Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 11 , 2016

Wayidiosha ku Mididim

Wayidiosha ku Mididim

“[Yehova] wakutazukanya en kudiokal mu mididim, wandamany mu chimunyik chend chikwamushena.” —1 PITA 2:9.

MIMINY: 1, 14

1. Yom ik yashikena pasheshikay Yerusalem?

MU MUVU wa 607 kurutu Yesu avadik, Mwant Nebukadinezar wa kaad ni chisak chend chijim cha amasalay a mu Babilon arishikisha musumb wa Yerusalem. Bibil ulejen anch mwant wajipa ansand avud ni mpak ya musamun. “Kwikil ap kusu umwing washay, ap ansand, ap ayangadim, ap amakurump, ap amapal.” Kupwa, “Osha Chikumbu cha Nzamb, apumwona mpwembu ya Yerusalem, osha yikumbu ya ant awonsu, ni kushesh yom yawonsu ya usey ukash.”—2 Jinsangu 36:17, 19.

2. Kubabesh ik kwapanay Yehova, ni yom ik yayishikena in Yuda?

2 In Yuda kafanyinap kushimok mulong wa kusheshik kwa Yerusalem. Mu mivu yivud, Nzamb wayitumang aprofet mulong wa kuyibabesh antu anch ang adandamen kumubwambwil, akuyirishikish kudi in Babilon. In Yuda avud afanyina kuyijip kwi mpak ya musamun ni awonsu akupanda afanyina kuchinin mu Babilon. (Jeremiy 15:2) Chading chirumburikin ik kuchinin mwi ngand yindj? Chom mudi chinech chasadika payikwatau antu mu usuk mu Babilon chayishikenap kal in Kristu? Anch mwawiy, chisu ik?

 MASHAKAMIN MWI NGAND YA WINGENDJ

3. Mwom wa mwi ngand ya wingendj mu Babilon wading ushalijangen nchik ni mwom wa usuk mu Idjibit?

3 Yehova wayileja in Yuda anch ang aya mwi ngand ya wingendj, akwitiyin mashakamin masu ni kushakam mu mutapu uwamp ukatinau. Wayileja kusutin kudi Jeremiy anch: ‘Tungany yikumbu, ushakamanyamu. Dimany yakudia, udiany. Salany midimu ya kuwapish misumb kuuyilanya [Mwi ngand ya wingendj]. Yilembilany antu akweta misumb yiney, mulong anch awiy ikal mu chisambu, niyen ukwikalany mu chisambu.’ (Jeremiy 29:5, 7) In Yuda alondula mbil ja Yehova ashakama mu mutapu uwamp. In Babilon ayitiyija in Yuda kusal midimu yau ni kwendangan mwi ngand yau pakad mulong. Mu chisu chinicha, Babilon wading ndond yijim ya kwisakin. Yom yafundau pakur yimekeshin anch padingau mwi ngand ya wingendj, in Yuda ileja mutapu wa kwisak ni ikala ni ukaliweny wa kusal yom yiwamp. In Yuda amwing ikala ampich. Mwom mwi ngand ya wingendj wadingap ukasikena mudi wadingau nich in Isarel mu usuk mu Idjibit mu yitot ya mivu.—Tang Kubudik 2:23-25.

4. Anany kand akwau amana mar pamwing nau in Yuda akad kushinshaman, ni mulong wak chading chiyikasikedin kusal yom yawonsu yading yitinau mu Yijil?

4 In Yuda amwing achinina mwi ngand ya wingendj ading ashinshamen kudi Nzamb. Ap anch kasalap yom yiyimp, amana mar pamwing ni antu akwau a muchid wau. In Yuda ikala ni yom yading yikwetau nich kuswir, pakwez mutapu ik wafanyinau kumwifukwil Yehova? Tempel ni chintamb ading ayoshin kal, ni mudimu wa in kupesh wasadikangap kand nawamp. Pakwez in Yuda ashinshamena asala yom mulong wa kulimish Yijil ya Nzamb. Chilakej, Daniel, Shadrak, Meshak, ni Abednego alika kudia yakudia yayijidikau in Yuda. Ni Bibil ulondin anch Daniel wamulembilang Nzamb pakad kujing. (Daniel 1:8; 6:10) Chikwau kand, mulong ayiyikela kudi muchid wakad kumusadin Nzamb, chading chikasiken kudi in Yuda ashinshamena kusal yom yading yitinau mu Yijil.

5. Yehova wayinka antu end ruchingej ik, ni mulong wak kushilamu kwinoku kwading kwakin?

5 Ov, in Isarel afanyina kand kutwish kumwifukwil Nzamb mu mutapu uwamp witiyinay? Pa chisu chinicha, chading chikasiken mulong Babilon wading kand kal ayilikaku antu mu usuk. Pakwez Yehova Nzamb washilamu anch antu end afanyidin kukolik, ni mwawiy chasadika. Kushilamu kwa Nzamb kuding kwakin yisu yawonsu!—Isay 55:11.

OV, IN KRISTU ANDAMAKAL MU USUK MU BABILON?

6, 7. Mulong wak chidi cha usey kuswimp mutapu wetu wa kutesh?

6 In Kristu kandikal amanangap yom mudi yiney mu usuk mu Babilon? Mu mivu yivud, Chinong cha Kalam chalondang anch in Kristu ashinshamena andama mu usuk wa Babilon mu muvu wa 1918 ni akolikamu mu muvu wa 1919. Pakwez, mu mutu wa mulong winou ni ukwambakenap, tukwilej mulong wak chidi cha usey kuswimp mutapu wetu wa kutesh.

7 Tong pa chinech: Babilon mujim udi musumb ujim wa mangand mawonsu wa relijon wa makasu. Ni antu a Nzamb kayikwatap mu usuk kudi relijon wa makasu mu muvu wa 1918. Chidi chakin anch mu chisu chinicha, azizidilau many ading ni kuyizengol. Pakwez kuzengol kwinoku akutakelang kudi mant ma mangand minam, kadiap kudi relijon wa makasu. Pakur kurutu kwa Njit ja Kusambish  ja Mangand Mawonsu jikalaku, atushalapol a Nzamb azizidilau many ading iyaurila kal ku relijon wa makasu. Chawiy yom yiney yamekeshap patok anch antu a Nzamb andama mu usuk wa Babilon Mujim mu muvu wa 1918.

CHISU IK CHANDAMAU ANTU A NZAMB MU USUK WA BABILON?

8. Yom ik yasadika kupwa kwa rufu ra apostol? (Tal chipich cha kwinsambishin.)

8 Ku Pentekot mu muvu wa 33, tunan twa in Kristu asu ayizizila many nich spiritu utumbila. Ikala ‘muchid watonday Nzamb, chisak cha in kupesh a Mwant Nzamb, muchid utumbila, antu a Nzamb a pa kampwil.’ (Tang 1 Pita 2:9, 10.) Apostol alamang nawamp yikumangen pading pachidiau kal aom. Pakwez, kupwa kwa rufu ra apostol, antu amwing mu yikumangen asambisha kufundish yitongijok ya makasu ni akata kuyipumbul in kwilej ku uyakin. Antu inay akata filozofi wa Aristot ni Platon ni asambisha kufundish yitongijok yau pa ndond pa kufundish uyakin wa mu Dizu dia Nzamb. (Midimu 20:30; 2 Tesalonik 2:6-8) Avud ading in ntumb ni ading atulam mu yikumangen. Chawiy ap anch Yesu wayileja in kwilejend anch “En awonsu udiany akadivar,” pakwez chisak cha amakurump a chirelijon chasambisha kwikalaku.—Mateu 23:8.

9. Rumburil mutapu wasambishau in Kristu apumbwoka kusal pamwing ni want wa Rom. Yibudikin yading ik?

9 Mu muvu wa 313 kupwa kwa rufu ra Kristu, Mwant Constantin wayikela musumb wa Rom wakad kumwijik Nzamb ni wayisala in Kristu apumboka chakwel ikal mudi relijon wijikena. Kupwa, Egliz wasambisha kusal pamwing ni want wa in Rom. Chilakej, Constantin wasala chikumangen pamwing nau antekel a chirelijon, chijikau mudi Chikumangan cha Nicée. Kupwa kwa chikumangan chinech, mwant wamwopata mwin kupesh utazukinau anch Arius mwi ngand ya wingendj mulong walika kwitiyij anch Yesu udi Nzamb. Kupwa, Theodosius wikala mwant wa Rom, ni Egliz Katolik wikala relijon wijikena nakash mu Musumb wa Rom. In Kwilej Nsangu alondin anch in Rom akad kumwijik Nzamb ikala “In Kristu” pa chisu cha Mwant Theodosius. Pakwez uyakin udi anch pa chisu chinicha, in Kristu apumbwoka asambisha kwitiy mafundish ma antu akad kumwijik Nzamb, chawiy ikala chikunku cha Babilon Mujim. Pakwez, kwading kuchid kal in Kristu ashinshamena azizidilau many. Ading mudi tidiku walonday Yesu. Antu inay ashinshamena asala usu nakash mulong wa kumwifukwil Nzamb, pakwez antu akemp ateshang yom yalondangau. (Tang Mateu 13:24, 25, 37-39.) Ading chakin mu usuk wa Babilon!

10. Mulong wak antu asambisha kulik mafundish ma egliz?

10 Mu yitot ya mivu yikemp ya kusambish kupwa kwa Kristu kufa, antu avud adandamena kutang Bibil mu dizu dia Grek ap Latin. Afanikeshang mafundish ma Dizu dia Nzamb ni mafundish ma mu egliz. Pijikau antu amwing anch mafundish ma mu egliz mading ma makasu, amalika. Pakwez chading cha ubaj kuyilej antu akwau chitongijok chau, ni ading afanyidin kuyijip anch asal mwamu.

11. Mutapu ik watwishay egliz kuyijindjikin antu Bibil?

11 Kwasuta chisu, antu akemp asambisha kulond dizu dia Grek ap Latin. Ni antekel a egliz kitiyap kand anch Dizu dia Nzamb adikarumuna mu mazu malondangau antu avud. Mudi chibudikin, ching kwau antakel a chirelijon ni antu amwing ilejina awiy  atangang Bibil ayinau, ni amwing pakach pa antakel a chirelijon kamutangangap kwau ap kumufund nawamp. Muntu mwawonsu walikang kwitiyij mafundish ma egliz amupupang nakash. In Kristu ashinshamena azizidilau many akumanganang mu ujindj mu yisak yikemp, ni amwing katwishangap kukumangan. Chilik chimwing, mudi kand in Yuda achinina mu Babilon, azizidilau many “chisak cha in kupesh a Mwant Nzamb” katwishap kwifukwil mu mutapu uwamp. Babilon Mujim wading kuyiyikel antu!

KWADING MAYINGISHIN MA KUCHINGEJIN

12, 13. Mayingishin ik maad mayinkisha in Kristu ruchingej ra kukolik? Rumburil.

12 Ov, in Kristu afanyina kukolik chakwel amwifukwila Nzamb patok ni mu mutapu uwanyidina? Mwaning! Kwading ruchingej kanang, mulong wa mayingishin maad. Diyingishin diakusambish diading dia kutek mashin ma kuchap nich mikand mau mau. Kurutu kwa kutek mashin minam piswimp ni muvu 1450, Bibil amufundirilang ku makas, chom chinech chadingap chiswapela. Kwasutang angond dikum pakwel anch muntu ukweta ukaliweny apwisha kopi umwing wa Bibil! Chikwau kand, in kufundiril afundinang pa yikit yadioshangau kudi annam. Mudi chibudikin, kwading kwau ma kopi makemp ma Bibil, ni ma kopi minam mading makwet usey nakash. Pakwez, patekau mashin ma kuchap nich ni mapaper, muntu ukweta ukaliweny watwishang kuchap uvud wa ma paj 1300 pa dichuku!

Kubudish kwa mashin ma kuchap nich mau mau ni in kukarumun Bibil atakamena ni akweta mushiku apana ruchingij ra kukolik ku Babilon (Tal paragraf wa 12, 13)

 13 Diyingishin diakaad diading mulong wa kukarumun Bibil. Piswimp ni muvu wa 1500, antu atakamena akemp awiy akarumuna Dizu dia Nzamb mu mazu malondangau antu avud. Asala mudimu winou ap anch ading ij anch akutwish kuyijip. Antakel a egliz akisa nakash. Mulong wak? Mulong ading akwet wom anch ang amakundj ni amband asambish kutang Bibil mu dizu diau, akusambish kwipul yipul mudi: ‘Pisu pafundishinay Bibil mafundish ma kumutokish muntu (pirigatwar)? Pisu palondinay Bibil anch muntu ufanyidin kumufut mwimpel chakwel amusadina malembil mulong wa afu? Pisu palondinay Bibil piur pa a pape ni a kardinal?’ Mafundish mavud ma egliz wa makasu mading mimedin pa filozofi wa Aristot ni Platon, amakundj adingaku mu yitot ya mivu kurutu kwa Kristu kuvadik. Antakel a egliz ajimanang nakash payipulangau yipul yiney. Amakundj ni amband alikang mafundish mau ayijipang. Antakel a egliz ayikangeshang antu kutang Bibil ni kuyipul yipul, ni mu yisu yivud yom yiney yasadikang mwamu. Pakwez antu akemp atakamena alika kwikal atakedinau kudi Babilon Mujim. Atana uyakin udiokila mu Dizu dia Nzamb, ni akata kwijik yom yivud! Kukolik ku relijon wa makasu kwaseja piswimp.

14. (a) Yom ik yasalau antu akata kwilej Bibil? (b) Rumburil mutapu wakimbay Mukadivar Russell uyakin.

14 Antu avud ading akatin kutang ni kwilej Bibil ni kulond piur pa yom yilejangau. Kadingap kakatina anch antakel a egliz ayileja yom yifanyidinau kwitiyij. Chawiy achinina mu jingand mukutwishau kwikal ishadidina mulong wa kwilej Bibil. Ngand yimwing ya jingand jinej yading ngand ya États-Unis. Kwinikwa, mu muvu wa 1870, Charles Taze Russell ni antu akwau akemp asambisha kumwilej Bibil chikurikina. Cha kusambish, Mukadivar Russell wading ukimbin kujingunin relijon ufundishina uyakin. Wafanakeshang mafundish ma marelijon matazukinau anch ma in Kristu, ni ma relijon matazukinau anch makad kwikal ma in Kristu ni yifundishinay Bibil. Wajingunina anch kwikil relijon ap umwing pa ma relijon minam wading usadidina nawamp Dizu dia Nzamb. Chisu chimwing, wambamba pamwing ni antakel a ma relijon kushalijan. Mukadivar Russell wachingeja anch antakel inay akwitiy uyakin watanay ndiy ni chisak chend mu Bibil ni chakwel aufundish mu yikumangen yau. Pakwez antakel a ma relijon kasangerap uyakin winou. In Kwilej a Bibil ileja anch kafanyidinap kumwifukwil Nzamb pamwing ni antu adia mu relijon wa makasu.—Tang 2 Korint 6:14.

15. (a) Chisu ik chandamau in Kristu akin mu usuk wa Babilon? (b) Yipul ik yikwakulau mu mutu wa mulong ulondwilaku ou?

15 Mu mutu wa mulong winou, twilej kal anch in Kristu akin andama mu usuk wa Babilon kupwa kwa rufu ra apostol. Pakwez, tudandamedin kukimb yakul ku yipul yilondwilaku ey: Mutapu ik twija anch in Kristu azizidinau many akolika mu Babilon Mujim mu mivu kurutu kwa muvu wa 1914? Ov, chidi chakin anch Yehova kayisangerap atushalapol end mulong kasalap mudimu wa kulejan nich mushiku pa chisu cha Njit ja Kusambish ja Mangand Mawonsu? Ov, amwing a akadivar netu iyandjika mu milong ya politik, ni ashadisha dilau dia Yehova pa chisu chinicha? Kupwa, anch in Kristu andama mu usuk wa relijon wa makasu kupwa kwa rufu ra apostol, chisu ik chadiokalawamu? Yipul yiney yidi ya usey nakash, ni akuyakul mu mutu wa mulong ulondwilaku ou.