Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 1 , 2016

 MUTU WA MULONG WA PA CHIBUR | MULONG WAK KWIKAL MWIN KASHINSH?

Win Kashinsh, ov, Ukwet Usey Nlel?

Win Kashinsh, ov, Ukwet Usey Nlel?

Hitoshi wasala mudimu mu biro utadina milong ya nfalang mu Japon. Padingay kusal rapor ni mukurump wend wa mudimu, amwita chakwel asala rapor wa makasu. Hitoshi warumburila anch kom kend kamubachikap kusal mudimu wakad kwikal wa win kashinsh. Mudi chibudikin, amuswejena nakash kudi mukurump wend nich ujim, ni kupwa washadisha mudimu wend.

Kupwa kwa angond, Hitoshi washadisha ruchingej rend piur pa midimu yikwau. Chilakej, pamwipulau mulong wa kwikal ni mudimu ukwau, Hitoshi walonda anch kafanyinap kusal mudimu uburedina win kashinsh. Mwin kumwipul wamwakula anch, “Mutapu wey wa kutong ushalijadin ni wa antu avud!” Dijuku dia Hitoshi ni arund nend amukasikesha chakwel adandamena mu mwikadil wend wa kwikal mwin kashinsh, chisu chasambishay kwidjidjek. Chilakej, Hitoshi walonda anch, “Niyipula anch kwikal mwin kashinsh piur pa ritiy ram chiding chitongijok chiwamp.”

Yom yamushikena Hitoshi yimekeshin mutapu umenau antu avud win kashinsh. Pakwez, antu avud amening anch kwikal mwin kashinsh kudi kushadish, nakash mu yom ya kwisak. Mband umwing usadina mudimu mu Afrique du Sud ulondin anch: “Antu avud anyingumukina adi akad win kashinsh, ni yisu yimwing yibachikin ya kwikal mudi awiy yipandiken.”

Mutapu umwing wa kuburen win kashinsh upandakena nlel unou madi makasu. Mivu ya kwinyim, dilejan diasalau kudi mwin kwilej piur pa yitongijok ya antu, Robert S. Feldman wa ku Universite wa Massachusetts, washinshikina anch antu amakurump 60 pa chitot akat kudimban kapamp kamwing mu mambamb ma aminit dikum. Feldman ulondin anch “wading rapor ushimokishina nakash, twadingap tuchingejina anch antu akat kudimban mwamu pichuku pichuku.” Chidi chakin anch antu avud kakatiningap kuyidimb, pakwez kudi antu avud nakash akata kudimban.

Mulong wak makasu, wij, ni mitapu yikwau ya kuburen win kashinsh yipandaken nlel unou? Mutapu ik usheshina kuburen win kashinsh mangand ma kabuj? Ni cha usey nakash, mutapu ik tukutwisha kwipuk kwiyandjik mu mikadil mudi yiney ya kuburen win kashinsh?