Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 10 , 2016

Ov, “Ulamin Manangu Makin”?

Ov, “Ulamin Manangu Makin”?

KUKWATIJAN ni ringany rimwing, nsand wading ushich mu ul wa uzwendj. Antu a mu misumb yijim atonganga anch nsand winou wading chisup ni amusipang. Pezangau angendj, antu amwing a mu ul wend amuswingishang ku mes kwa arund nend. Amutekinang utad waad wa argent udia ujim ni wa or wading ukemp pakwez wading ni usey nakash kusutamu tupamp twaad utad wa argent. Amuleja anch: “Tond utad ukatina.” Nsand winou watonda utad wa argent ni wachina mau.

Dichuku dimwing ngendj umwing wamwipula nsand winou anch: “Ov wijap kwey anch utad wa or ukwet usey tupamp twaad kusutamu wa argent?” Nsand wasipa ni walond anch “Mwaning nij.” Kupwa ngendj wamwipula kand anch: “Chad, mulong wak wasendina utad wa argent? Anch wasendin utad wa or umwing, wad ufanyidin kwikal ni nfalang jivud kapamp kaad!” Pakwez nsand wakula anch: “Anch nasendin utad wa or, antu afanyidin kulik kusengan ni yamam. Wij uvud wa utad wa argent nasendina kal?” rusangu ra nsand winou rimekeshin mwikadil ufanyidinau kwikal nich antu apamina kal mulong wa kutaninamu mu—manangu makin.

Bibil ulondin anch: “Mwanam ikundj, lam manangu makin ni [mutapu wa kutong]. Kangal yidiokal ku mes kwey. Chad ey ukaya mwi njil yey wakad kwakam, ni mwend wey kiukez kwipwakalap.” (Jinswir. 3:21, 23) Chawiy kwijik “manangu makin” ni kumasadin kukutukwash tulika kwakam. Makutukwash tulika kwipwakal mu spiritu, ni kulam ‘mend’ metu nawamp.

CHIRUMBURIKIN IK?

Padi kushalijal pakach pa manangu makin, ronganyin, ni kutesh kwa yom. Muntu ukweta ronganyin ukat kulam jinsang ap uyakin kanang. Muntu ukata kutesh yom ukutwish kwijik mutapu wa kuyilejamu antu akwau. Muntu ukweta manangu ukwet ronganyin ni ukat kutesh ni ukat kusadin kand yom yiney mu mwom wend.

Chilakej, muntu ukutwish kwikal ni chisu cha kutang ni cha kutesh yom yitanginay mu buku Chom Ik Chakin Kamu Chifundishinay Bibil? Chisu chilejinay dilejan diend dia Bibil, ukutwish kwakul nawamp. Ukutwish kusambish kukumangan ku yikumangan ni kupan yakul yiwamp. Yom yiney yikutwish kumekesh anch uyil kurutu mu spiritu, pakwez yom yiney yimekeshin anch muntu winou ukwet manangu? Bwat. Ukutwish kwikal muntu wilejina mau mau. Pakwez, anch wasambish kusadin uyakin, kusadin ronganyin ni kutesh yom mu mutapu uwamp, ukwikal ni manangu. Anch mipak yend yikwatiningay yidi ni yibudikin yiwamp, yimekeshin anch mutapu wend wa kutong udi uwamp, ukumekan patok anch usadidin manangu makin.

Mateu 7:24-27 ulejen chilakej chalonday Yesu cha antu aad atunga yikumbu. Muntu umwing amulejen mudi muntu ukweta “manangu.” Watonga kurutu piur pa yom yikushikena, chawiy chatungay chikumbu chend pa diyal. Watonga yom kurutu ni wayisadina. Katongap anch kutung chikumbu mu usukuril kukumwitap nfalang jivud ap kakuchitungap mu machuku mavud. Watonga ni manangu, yibudikin ya machuku ma kurutu piur pa yom yasalay. Pakwez patuta rikind, chikumbu chend chawap. Chipul chawiy ech, mutapu ik tukutwisha kwikal ni kulam manangu makin?

 MUTAPU IK NIKUTWISHA KUMIKAL NICH?

Chakusambish, ijik anch Mike 6:9 ulondin anch: ‘Antu akweta manangu makin, akwov dijin dia [Nzamb] wom.’ Kwov dijin dia Yehova wom chitin kumulimish. Chirumburikin kumwov wom mu mutapu uwamp mulong wa dijin diend ni mulong wa mbil jend. Mulong wa kumulimish muntu, ufanyidin kwijik mutapu utonginingay. Chawiy, ukumuchingejin, ni kumwilej, ni ukwimburij yom yikatinay. Anch twatongin pa yibudikin ya machuku ma kurutu mulong wa yisal yetu ni mutapu yikwikala pa urund wetu ni Yehova ni anch twakwat mipak yimedina pa mbil jend, yawiy yikusala anch twikala ni manangu makin.

Chakaad, Jinswir 18:1 ulondin anch: “Muntu ukata kwiyauril kudi akwau ukat kwisotil rusot rend amwinend, chad ukat kushesh [manangu makin].” Anch tubabelap, tukutwish kwiyauril ni Yehova ni antu end. Mulong wa kwipuk kwiyauril, tufanyidin kusutish chisu ni antu oviling dijin dia Nzamb wom ni alimishining mbil jend. Tufanyidin kuya ku Chot cha Want anch chitwishikin, chakwel twikala pamwing ni in Kristu a mu chikumangen. Ku yikumangan, tufanyidin kwikal ni yitongijok yiwamp chakwel tutesha yom yikutukwasha.

Kuwejinaku yom yiney, anch twamwazuril Yehova michim yetu mu malembil, tukumusejin piswimp. (Jinsw. 3:5, 6) Anch yitongijok yetu yidi yiwamp chisu tutangina Bibil ni mikand tutambwiling mu dirijek dia Yehova, tukwangul kulondwish ni yisal yetu. Tufanyidin kwitiy yiyul yitwinkishinau  kudi akadivar aswila kal mu spiritu. (Jinsw. 19:20) Pa ndond pa ‘kulik manangu mawonsu makin’, tufanyidin kukasikesh mwikadil winou wa usey.

MUTAPU IK UKUKWASHA MANANGU MINAM DIJUKU DIAM?

Manangu makin makutwish kukwash majuku. Chilakej, Bibil ulejen anch mband ikal ni ‘kalimish kakurikina’ mulong wa nfumwend. (Efes 5:33) Mutapu ik ukutwishay ikundj kutambul kalimish kakurikina? Anch wasal ya ku usu ap anch wit kalimish kinak mu mutapu uyimp, ukwikal ni yibudikin yiyimp. Mulong wa kwipuk mulong winou, mband ukweta ikundj winou ukutwish kumekesh kalimish kakemp anch ikundj udiap. Chawiy, ukutwish kumulimish anch udi kwamwamu? Yimeken anch yom yiney yikutwishap kusadik. Ikundj ufanyidin kushinshikin yom yikutwisha kulet yibudikin yiwamp mu machuku ma kurutu. Anch wamekesh dibuj dia mu spiritu, kwikal ni rukat ni muntu muwamp, ukutambul kalimish kend kakurikina. Chidi chakin, mband mwin Kristu ufanyidin kumumekeshin nfumwend kalimish ap anch uwanyidin kumwinkish kalish kinak ap bwat.—Gal. 5:22, 23.

Bibil ulondin kand anch ikundj ufanyidin kumukat mukajend. (Efes 5:28, 33) Mulong asala usu wa kulam rukat ra nfumwend, mband ukutwish kutong anch chidi chiwamp kumujindjikin nfumwend yom yiyimp yikwetay mbil ja kwijik. Kutong mwamu kumekeshin manangu makin? Anch wijik yom yiney, yikwikal nchik? Ov ukumukat mukajend nakash? Chikumukasiken nakash ikundj. Pakwez, anch mband wamurumburil nfumwend yom yiney pa chisu chiwanyidina mu mutapu uwamp, nfumwend ukusanger win kashinsh wend. Mwamu rukat rau rikuya kurutu.

Kuyipup aney nlel kukuyikwash mutapu ik mu machuku ma kurutu?

An afanyidin kuziyin kudi anvaj au ni anvaj afanyidin kuyipup mu mutapu ulejenay Yehova. (Efes 6:1, 4) Chinech chirumburikin anch anvaj afanyidin kumulej mwan yom yifanyidinay kusal ap bwat? Mwan ufanyidin kwijik yom yivud pa ndond pa kwijik ching yijil yamwinkishau kal ap kumupup mulong wa yisal yiyimp. Anvaj akweta manangu makin amukwashining mwanau ijik mulong wak ufanyidin kuziyin.

Chilakej, tong mbil anch mwan ukat kulond pakad kalimish kudi nvaj wend umwing. Kumuswejin ap kumupup mu mutapu uyimp kukutwish kwamunenganesh mwan ap kumuninetish ku usu. Ukwov ushon mu muchim wend ni yom yiney yikusal anch ikala kulemp nau anvajend.

Anvaj akudishina manangu makin akutong piur pa mutapu ukatau kuyipup anau ni yibudikin yikwikalau nich an mu machuku ma kurutu. Anvaj kafanyidinap kusal mau mau mulong akamin. Pamwing ap, akutwish kutong ni kulond ni mwanau mu mutapu uwamp wa rukat, kumurumburil anch Yehova ukatin anch ayilimish anvajend mulong ataninamu chikupu. Chad anch mwan wayilimish anvajend, ukwijik anch umulimishin Yehova. (Efes 6:2, 3) Mutapu winou uwamp wa kwambamb ni mwan ukupukun ku muchim wend. Ukwiyov anch anvajend amutongidin, ni kalimish mulong wa anvajend ka kuya kurutu. Chifanyidin chad mwan kwit ukwash anch wikal ni milong yikash kurutu oku.

Anvaj amwing akutwish kwiyov nayimp anch amunenganesh mwanau, chawiy akat kulik kumupup mwanau. Pakwez, yom ik yikutwisha kushiken anch mwan wapam? Ukumwov Yehova wom ni kwikal ni manangu ma kwitiy yijil ya Nzamb? Ov, ukutwish kwikal ni chitongijok chiwamp mulong wa Yehova, anch ukwiyauril amwinend ni milong ya mu spiritu?—Jinsw. 13:1; 29:21.

Mwin kuumb ap mwin kusong muwamp ukat kutong kurutu piur pa yom yikusalay. Kakusalangap chom pakad kutong ni wachingejin anch ukwikal ni chom chiwamp. Anvaj akweta manangu makin akat kusutish chisu mulong wa kwilej ni kusadin mbil ja Yehova, mulong wa kwov dijin diend wom. Mu kulik kwiyauril ayinau ni Yehova ni dirijek diend, akat kwikal ni manangu makin ni kumasadin mulong wa kukwash dijuku diau.

Dichuku diawonsu tukat kurish pa kukwat mipak yikutwisha kutukwash mu machuku ma kurutu mu mwom wetu. Pa ndond pa kukwat mipak ya mau mau, mulong wak ufanyidinap kuchingel ni kutong? Tong nawamp mulong wa yibudikin ya machuku ma kurutu. Kimb ukwash wa Yehova, ni sadin manangu madiokila kudi ndiy. Mwamu tukulam manangu makin, ni manangu minam ma kutukwash twikal ni mwom.—Jinsw. 3:21, 22.