Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 10 , 2016

Kasikesh Ritiy Rey Mulong wa Yom Uchingejina

Kasikesh Ritiy Rey Mulong wa Yom Uchingejina

“Ritiy rikat kutwijikish win yakin wa yom yituchingejina.”—HEBEREU 11:1.

MIMINY: 54, 55

1, 2. (a) Yom tuchingejina yishalijadin mutapu ik ni yom yichingejinau antu akwau? (b) Yom ik tukwisambina mu mutu wa mulong winou?

YEHOVA watwinkisha yom yiwamp yitukutwisha kuchingejin. Wakana mulong wa kutumbish dijin diend ni kusal anch rusot rend risadika mwiur ni pansh. (Mateu 6:9, 10) Yiney yidi yom ya usey tukumana kurutu oku. Yehova washilamu kand anch ukutwinkish mwom wa chikupu, ap anch tukuya mwiur ap anch tukushakam panap pansh. Musangar mudi ik ukwikalaku! (Yohan 10:16; 2 Pita 3:13) Ni tuchingedin kuman kurutu oku mutapu Yehova ukuyitakelay antu end ni kuyikwash mu machuku minam ma nsudien.

2 Bibil ulondin anch ritiy “rikat kutwijikish win yakin” wa yom yituchingejina. Chinech chirumburikin anch antu akweta ritiy akwet kashinsh anch yom yashilayamu Yehova yikwikal yakin. (Hebereu 11:1) Chikwau kand, nlel antu avud achingejin ni akatin kuman yom yiney, pakwez kakwetap kashinsh anch yom yiney yikwikal kamu yakin. Chilakej, muntu ukutwish kuchingej anch ukuwin masengan kampand, pakwez kakutwishap kamu kwikal ni kashinsh anch ukuwin. Mu mutu wa mulong winou tukuman yom tukutwisha kusal mulong wa kukasikesh ritiy retu mu yom yashilayamu Nzamb. Tukwisambin kand mutapu ukutwisha kutukwash ritiy rikash katat.

3. Mulong wak twitiyijina anch kushilamu kwa Nzamb kukwikal kwakin?

 3 Kwikil muntu ap umwing pakach petu wavadika ni ritiy. Mulong wa kwikal ni ritiy, tufanyidin kulik spiritu utumbila wa Nzamb atakel michim yetu. (Galatia 5:22) Spiritu utumbila ukutukwash kumwijik Yehova. Anch twijik anch udi mwin dikand diawonsu ni manang, tukwikal ni kashinsh anch ukwet usu wa kusal yom yawonsu yashilayamu. Yehova amwinend wisambina piur pa kushilamu kwend mudi kwawanyina kal palonday anch: “Yom yiney yawanyin kal!” (Tang Kujingunik 21:3-6.) Twij anch Yehova uwanyishining yisu yawonsu kushilamu kwend. Udi “Nzamb wa kashinsh.” Chawiy tukata kwitiyij yom yawonsu yitulejiningay mulong wa machuku ma kurutu.—Kuvurik Yijil 7:9.

ATUSHALAPOL A NZAMB A PASAK ADING NI RITIY RIKASH

4. Atushalapol a Nzamb a pasak ading ni ritiy mu yom ik?

4 Hebereu shapitre 11 ujimbwil majin 16 ma amakundj nau amband ading ni ritiy rikash mu kushilamu kwa Yehova. Ujimbwil kand majin ma antu avud amusangaresha Yehova ‘mulong wa ritiy rau.’ (Hebereu 11:39) Awonsu achingela “mbut” jashilayimu Yehova. Ading ij anch “mbut” jinej jikez kayishesh akankuny awonsu a Nzamb, ni kukarumun divu dikala paradis. (Disambishil 3:15) Atushalapol inay ading ni ritiy rikash anch Yehova ukez kayivumbul. Chakin kamu, kachingejinap kuvumbuk mulong wa kuya mwiur, mulong Yesu wading kandikal atenchika mulong winou. (Galatia 3:16) Pakwez ading ni ruchingej ra kushakam chikupu panap pansh mu paradis.—Kuseng 37:11; Isay 26:19; Ozey 13:14.

5, 6. Yom ik yading yichingedinay Aburaham ni dijuku diend? Mutapu ik walamau ritiy rau rikash? (Tal chipich cha kwinsambishin.)

5 Hebereu 11:13 ulondin piur pa atushalapol a Yehova inay ashinshamena anch: “Antu inay awonsu afila mu ritiy rau. Awiy katambulap yom yayishilaumu kudi Nzamb, pakwez ayimena kulemp, asangar kand.” Amana kurutu ngand yisu ni atonga anch adi mwinimwa. Umwing wa pakach pau wading Aburaham. Yesu walonda anch Aburaham “wasangara nakash mulong ndiy wijika “ chisu chinicha. (Yohan 8:56) Sara, Isak ni Jakob ni akwau achingela kand kuman chisu chikuyikela Want, ‘watenchikay Nzamb,’ pa divu diawonsu.—Hebereu 11:8-11.

6 Mutapu ik walamay Aburaham ni dijuku diend ritiy rikash? Adandamena kwilej piur pa Yehova. Pa chisu chinicha, Nzamb wambambang nau kusutin angel, mu yishimushimu ap mu yilat. Ilejina kand kusutin atushalapol ashinshamena a pakuru ap kusutin mifund yikur. Aburaham ni dijuku diend kavuramenap kushilamu kwa Yehova ni akatang kutongijokin pa yom yiney. Mudi chibudikin, kidjidjekap anch Yehova ukuwanyish kushilamu kwend. Chawiy ashala ashinshamena kudiay ndiy ap anch amana mar ni kuyizengol.

7. Yom ik yitwinkishinay Yehova mulong wa kukasikesh ritiy retu?

7 Yom ik yikutwisha kutukwash chakwel tulama ritiy rikash? Yehova watwinkisha Bibil mulong wa kutufundish piur pa kushilamu kwend kwa machuku ma kurutu. Kusutin mu Bibil Yehova utulejin yom tufanyindina kusal chakwel twikala ni musangar. Chawiy chidia chiwamp kudi etu kutang Bibil dichuku diawonsu ni kulondul wintakel wend. (Kuseng 1:1-3; tang Midimu 17:11.) Yehova utwinkishin kand “yakudia pa chisu chiwanyidina” kusutin “kashalapol ushinshamena ni kubabal.” (Mateu 24:45) Mudi mwadingau antu a Nzamb a pakur, ni yetu tukwet kuswir kwa kutang chisu chawonsu yom yashilayamu Nzamb ni kutongin pa yom yiney nakash. Chinech chikutukwash kushal ashinshamena kudi Nzamb ni kudandamen  kuchingel chisu chikuyikela Want pa divu diawonsu.

8. Mutapu ik ukutwisha malembil kukasikesh ritiy retu?

8 Yom ik yikwau yayikwasha antu a Nzamb a pakur mulong wa kulam ritiy rau rikash? Amulembilang Yehova mulong wa ukwash ni chisu chamanangau anch Yehova wakulang ku malembil mau, ritiy rau rikalang rikash. (Nehemiy 1:4, 11; Kuseng 34:4, 15, 17; Daniel 9:19-21) Chilik chimwng, anch twaman anch Yehova uteshin malembil metu, ni ukat kutwinkish yom tukweta ni kuswir mu chisu chiwanyidina ritiy retu rikat kwikal rikash. (Tang 1 Yohan 5:14, 15.) Tukwet kand kuswir kwa ‘kudandamen kumwit’ Yehova atwinkisha spiritu wend utumbila chakwel tutwish kwikal ni ritiy rikash.—Luka 11:9, 13.

9. Tufanyidin kulembil piur pa yom ik?

9 Chisu tumulembila Yehova, tufanyidinap kumwit ching yom tukweta nich kuswir. Tufanyidin kand kumujikitish ni kumutumbish dichuku diawonsu. Kupwa kwa yiney, Yehova wasala kand yom yivud yishimokishena! (Kuseng 40:5) Antu a Yehova alembiling kand mulong wa akadivar nau a pa mangand mawonsu. Chilakej, tufanyidin kwijik “antu atekilau mu rukan.” Tulembiling kand mulong wa “in kutakel.” Anch twaman anch Yehova wakwil ku malembil metu, ritiy retu mudiay ndiy rikukasikan ni tukumusejin piswimp.—Hebereu 13:3, 7.

ASHALA ASHINSHAMENA

10. Yom ik yayikwasha antu avud chakwel atakamana ni kushal ashinshamena kudi Nzamb?

10 Mu Hebereu shapitre wa 11, kambuy Paul walonda anch: ‘Ku ritiy amband ayaka anamakwau avumbuka ku rufu, ikala kand aom. Amakundj akwau ayimesha mar ma rufu, pakwez kitiyap kudiokalamu, itiyina kufa chakwel akuvumbuk kwikal aom.’ (Hebereu 11:35) Avud ajijamana mu yoziu ni ashala ashinshamena kudi Nzamb mulong ading akwet ritiy rikash mu divumbuk diashilayamu Nzamb. Ading ij anch mu machuku ma kurutu, Yehova ukuyivumbul ni akwikal kand aom chakwel ashakam chikupu pa divu. Tong piur pa Nabot ni Zakariy. Ayasa mayal chakwel afa mulong amuziyina Nzamb. (1 Ant 21:3, 15; 2 Jinsangu 24:20, 21) Daniel amudjibwila mu dibuku mwadinga antambu aswejina, ni arunend ayidjibwila mu fur wa mizwizwu ya kasu. Akata anch afa pa ndond pa kumubwambwil Yehova. Amakundj inay ading kamu ni ritiy rikash chawiy Yehova wayinkisha spiritu wend utumbila ni wayikwasha kujijaman mu mar mau.—Daniel 3:16-18, 20, 28; 6:13, 16, 21-23; Hebereu 11:33, 34.

11. Yakamish ik yimwing yajijamenau aprofet amwing mulong wa ritiy rau?

11 Aprofet avud, mudi Mike ni Jeremiy, ayisipa ni ayiteka mu rukan. Aprofet akwau, mudi Elija, “Atambitambanga mwi mpay, ni pa mikandu, ashakamanga mu mandam ni mu mabuku pansh.” Awonsu ajijamena yoziu ni ashala ashinshamena kudi Nzamb mulong ading ‘ij win yakin wa yom yituchingejina.’—Hebereu 11:1, 36-38; 1 Ant 18:13; 22:24-27; Jeremiy 20:1, 2; 28:10, 11; 32:2.

12. Nany udia chilakej chiwamp tufanyidina kwimburij? Yom ik yamukwasha chakwel ajijamana mu yoziu?

12 Yesu Kristu wajijamana ku yoziu yawonsu yikash ni washala ushinshamena kudi Yehova. Yom ik yamukwasha chakwel ajijamana? Paul walonda anch: “Ndiy wadandamena kamu ap anch amujipinap nchik pa mutond [wa mar], kwovap usany wa rufu ra mutapu winou, mulong wading uchingejin musangar ukumanay kurutu. Chad katat ushich ku chikas cha katatuku cha ditand dia Nzamb.” (Hebereu 12:2) Paul wayikasikesha in Kristu mulong wa ‘kutongijokin’ pa chilakej cha Yesu. (Tang Hebereu 12:3.) Mudi Yesu, in Kristu avud a mu mivu  chitot ya kusambish afa mulong ading ashinshamen kud Yehova. Umwing wa pakach pau wading Antipas. (Kujingunik 2:13) In Kristu inay atambula kal difut diau, mudi kand atushalapol akwau a Nzamb ading atakelaku kal kurutu kwau ading akweta ruchingej ra kwikal ni mwom panap pa divu. (Hebereu 11:35) Yisu yimwing kupwa kwa Yesu kwikal Mwant mu muvu wa 1914, in Kristu azizidinau many ading afa kal ayivumbula mulong wa kwikal ni mwom wakad kufa mwiur, ni kuyikel nend pamwing mulong wa kuyitakel antu.—Kujingunik 20:4.

ATUSHALAPOL A NZAMB NLEL AKWETA RITIY RIKASH

13, 14. Yoziu ik yajijamenay Rudolf Graichen, ni yom ik yamukwasha kushal ushinshamena kudi Nzamb?

13 Ma miliyon ma atushalapol a Nzamb akat kulondul chilakej cha Yesu. Akat kutongijokin pa kushilamu kwa Nzamb ni ashadining kamu ashinshamena mu yisu ya yoziu. Tushinshikinany piur pa Rudolf Graichen, wavadikina mwi ngand ya Allemagne mu muvu wa 1925. Chisu chadingay nsand, anvajend atekang yipich yilondina jinsangu ja Bibil mu chikumbu chau. Walonda anch: “Chipich chimwing chamekesha  kangol ni mukoku, mwan a mpemb ni chisump, mwan a ngomb ni ntambu—awonsu akwikal mu chisambu, mwan mukemp ukuyitakel.” (Isay 11:6-9) Yom yiney ya mukwasha Rudolf kutongin nakash piur pa paradis panap pansh ni yakasikesha ritiy rend. Mudi chibudikin, washala kamu ushinshimena kudi Yehova ap anch amuzengola nakash kudiau a Nazie Gestapo ni kudi régime Communiste Stasi wa ku Allemagne wa kwingangel.

14 Rudolf wajijamana ku yoziu yikwau yivud. Makwend wafa ni mayej ma typhus mu Ravensbrück mu kamp wa concentration. Tatukwend wasinya mukand ni walonda anch kakwikalap kand Kaman wa Yehova. Pakwez Rudolf walama ritiy rend rikash. Kupwa, pabudikay mu rukan, wasala mudi kalam wa munyingumuku. Kupwa amutazuka kwilej Shikol ya Gilead ni amutuma mwi ngand ya Chili, mwinimwa wasala kand mudi kalam wa munyingumuku. Kupwa wamwata nambaz umwing mishoner, Patsy. Cha ushon, kusut kwa muvu, mwanau mband wafa. Kupwa kwa machuku, Patsy niyend wafa. Wading kwend ni mivu 43. Yikalap nchik yoziu yiney yawonsu, Rudolf wadandamena kumusadin Yehova. Ap pananapay ni kadingap ni ukash wa mujimbu uwamp, wasalang mudi chibol wa rawonsu ni mudi mukurump wa chikumangen. Tukutwish kutang rusang rend ra mwom mu nimero wa Chinong cha Kalam cha 1 ngond wa 8, 1997, paj wa 20-25 mu Français. [1] (Tal mazu ma kwinsudien.)

15. Let yilakej yimwing ya akadivar nau anambaz amwing amusadidina Yehova ni musangar ap anch ayizengodin.

15 Nlel, akadivar ni anambaz etu avud amusadidin Yehova ni musangar ap anch ayizengodin nakash. Akadivar yitot pakach pau adi murukan mu Erythrée, mu Singapour, ni Corée du Sud mulong alikin “kurish nich mpak ya musamun.” (Mateu 26:52) Chilakej, Isaac, Negede, ni Paulos asadin kal mivu 20 ni kusut mu rukan ra Erythrée! Mwinimwa ayimeshin mar nakash. Ni mu mivu yiney yawonsu, kakwetap mutapu wa kwatan ni mutapu wa kuyilam anvajau. Pakwez adi ashinshamena kudi Yehova, ni ritiy rau ridi rikash. Ni antu ayilamining mu rukan ayilimishin. Yipich yau yidi pa kapend ka jw.org. akwet musangar ap anch amen mar.

Mutapu ik ulaminau akadivar a mu chikumangen chey ritiy rikash? (Tal paragraf wa 15, 16)

16. Ritiy rikash rikutukwash kusal ik?

16 Antu a Yehova avud kakatap kuyitek mu rukan ap kuyimesh mar nakash mudi akadivar twajimbula kal ay. Pakwez avud amen mar mulong adi atuzwendj, mulong wa mar ma chitangil, ap mulong wa njit ja an a ngand. Akwau akat kulondul chilakej cha Aburaham, Isak, Jakob, ni Moses ni alikin kal ntumb ap ashil kal mapit mau mulong wa kumusadin Yehova. Yom ik yiyikwashina akadivar chakwel ikala ni musangar wa kumusadin Yehova? Rukat rau mulong wa Yehova ni ritiy rau rikash mu kushilamu kwend. Ij anch ukuyinkish atushalapol end ashinshamena mwom wa chikupu mwi ngand yisu, mukwikala kutentam.—Tang Kuseng 37:5, 7, 9, 29.

17. Mutapu ik ukutwisha kulam ritiy rikash, ni yom ik tukwambambina mu mutu wa mulong ulondwilaku ou?

17 Mu mutu wa mulong winou, twaman kal mutapu ukata ritiy “kutwijikish win yakin wa yom yituchingejina.” Mulong wakwikal ni ritiy mudi riner, tufanyidin kumulembil Yehova ni kudandamen kutongijokin pa yom yashilayamu. Mwamu tukutwish kujijamen choziu chin chawonsu. Mutu wa mulong ulondwilaku ou, tukwisambin yom yivud yirumburikina kwikal ni ritiy.

^ [1] (paragraf wa 14) Tal kand rusang ra mwom ra Andrej Hanák wa mwin ngand ya Slovaquie mu mutu wa mulong ulondina anch: “Les épreuves n’ont pas terni mon espérance” mu Réveillez-vous! wa 22 ngond wa 4 , 2002.