Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 11 , 2016

Ov, Ukwatin Buku wa Yehova Nich Usey?

Ov, Ukwatin Buku wa Yehova Nich Usey?

“Piwatambulanya dizu dia Nzamb, . . . waditiyanya . . . mudi dizu diakin dia Nzamb.”—1 TESOLONIK 2:13, NWT.

MIMINY: 44, 40

1-3. Yom ik yasadika pakach pa Evodiy ni Sintik? Mutapu ik tukutwisha kwiyep milong yiney? (Tal chipich cha kwinsambishin.)

TUKWATINING Bibil nich usey mulong twij anch udi Buku wa Nzamb. Bibil ukwet yiyul yikutwisha kutukwash kwiyep milong, ni ukutwish kutukwash anch twarumbuk. Mutapu ik tusadining mulong wa yiyul yiney? Tongijokin piur pa amband aad azizilau many a mu mivu chitot ya kusambish, Evodiy ni Sintik. Bibil ulondin anch atenda, pakwez katulejinap mulong wak. El tutonginany yom yashikena.

2 Pamwing ap Evodiy wayitazuka akadivar ni anambaz amwing kwol kwend mulong wa kudia yakudia. Pakwez kamutazukap Sintik. Kupwa, pateshay akwau akat kulond mutapu wasangerangau yakudia, wajimana nakash. Pamwing watonga anch: ‘Nikutwishap kwitiyij anch Evodiy alika kwintazuk am! Natonga anch twading arund awamp.’ Sintik wiyova anch Evodiy kadingap umukatin, ni wamwiyepa. Chawiy, Sintik wayitazuka antu awiy amwing mulong kwez kudia ya kudia pakwez  kamutazukap Evodiy! Mulong winou wafanyina kuyovish antu akwau ushon mu chikumangen. Bibil ulejen anch Paul wayiyula anambaz inay aad ni wayikasikesha anch achirish chisambu. Afanyina kumutesh ni kudandamen kumusadin Yehova ni musangar.—Filip 4:2, 3.

3 Nlel unou mu yikumangen yetu, yisu yimwing niyetu tukutwish kwikal ni mulong ni mukadivar ap nambaz. Pakwez anch twalondul yiyul ya Bibil, tukutwish kupwish milong ya mutapu winou. Chawiy tukutwish kand kuyiyep. Anch twaziyin yom yilondinay Bibil, tukumekesh chakin kamu anch tukwatin nich usey Buku wa Yehova.—Kuseng 27:11.

BIBIL UTUFUNDISHIN KUSHINSHIKIN YOVIL YETU

4, 5. Yiyul ik yitwinkishinau mu Dizu dia Nzamb mulong wa kushinshikin yovil yetu?

4 Chiswapelingap kushinshikin yovil yetu. Tukutwish kwov ushon ap kujiman anch muntu watulond nayimp ap watusadin mu mutapu uyimp, pamwing ap mulong wa yaku ya kwol kwetu, ulombu wa chikit chetu, ap mutapu tudia. Ni yikutwish kutujimesh nakash anch muntu watulondang nayimp ap waturumbukinang udi mukadivar ap nambaz. Chiyul ik tutanina mu Dizu dia Nzamb chikutwisha kutukwash?

5 Yehova wij yom yikutwisha kushiken anch muntu walik kushinshikin yovil yend. Anch twov ushon ap ujim, tukutwish kulond ap kusal yom yikutwisha kutunenganesh kwinyim. Mu Bibil, Yehova utufundishin kushinshikin mutapu tukata kwiyov ni utulejin anch: “Kangal wikal mwin kwov ujim swa.” Tongijokin mutapu tukutwisha kwiyep milong yivud anch twaziyin ku chiyul chinech ni kulik kwov ujim swa! (Tang Mulej 7:9; Jinswir 16:32.) Bibil utulejin kand kuyilikishin antu akwau. Chawiy, Yesu walonda anch ang twalik kuyilikishin antu akwau Yehova kakutulikishinap niyetu. (Mateu 6:14, 15) Ov, ufanyidin kwikal mwin kushimpish muchim nakash ni kwikal uswapela kuyilikishin antu akwau?

6. Yom ik yikutwisha yashiken anch twalik kushinshikin yovil yetu?

6 Anch tushinshikidinap yovil yetu, tukutwish kusambish kwov ujim ni kusambish kwiyov anch akukisin kudi muntu kampand. Ap tukutwish kuyibachik antu akwau mu chikumangen kwiyov mutapu winou. Ap anch tusadin usu wa kujindjik ujim ap rikis retu, antu akwau akujingunin mutapu twiyovila. Kupwa akadivar nau anambaz netu akusambish kutwiyep. (Jinswir 26:24-26) Amakurump a chikumangen akusadin Bibil mulong wa kutukwash kulik ujim ap rikis ni kuyilikishin antu akwau. (In Levi 19:17, 18; Rom 3:11-18) Anch asal mwamu, ov, tukulondul wintakel wa Buku wa Yehova?

YEHOVA UTUTAKEDIN

7, 8. (a) Mutapu ik utakedinay Yehova antu end? (b) Mbil ik jimwing tutanina mu Bibil, ni mulong wak tufanyidin kuziyin kwi mbil jinej?

7 Yehova uyitakedin antu adia mu chikunku cha dirijek diend chidia pansh nlel, ni ukat kuyifundish. Mutapu ik? Wamuteka Yesu kwikal ‘mwant wa chikumangen’ ni Yesu wamuteka “kashalapol ushinshamena ni kubabal” mulong wa kufundish ni kutakel antu a Nzamb. (Efes 5:23; Mateu 24:45-47, TMK) Mudi mwading kand chisak chitakedila cha mu mivu chitot ya kusambish, kashalapol winou ukwatin kamu Bibil nich usey mulong didi Dizu dia Nzamb. (Tang 1 Tesalonik 2:13.) Mbil ik jimwing jitutanina mu Bibil?

8 Bibil utulejin kukumangan pakad kujing. (Hebereu 10:24, 25) Yikumangan yitukasikeshin  etu awonsu kwitiyij mafundish ma mu Bibil. (1 Korint 1:10) Yitulejin kand ‘kukimb bil Want.’ (Mateu 6:33) Bibil utufundishin kulejan ku chikumbu ni chikumbu, pa jindond jidia antu avud, ni ndond yawonsu tukutwisha kutan antu. (Mateu 28:19, 20; Midimu 5:42; 17:17; 20: 20) Uyilejin amakurump a chikumangen kulam chikumangen chishitwila. (1 Korint 5:1-5, 13; 1 Timote 5:19-21) Ni utulejin anch tufanyidin kulam mijimbu yetu yishitwila ni kwiyep yitongijok ni yisalijok yikisinay Yehova.—2 Korint 7:1.

9. Nany watekau kudi Yesu mulong wa kutukwash kutesh Dizu dia Nzamb?

9 Antu amwing akutwish kutong anch kakwetap kuswir kwa muntu mulong wa kuyirumburil Bibil. Pakwez kudiokal mu muvu wa 1919, Yesu wasambisha kumusadin “kashalapol ushinshamena ni kubabal” mulong wa kuyikwash antu a Nzamb kutesh yifundishinay Bibil ni kulondul yilondinay. Kusutin ku kuziyin yilondinay Bibil, tulamin chikumangen chishitwila, chikweta chisambu, ni chidia mu umwing. Iyipula anch, ‘Nikushal ushinshamena kudi Yesu ni kulondul wintakel wa kashalapol ushinshamena?’

DITEMB DIA YEHOVA DIYIL MAU!

10. Mutapu ik urumburilay buku wa Ezekiel chikunku cha dirijek dia Yehova chidia mwiur?

10 Kusutin Bibil, twilejin anch atushalapol a Yehova adia mwiur niyawiy ayitenchikin. Chilakej, Ezekiel wamana mu chishimushimu Yehova ukat kwendish ditemb, diyil mau ku mitambu yawonsu yikatinay Yehova anch diya. (Ezekiel 1:4-28) Ditemb dimekeshin chikunku cha dirijek dia Nzamb chidia mwiur, chiswakela kulondul wintakel wend. Ku mutambu ukwau, chikwet usu pa chikunku cha dirijek diend chidia pa divu. Tongin ku kuswimp kuvud kwasadikina mu dirijek dia Nzamb mu mivu dikum yasutina ey. Vurik anch Yehova utakedin kuswimp kwinoku. Piswimp ap Kristu nau angel end akushesh mangand minam mayimp. Kukwikalap kand muntu ukulika kumulimish Yehova ni dijin diend ap ukulonda nayimp piur pa mutapu wend wa kuyikel!

Kujikitish mudi ik kudi in kwipan kwa kwikatin asadina mudimu nakash wa kutung! (Tal paragraf wa 11)

11, 12. Dirijek dia Yehova ditwishin kusal ik mu machuku minam ma nsudien?

11 Tumanany mutapu utwishina dirijek dia Yehova kusal yom mu machuku minam ma nsudien. Kutung. Yitot ya akadivar nau anambaz asadin mudimu nakash mulong wa kutung biro musu wa pa mangand mawonsu wa Atuman a Yehova ku Warwick, New York, États-Unis d’Amérique. Tunan twa in kwipan kwa kwikatin a mu mangand mawonsu atungin Yot ya Want ni ma biro ma mitiy. In kwipan kwa kwikatin inay akat kuyitakel ku Biro Mujim wa in Kutung wa pa Mangand Mawonsu. Kujikitish mudi ik kudi awonsu asadina mudimu nakash mulong wa kutung kwinoku! Ni atushalapol a Yehova  a pa mangand mawonsu apanining yawonsu yikutwishau kupan mulong wa kukwash kuland jindond ni kutungap. Yehova uyiyukishin antu end mulong wa kwikepish ni kushinshaman kumekeshinau.—Luka 21:1-4.

12 Mafundish. Yehova ukatining kuyifundish antu end. (Isay 2:2, 3) Tong piur pa ma shikol kushalijan tukweta. Kudi Shikol ya Mudimu wa Uchibol, Shikol ya in Kulejan a Want, Shikol ya Gilead, Shikol ya Yid Yisu ya Betel, Shikol ya Atulam in Kwendangan ni Akajau, Shikol ya Amakurump a Chikumangen, Shikol ya Mudimu wa Want, ni Shikol ya Yid ya Komite wa Mutiy ni Akajau. Ni pa kapend kwetu ka jw.org, tukutwish kutan Bibil ni mikand yikwau mu yitot ya mazu. Kapend kakwet yikunku ya pakampwil mulong wa an ni majuku ni mitu ya milong yisu yiwamp yikata kubudik. Ukat kusadin jw.org mu mudimu wey wa kulejan ni mudifukwil dien dia dijuku?

IKAL USHINSHAMENA KUDI YEHOVA NI KWASH DIRIJEK DIEND

13. Chisend ik chikwetau antu a Yehova?

13 Musangar mudi ik wa kwikal mu dirijek dia Yehova ni kwijik yom yitwitinay kusal! Chidi chakin, kudiokal patwijikina yom yimusangareshina Nzamb, tukwet chisend cha kumuziyin ni cha kusal yom yidia yiwamp. Ap anch antu avud akatin kusal yom yiyimp, tufanyidin ‘kukis yom yiyimp,’ mudi muyikisinay Yehova. (Kuseng 97:10) Tufanyidinap kwikal mudi antu akata kutong anch ‘kuyip kudi kuwap ni kuwap kudi kuyip.’ (Isay 5:20) Tukatin kumusangaresh Yehova, chawiy tukwatina mupak wa kushal ishitwila mu mitapu yawonsu. (1 Korint 6:9-11) Yom yitulejinay Yehova mu Bibil yidi mulong wa uwamp wetu. Tumukatin ni tukatin kushal ashinshamena kudi ndiy. Chawiy chisadina anch tulondul mbil jend ku chikumbu, ku chikumangen, ku mudimu, ku shikol, ap kwi ndond yawonsu tudia. (Jinswir 15:3) Tong mulong wa jindond jimwing kwitina kushal ashinshamena kudi Nzamb.

14. Mutapu ik ukutwishau anvaj kwikal ashinshamena kudi Yehova?

14 Mutapu tufumbina anetu. Mu Bibil, Yehova wayinkisha anvaj mbil ja mutapu wa kufumb anau. In Kristu afanyidin kubabal chakwel kangal ikal abachikinau kutong mutapu utonginau antu a mangand minam. (Efes 2:2) Chilakej, ku jindond jimwing tatuku ukutwish kutong anch, ‘Chidi chiwamp amaku kufundish an.’ Pakwez Bibil uyilejin atatuku patok kuyifundish anau piur pa Yehova. (Efes 6:4) Atatuku nau amaku umukatina Yehova akatining anch anau ikal ni urund wa piswimp ni Yehova, mudi kamu mwadingay Samwel padingay mwan mukemp.—1 Samwel 3:19.

15. Mutapu ik tukutwisha kwikal ashinshamena kudi Yehova chisu tukwatina mipak yijim?

15 Mutapu tukwatining mipak. Kurutu kwa kukwat mipak yijim mu mwom, tufanyidin kwijik yitongijok ya Yehova chakwel tushal ashinshamena kudi ndiy. Bibil ni dirijek diend yikutwish kutukwash. Chilakej, anvaj amwing nlel adiokiling mu jingand jau mulong wa kuya mwi ngand yindjing akwatining mupak wa kuyichirish anau mwi ngand yau mulong wa kushakam ni anamakwau. Mwamu, anvaj inay akudandamen kusal mudimu ni kwikal ni nfalang jivud. Chakashinsh, winou udi mupak wa muntu panrend, pakwez antu atijadina afanyidin kwiyipul anch, ‘Yom ik yitonginay Yehova piur pa mupak winou?’ (Tang Rom 14:12.) Chakusambish chikwikal cha manangu kutong piur pa yom  yilondinay Bibil kurutu kwa kukwat mupak wa usey mulong wa dijuku dietu ni mudimu wetu. Tukwet kuswir kwa ukwash wa Tatukwetu mulong tukutwishap kutakel rizau retu.—Jeremiy 10:23.

16. Pavadikay mwanend ikundj, maku umwing wakwata mupak ik? Yom ik yamukwasha kukwat mupak uwamp?

16 Kupwa kwa ambay a uruw amwing kushemunik mulong wa kuya mwi ngand yikwau, avala mwan ikundj, ni akwata mupak wa kumuchirish mwanau chakwel ashakam pamwing nau angakend. Pakwez pa chisu chinicha, mband wasambisha kwilej Bibil ni umwing wa Atuman a Yehova. Wileja anch chading chisend chend cha kumufundish mwanend piur pa Yehova. (Kuseng 127:3; Jinswir 22:6) Mband winou wamulembila Yehova, mudi mutulejinay Bibil kusal, ni wasambish kumwilembin Yehova chakwel amukwasha kusal yom yidia yiwamp. (Kuseng 62:7, 8) Wamuleja kand nambaz wilejangay nend Bibil ni wayileja antu akwau a mu chikumangen piur pa mulong wend. Ap anch anamakwend ni arund nend adandamena kumulej anch amutum mwan kudi angakend, wamana anch chadingap chiwamp kusal mwamu. Nfumwend wamana mutapu wamukwashau mukajend ni mwanau kudi akadivar nau anambaz. Wikala ni musangar wa kusambish kwilej Bibil ni kukumangan pamwing ni dijuku diend. Tong mutapu wovay maku winou musangar pamanay anch Yehova wakula ku malembil mend!

17. Anch twilejin Bibil ni muntu kanang, wintakel in tufanyidina kulondul?

17 Mutapu tulondwila wintakel. Anch tushinshamen kudi Nzamb, tukulondul wintakel udiokila mu dirijek diend. Chilakej, shinshikin yom tufanyidina kusal kupwa kwa kusambish kwilej buku Chom ik Chakin Kamu Chifundishinay Bibil? ni muntu kanang. Atuleja kutek ma minit makemp kupwa kwa dilejan mulong wa kumukwash mwin kwilej ijika yivud piur pa dirijek dia Yehova. Tukutwish kusadin video ulondina anch Ov, Yom ik Yisadikininga ku Chot cha Want? ni broshir Ov, Anany Asadina Rusot ra Yehova Nlel? Kupwa kwa kupwish buku Chifundishinay Bibil, tukutwish kumukwash mwin kwilej chakwel ‘akasikana nakash mu ritiy’ kusutin kwilej nend pamwing buku “Ilamany mu Rukat ra Nzamb”, ap anch watambwil kal dibatish kwasutin kal chisu. (Kolosay 2:7) Ov, ukat kulondul wintakel winou udiokila mu dirijek dia Yehova?

18, 19. Mayingishin ik mamwing masadina anch tumujikitisha Yehova?

18 Kudi mayingishin mavud masadina anch tumujikitisha Yehova! Cha kusambish, “ku ukash wend tukwet mwom, tukat kwend, tudiaku.” (Midimu 17:27, 28) Watwinkisha kand Buku wend, Bibil. Mudi in Kristu a ku Tesalonik, tukatin chipan chinech mulong udi uruu udiokila kudi ndiy.—1 Tesalonik 2:13.

19 Bibil utukwashining kusej piswimp ni Yehova, ni ndiy ukusej piswimp netu. (Jakobu 4:8) Tujikitishin nakash mulong Tatukwetu ututazukin twikala mu dirijek diend! Twiyovil mudi nfund a kuseng wafunda anch: “Panany kujikitish kudi [Yehova] mulong Ndiy udi muwamp ni rukat rend [rishinshamena] rushiching chikupu.” (Kuseng 136:1) Mu verse win mwawonsu wa kuseng winou, nfund a kuseng uchirikidin mazu “rukat rend [rishinshamena] rushiching chikupu.” Mwaning, anch tudi ashinshamena kudi Yehova ni kulondul wintakel utwinkishinay kusutin dirijek diend, ukutwinkish mwom wa chikupu ni ukushal ushinshamena kudi etu chikupu!