Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 11 , 2016

Atenchikinau Kukwatijan ni Buku wa Nzamb

Atenchikinau Kukwatijan ni Buku wa Nzamb

“Yehova ku manangu mend kwawiy kwatangilay ngand. Ndiy watenchika maur nich ronganyin rend.”—JINSWIR 3:19.

MIMINY: 6, 24

1, 2. (a) Yom ik yilondiningau antu amwing piur pa chitongijok cha kulond anch Nzamb ukwet dirijek? (b) Yom ik tukwisambina mu mutu wa mulong winou?

ANTU amwing alondining anch: “Ukwetap kuswir kwa dirijek kampand mulong wa kukutakel. Yiukweta nich kuswir yidi kwikal mu urund wa piswimp ni Nzamb.” Ov, chidi chakin? Jinsangu jimekeshin ik?

2 Mu mutu wa mulong winou, tukuman anch Yehova usadining yom pakad kanvundangesh ni utenchikin antu end. Twikwisambin kand yom tufanyidina kusal anch dirijek dia Yehova diatwinkish wintakel. (1 Korint 14:33, 40) Mu mivu chitot ya kusambish, antu a Yehova alondula wintakel wa Mifund ni atwisha kulejan rusangu ruwamp mu jindond jivud. Mudi awiy, tufanyidin kwitiy anch Bibil atutakel nlel. Ni anch twaziyin kwi mbil tutambwila mu dirijek dia Nzamb, mudi chibudikin tukutwish kulejan rusangu ruwamp mwi ngand yawonsu. Chikumangen chikudandamen kwikal chishitwila, chikweta chisambu, ni chikwikal mu umwing.

YEHOVA UDI NZAMB WAKAD KANVUDANGESH

3. Yom ik yikwinkishina kashinsh anch Yehova udi wakad kanvundangesh?

3 Anch twatal yom yatangay Yehova, tumen patok anch Nzamb  kakwetingap kanvundangesh. Ku “manangu mend kwawiy kwatangilay ngand. Ndiy watenchika maur nich ronganyin rend.” (Jinswir 3:19) Kudi yom yivud yitwakad kwijik yatangay Yehova. Pakwez,“niyetu tukat kutesh ching kusu mu kayauyau.” (Job 26:14) Pakwez yoviken nawamp kusutin yikemp twija piur pa diur mutapu uditenchikinau nawamp. (Kuseng 8:3, 4) Ma miliyon ma atutumb makat kushemunik mwiur mu mutapu uwamp pakad kububijan. Ni tong mutapu ukata ma planet kunyingumuk ku muten. Kutenchik kwinoku kushimokishena kuswapel mulong Yehova ndiy watenchika mutapu ukata ma planet ni atutumbu kushemunik. Anch twatong mutapu ‘watangay maur ku manangu mend’ ni divu, tufanyidin kumutumbish, kumwifukwil, ni kwikal ashinshamena kudi ndiy.—Kuseng 136:1, 5-9.

4. Mulong wak in siyans katwishinap kwakul ku yipul yivud ya usey?

4 In siyans akat kusadin yom yivud yilejau piur pa diur ni divu mulong wa kusal anch mashakamin metu mikal mawamp. Pakwez kakutwishangap kwakul ku yipul yivud ya usey. Chilakej, in kwilej atutumbu kakutwishangap kurumburil mutapu wasambisha diur ap mulong wak antu, annam, mitond yidiaku panap pa divu. Ni antu avud kakutwishangap kurumburil mulong wak antu akwet kuswir kwa kushakam chikupu. (Mulej 3:11) Diyingishin dimwing disadina anch antu akangany kwakul ku yipul yiney didi anch in siyans nau antu akwau alondining anch Nzamb kwikiling ni akat kufundish malejan ma dikarumuk. Pakwez Nzamb utwinkishin yakul mu Buku wend, Bibil.

5. Mu mitapu ik yikatau antu kuchingejin mimbu ya yom yatangau?

5 Yehova watanga chom ni chom ni mimbu yau. Mimbu yiney yikuswimpangap. In kwilej milong ya kasu ka nzembu, a plombiye, a injenyer, a pilot, a dokter, ni antu akwau akat kuchingejin mimbu yiney mulong wa kusal midimu yau. Chilakej, rudung ra mutu aritekining pa ndond kampand mu mujimbu, a dokter ijing ndond yifanyidinau kuritan kudi muyej mwawonsu. Ni muntu mwawonsu wijing anch ang muntu wamatik kudiokal pa ndond yilemp, ukuwa ni ukutwish kufa. Tuziyidin ku mimbu ya yom yatangau, mudi usu kanang ukutwisha kutupwit ku ubaj, mulong tukatin kwikal aom.

YOM YATENCHIKAY NZAMB

6. Mutapu ik twija anch Yehova ukatin anch antu end amwifukwila mu mutapu uwamp?

6 Yehova watenchika diur mu mutapu upandakena kuwap. Chakin, ukatin anch antu end amwifukwila mu mutapu uwamp. Chawiy chatwinkishay Yehova Bibil mulong wa kutufundish mutapu wa kumwifukwil. Mu kulondul ukwash utwinkinay kusutin Bibil ni dirijek diend tukwikal ni musangar mu mashakamin metu.

7. Yom ik tukutwisha kwilejin ku mutapu wafundau Bibil?

7 Bibil udi chakin chipan cha pakampwil chidiokila kudi Nzamb. In kwilej amwing alondin anch Bibil udi kwend buku wafundau kudi chisak cha in Yuda ni in Kristu akumangejau pamwing kudi antu. Pakwez Nzamb ndiy wakwata mupak wa kutond nany ukufunda Bibil, ni chisu chikumufundau, ni yom ik yikufundau. Chawiy chisadina anch mikand yawonsu yidia mu Bibil yitukwash kutesh uruu wa Nzamb. Kudiokal ku Disambishil kushik ku Kujingunik, Bibil utulejin anch kwading kufanyidin kwikal “mbut” jikusala divu kwikal kand paradis. Ni twilejining anch “mbut” jinej udi Yesu Kristu ni Want wend ukumekesh anch Yehova ndiy ukweta mbil ja kuyiyikel antu awonsu.—Tang Disambishil 3:15; Mateu 6:10; Kujingunik 11:15.

8. Mu mitapu ik yading yitenchikinau in Isarel nawamp?

 8 In Isarel alondula Yijil yayinkishau kudi Nzamb ni ading atenchikinau nawamp. Chilakej, kwading ‘amband atenchikau mulong wa kusal mudimu ku chis cha mwinkand wa kukumangen.’ (Kubudik 38:8) In Isarel ading kand ni yijil mulong wa mutapu wa kushemunik ni kusend mwinkand mu mutapu uwamp. Kupwa, Mwant David watenchika in kupesh ni in Levi mulong wa kusal midimu ya pakampwil ku tempel. (1 Jinsangu 23:1-6; 24:1-3) Chisu chaziyinangau an a Isarel kudi Yehova, wayiyukishang. Ading itenchikin, mu chisambu, ni mu umwing.—Kuvurik Yijil 11:26, 27; 28:1-14.

9. Yikumangen ya mu mivu chitot ya kusambish ading ayitenchikin mutapu ik?

9 Yikumangen ya mu mivu chitot ya kusambish ading ayitenchikin niyawiy. Kwading chisak chitakedila, chisak chinech cha antu chapanang wintakel ku yikumangen. Chakusambish, chisak chinech achisala kudi apostol. Kupwa, amakurump akwau iwejaku. (Midimu 6:1-6; 15:6) Yehova wayitakela antu a mu chisak chitakedila ni akwau chakwel asala mudimu pamwing mu kufund mikand yikweta yiyul ni mbil mulong wa kupan ku yikumangen. (1 Timote 3:1-13; Titus 1:5-9) Yikumangen yataninamu mutapu ik mu kulondul wintakel wa chisak chitakedila?

10. Yom ik yashikenang palondulang yikumangen mbil japanangau kudi chisak chitakedila? (Tal chipich cha kwinsambishin.)

10 Tang Midimu 16:4, 5. Mu mivu chitot ya kusambish, akadivar amwing ayangang kutal yikumangen mulong wa kuyilej “yijil yatenchikau kudi atwimbuy a Yesu ni kudi amakurump mu Yerusalem,” yijil yiney ayipanang kudi chisak chitakedila. Yikumangen yalondulang mbil jinej ni ‘yakasikana mu ritiy, yavulijananga kand pichuku pichuku.’ Yom ik tukutwisha kwilejin ku chilakej chau yikutwisha kutukwash nlel mu yikumangen yetu?

OV, UKAT KULONDUL WINTAKEL?

11. Yom ik yifanyidinau kusal amakurump a chikumangen ni ankwash a mudimu chisu chitambwilau wintakel mu dirijek dia Nzamb?

11 Antakel a Biro wa Mutiy, atulam a munyingumuku, ni amakurump a chikumangen afanyidin kuziyin ku wintakel utambwilau mu dirijek dia Nzamb. Chawiy, Buku wa Yehova utulejin kuyiziyin antu akata kututakel. (Kuvurik Yijil 30:16; Hebereu 13:7, 17) Antu ashinshamena kudi Yehova kakatap kubwambwil, ni kakatap kwinan piur pa wintakel utambwilingau. Tufanyidinap kwikal mudi Diotref, waburena kalimish kudi akadivar atakedina. (Tang 3 Yohan 9, 10.) Anch twalondul wintakel utwinkishinau, yikutukwash kulam chisambu ni uumwing mu chikumangen. Chawiy tufanyidin kwiyipul anch: ‘Ov, nikat kuyikasikesh akadivar ni anambaz kwikal ashinshamena kudi Yehova? Nikat kulondul pakad kulab wintakel nitambwiling mu dirijek dia Nzamb?’

12. Mutapu ik uyitekiningau amakurump ni ankwash a mudimu?

12 Machuku masutang am, Chisak chitakedila chaswimpin mutapu ufanyidinau kutek amakurump ni ankwash a mudimu mu chikumangen chin chawonsu. “Yipul ya in Kutang” yidia mu Chinong cha Kalam cha 15, ngond wa 11, 2014, charumburil anch mu mivu chitot ya kusambish, chisak chitakedila chayinkisha atulam in kwendangan mbil ya kutek amakurump ni ankwash a mudimu. Kusambish ngond wa 9, 2014, atulam a munyingumuku asambishin kutekan mu mutapu winou. Anch amakurump a mu chikumangen atond mukadivar ukusala mudi mukurump ap nkwash a mudimu, kalam wa munyingumuku ukat kusal usu wa kumwijik nawamp ni dijuku diend. Chilakej, ukutwish kusal mudimu wa kulejan pamwing ni mukadivar winou. (1 Timote 3:4, 5) Kupwa kalam wa munyingumuku ni amakurump akushakam  pamwing. Akat kushinshikin kamu nawamp Mifund yilejena mikadil yifanyidinay kwikal nich mukurump ap nkwash a mudimu.—1 Timote 3:1-10, 12, 13; 1 Pita 5:1-3.

13. Mutapu ik tukutwisha kumekesh anch twovijadin pamwing ni wintakel tutambwila kudi amakurump?

13 Amakurump akat kutwinkish wintakel udiokila mu Bibil mulong akatining kutuking ni kulam chikumangen. Tufanyidin kwovijan nau mulong mbil jinej jidi mulong kutaninamu kwetu. (1 Timote 6:3) Mu mivu chitot ya kusambish, antu amwing aletishang “kanvundangesh.” Kakatangap kwau kusal mudimu, pakwez iyandjikang mu yom yakad kuyital. Amakurump asala usu wa kuyikwash, pakwez alika kwau kuswimp. Paul waleja chikumangen mutapu ufanyidina kumuman muntu wa mutapu winou. Walonda anch: “Mushinshikany muntu mwinou, chad aurikany nend.” Afanyina kwaurik ni muntu wa mutapu winou pakwez kafanyinap kumuman mudi mukankuny. (2 Tesalonik 3:11-15) Nlel amakurump niyawiy asadin usu wa kumukwash muntu uvuramedina mbil ja Nzamb, chilakej, muntu ukimbina kwatijan ni muntu wakad kwikal kaman. (1 Korint 7:39) Anch muntu walik kuswimp yisal yend, amakurump akutwish kukwat mupak wa kusal diskur dirumburila mutapu ukutwisha yisal yiney kusal anch antu akwau alonda nayimp piur pa chikumangen. Anch amakurump asal diskur mudi dined mu chikumangen chen, ey mutapu ik ukusala? Anch umwij muntu winou, ov, ukumwipuk? Mu mutapu winou, ukutwish chad kumukwash ijika anch yisal yend yidi yiyimp ni yimusangareshinap Yehova, ni ukutwish kuswimp mwikadil wend. [1]—Tal mazu ma kwinsudien.

TULAMANY CHIKUMANGEN CHISHITWILA, CHIKWETA CHISAMBU, NI UUMWING

14. Mutapu ik tukutwisha kukwash kulam chikumangen chishitwila?

14 Dizu dia Nzamb ditulejin yom yitufanyidina kusal etu awonsu mulong kangal tulika uyimp wikal mu chikumangen. Tushinshikina yom yashikena mu Korint. Paul wading uyikatin akadivar ni anambaz a kwinikwa. Wayikwasha antu avud kwilej uyakin. (1 Korint 1:1, 2) Chawiy tongin mutapu wiyovay chisu chatanay amwing a pakach pau adi akamasandj ni akadivar ayitalang antu a mutapu winou kudandamen kwikal mu chikumangen! Paul wayileja amakurump a chikumangen anch “mupanany muntu winou kudi Satan.” Ading afanyidin kumudiosh muntu winou mu chikumangen, charumburik anch kumwopat. (1 Korint 5:1, 5-7, 12) Nlel, amakurump a mu chikumangen akutwish kukwat mupak wa kumwopat muntu wasadina chitil chijim ni walik kakarumuk. Mu mutapu winou, mutapu ik tukumumana muntu winou kukwatijan ni Mifund? Anch twasal mwamu, tukwashin kulam chikumangen chishitwila. Ni tukutwish kumukwash muntu winou kujingunin anch nifanyidin kukarumuk ni kumwit Yehova dilikishin.

15. Mutapu ik tukutwisha kudandamen kulam chisambu mu chikumangen?

15 Kwading kand mulong ukwau ku Korint. Amwing ayifundang akadivar nau ku dirumburish. Paul wayipula anch: “Ov, mulong wak kiushimpishinanyap muchim anch muntu wakusalany nayimp?” (1 Korint 6:1-8) Nlel, antu amwing mu chikumangen akat kwovijan pamwing ni akadivar pa milong ya kwisak, pakwez anch nfalang jashadik amening anch akadivar nau asadinang makasu mulong wa kujiy. Chawiy akat kuyifund akadivar nau. Pakwez anch yom yiney yashiken, yikutwish kuyibachik antu alonda nayimp piur pa Yehova nau antu end. Ni yikutwish kuletish kanvundangesh mu chikumangen. Buku wa Nzamb utukwashin kuman mutapu tukutwisha kudandamen kulam chisambu ni akadivar netu, ap anch tukutwish twashadish nfalang. [2] (Tal mazu ma kwinsudien.) Chawiy, watufundisha  mutapu tufanyidina kupwish milong yikash ni kupwitijan. (Tang Mateu 5:23, 24; 18:15-17.) Anch twaziyin kwi mbil jend, tukudandamen kulam chisambu ni uumwing mu chikumangen.

16. Mulong wak antu a Nzamb adi mu umwing?

16 Buku wa Yehova utulejin anch: “Talany kuwap ni musangar anch akadivar abombakan ni kushakam pamwing!” (Kuseng 133:1) Chisu chamuziyinangau Yehova, an a Isarel adinga atenchikinau ni mu umwing. Nzamb wasambela kulond piur pa antu end anch: “Nikez kakukumangejany pamwing mudi amikoku [adia] mu diyind.” (Mike 2:12) Yehova wasambela kand kulond piur pa antu end anch afanyidin kwilej uyakin wa mu Mifund ni kumusadin mu umwing. Walonda anch: “Chawiy nikez kakarumun dizu dia antu a michid yawonsu kwikal dizu dishitwila. Awiy akez katazuk pa dijin dia Yehova, mulong wa kumusadin chikij ku chikij.” (Sofoniy 3:9, NWT) Musangar mudi ik tukweta wa kumwifukwil Yehova mu umwing!

Amakurump amuyudin muntu ‘wasalang chitil’ (Tal paragraf wa 17)

17. Yom ik yifanyidinau kusal amakurump anch muntu wasal chitil chijim?

17 Anch muntu wasal chitil chijim, amakurump afanyidin kusal swa mulong wa kumuyul nich rukat. Ij anch Yehova ukatin akinga chikumangen ku yisalijok yiyimp chakwel chikala chishitwila ni chikal mu umwing. (Jinswir 15:3) Paul wayikata nakash akadivar a mu Korint ni wayikwasha padingau nich kuswir kwa ukwash, mudi tutangina mu mukand wa kusambish wayifundinay. Twij anch amakurump a chikumangen a kwinikwa asala swa kulondul wintakel wa Paul mulong kupwa kwa angond amwing, wayijikitisha mu mukand wend wa kaad wayifundinay. Anch mukadivar ‘wasal chitil kurutu ijika,’ amakurump afanyidin kumuyul mu mutapu wa rukat.—Galatia 6:1.

18. (a) Mutapu ik wakwasha mbil ja mu Dizu dia Nzamb yikumangen ya mu mivu chitot ya kusambish? (b) Yom ik tukwisambina mu mutu wa mulong ukwambakenap?

18 Choviken anch palondulau in Kristu a mu mivu chitot ya kusambish wintakel wa mu Buku wa Nzamb, yikumangen yau yishitula, yikala mu chisambu, ni yikal mu umwing. (1 Korint 1:10; Efes 4:11-13; 1 Pita 3:8) Mudi chibudikin, akadivar ni anambaz inay atwisha chad kulejan rusangu ruwamp pa “mangand mawonsu.” (Kolosay 1:23) Nlel kand, antu a Yehova adi mu umwing ni itenchikin ni akat kulejan rusangu ruwamp pa mangand mawonsu. Mutu wa mulong wambakedinap ukutwinkish kashinsh piur pa maswir majim ma kumutumbish Mukaleng Nsalejetu Yehova ni kuziyin kwi mbil jidia mu Buku wend, Bibil.—Kuseng 71:15, 16.

^ [1] (paragraf wa 13) Tal Atenchikinau Chakwel Kusal Rusot ra Yehova, paj wa 134-136.

^ [2] (paragraf wa 15) Mulong wa jinsangu piur pa kwijik anch mwin Kristu akutwish kukwat mupak wa kumufund mwin Kristu mukwau, tal buku “Ilamany mu Rukat ra Nzamb,” paj wa 223, mazu ma kwinshin.