa rukat.

Satan ni ayilembil end adi ayimp ni akwet chisum. Adi akankuny a an a antu, niyau aletin mar nakash panap pansh. Chilakej, Satan wajipa yivam ni atushalapol a ikundj ushinshamena Job. Kupwa, wajipa an dikum a Job kusutin “chinzwij mukash” wawisha chikumbu mwadingau. Kupwa kwa yom yiney, Satan wamumesha Job mar nich “makwalong ma yitat yiyimp ya tushiny, kusambishil ku mend djat kamu ni mwimband a mutu.”—Job 1:7-19; 2:7.

Piswimp ap, Satan kakwikalakwap. Kudiosh kwamudjibulau panap pansh, wij anch “chisu chend chashal kal chikemp.” (Kujingunik 12:12) Satan wakangany kal, ni riner ridi chakin rusangu ruwamp!

ANTU ADIOKILA PA DIVU

“Ey [Yesu] wayikwola antu kwikal antu a Nzamb. Wayikwola antu amwing a michid yawonsu, ni antu a jindim jawonsu, ni a majuku mawonsu, ni a mangand mawonsu. Ndiy wayikadish kwikal want wa in kupesh mulong wa kumusadil Nzamb, chad awiy akez kuyikel pa mangand.”—Kujingunik 5:9, 10.

Mulong Yesu wavumbuka panap pansh waya mwiur, antu amwing niyau akutwish kuvumbuk mutapu winou. Yesu wayileja atwimbuy end ashinshamena anch: ‘Niyil kunirijekinany ndond. Mwamu, . . . Nikez kuchirik mulong wa kukwezilany twayany pamwing niyamam, chakwel ukushakamany kunishicha am.’—Yohan 14:2, 3.

Antu ayila mwiur ayil ni chitongijok kampand. Pamwing ni Yesu, akusal Want ukuyikela antu akushakama pa divu chikupu ni kuyiletin yiyukish. Wawiy winou Want wayilejay in kwilejend kulembil mu malembil ma chilakej anch: “Tatukwetu udia mwiur, dijin diey aditumbish. Want wey weza. Rusot rey arusala pansh mudi mwiur.”—Mateu 6:9, 10.

YOM YIKUSALAU ADIA MWIUR

“Nov [kambuy Yohan] dizu dijim diabudik mwi nkwas dialond anch: ‘Talany! Mwinkand wa Nzamb udi nau antu, . . . Ndiy ukez kuyikuswol mansoj ku mes kwau; kukez kikalip kand rufu; ap kukez kikalip kand madil, ap kushikok kudil, ap kusansan, kwamwamu kand; mulong yom yikur yasutin kal.’”—Kujingunik 21:3, 4, TMK.

Chishimushimu cha uprofet winou chilejen chisu chikweza Want wa Nzamb, usadinau kudi Yesu ni antu akuvumbulau panap pansh, ukulet nsudien ku winyikel wa Satan ni kusal divu kwikal paradis. Yom yiyimeshina antu mar nakash ni kulet ushon yikupwa. Ap rufu rikwikalakwap kand.

Yom ik yikushikena ku ma miliyon ma antu afa kal ni akulikau kuvumbul mulong wa kuya mwiur? Mu machuku ma kurutu, akuyichirish ku mwom ni ruchingej ra kushakam chikupu mu Paradis pa divu.—Luka 23:43.

Yishimushimu yiney yitwinkishin kashinsh anch Yehova Nzamb ni Mwanend, Yesu Kristu, ni angel ashinshamena ni antu alandau pa divu, awonsu akat kututongin ni akimbin uwamp wetu. Mulong wa jinsangu jivud piur yom yikusalau, tukwitin kuyitazuk Atuman a Yehova ap yang pa kapend ka www.jw.org, ni ukutwish kubudish buku Chom ik Chakin Kamu Chifundishinay Bibil?