Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 1 , 2016

 MUTU WA MULONG WA PA CHIBUR | MULONG WAK Kwikal MWIN KASHINSH?

Mutapu Ukweta Kuburen Win Kashinsh Usu Padi Ey

Mutapu Ukweta Kuburen Win Kashinsh Usu Padi Ey

“Yisu yivud kuding milong yikash yikutwisha kupwa ching ni kuburen win kashinsh ap kukemp.”—Samantha, Afrique du Sud.

Ov, witiyin chitongijok chinech? Mudi Samantha, antu avud pakach petu arisha nich milong yikash yisu yimwing. Yom tukutwisha kusal mu milong yitubachikina kwikal akad win kashinsh yikutwish kumekesh wuntu wetu wakin. Chilakej, anch tukimbin ching kwichidij ku uyimp wetu, tukutwish kuman anch kuburen win kashinsh kudi kwa usey yisu yimwing. Chisu chikatau antu akwau kujingunin uyakin, kuburen win kashinsh kukat kuletang yisu yivud yibudikin yiyimp. Shinshikin yom yilondwilaku ey.

KUBUREN WIN KASHINSH KUKAT KUSHESH RUCHINGEJ

Urund ukat kukasikan anch kudi ruchingej. Anch antu aad akat kuchingejijadin, akat kwiyov mu diking. Pakwez ruchingej rikutwishap kukul dichuku dimwing. Antu akat kukasikesh ruchingej anch akat kusutish chisu pamwing, kwambamb ni win kashinsh ni kusal yom pakad choy. Ruchingej rikutwish kusheshik nich chisal chimwing cha kuburen win kashinsh. Ni anch ruchingej rasheshik, chikutwish kukasikan nakash kurichirish rikalaku kand.

Kandikal akudimbangap kudi muntu uwading kuman anch udi murund muwamp? Anch chidi mwamu, wiyova mutapu ik? Chakin, wova nayimp, akurumbukina kamu. Chom chinech choviken. Mu uyakin, kuburen win kashinsh kukutwish kushesh urund uwamp.

KUBUREN WIN KASHINSH KUKAT KUKULANG

Dilejan diasalay Robert Innes, mulej wa ekonomi ku Universite wa Californie, wamana anch “kuburen win kashinsh kukat kusamburikang.” Mwamu, kuburen win kashinsh kudi mudi musong ukata kusamburikang kudi antu akwau—anch ushich nakash ni muntu ukweting makasu, kudi ubaj ujim nakash kudi ey wa kwikal muntu uburedina win kashinsh.

Mutapu ik ukutwisha kwipuk kuwa mu mupit wa kuburen win kashinsh? Bibil ukutwish kutukwash. El amboku tushinshikin yany yimwing ya Bibil.