Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 10 , 2016

Lam Mwikadil Wey wa mu Spiritu Piusadidina Mwi Ngand ya Wingendj

Lam Mwikadil Wey wa mu Spiritu Piusadidina Mwi Ngand ya Wingendj

“Mazu mey namajindjikin kal mu muchim wam.”—KUSENG 119:11.

MIMINY: 142, 47

1-3. (a) Yom ik tufanyidina kutek pa ndond ya kusambish? (b) Milong ik yikash yikwetau antu ilejina dizu disu, ni yom yiney yiletin yipul ik? (Tal chipich cha kwinsambishin.)

NLEL, Atuman a Yehova avud akwatiken mulong wa kukwash kuwanyish uprofet wa kulejan rusangu ruwamp ku “antu a mangand mawonsu, ni a michid yawonsu, ni a [mazu mawonsu].” (Kujingunik 14:6) Ov, udi pakach pa antu ilejina kulond dizu dinying? Amwing asadin mudi amishoner, akwau alejen kwi ndond kudia maswir ma in kulejan. Akwau akat kuya mu kukumangan mu yikumangen yisadidina dizu dia wingendj mwi jingand jau.

2 Atushalapol awonsu a Nzamb akwet kuswir kwa kukasikesh mwikadil wau wa mu spiritu ni wa dijuku diau. (Mateu 5:3) Yisu yimwing, tukutwish kutong anch tukwatiken nakash ni chikasiken kwikal ni chisu cha kusal dileja dia muntu panrend yisu yawonsu. Pakwez, antu adia mu yikumangen ya dizu dia wingendj akwet milong yivud.

3 Antu asadidina mu chikumangen cha dizu dia wingendj akwet kuswir kwa kwilej dizu disu, pakwez  afanyidin kwikal ni kashinsh anch ilejin chakin kamu yom yikurikina ya Nzamb. (1 Korint 2:10) Mutapu ik ukusalau mwamu anch kateshinap nawamp yom yilondinau mu chikumangen? Ni mulong wak anvaj in Kristu asadidina mu chikumangen cha dizu dia wingendj afanyidin kwikal ni kashinsh anch uyakin ushikin ku michim ya anau?

UBAJ MULONG WA URUND WETU NI YEHOVA

4. Yom ik yikutwisha kutek urund wetu ni Yehova mu ubaj? Let chilakej.

4 Anch tuteshinap mafundish ma Bibil mu dizu dia wingendj, chom chinech chikutwish kutuletin ubaj mulong wa urund wetu ni Yehova. Chisu chachirikay Nehemiy ku Yerusalem, wamana anch an amwing katwishangap kulond dizu dia Hebereu. (Tang Nehemiy 13:23, 24.) Mulong an inay katwishap kutesh Dizu dia Nzamb, urund wau ni Yehova wayipa.—Nehemiy 8:2, 8.

5, 6. Yom ik yamenau anvaj amwing asadidina mu chikumangen cha dizu dia wingendj, ni mulong ik udiaku?

5 Anvaj amwing in Kristu asadidina mu chikumangen cha dizu dia wingendj amen anch urund wa anau ni Yehova ukat kuyip. Mulong anau kateshiningap nawamp yom yilondinau mu chikumangen, ni yom yilondinau yikuyibachikangap kusal yom kanang. Pedro wadiokala mu Amérique du Sud ni dijuku diend ni waya kushakam mu Australie ulondin anch: “Anch alondin piur pa milong ya mu spiritu, yom yiney yifanyidin kushik ku muchim.” [1] (Tal mazu ma kwinsudien.)—Luka 24:32.

6 Anch tutangin mu dizu dia wingendj, tukwiyovap mutapu tukata kwiyov pitutangining mu dizu dietu dia chivadik. Chikwau kand, mulong chikasiken kwambamb mu dizu dikwau, tukutwish kuziy ni difukwil dietu mulong wa Yehova dikwikalap ni yibudikin yiwamp. Chawiy pitudandamedina kwikal ni maswir ma kusadin mu chikumangen cha dizu dia wingendj, tufanyidin kand kulam urund wetu ni Yehova.—Mateu 4:4.

ALAMA URUND WAU NI YEHOVA

7. Mutapu ik wapakishau in Babilon kumushindin Daniel chakwel itiyija yishankur yau ni relijon wau?

7 Chisu chadingay Daniel ni arund nend mu Babilon, in Babilon ayishindila anch itiyija yishankur ni relijon wau. Mutapu ik? Ayifundisha kulond ‘dizu dia in Kalidey’ ni ayipila majin ma in Babilon. (Daniel 1:3-7) Dijin disu dia mupilau Daniel diading dijin dia nzamb wijikena nakash mu Babilon utazukinau anch Bel. Chinech chamekana anch Mwant Nebukadinezar wakata chakwel Daniel itiyija anch nzamb wa mu Babilon ukwet usu kusutamu Nzamb wa Daniel, Yehova .—Daniel 4:8.

8. Mutapu ik walamay ni wakasikeshay Daniel urund wend ni Yehova?

8 Padingay mu Babilon, Daniel amwinkishang ya kudia yiwamp yadingay kudia mwant. Pakwez “watonga mu muchim wend” anch kakutwishap kubwambwil ku yijil ya Nzamb. (Daniel 1:8, NWT.) Mulong wadandamena kwilej “mikand yitumbila,” yading mu Hebereu, walama ni wakasikesha urund wend ni Yehova ap anch wading mwi ngand ya wingendj. (Daniel 9:2) Kusut kwa mivu piswimp 70 kupwa kwa kushik mu Babilon, ading amwij ching dijin diend dikur dia mu Hebereu, Daniel.—Daniel 5:13.

9. Nfund a Kuseng 119 wading ni chitongijok ik mulong wa Dizu dia Nzamb?

9 Nfund a Kuseng 119 wajijamana pamulondau nayimp kudi antu ading mu chipang cha want. Pakwez Dizu dia Nzamb diamukasikesha, ni chinech chamukwasha ashalijana nau antu akwau. (Kuseng 119:23, 61) Witiya anch mazu ma Nzamb mamukwasha nakash.—Tang Kuseng 119:11, 46.

 DANDAMEN KUKASIKESH URUND WEY NI YEHOVA

10, 11. (a) Tufanyidin kwikal ni chitongijok ik chisu twilejina Dizu dia Nzamb? (b) Mutapu ik tukutwisha kuwanyish chitongijok chetu? Let chilakej.

10 Ap anch tukwatiken ni yisend mu chikumangen ni ku mudimu, etu awonsu tufanyidin kwitekin chisu mulong wa dilejan dia muntu panrend ni difukwil dia mu dijuku. (Efes 5:15, 16) Chitongijok chetu chidiap kusu cha kutang yom yivud ap kurijek yom tukwakula ku chikumangan. Pakwez chitongijok chetu chidi cha kulik Dizu dia Nzamb dikala ni usu padi etu ni dikasikesh ritiy retu.

11 Mulong wa kuwanish chitongijok chetu, tufanyidin kwikal ni chisik. Anch twilejin, tufanyidinap kutongin ching maswir ma antu akwau, pakwez tufanyidin kutongin kand pa maswir metu. (Filip 1:9, 10) Chisu twirijekina mulong wa mudimu wa kulejan, mulong wa yikumangan, ap mulong wa diskur, tufanyidin kwijik anch tufanyidinap kusadin yom tutangina mulong wetwetu ayinetu. Chilakej, ap anch muntu wisukina ukat kupim yakudia yisukinay kurutu kwa kuyitekin antu, yakudia yapimangay yiney yikutwishap yamwinkish ukash wa mujimbu uwamp. Anch ukatin kwikal ni ukash wa mujimbu uwamp, ufanyidin kwisuk chisu chin chawonsu yakudia mulong wa ukash wa mujimbu wend. Mu mutapu wawiy umwing, anch tukatin kukasikesh urund wetu ni Yehova, tufanyidin kwilej Bibil chisu chin chawonsu. Kwilej Bibil kukurikina mudi kwinoku kukuwanyish maswir metu.

12, 13. Mulong wak antu avud iyoviling anch chidi cha ukwash kwilej Bibil mu dizu diau dia chivadik?

12 Antu avud asadidina mu chikumangen cha dizu dia wingendj iyoviling anch chiding cha ukwash kwilej Bibil chisu chawonsu mu ‘dizu diau dia chivadik.’ (Midimu 2:8) Ni amishoner ijing anch mulong wa kushal akasikena mu jindond jisadidinau, kafanyidinap kuchingejin ching yom yiteshiningau ku yikumangan.

13 Alain, wileja dizu dia in Perse mu mivu  chinan, ulondin anch: “Pinikata kurijek yikumangan mu dizu dia in Perse, nikat kushinshikin pa dizu dined. Ap anch nikat kusal usu wa kulam yom yiney mu manang mam, pakwez pinitangining yom yiney ya mu spiritu, yinshikiningap ku muchim. Chawiy chisadina anch nitekin chisu mulong wa kwilej Bibil ni mikand yikwau chisu chawonsu mu dizu diam dia chivadik.”

PUKUN KU MICHIM YA ANEY

14. Anvaj afanyidin kushinshikin chom ik, ni mulong wak?

14 Avanj in Kristu afanyidin kwikal ni kashinsh anch uyakin ushikin mu manangu ni ku michim ya anau. Shinshikin chilakej cha Serge ni mukajend, Muriel, asadina mu chikumangen cha dizu dia wingendj mu mivu yisatu ni kusut. Asambisha kuman anch mwanau ikundj wa mivu 17, kadingap kusanger mudimu wa kulejan ni yikumangan. Muriel ulondin anch: “Kurutu akata kulejan mu dizu diend dia chivadik, Français, wading ni usweral wa kuya kulejan mu dizu dikwau.” Serge ulondin anch: “Chisu twijika anch yom yiney yamukangeshang mwanetu kuya kurutu mu spiritu, twakwata mupak wa kuchirik mu chikumangen chetu chikur.”

Ikal ni kashinsh anch uyakin ushikin ku michim ya aney (Tal paragraf wa 14, 15)

15. (a) Yom ik yikuyikwasha anvaj akwata mupak wa kuswimp chikumangen? (b) Yom ik yidia mu mukand wa Kuvurik Yijil 6:5-7 yifanyidinau anvaj kusal?

15 Yom ik yikutwisha kuyikwash anvaj anch akukwat mupak ap bwat wa ku chirik mu chikumangen chisadidina dizu diteshinau anau nawamp? Cha kusambish, afanyidin kwijik anch akwet chisu ni usu wa kuyifundish anau mulong amukata Yehova ni kuyifundish dizu dia wingendj mu chisu chawiy chimwing. Cha kaad, afanyidin kuman anch anau kakatinap kuya mu kulejan, kuya ku yikumangan ap kusadin mu teritwar mulondinau dizu dia wingendj. Mayingishin minam ma kusal anch anvaj akwat mupak wa kuchirik mu chikumangen chisadidina dizu diteshiningau anau nawamp. Kupwa, anch an akasikesh urund wau ni Yehova, anvaj akutwish chad kukwat mupak wa kuya mu chikumangen chisadidina dizu dia wingendj.—Tang Kuvurik Yijil 6:5-7.

16, 17. Yom ik yayikwasha anvaj amwing kuyifundish anau piur pa Yehova?

16 Anvaj amwing amen kal mitapu ya kuyifundish anau piur pa Yehova mu dizu diau dia chivadik ap anch akumangening mu chikumangen ap mu chisak chisadidina dizu dia wingendj. Charles udi tatuku wa an amband asatu akweta mivu pakach pa 9 ni 13. Akat kukumangan mu chisak cha Dingal. Ulondin anch: “Twakwatin mupak wa kutakel malejan ni difukwil dia mu dijuku nau an mu dizu dietu dia chivadik. Pakwez tusadining kand yikunku ni tusengening mu Dingal chakwel ileja dizu dined patusengena.”

Sal usu wa kwilej dizu dilondinau pa ndond yiudia ni kudisadin mu yikumangan (Tal paragraf wa 16, 17)

17 Kevin udi tatuku ukweta an aad, umwing wa mivu yitan ni mukwau ukwet mivu chinan. Wasala usu nakash mulong wa kuyifundish an uyakin mulong an inay kateshangap kamu nawamp yikumangan yasalangau mu dizu dia wingendj mu chikumangen chayangangau. Ulondin anch: “Am ni mukajam tusadining dilejan panretu ni anetu mu dizu dia Français dizu diau dia chivadik. Twitekidin kand chitongijok cha kuya kukumanganang mu chikumangen cha Français kapamp kamwing pa ngond, ni tutanidiningamu pituyiling mu konje mulong wa kukumangan ku yitentam yisadidininga dizu dietu dia chivadik.”

18. (a) Mutapu ik ukutwisha kukukwash mukand wa Rom 15:1, 2 kukwat mipak ya manangu mulong wa kuyikwash aney? (b) Yiyul ik yipaninanau anvaj amwing? (Tal mazu ma kwinsudien.)

18 Dijuku ni dijuku difanyidin kukwat mupak wa yom yidia yiwamp mulong wa anau ni urund wau ni Yehova. [2] (Tal mazu ma kwinsudien.) (Galatia 6:5) Muriel ulondin anch ap anch ndiy ni nfumwend ading akatin  kudandamen kusadin mu chikumangen cha dizu dia wingendj, akwata mupak wa kudiokalamu mulong wa kuyikwash anau chakwel akasikesha rukat rau mulong wa Yehova. (Tang Rom 15:1, 2.) Nlel, Serge, wij anch wakwata mupak uwamp. Ulondin anch : “kudiosh twachirikina mu chikumangen cha Français, mwan etu ikundj waya kurutu mu spiritu ni watambula dibatish. Katat udi chibol wa rawonsu. Utongin kand kuchirik mu chisak cha dizu dia wingendj!”

EL DIZU DIA NZAMB DIPUKUN KU MUCHIM WEY

19, 20. Mutapu ik tukutwisha kumekesh rukat retu mulong wa Dizu dia Nzamb?

19 Yehova ukatining antu awonsu. Wasala anch Bibil ikalaku mu yitot ya mazu, mulong ‘antu amitapu yawonsu’ akutwish kwijik uyakin. (1 Timote 2:4) Wij anch urund wetu ni ndiy ukukasikan anch twatang Bibil mu dizu tuteshina nawamp.

20 Etu awonsu tufanyidin kusal usu nakash wa kukasikesh urund wetu ni Yehova. Tukutwish kusal mwamu anch twilej Bibil mu dizu tuteshina nawamp. Tukutwish kand kukwash dijuku dietu kulam mwikadil wa mu spiritu, ni tukumekesh anch tukatin kamu Dizu dia Nzamb.—Kuseng 119:11.

^ [1] (paragraf wa 5) Majin mamwing amaswimpin kal.

^ [2] ( paragraf wa 18) mulong wa kutan mbil jikutwisha kukwash dijuku diey, tal mutu wa mulong ulondina anch: “Élever des enfants à l’étrangerdifficile mais enrichissant” mu Chinong cha Kalam cha 15 Ngond wa 10, 2002.