Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 10 , 2016

Mekesh Ritiy mu Kushilamu Kwa Yehova

Mekesh Ritiy mu Kushilamu Kwa Yehova

“Ritiy rikat . . . kutwijikish ni [kushinshikin] yom yakad kumekan ku mes.”—HEBEREU 11:1.

MIMINY: 54, 43

1. Mutapu ik tufanyidina kwiyov piur pa ritiy retu?

RITIY chidi chom chakad kwikalau nich antu avud. (2 Tesalonik 3:2) Pakwez Yehova ukat kupan ritiy kudi antu awonsu akata kumwifukwil. (Rom 12:3; Galatia 5:22) Tujikitishin mudi ik mulong wa ritiy ritwinkishiningay Yehova!

2, 3. (a) Mutapu ik tukutwisha kutaninamu anch tukwet ritiy? (b) Yipul ik tukushinshikina katat?

2 Yehova wapana mwanend mukatish chakwel muntu mwawonsu ukuteka ritiy mudiay Yesu ukutwish kumulikishin yitil yend. Chinech chisadin anch chiyiswapel antu kwikal arund a Yehova ni kushakam chikupu. (Yohan 6:44, 65; Rom 6:23) Yehova udi muntu muwamp mud ik kudi etu! Ap anch tudi akayitil ni tukat kufa, Yehova umening anch tukutwish kusal yom yiwamp. (Kuseng 103:10) Utukwashining kwilej rusangu ruwamp piur pa Yesu ni chakupesh chend. Anch twasambish kwikal ni ritiy mudiay Yesu ni kumulondul tukutwish  kuchingejin mwom wa chikupu !—Tang 1 Yohan 4:9, 10.

3 Yom ik yivud tukutwisha kwilej piur pa ritiy? Anch twijik yom yasalay Nzamb mulong wetwetu ni yikusalay mu machuku ma kurutu, ov chinech chirumburikin anch tukwet ritiy? El tumanany yom yikwau tufanyidina kusal.

‘IKAL NI RITIY MU MUCHIM WEY’

4. Anch tukwet ritiy, rikwikal ni usu ik padi etu?

4 Anch tukwet ritiy mudiay Yehova ni Yesu, tukutwishap ching kwijik yom yasalau ni yikusalau mulong wetwetu. Tukwikal kand ni maswir makash ma kushakam kulondwish yom yitufundishinau. Tukwikal ni mushiku wa kuyikwash antu akwau chakwel niyawiy ijika yom yiney. Kambuy Paul walonda anch: “Anch walond patok kudi antu anch: ‘Yesu udi Nsalejam,’ chad witiy mu muchim wey anch, Nzamb wamuvumbula mu rufu kwikal kand mwom, ey ukez kupand. Mulong ku ritiy ridia mu muchim wa muntu, kwawiy kukez kumuyingishinau kudi Nzamb. Kulond ku kan patok kudi antu, kwawiy kukez kupandilay muntu.”—Rom 10:9, 10; 2 Korint 4:13.

5. Mulong wak ritiy ridi ra usey nakash, ni yom ik tufanyidina kusal mulong wa kwikal ni ritiy rikash? Let chilakej.

5 Chakin kamu, mulong wa kusanger mwom wa chikupu mwi ngand yisu ya Nzamb, tufanyidin kwikal ni ritiy ni kurilam chakwel rikala rikash. Ritiy ridi mudi mutond. Tufanyidin kudandamen kwichil mem ku mutond chakwel upama nawamp. Pakwez anch tuwichidinap mem mutapu uwamp mutond ukuwum. Chilik chimwing kand, tufanyidin kushinshikin anch ritiy retu ridi “rikash” ni ridandamedin “kujimb.”—Titus 2:2; 2 Tesalonik 1:3; Luka 22:32; Hebereu 3:12.

BIBIL ULEJEN CHIRUMBURIKINA RITIY

6. Mu mitapu ik yaad yirumburilay Hebereu 11:1 piur pa ritiy?

6 Hebereu 11:1, urumburil chidia ritiy. (Tang.) (1) Ritiy rikat “kutwijikish win yakin wa yom yituchingejina.” Yom “tuchingejina” mudi kand kushilamu kwa Nzamb mulong wa machuku ma kurutu. Chilakej, tukwet kashinsh anch yom yiyimp yikwikalakwap ni kukwikal ngand yisu. (2) Ritiy rikat “kutwijikish ni [kushinshikin] yom yakad kumekan ku mes.” Twij anch Yehova Nzamb, Yesu Kristu, angel, ni Want yidiaku mwiur, ap anch tuyimeningap. (Hebereu 11:3) Mutapu ik tukutwisha kumekesh chakin kamu anch tukwet ritiy mu kushilamu kwa Nzamb ni mu yom yitwakad kuman? Tukat kusal mwamu kusutin mutapu tudia, yom tulondining, ni yom tusadining.

7. Mutapu ik utukwashina chilakej cha Nowa kutesh chirumburikina kwikal ni ritiy? (Tal chipich cha kwinsambishin.)

7 Yom ik tukwilejina kusutin ritiy ra Nowa? Kambuy Paul walonda anch Nowa: “witiya kubabesh kwamulejau kudi Nzamb, mulong wa yom yikweza kurutu yakad kal kumekan ku mes. Ndiy wamuziyila Nzamb, chad wasala waat, mwawiy mwapandilay amwinend ni a mu dijuku diend.” (Hebereu 11:7) Mulong Nowa wading ni ritiy mu yom ya mulejau kudi Yehova, wasala waat ujim. Pamwing ap amutej nend amwipula mulong wak wasalay waat winou. Tukwet kashinsh anch Nowa kaninetap. Bibil ulondin anch Nowa wading ‘mwin kulejan wa yom yitentamina.’ (2 Pita 2:5) Wayibabesha antu anch Nzamb ukulet  mabeb mulong wa kuyijip antu ayimp. Pamwing ap wayileja yom yawonsu mutapu wamulejau kudi Yehova anch: “Katat musul wa yom yawonsu ya pansh yikata kupin wez kal, mwamu munayitongidila. Tal kwa, ngand yizul kal nich chisum mulong wa antu,”ni ‘nikulet mabeb mavud nakash, mulong wa kushesh yom yawonsu yikata kupim ya mwishin mwa diur. Chad kand yom yawonsu ya pansh yikata kupim yikez kufa.’ Kupwa Nowa wafanyina kuyilej antu yom yafanyinau kusal chakwel apanda. Yehova wamuleja anch: “Ukwandam mu waat.”—Disambishil 6:13, 17, 18.

8. Yom ik yalonday Jakobu mulong wa ritiy?

8 Jakobu ni yend wafunda piur pa ritiy. Wafunda yom yiney kurutu kambuy Paul ayifundina in Hebereu. Wafunda anch: “Nleja ritiy rey rakad yisalijok, niyam nikukulej ritiy ram kusutin yisalijok yam.” (Jakobu 2:18, NWT.) Jakobu warumburila anch mulong wa kwikal ni ritiy, tufanyidinap ching kwitiyij. Ayilembil niyau akat kwitiyij anch Nzamb udingaku pakwez katekiningap ritiy mudiay Yehova. Pakwez, akat kumubwambwil nakash. (Jakobu 2:19, 20) Chikwau kand, anch muntu ukwet ritiy ukumusangaresh Nzamb kusutin  ku yom ap yisal yend yiwamp. Yawiy yasalay Aburaham. Jakobu wafunda anch: “Nshankur wetu Aburaham wamupesha mwanend ikundj Isak pa chintamb, ov, kichawiyap chisalijok chinech chamwedilau anch utentamin? Tal kwa, ritiy rend ni yisalijok, yawonsu yisadidil pamwing. Ritiy rend rawanyina mulong wa yisalijok yend.” Jakobu wakasikeshina ritiy rakad yisal ang rikwetap usey palonday anch: “Chawiy mujimbu wakad mupim ufil. Chawiy chimwing kand, niyau ritiy rakad yisalijok rufil.”—Jakobu 2:21-23, 26.

9, 10. Kutek ritiy mudiay Mwan chirumburikin ik?

9 Kusut kwa mivu 30, Yohan wafunda Rusangu rend Ruwamp ni mikand yisatu. Mudi in kufund akwau a Bibil, Yohan wijika chirumburikina ritiy. Mu yom yend yafunday, Yohan wasadina tupamp tuvud chisal cha Grek charumburila yisu yimwing “kwikal ni ritiy” mu Anglais.

10 Chilakej Yohan warumburila anch: “Muntu mwawonsu umwitiyijina Mwan ukwet mwom wa chikupu. Muntu mwawonsu wakad kumuziyil Mwan kakez kwikalap nich mwom winou, pakwez Nzamb ukez kudandamen kumujimen.” (Yohan 3:36) Mulong wa kumekesh ritiy kudiay mwan, tufanyidin kumuziyin Yesu. Chawiy, kusutin yom yafunday Yohan, tumen anch Yesu walondang yisu yivud anch mulong wa kwikal ni mwom wa chikupu, tufanyidin kumwitiyij ndiy ni Tatukwend.—Yohan 3:16; 6:29, 40; 11:25, 26; 14: 1, 12.

11. Mutapu ik tukutwisha kumekesh anch tukat kumujikitish Yehova mulong wa kwijik uyakin?

11 Yehova usadidin spiritu wend utumbila mulong wa kutukwash twijika uyakin piur pend ni pa Mwanend ni utukwashining tuteka ritiy mudiau awiy. (Tang Luka 10:21.) Mutapu ik tukutwisha kumekesh kujikitish kudi Yehova mulong wa yom yawonsu yatusadinay? Tufanyidinap kulik kumujikitish Yehova mulong ukatin anch twikal mu urund ni ndiy kusutin Yesu, udia “Kalal ni Mwin Kutenchik wa ritiy retu.” (Hebereu 12:2) Ni tufanyidin kudandamen kukasikesh ritiy retu kusutin mu kumulembil Yehova ni kwilej Dizu diend chisu chawonsu.—Efes 6:18; 1 Pita 2:2.

Mekesh ritiy rey kusutin kuyilej antu rusangu ruwamp anch ukwet chisu chakusal mwamu (Tal paragraf wa 12)

12. Yom ik tukusala anch tukwet ritiy?

12 Tufanyidin kudandamen kumekesh mu yisal yetu anch tukwet ritiy rikash mu kushilamu kwa Yehova. Chilakej, tukudandamen kulejan kudi antu piur pa Want wa Nzamb ni kuyikwash chakwel ikala in kwilej a Yesu. Tukudandamen kand kusal yom ‘yiwamp kudi antu awonsu, pakwez kupandakan kudi anamakwetu in ritiy.’ (Galatia 6:10) Ni kusal usu nakash mulong ‘wa kumudjol muntu mukur ni yaku yend’ mulong tukatinap chom ap chimwing chiyipish urund wetu ni Yehova.—Kolosay 3:5, 8-10.

RITIY MUDIAY NZAMB CHIDI CHIKUNKU CHA MUFULANDAL WETU

13. Mulong wak “ritiy mudiay Nzamb” ridi ra usey? Mutapu ik urirumburilau mu Bibil ni mulong wak?

13 Bibil ulondin anch: “Wakad ritiy muntu kakutwishap kumusangarish Nzamb, mulong muntu mwawonsu ukuseja piswimp kudi Nzamb ufanyidin kwitiy anch, Nzamb udiaku, ndiy ukat kufutan kuwap kudi antu awonsu akata kumusurab.” (Hebereu 11:6) Bibil ulondin kand anch “ritiy mudiay Nzamb” chidi chom chakusambish chifanyidinau kwikal nich in Kristu akin. Chidi chikunku cha ‘mufulandal’ wetu. (Hebereu 6:1) Tufanyidinap ching kwikal ni ritiy kwapwa, pakwez tufanyindin kwikal  kand ni mikadil yikwau ya usey mulong wa kwikal mu urund uwamp ni Yehova ni kuulam.—Tang 2 Pita 1:5-7; Jud 20, 21.

14, 15. Anch twisikej ritiy ni rukat, ritiy rikwet usey ik?

14 In kufund Bibil isambina nakash mulong wa ritiy kusutamu mikadil yikau. Chinech chirumburikin anch ritiy udi mwikadil wa usey tufanyidina kwikal nich?

15 Paul wisikeja ritiy ni rukat. Wafunda anch: “Ap anch nikwet ritiy rujim ra kushemunin mikandu, pakwez anch kinikwetap rukat, nidi muntu wamwamu.” (1 Korint 13:2) Yesu walonda anch: “Chijil chakusambish chipandakenamu Yijil yawonsu” kudi kumukat Nzamb. (Mateu 22:35-40, TMK.) Rukat ritukwashining kwikal ni mikadil yikwau yimusangareshina Nzamb. Chilakej, Bibil ulondin anch rukat rikat “kwitiyij kwau yom yawonsu.” Chawiy rukat rikutukwash kwitiyij ap kwikal ni ritiy mu yom yawonsu yitulejinay Nzamb yidia mu Bibil.—1 Korint 13:4, 7.

16, 17. Yom ik yilondinay Bibil piur pa ritiy ni rukat? Mwikadil ik upandakena kujimb pakach pa mikadil yiney, ni mulong wak?

16 Rukat ni ritiy yidi mikadil ya usey nakash, chawiy chayisambinau nakash kudi in kufund a Bibil. Paul wayikasikesha akadivar chakwel ‘adjala rukibu ra ritiy ni rukat.’ (1 Tesalonik 5:8) Pita wafunda piur pa Yesu anch: “En umukatilany ndiy wakad kal en kumumananyap ku mes, en umwitiyijinany, ap anch kiumumenanyap.” (1 Pita 1:8) Jakobu wayipula akadivar nend azizidinau many anch: “Ov Nzamb kakatap kuyitond utuzwendj a mangand kwikal ampich mu ritiy ni answan a mu Want wayishilayimu kudi awiy amukatina?” (Jakobu 2:5, TMK.) Yohan wafunda anch yijil ya Nzamb yirumburikin anch “twitiyij mu dijin dia Mwanend Yesu Kristu ni kukatijan muntu ni mukwau.”—1 Yohan 3:23, TMK.

17 Pakwez Paul wafunda kand anch: “Chawiy, kudi ritiy, ruchingej, rukat, yom yiney yisatu, ni chipandakenamu ku yawonsu yiney, rukat.” (1 Korint 13:13, TMK.) Mu machuku ma kurutu, tukwikalap kand ni kuswir kwa kwikal ni ritiy mu kushilamu kwa Nzamb piur pa ngand yisu mulong yom yiney yikwikal kamu yakin. Tukez kwikal ni mwom uwamp wisambidinay Bibil. Pakwez tukwikal ni kuswir kwa kumukat Nzamb ni kuyikat antu akwau. Chawiy, rukat retu mulong wa awiy rikwikal ra chikupu.

YEHOVA UYUKISHIN RITIY RETU

18, 19. Yibudikin ik yidiaku nlel mulong antu a Nzamb akwet ritiy, ni nany uwanyidina kushiman mulong wa yom yiney?

18 Antu a Yehova a machuku minam akwet ritiy mu Want wa Nzamb ni akat kupan ukwash ku Want winou. Ni akatijadin umwing ni mukwau. Asadin mwamu mulong itiyin anch spiritu wa Nzamb ayitakel mu mashakamin mau. (Galatia 5:22, 23) Yibudikin ik yitaniningau? Ma miliyon chinan ni kusut ma akadivar ni anambaz adia pa mangand mawonsu adi mu umwing ni mu chisambu mu yikumangen yau. Chakin kamu ritiy ni rukat yidi mikadil yimwing ya usey nakash.

19 Uumwing winou udiaku mulong wa ukwash wa Nzamb wetu. Uwanyidin ntumb mulong wa yom yiney. (Isay 55:13) Tujikitishin nakash mulong wasala anch ‘tupanda mulong wa ritiy.’ (Efes 2:8) Yehova udandamedin kuyikwash antu avud mulong ikal ni ritiy mudiay ndiy. Kupwa, mangand mawonsu makwizul ni antu awanyidina, atentamina, ni akweta musangar wa kumushiman Yehova chikupu!