Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 11 , 2016

“Dandamenany Kukasikeshijan Umwing ni Mukwau Dichuku Diawonsu”

“Dandamenany Kukasikeshijan Umwing ni Mukwau Dichuku Diawonsu”

“Anch ukwetany mazu ma kuyikasikesh antu, malondany.”—MIDIMU 13:15, NWT.

MIMINY: 53, 45

1, 2. Mulong wak chidi cha usey kuyikasikesh antu akwau?

CRISTINA, ukweta mivu 18, ulondin anch: “Anvajam kakwinkasikeshangap, pakwez akat kwinlond nayimp. Ni mazu mau mading ching mayimp. Akat kulond anch kandikal niswa mu manangu, nikwilejap, ni anch nilimididin. Chawiy nikat kudil nakash ni nikatap kusanger kwambambol nau. Niyoviling anch nidi muntu wakad usey.”  [1] (Tal mazu ma kwinsudien.) Mashakamin makutwish kukasikan anch antu akwau katukasikeshinap!

2 Ku mutambu ukwau, tong nakash mutapu ukutwisha kuyikwash antu akwau piuyikasikeshina. Rubén ulondin anch: “Narisha ni yitongijok ya kwiyov anch nikwetap usey mu mivu yivud. Pakwez dichuku dimwing, nading mu mudimu wa kulejan ni mukurump wa chikumangen wamana anch nikwetap musangar. Wantesha kamu nawamp pinading nimulejina mutapu niyovang. Kupwa wanvurisha yom yiwamp nasalang. Wanvurisha kand mazu ma Yesu malondina anch—umwing ni umwing wetu ukwet usey nakash kusutamu amiswesu. Navurikang mufund winou, ni mazu ma mufund winou madandamedin kupukun ku muchim wam. Mazu ma mukurump winou mamekesha kushalijan nakash.”—Mateu 10:31.

3. (a) Yom ik yalonday kambuy Paul piur pa kuyikasikesh antu akwau? (b) Yom ik tukwisambina mu mutu wa mulong winou?

 3 Bibil ulondin anch tufanyidin kukasikeshijan umwing ni mukwau chisu chawonsu. Kambuy Paul wayifundina in Kristu in Hebereu anch: “Anamakwam in Kristu, babalany, kangal muntu ap kusu umwing wa pakach pen wikal nich muchim uyimp wakad ritiy wa kupumbuk kudiokal kudi Nzamb mwom. Pakwez kasikeshijanany muntu ni mukwau pichuku pichuku.” Paul warumburila mulong wak: “Salany mwamu chakwel kangal muntu umwing wa pakach pen ukudimbau ku chitil, chad wachinchikish muchim wend.” (Hebereu 3:12, 13) Tong mutapu ukwiyova nawamp anch muntu wakukasikesh. Chawiy, mayingishin ik tukweta ma kuyikasikesh akadivar netu? Yom ik tukutwisha kwilejin ku mutapu wa Yehova, Yesu, ni Paul wa kuyikasikesh antu akwau? Ni mitapu ik yimwing tukutwisha kuyikasikesh antu akwau? El twisambinany yipul yiney.

ETU AWONSU TUKWET KUSWIR KWA KUTUKASIKESH

4. Nany ukweta kuswir kwa kumukasikesh? Mulong wak antu avud nlel kakatap kuyikasikesh antu akwau?

4 Etu awonsu tukwet kuswir kwa kutukasikesh. Anvaj afanyidin pakampwil kuyikasikesh anau. Mulej utazukinau anch Timothy Evans urumburil anch an “akwet kuswir kwa kuyikasikesh mudi mutond ukweta kuswir kwa mem.” Uwejidinaku anch: “Nich kukasikesh, mwan ukwiyov nawamp ni ukusangar.” Pakwez mulong tudi “machuku ma kwinsudiel,” antu avud akat kwitongin ayinau ni kakwetap ‘rukat ra chivadik’ umwing ni mukwau. (2 Timote 3:1-5) Anvaj amwing kakatap kuyikasikesh anau mulong niyau kayikasikeshangap kudi anvajau. Antu amakurump akweting niyau kuswir kwa kuyikasikesh, pakwez yisu yivud chom chinech chikusadikangap. Chilakej, antu avud akat kwinan anch kakuyijikitishangap mulong wa yom yisadiningau ku mudimu.

5. Mutapu ik tukutwisha kuyikasikesh antu akwau?

5 Tukutwish kuyikasikesh antu akwau mu kuyijikitish mulong wa yom yiwamp yasalangay. Tukutwish kand kuyikasikesh antu akwau mu kuyilej anch ukwetany mikadil yiwamp ni kuyikasikesh pakwetau ushon ap paziyinau. (1 Tesalonik 5:14) Mulong tuding chisu chawonsu ni akadivar ni anambaz netu, tukweting mitapu yivud ya kulond chom chikuyikasikesha. (Tang Mulej 4:9, 10.) Iyipula bil anch: ‘Nisadining anch antu akwau ijik mulong wak niyikwatining ni usey ni kuyikat? Ov, nisadining mwamu chisu nikutwisha kusal mwamu?’ Tongin piur pa yom yilondinay Bibil: “Dizu dia muchisu chau—didi diwamp!”—Jinswir 15:23.

6. Mulong wak Satan ukatin kuyiziyish antu a Nzamb? Let chilakej cha mutapu wapakishay kusal mwamu.

6 Jinswir 24:10 ulondin anch: “Anch [waziy] pa dichuku dia yakamish, usu wey [ukukep].” Satan wij anch ang watuziyish ukutwish kuyipish urund wetu ni Yehova. Wapakisha kumuziyish Job pamumeshay mar mapandakena. Pakwez chitongijok cha chisum cha Satan chakanganya. Job washala ushinshamena kudi Yehova. (Job 2:3; 22:3; 27:5) Niyetu tukutwish kumurishikish Satan ni kwikal ni kashinsh anch kakutuwinap. Anch twadandamen kuyikasikesh antu a mu dijuku dietu ni akadivar nau anambaz netu a mu chikumangen, tukutwish kukwash umwing ni umwing kwikal ni musangar ni kushal piswimp ni Yehova.

YILAKEJ TUKUTWISHA KWIMBURIJ

7, 8. (a) Mutapu ik ukatay Yehova kuyikasikesh antu? (b) Mutapu ik ukutwishau anvaj kulondul chilakej cha Yehova? (Tal chipich cha kwinsambishin.)

7 Yehova ukat kuyikasikesh antu. Nfund a kuseng wafunda anch: “Yehova udi piswimp nau awiy akweta michim yinenganena, ukat kuyipandish akweta michim [yiziyina].” (Kuseng  34:18,TMK.) Chisu chovay muprofet Jeremiy wom ni paziyay, Yehova wamuleja anch ukumukwash. (Jeremiy 1:6-10) Yehova watuma mwangel mulong wa kumukasikesh muprofet ipal Daniel. Mwangel winou wamwela Daniel anch ‘ukwet usey nakash.’ (Daniel 10:8, 11, 18, 19) Ukutwish kuyikasikesh akadivar nau anambaz mu mutapu winou, kuwejinaku ayibol ni amapal akad kand kusal nakash mudi mwasalangau pakur?

8 Ap anch Yehova ni Yesu asala mivu yivud pamwing, Yehova wading wij anch ufanyidin kudandamen kumukasikesh Mwanend pezay panap pa divu. Yesu watesha dizu dia Tukwend pasambishay mudimu wend wa kulejan, waditesha kand mu muvu wend wa nsudien panap pansh. Yehova walonda tupamp twaad anch: “Ey udi Mwanam unikatila nakash. Am nikat kusangar mulong weyey.” (Mateu 3:17; 17:5) Yesu amukasikesha kamu pamuteshay Tatukwend ukat kulond anch umukatin ni wibazin mulong wendendiy. Kupwa, uchuku kurutu kwa kufa, wiyakamisha nakash. Yehova wamukasikesha pamutumay mwangel mulong wa kumwongoj. (Luka 22:43) Anvaj, ukutwishany kwimburij chilakej cha Yehova mu kuyikasikesh anen chisu chawonsu. Yijikitishanganya anch asal yom yiwamp. Ni anch akwet yoziu ku shikol, salany yawonsu ukutwishanya mulong wa kuyikasikesh ni kuyikwash chakwel ajijamana.

9. Yom ik tukutwisha kwilejin ku mutapu Yesu wayisadinay atwimbuy end?

9 Yesu nindiy washa chilakej chiwamp tufanyidina kwimburij. Uchuku umwing kurutu kwa kufa, Yesu wayowisha atwimbuy end ku mend ni wayileja mutapu chidia cha usey kwikal ikepishina. Pakwez ading ibazin ni kusambish kutadikijan mulong wa kwijik nany wading mukurump, ni Pita wibaza anch ndiy kakutwishap wamusha Yesu. (Luka 22:24, 33, 34) Yesu, kimenap pa kurumbok kwau. Pakwez, wayijikitisha mulong wa kushinshaman kwau kudi ndiy. Wayileja anch akusal yom yipandakena kujimb mudi yasalay, ni wayileja nich kashinsh anch Yehova uyikatin. (Luka 22:28; Yohan 14:12; 16:27) Tukutwish kwiyipul anch, ‘Ov, nikat kwimburij chilakej cha Yesu ni kuyijikitish antu akwau mulong wa mikadil yau yiwamp pa ndond pa kwimen pa kurumbok kwau?’

10, 11. Mutapu ik Paul wayikasikeshay akadivar nend, ni wakata kusal ik?

10 Kambuy Paul yisu yivud walondang yom yiwamp piur pa akadivar nend. Wayangang mu weny mu mivu yivud pamwing ni akadivar amwing, ni wayijika nawamp, pakwez kafundap kurumbok kwau. Pakwez, wayibazang. Chilakej, Paul walonda piur pa Timote anch ‘udi mwanend mwi Nsalejetu, udi mwin yakin ukatilay’ ni wading ni kashinsh anch Timote ukutongin pa maswir ma antu akwau. (1 Korint 4:17; Filip 2:19, 20) Paul wayileja in Kristu a mu Korint anch Titus wading ‘kusal mudimu pamwing niyend mulong wa kukukwashany’. (2 Korint 8:23) Chakashinsh anch Timote ni Titus ayikasikesha chisu chilejau yom yayifundishau kudi Paul!

11 Paul ni mbay nend wa mudimu Barnabas ateka mwom mu ubaj mulong wa kuyikasikesh akadivar nau. Chilakej, ijika anch antu avud a mu musumb wa Listre akimba kuyijip. Pakwez achirika kand kwinikwa mulong wa kuyikasikesh in kwilej asu ni kuyikwash chakwel ashal ashinshamena kudi Yehova. (Midimu 14:19-22) Kupwa, pashikau mu Efes, Paul wading mu ubaj mulong wa chisak cha antu chading chayijimenang kal, pakwez washakama machuku mavud mulong wa kuyikasikesh akadivar nend. Midimu 20:1, 2 ulondin anch: “Paul wayikumangeja in kwitiyij, wayikasikesh nich mazu. Chad waladikijana nau, wadiokal kwinikwa, waya kwi ngand ya Masedon. Ndiy wendangana mwi ngand yiniya, mulong wa kuyikasikesh  in kwitiyij nich mazu mavud. Chad waya kwi ngand ya Grek.”

KASIKESHIJANANY UMWING NI MUKWAU

12. Mulong wak chiwapin kuya ku yikumangan?

12 Yehova ukatin yom yiwamp mulong wetwetu. Chawiy chitulejinay anch tufanyidin kukumangan pamwing chisu chawonsu. Ku yikumangan yetu, tukat kwilej piur pa Yehova ni kukasikeshijan umwing ni mukwau. (1 Korint 14:31; tang Hebereu 10:24, 25.) Cristina, wajimbulangau kwinsambishin mu mutu wa mulong winou, ulondin anch: “Chom chimwing nikatining nakash ku yikumangan ridi rukat ni kukasikesh nitambwiling kwinikwa. Yisu yimwing noviling kuziy anch nashik ku Chot cha Want. Pakwez anch anambaz ansejin piswimp, ambwikataku, ni alond anch niwapin, akat kwinlej anch tukukatin ni akat kusanger kuman mutapu niyila kurutu mu spiritu. Kukasikesh kwau kukat kwinsal nova nawamp nakash!” Chidi cha usey mudi ik anch umwing ni umwing wa pakach petu wayikasikesh akwau!—Rom 1:11, 12.

13. Mulong wak antu amusadidina kal Yehova mu mivu yivud niyau akwet kuswir kwa kuyikasikesh?

13 Ap antu amusadidina kal Yehova mu mivu yivud akwet kuswir kwa kuyikasikesh. Tong piur pa Joshua. Chisu chading chiyilau in Isarel Mwi ngand ya Kushilamu, Yehova wamutonda Joshua mulong wa kuyitakel. Pakwez, Yehova wamuleja Moses kumukasikesh ap anch Joshua wading wamusadina kal Yehova mu mivu yivud. Yehova walonda anch: “Mwinkisha Joshua chisend, ni kumukasikesh ndiy, ni kumujijamesh, mulong ndiy ukez kwauk ushad kurutu kwa antu inay. Ndiy ukez kuyitek mu jindond jau mwi ngand yiukeza kuman.” (Kuvurik Yijil 3:27, 28) Joshua wading ukwet kuswir kwa kumukasikesh mulong muchid winou wading ufanyidin kurish njit jivud, ni kuyiwin kwi njit jimwing. (Joshua 7:1-9) Nlel, tukutwish kuyikasikesh amakurump a chikumangen ni atulam a munyingumuku, asadina mudimu nakash mulong wa kulam antu a Nzamb. (Tang 1 Tesalonik 5:12, 13.) Kalam umwing wa munyingumuku walonda anch: “Yisu yimwing akadivar akat kutwinkish mikand ya kujikitish yilondina mutapu wasangarau pitwaya kuyital. Tukat kulam mikand yiney ni kuyitang chisu tukata kwov usweral. Yiding kamu musul wa kukasikesh.”

Tuyikwashining anetu kumusejin Yehova piswimp chisu tuyikasikeshina nich musangar (Tal paragraf wa 14)

14. Yilakej ik yimekeshina anch chidi chiwamp kuyijikitish antu akwau pituyiyudina?

14 Mu yisu yimwing, kambuy Paul wayinkisha in Korint yiyul. Pasadinau yiyul yiney Paul wayijikitisha. (2 Korint 7:8-11) Chidi chakin anch mazu mend mayikasikeshang mulong adandamen kusal yom yidia yiwamp. Nlel, amakurump a chikumangen ni anvaj akutwish kulondul chilakej cha Paul. Andreas, ukweta an aad ulondin anch: “Kukasikesh kuyikwashining  an kupam mu spiritu ni mu manangu. Chiyul chifanyidin kwikal chikasikeshena. Ap anetu akutwish kwijik yidia yiwamp, kusal yom yiwamp kwikal chaku chau mu mwom wau kusutin ku kuyikasikesh kwetu chisu chawonsu.”

YOM IK YIKUTWISHA KUKUKWASH KUYIKASIKESH ANTU AKWAU?

15. Njil ik yimwing tukutwisha kuyikasikesh akwetu?

15 Yileja akadivar ni anambaz ney mutapu ukwatina nich usey usu wau ni mikadil yau yiwamp. (2 Jinsangu 16:9; Job 1:8) Anch twasal mwamu, tumwimburijin Yehova ni Yesu. Akat kukwat nich usey chom chawonsu tusadining mulong wawawiy, ap anch tusadinap kamu nakash mudi twada tukimbina. (Tang Luka 21:1-4; 2 Korint 8:12.) Chilakej, twij anch chitin kusal usu nakash kudi akatish netu apamina kal mulong wa kwez ku yikumangan ni kuya mu mudimu wa kulejan. Ov, tukat kuyikasikesh ni kuyijikitish mulong wa yom yawonsu yisadiningau?

16. Chisu ik tukutwisha kuyikasikesh antu akwau?

16 Yikasikesha antu akwau yisu yivud anch chiswapel. Anch waman chom chiwamp chasalangay muntu ufanyidin kumujikitish. Chisu chadingay Paul ni Barnabas ku Antiosh wa ku Pisidiy, antakel a mu sinagog ayileja anch: ‘Anamakwetu, anch ukwetany mazu ma kuyikasikesh antu, malondany.’ Paul wasadina chisu chinech mulong wa kuyikasikesh antu. (Midimu 13:13-16, 42-44) Anch twayikasikesh antu akwau, niyau akutukasikesh.—Luka 6:38.

17. Mutapu ik uwamp wa kuyijikitish antu akwau?

17 Ikal ni kashinsh. Chisu Yesu chayijikitishay in Kristu a ku Tiatir, wadinga nich kashinsh ni wayileja anch wasalangany yom yiwamp. (Tang Kujingunik 2:18, 19.) Mutapu ik tukutwisha kumwimburij? Pamwing ap tukutwish kumujikitish maku udia amwinend mulong wa mutapu ulidinay anend chikalap nchik mashakamin makash madiay nich. Anch udi nvaj, ukutwish kuyijikitish aney mulong wa usu usadinau mulong wa kumusadin Yehova. Yileja piur pa yom yiwamp yasalangau. Anch ukwet kashinsh piuyijikitishina antu akwau, akutwish kwijik anch twovil kurumburik kwa yom tulondina.

18, 19. Mutapu ik tukutwisha kukwashijan umwing ni mukwau kushal piswimp ni Yehova?

18 Yehova wamuleja Moses amukasikesha Joshua. Chidi chakin, Yehova kakutwishap kand kulond niyetwetu nlel ni kutulej muntu kanang tufanyidina kukasikesh. Pakwez ukweting musangar anch waman usu tusadina mulong wa kuyikasikesh antu akwau. (Jinswir 19:17; Hebereu 12:12) Chilakej, anch mukadivar wasal diskur mu chikumangen chetu, tukutwish kumulej yom twasangerang mu diskur diend. Pamwing ap yom yalondangay yatukwashang kurish ni milong yetu ni kwov kurumburik kwa mifund yimwing. Nambaz umwing wamufundina mukadivar umwing wasala diskur anch: “Ap anch twambambin mu ma minit makemp, wamen muchim wam ulimina ni wankasikeshin ni wangokin. Nakimbang kukwijikish anch piwalondina mu mutapu winou uwamp, piwading ku chimet ni pitwambambina ney, niyova anch chading chipan chidiokila kudi Yehova.”

19 Tukutwish kukwashijan umwing ni mukwau ni kushal piswimp ni Yehova anch twalondul chiyul cha Paul chilondina anch: “Chawiy [dandamenany] kasikeshijanany mu ritiy muntu ni mukwau, kwashijanany kand mudi muukat kusalanya.” (1 Tesalonik 5:11) Anch ‘twadandamen kasikeshijan mu ritiy muntu ni mukwau dichuku diawonsu,’ tukumusangaresh Yehova nakash!

^ [1] (paragraf wa 1) Majin mamwing amaswimpin kal.