Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 1 , 2016

Sal Usu Chakwel ‘Rukat Rey ra Ukadivar Ridandamena’!

Sal Usu Chakwel ‘Rukat Rey ra Ukadivar Ridandamena’!

“Rukat ra ukadivar ridandamena.”—HEBEREU 13:1, NWT.

MIMINY: 3, 20

1, 2. Mulong wak Paul wayifundina in Kristu mukand wa Hebereu?

MU MUVU wa 61, yikumangen ya mu Isarel mwawonsu yading mu chisambu. Ap anch kambuy Paul wading mu rukan ku Rom, wading ukwet ruchingej anch ukubudik. Timote mbay nend wa mudimu wendangay nend amubudisha mu rukan, ni awonsu ading akwet ruchingej ra kuya kuyital akadivar a ku Yudeya. (Hebereu 13:23) Mu mivu yitan kwau, in Kristu a mu Yudea, nakash kamu ading ashicha mu Yerusalem, afanyina kubudik swaa. Mulong wak? Yesu watakela kuyilej in kwilejend anch, ang aman musumb wa Yerusalem aunyingumuk kudi amasalay, afanyidin kuchin.—Luka 21:20-24.

2 Kwasuta mivu 28 kudiosh papanay Yesu dibabesh dined kudi in kwilejend. Pa chisu chinicha, in Kristu a mu Isarel afanyina kushal ashinshamena chikalap nchik kuzengol ap yikokujol yivud. (Hebereu 10:32-34) Pakwez, Paul wasota kuyirijek akadivar mulong wa yom yafanyina kushiken machuku ma kurutu. Afanyina kwikal mu yoziu yikash mulong wa ritiy rau. (Mateu 24:20, 21; Hebereu 12:4) Ading akwet kuswir kwa kujijaman ni ritiy rikash kusut yadingau nich pakuru mulong wa kuziyil ku mazu ma Yesu ma kuchin, ni afanyina kusal mwamu mulong wa kupand. (Tang Hebereu 10:36-39.) Chawiy chamupepilau Paul kudi Yehova mulong wa kuyifundin akadivar ni anambaz akatish. Mukand  winou, utazukinau katat anch mukand wa Hebereu, aufunda mulong wa kuyikasikesh piur pa yom yafanyina kushiken.

3. Mulong wak tufanyidin kushinshikin mukand wa Hebereu?

3 Mudi antu a Nzamb nlel, tufanyidin kushinshikin mukand wa Hebereu. Mulong wak? Mulong mashakamin metu mafaniken ni ma in Kristu a ku Yudeya. Tudi mu machuku “ma mar nakash,” ni antu avud ajijamedin kal nich kushinshaman amen yikokujol yikash ni kuzengol. (2 Timote 3:1, 12) Pakwez antu amwing pakach petu adi mu chisambu ni kayizengodilap. Chawiy, mudi in Kristu a chisu cha Paul, tufanyidin kubabal. Mulong wak? Mulong piswimp ap, tukwikal ni choziu chikash mulong wa ritiy retu!—Tang Luka 21:34-36.

4. Wisu mufund wa muvu wa 2016, ni mulong wak uwanyididin?

4 Chom ik chikutukwasha kwirijek mulong wa yom ya kurutu? Mu mukand wa Hebereu, Paul wajimbula yom yivud yikutukwasha mulong wa kukasikesh ritiy retu. Chivurish chimwing cha usey chidi mu Hebereu 13:1, NWT. Chitukasikeshin anch: “Rukat ra ukadivar ridandamena chikupu.” Verse winou ndiy watondinau mulong wa kwikal mufund wa muvu wa 2016.

Mufund wa muvu wa 2016: “Rukat ra ukadivar ridandamena chikupu.” Hebereu 13:1

RUKAT RA UKADIVAR CHOM IK?

5. Rukat ra ukadivar chom ik?

5 Rukat ra ukadivar chom ik? Rukat ra ukadivar yidi yovil yikash ni yikurukina yidia pakach pa antu a mu dijuku dimwing ap arund a piswimp nakash. (Yohan 11:36) Tudiap akadivar ap anambaz a rubabek. Pakwez, tudi kamu akadivar ni anambaz. (Mateu 23:8) Paul walonda anch: “Katijanany amwing ni akwau mudi mufanyidinau akadivar kukatijan. Chifanyidin kukasikesh kulimishijan amwing ni akwau.” (Rom 12:10) Mazu minam mamekeshin usu ukweta rukat tukweta mulong wa akadivar netu. Rukat riner ra ukadivar, rimedin pa yany ya win Kristu, riyikwashin antu a Nzamb kwikal arund a piswimp umwing ni mukwau ni kwikal mu uumwing.

6. Mutapu ik uteshinau in Kristu akin kurumburik kwa rukat ra ukadivar?

6 Mazu “rukat ra ukadivar” tumatanin nakash mu mifund ya win kristu. Kudiau in Yuda a pasak, dizu “mukadivar” adisadilang mulong wa kumekesh muntu wa mu dijuku ap yisu yimwing muntu mwawonsu wakad kwikal mu dijuku. Pakwez, kadisadilangap kudi muntu wakad kwikal mwin Yuda. Chad, mulong tudi in Kristu akin, “mukadivar” ap nambaz netu udi mwin Kristu mwawonsu wakin, chikalap nchik ngand yidiokilay. (Rom 10:12) Yehova watufundisha chakwel tukatijana umwing ni mukwau mudi akadivar. (1 Tesalonik 4:9) Pakwez, mulong wak chidi cha usey kudandamen kumekesh rukat ra ukadivar?

MULONG WAK CHIDI CHA USEY KUDANDAMEN KUMEKESH RUKAT RA UKADIVAR?

7. (a) Diyingishin ik dijim ditubachikina kumekesh rukat ra ukadivar? (b) Let diyingishin dikwau dijim dimekeshina mulong wak chidi cha usey kukasikesh rukat retu umwing ni mukwau.

7 Diyingishin dijim dia kumekesh rukat ra ukadivar didi anch Yehova utulejin kusal mwamu. Tukutwishap kumukat Yehova anch tulikin kuyikat akadivar netu. (1 Yohan 4:7, 20, 21) Diyingishin dikwau didi anch tukwet kuswir kwa umwing ni mukwau, nakash kamu mu yisu ya mar nakash. Chisu chayifundinau in Kristu in Hebereu mukand kudi Paul, wading wij anch piswimp ap in Kristu amwing afanyina kusha yikumbu yau ni yom yau. Yesu warumburil mutapu ukwikala chisu chinicha chikash. (Marko 13:14-18; Luka 21:21-23) Chawiy, kurutu kwa chisu chinicha kushik, in Kristu inay afanyina kukasikesh rukat rau umwing ni mukwau.—Rom 12:9.

8. Chom ik tufanyidina kusal katat kurutu kwa mar makash kusambish?

8 Mar makash ma mu rusangu ra antu mezin  piswimp ap. (Marko 13:19; Kujingunik 7:1-3) Tufanyidin kuziyil ku chiyul ech: “En, antwam, andamany mu yikumbu yen [tupalikany twa mukach], wipatilanyamu. Jingamanyaku bil pakemp, ching ujim wasut.” (Isay 26:20) “Yikumbu ya mukach” yiney yikutwish kumekesh yikumangen yetu. Kwawiy kwinikwa tukata kumwifukwil Yehova pamwing ni akadivar nau anambaz. Pakwez, tufanyidin kusal yivud kulik ching kukumangan chisu chawonsu. Paul wayivurisha in Kristu in Hebereu anch afanyidin kukasikeshijan umwing ni mukwau mu kumekesh rukat ni kuyisadil antu akwau yom yiwamp. (Hebereu 10:24, 25) Tukwet kuswir kwa kukasikesh rukat ra ukadivar katat mulong rikutukwash kujijamen yikokujol yawonsu tukutwisha kwikal nich machuku ma kurutu.

9. (a) Mitapu ik tukweta ya kumekesh rukat retu ra ukadivar nlel? (b) Let yilakej yimekeshina mutapu umekeshinau antu a Yehova rukat ra ukadivar.

9 Ap nlel unou, tukwet mitapu yivud ya kumekesh rukat ra ukadivar kurutu kwa mar makash kusambish. Akadivar netu avud amen mar mulong wa kuzal kwa divu, mabeb makash, rinkind mukash, tsunami, ap mar makwau ma chitangil. Akadivar amwing akat kujijamen kuzengol. (Mateu 24:6-9) Ni kudi mar ma kuman nfalang mulong tushich mu mangand minam mayimp. (Kujingunik 6:5, 6) Pakwez, ap anch akadivar netu akwet mar nakash, tukwet mitapu yivud ya kumekesh anch tuyikatin. Ap anch mangand minam mamekeshinap rukat, tufanyidin kudandamen kumekesh rukat ra ukadivar. (Mateu 24:12) [1]—Tal mazu ma kwinsudiel.

MUTAPU TUKUTWISHA KUSAL ANCH RUKAT RETU RA UKADIVAR RIDANDAMENA

10. Yom ik tukushinshikina katat?

10 Chikalap nchik milong tukweta, mutapu ik tukutwisha kwikal nich kashinsh anch tudandamedin kumekesh rukat ra ukadivar? Mutapu ik tukutwisha kumekesh rukat ra mutapu winou kudi akadivar netu? Kupwa kwa kulond anch “Rukat ra ukadivar ridandamena,” kambuy Paul wajimbula mitapu yivud yikutwishau in Kristu kusal mwamu. El amboku tushinshikinany mitapu musamban pakach pa yiney.

11, 12. Chom ik chirumburikina kumekesh mwikadil wa kuyak antu akwau? (Tal chipich cha kwinsambishil.)

11 “Vurikany kuyak aeny [ap angendj].” (Tang Hebereu 13:2.) Mazu “kuyak angendj” marumburikin ik? Mazu masadilay Paul marumburikin “kumekesh ranaken kudi angendj.” Pamwing ap mazu minam matuvurishin Aburaham ni Lot. Amakundj inay aad amekesha ranaken kudi angendj akadiau kwijik. Kupwa, Aburaham ni Lot ijika anch angendj inay ading angel. (Disambishil 18:2-5; 19:1-3) Yilakej yiney yayikasikesha in Kristu in Hebereu chakwel amekesha rukat ra ukadivar pa kwikal ni chaku cha kuyak angendj.

12 Mutapu ik tukutwisha kumekesh mwikadil wa kuyak antu akwau? Tukutwish kuyitazuk akadivar ni anambaz ku chikumbu chetu mulong wa kudia nau ap kukasikeshijan. Ap anch tukutwishap kumwijik nawamp kalam wa munyingumuku ni mukajend, tukutwish kuyitazuk ku chikumbu chetu chisu chezinau kwendin chikumangen chetu. (3 Yohan 5-8) Tufanyidinap ching kwisuk yakudia yivud ap kushesh nfalang jivud. Rutong retu ridi ra kuyikasikesh akadivar netu, ridiap ra kwibaz mulong wa yom tukweta. Ni tufanyidinap ching kuyitazuk antu akutwisha kutusadil niyetu mutapu umwing. (Luka 10:42; 14:12-14) Chom chidia cha usey chidi anch, tufanyidinap kwikal akwatikena nakash ni kuvuramen kumekesh mwikadil wa kuyak antu akwau!

13, 14. Mutapu ik tukutwisha ‘kuyivurik antu adia mu rukan’?

13 “Yivurikany antu atekilau mu  rukan.” (Tang Hebereu 13:3.) Chisu chafunday Paul mazu minam, wading ulondin piur pa akadivar ading mu rukan mulong wa ritiy rau. Paul wajikitisha yikumangen mulong amekesha ‘ranaken kudi antu ading mu rukan.’ (Hebereu 10:34) Akadivar amwing amukwasha Paul mu mivu yinying padingay mu rukan, pakwez akwau ading ashich kulemp. Mutapu ik wafanyinau kumukwash Paul? Afanyina kudandamen kulembil nakash mulong wendendiy.—Filip 1:12-14; Hebereu 13:18, 19.

14 Nlel unou, Atuman avud adi mu rukan mulong wa ritiy rau. Akadivar ni anambaz ashicha piswimp akutwish kuyikwash ni yom yimwing. Pakwez avud pakach petu ashich kulemp ni jinkan jinej. Mutapu ik tukutwish kuyikwash ni kulik kuyivuramen? Rukat ra ukadivar rikutubachik kulembil nakash mulong wau. Chilakej, tukutwish kulembil mulong wa akadivar, anambaz, ni anikanch adia mu rukan mu Érythrée, kuwejinaku ni mukadivar Paulos Eyassu, Isaac Mogos, ni Negede Teklemariam, adia mu rukan kwasutin kal mivu 20.

15. Mutapu ik tukutwisha kulimish uruw wetu?

15 “Chifanyidin uruu aulimish kudi antu awonsu.” (Tang Hebereu 13:4.) Tukutwish kand kumekesh rukat ra ukadivar pa kwikal nich mwikadil wishitwila. (1 Timote 5:1, 2) Chilakej, anch twasal masandj ni mukadivar ap ni nambaz, tukumurumbukin muntu winou ni dijuku diend. Ruchingej radingau nich akadivar piur petwetu rikupwa. (1 Tesalonik 4:3-8) Tong bil kand piur pa mutapu ukwiyovay mband anch wajingunin anch nfumwend ukat kutalang pornografi. Ov, ukwiyov anch nfumwend umukatin ni ulimishin ditenchik dia uruw?—Mateu 5:28.

16. Kusanger yom tukweta kukutukwash mutapu ik kumekesh rukat ra ukadivar?

16 “Sangarany nich yom yiukwetany.” (Tang Hebereu 13:5.) Ruchingej mudiay Yehova rikutukwash kwikal nich musangar mulong wa yom tukweta. Chinech chikutukwash mutapu ik kumekesh rukat ra ukadivar? Anch tukwet musangar, tukuvurik anch akadivar ni anambaz netu in Kristu akwet usey nakash kusutamu nfalang ap  yom yikwau. (1 Timote 6:6-8) Tukutwishap kuyinanin akadivar ni anambaz netu mulong wa mashakamin metu. Ni tufanyidinap kuyovil antu akwau mukau ap kwikal ni ris ra yom yikwetau. Chinyim ni chinech, anch tukwet musangar, tukwikal ni muchim wa kupan.—1 Timote 6:17-19.

17. Kwikal ni ‘kutakaman’ kukutukwash mutapu ik kumekesh rukat ra ukadivar?

17 ‘Kwikal nich kutakaman.’ (Tang Hebereu 13:6.) Ruchingej mudiay Yehova ritwinkishin kutakaman mulong wa kujijamen yikokujol yikash. Kutakaman kwinoku kutwinkishin kwikal ni chitongijok chiwamp. Ni anch tukwet chitongijok chiwamp, tukutwish kumekesh rukat ra ukadivar pa kuyikasikesh ni kuyongoj akadivar ni anambaz netu. (1 Tesalonik 5:14, 15) Ap pa chisu cha mar makash, tukutwish kwikal ni kutakaman, pa kwijik anch dipandish dietu didi piswimp.—Luka 21:25-28.

18. Mutapu ik tukutwisha kukasikesh rukat ra ukadivar mulong wa amakurump etu?

18 “Vurikany in kutakel en.” (Tang Hebereu 13:7, 17.) Amakurump a mu chikumangen chetu akat kusadil chisu chau mulong wa kusal mudimu ukash mulong wetwetu. Anch twatongin piur pa yawonsu yisadinau, rukat retu ni kujikitish kwetu mulong wawawiy kukukul. Tufanyidinap kusal anch ashadisha musangar wau ap ikala ni runeng mulong wa chom kampand tukusala. Pakwez, tufanyidin kuziyin kwa kwisotil. Mu mutapu winou tuyinkishin “kalimish nakash ni rukat mulong wa midimu yau.”—1 Tesalonik 5:13.

Ov, ukat kusanger mudimu usadilau amakurump mulong wetwetu? (Tal paragraf 18)

DANDAMENANY KUSAL MWAMU

19, 20. Mutapu ik tukutwisha kudandamen kumekesh rukat ra ukadivar mu mutapu ujim?

19 Antu a Yehova ijiken mulong wa rukat rau ra ukadivar. Chading kand mwamu pa chisu cha Paul. Pakwez Paul wayikasikesha akadivar kumekesh rukat mu mutapu ujim. Walonda anch: “Uwejanyaku kusal mwamu kakwau ni kakwau.” (1 Tesalonik 4:9, 10) Chimeken patok anch, kudi mitapu yikwau ya kuwapish nakash!

20 Chawiy, chisu tutadina mufund wa muvu mu Chot chetu cha Want muvu winou, el amboku tutongijokin pa yipul ey: Nikutwish kupandikesh mwikadil wa kuyak angendj? Mutapu ik nikutwisha kuyikwash akadivar adia mu rukan? Ov, nikat kulimish ditenchik dia Nzamb piur pa uruw? Chom ik chikwinkwasha kwikal ni musangar wakin? Mutapu ik nikutwisha kumuchingejin Yehova nakash? Mutapu ik nikutwisha kuziyil nakash kudi antu atakedila? Anch twasal usu wa kuwapish nakash mu milad yiney musamban, mufund wa muvu ukwikalap mudi chijingidij ku rubumbu; pakwez ukutuvurish chakwel tuziyina mazu ma Paul malondina anch: “Rukat ra ukadivar ridandamena chikupu.”—Hebereu 13:1, NWT.

^ [1] (paragraf 9) Mulong wa yilakej yimekeshina mutapu umekeshinau Atuman a Yehova rukat ra ukadivar mu yisu ya mar, tal Chinong cha Kalam cha 15 ngond wa 7, 2002, paj wa 8-9, mu français, ni buku Les Témoins de Jéhovah : Prédicateurs du Royaume de Dieu, shapitre wa 19.